o faifeautalai tamaitai o loo talanoa atu i se alii talavou

21–27 Oketopa

1 ma le 2 Tesalonia

“Aua Nei Vave Luluina o Outou Loto, pe Faaatuatuvaleina”

A o e faitauina ma le agaga tatalo le 1 ma le 2 Tesalonia faatasi ma tamaiti i lou mafaufau, o le a e maua ia mataupu faavae latou te manaomia ona malamalama ai.

Tusifaamaumau Ou Lagona Uunai

aikona fefaasoaai

Valaaulia le Fefaasoaai

I le lesona o le vaiaso talu ai, pe na e valaauliaina ia tamaiti e faaaoga mea sa latou aoaoina i se mea? Tuu i tamaiti e faaaoga nai uluai minute o le vasega i lenei vaiaso e faasoa mai ai o latou aafiaga.

aikona aoao atu

Aoao atu Aoaoga Faavae

Tamaiti Laiti Ifo

1 Tesalonia 5:1–6

A o ou mulimuli i poloaiga, o le a ou saunia mo le Afio Mai Faalua o Iesu Keriso.

E mafai ona fesoasoani le fautuaga a Paulo tatou te saunia ai ma vaavaai atu mo lena aso tele pe a toe afio mai le Faaola i le lalolagi.

Gaoioiga e Mafai Ona Fai

• Valaaulia se tina e talanoa mai pe faapefea lona faatalitali atu mo lana pepe o le a fanau mai e aunoa ma le iloa tonu o le taimi o le a fanau mai ai. Faitau le 1 Tesalonia 5:2–3, ma ta’u atu i tamaiti o le a toe afio mai Iesu Keriso i le lalolagi, ae e leai se tasi e iloa tonu le taimi—e pei foi ona le iloa tonu e se tina pe o le a le taimi o le a fanau mai ai le pepe.

• Fai i tamaiti e talanoa e uiga i se taimi sa latou sauniuni ai mo se malaga po o se mea o le a fai. O a ni mea sa latou faia e sauniuni ai? Aumai se atopau po o se taga ma tuu i tamaiti e faafoliga faapea o la e teu i ai mea e sauniuni ai mo se malaga po o se mea o le a fai. Faamalamalama atu tatou te saunia mo le toe afio mai o Iesu Keriso e ala i le tatalo, faitauina o tusitusiga paia, mulimuli i le perofeta, ma ola amiotonu i aso taitasi. Fai i tamaiti e tusi ni ata pe mafai faapefea ona latou faia lenei mea ma tuu i totonu o a latou atopau.

• Faitau le 1 Tesalonia 5:6 i tamaiti ma faamalamalama atu iai afai tatou te le saunia mo le toe afio mai o Iesu, e pei o la ua tatou tulemomoe ma tatou le saunia ai mo Ia. Valaaulia tamaiti e faafoliga faapea o la ua tulemomoe. Faamalamalama afai tatou te saunia, e pei o la tatou te feala ma faatalitali mo Ia. Valaaulia i latou e ala mai. Usu faatasi le “Pe a Ia Toe afio Mai” (Tusipse a Tamaiti, 46–47).

2 Tesalonia 2:1–3

Sa aoao mai e Paulo e faapea o le a tulai mai se liliuese a o lei toe afio mai Iesu Keriso.

O le Ekalesia na faatuina e Iesu Keriso na iu ina pau atu i le liliuese, o lona uiga na aveesea mai le lalolagi le pule o le perisitua ma upumoni o le talalelei. Sa valoia e Paulo o lenei liliuese, po o le “pauu ese,” o le a tupu a o lumanai le Afio Mai Faalua ole Faaola.

Gaoioiga e Mafai Ona Fai

• A uma ona faitau faatasi ma tamaiti le 2 Tesalonia 2:3 fau se ‘olo mai ipuinu pepa po o ni poloka. Ta’u i tamaiti o ipuinu po o poloka e faatusa i vaega taua o le Ekalesia moni, e pei o upumoni ole talalelei, o le perisitua, faamauga i le malumalu, ma perofeta. Ina ua maliliu Paulo ma isi Aposetolo, sa leiloloa nei mea, ma sa le i i ai le Ekalesia moni i le lalolagi mo le tele o tausaga. Valaaulia se tamaitiiti e talepe i lalo le ‘olo, ma faamalamalama atu sa faaigoa lenei mea o le Liliuese po o le “pauu ese.” Ina ua toe faafoi mai e Iesu Keriso Lana Ekalesia, sa faaigoaina o le Toefuataiga. (Tagai “Liliuese,” Faamaoni i le Faatuatua, 5-6.)

• Faaali se Tusi a Mamona ma ni ata o le perofeta ma se malumalu. Valaaulia tamaiti e fai mai “Liliuese” pe a e nanaina mea i se taga ma le “Toefuataiga” pe a toe aumaia i fafo.

• Usu ni pese o loo aoao mai ai upumoni sa aveesea i le taimi o le Liliuese ma toefuatai mai i o tatou taimi, e pei o le “O Au o se Atalii o le Atua,” “O Le Ekalesia A Iesu Keriso,” ma le “Ou Te Fia Vaai i le Malumalu” ma le (Tusipese a Tamaiti, 2–3, 48, 99).

aikona aoao atu

Aoao atu Aoaoga Faavae

Tamaiti Matutua Atu

1 Tesalonia 5:1–6

A o ou mulimuli i poloaiga, o le a ou saunia mo le Afio Mai Faalua o Iesu Keriso.

E mafai ona fesoasoani le fautuaa a Paulo tatou te saunia ai ma vaavaai atumo lena aso tele pe a toe afio mai le Faaola i le lalolagi.

Gaoioiga e Mafai Ona Fai

• Valaaulia se tamaitiiti e faitau mai le 1 Tesalonia 5:1–6 a o mulimuli ai isi tamaiti. A maea fuaiupu taitasi, fai i se tamaitiiti e aotele mai pe o le a sona manatu i le mea o loo talanoa mai ai le fuaiupu. Atonu e te manao e faamalamalama atu faapea “o le aso o le Alii” o lona uiga o le Afio Mai Faalua o Iesu Keriso. Aisea e manatu ai tamaiti ua faatusatusa le Afio Mai Faalua i se gaoi i le po po o se fafine o le a fanau?

• Fai i tamaiti e vaai faalemafaufau faapea o le a asiasi mai le Faaola i le tou vasega i se taimi o le aso. E mafai faapefea ona tatou saunia lo tatou potuaoga mo Lana asiasiga? Fesoasoani i tamaiti e mafaufau i mea e mafai ona tatou faia e sauniuni ai i tatou lava mo le aso o le a toe foi mai ai Iesu Keriso. Mo se faataitaiga, e mafai ona tatou salamo, faamagalo atu, faaleleia a tatou sootaga ma o tatou aiga, mulimuli i le perofeta, ma tausi a tatou feagaiga. Fautuaina tamaiti e filifili se mea se tasi o le a latou faia e sauniuni ai i latou lava e talia le Faaola i Lona afio mai.

2 Tesalonia 2:1–3

Sa aoao mai e Paulo e faapea o le a tulai mai se liliuese a o lei toe afio mai Iesu Keriso.

Afai e malamalama ia tamaiti sa aveesea le Ekalesia a Iesu Keriso ma Lana talalelei mai le lalolagi i le taimi o le Liliuese Tele, o le a atili manino ai ia te i latou le tatau ona i ai o le Toefuataiga.

Gaoioiga e Mafai Ona Fai

• Valaaulia se tasi o tamaiti e faitau le 2 Tesalonia 2:1–3. E tusa ai ma nei fuaiupu, o le a le mea sa tatau ona tupu a o lei oo mai le “aso o Keriso,” lea e faauigaina o le Afio Mai Faalua? Pe iloa e nisi o tamaiti le uiga o le “pauu ese”? Ia mautinoa ua malamalama ia tamaiti o lona uiga o le Liiuese Tele, lea sa tupu ina ua mavae le maliliu o Aposetolo a le Faaola. Atonu e te manao e faasoa atu faamatalaga mai le “Liliuese,” Faamaoni i le Faatuatua, 5-6.

• Fesoasoani i tamaiti e lisi i le laupapa ni nai upumoni ma faamanuiaga ua tatou olioli ai ona o le talalelei. (O nisi o faataitaiga e mafai ona aofia ai malumalu, perofeta, o le perisitua, ma le meaalofa o le Agaga Paia.) Tape ese mea nei taitasitasi, ma fesili i tamaiti pe mata e ese faapefea o latou olaga e aunoa ma nei mea. Faamalamalama atu o nei upumoni na leiloloa i le taimi o le Liliuese Tele. Aisea na taua ai le toefuatai mai o le Ekalesia a Iesu Keriso i le lalolagi i aso e gata ai? Valaaulia ia tamaiti e “toefuatai” pe toe tusi ia upumoni ma faamanuiaga i le laupapa.

2 Tesalonia 3:7–13

E finagalo le Tama Faalelagi ia ou galue.

E mafai faapefea ona e fesoaoani i tamaiti e vaai i le galue o se faamanuiaga, ae le o se mea e aloese ai?

Gaoioiga e Mafai Ona Fai

• Valaaulia tamaiti e feauauai i le faitauina o fuaiupu mai le 2 Tesalonia 3:7–13 ma vaavaai mo le faafitauli sa feagai ma le Au Paia. Aisea e finagalo ai le Tama Faalelagi ia tatou galulue? O le a le mea semanu e tupu pe anafai tatou te le aoaoina e galulue malosi? Tuu i tamaiti e feauauai e faatino mai ni feau faigofie ae mate mai e isi tamaiti a latou mea la e fai.

• Valaaulia ia tamaiti e talanoa e uiga i se taimi sa latou galulue malosi ai i se galuega, se galuega faatino, po o se sini. O a ni o latou lagona e uiga ia i latou lava ina ua uma ona latou faia? O le a le uiga o le “e aua le faavaivai i le amio lelei”? (2 Tesalonia 3:13).

aikona aoaoina

Fautuaina le Aoaoina i le Aiga

Valaaulia ia tamaiti e ta’u i se tagata o le aiga po o se uo se mafuaaga e tasi latou te faafetai ai i le iai o le talalelei i le lalolagi i ona po nei (e mafai ona fesoasoani le itulau o gaoioiga o le vaiaso lenei latou te manatua ai).

Faaleleia o Lo Tatou Aoao Atu

Lagolago atu i matua o tamaiti. “O matua o faiaoga aupito taua ia mo a latou fanau—e iai ia i latou le tiutetauave autu ma le mana silisili e tosina ai a latou fanau (tagai Teuteronome 6:6–7). A o e aoao atu tamaiti i le lotu, saili ma le agaga tatalo e lagolago atu i o latou matua i la latou matafaioi taua” (Aoao Atu i le Ala a le Faaola, 25).

itulau o gaoioiga: na taumua mai le Liliuese i le Afio Mai Faalua