Vakamataliataki i Karisito

Na Vakamataliataki, mai vei Carl Heinrich Bloch

Epereli 1–14

Maciu 16–17; Marika 9; Luke 9

“Sai Kemuni na Karisito”

Ni o vakananuma titobu na iwase eso oqo ena Veiyalayalati Vou ka vakarogoca na itukutuku ni koniferedi raraba, vakarogoca vinaka na itukutuku o nanuma ni ra na gadreva na gone ena nomu kalasi.

Vola na Veika o Uqeti Kina

ivakatakilakila ni veiwasei

Sureta na Veiwasei

Kevaka era a vakarorogo se sarava na koniferedi raraba na gone ena nomu kalasi, sureti ira me ra wasea e dua na ka era a rogoca se raica.

ivakatakilakila ni veivakavulici

Vakavulica na iVunau

Gone Sobu

Maciu 16:13–17

Au rawa ni rawata e dua na ivakadinadina ni o Jisu Karisito na Luve ni Kalou.

Vakasamataka na sala mo vakayagataka kina na ivakadinadina nei Pita kei na kena isau mai vei Jisu mo vakavulica vei ira na gone na cava na ivakadinadina ka vakauqeti ira me ra vakasaqara na nodra.

iTaviqaravi e Rawa ni Caka

• Kerei ira na gone me ra vakarogoca na ka e tukuna o Pita ni o wilika na Maciu 16:15–17. (Raica talega na “Wase 32: Vakadinadinataki Karisito o Pita,” New Testament Stories, 76–77, se na kena vidio ena LDS.org.) Vakamacalataka ni a wasea tiko o Pita na nona ivakadinadina baleti Jisu Karisito. Wilika tale na tikina eso oqori. (Se vakaraitaka tale na vidio.) Ena gauna oqo kerei ira na gone me ra vakarogoca se o cei a tukuna vei Pita ni o Jisu Karisito na Luve ni Kalou.

• Wasea nomu ivakadinadina baleti Jisu Karisito, ka vakamacalataka na sala o ciqoma kina. Sureti ira na gone me ra vakasaqara nodra dui ivakadinadina mai vei Tamada Vakalomalagi.

Maciu 16:15–19

E solia o Jisu Karisito vei ira na parofita kei na iapositolo na idola ni matabete me ra liutaka na Nona Lotu.

Na iVakabula e vakatauvatana na ivakatakila ki na vatu kei na lewa ni matabete ki na ki. E rawa vakacava ni o vakayagataka na veivakatauvatani oqo me vukei ira na gone me ra vakabauti ira era liutaka na Nona Lotu.

iTaviqaravi e Rawa ni Caka

• Vakaraitaka e dua na vatu vei ira na gone ni o wilika vata kei ira na Maciu 16:18 . Tokaruataka vata kei ira na malanivosa “e dela ni vatu oqo kau na tara kina na noqu isoqosoqo lewe ni lotu,” ka matanataka toka. Vakamacalataka ni Lotu e tara cake ena “vatu” ni ivakatakila.

• Vakaraitaka vei ira na gone eso na ki ka taroga se cava e dau vakayagataki kina na ki. Vakamacalataka ni o Pita kei ira tale na vo ni iApositolo era a ciqoma na ki ni matabete mai vei Jisu. Na ki oqori era “tadolava” na veivakalougatataki vei keda ka dolava na sala ki lomalagi. Kena ivakaraitaki, na ki ni matabete e vakatarai keda me da papitaiso ka vakayagataka na sakaramede. Solia eso na ki pepa vei ira na gone, me ra vola kina eso na veivakalougatataki ena rawa ni “tadolava” na ki ni matabete.

• Vakaraitaka e dua na kena itaba na Peresitedi ni Lotu, ka wasea nomu ivakadinadina ni tu vua na ki kece sara ni matabete ena gauna oqo, me vakataki Pita ga.

ivakatakarakara kei Pita ni taura tu na ki

A solia o Jisu vei Pita na ki ni matabete.

Maciu 17:19–20

E rawa ni cakamana na noqu vakabauta.

Ni o wilika na yalayala nei Jisu ni rawa ni tosoya e dua na ulunivanua na vakabauta e vaka na sore ni mosita, na cava e vakauqeti iko me baleti ira na gone o vakavulica?

iTaviqaravi e Rawa ni Caka

• Sureti ira na gone me ra veivukevuke ni droinitaka ena papa na ulunivanua lelevu kei na sorenitei lalai ni o wilika vata kei ira na Maciu 17:19–20 . Vakamacalataka ni ulunivanua me da tosoya sai ira ga na veika e dau dredre ni da cakava. Na cava eso na ka e rawa ni vaka na ulunivanua vei keda? Vakayagataka na tabana ni itaviqaravi ni macawa oqo me vukei ira na gone me ra vakasamataka na ivakarau e rawa ni vukei ira kina na vakabauta me ra cakava na ka e vinakata na Kalou me ra cakava.

• Biuta e dua na itaba ni dua na ulunivanua ena dua na yasa ni rumu, ka vola kina na vosa me vaka na rere, lomalomarua, se na lomaleqa Kerei ira na gone me ra cavuta eso na ka e rawa ni ra cakava me levu cake kina na nodra vakabauti Jisu Karisito. O koya na gone e vakatura e dua na ka me qai tosoya voleka mai na ulunivanua ki na yasa ni rumu kadua. Wilika na Maciu 17:19–20, ka vakadinadinataka na mana ni vakabauta ki na nomu bula.

• Kerei ira na gone me ra lagata “Faith,” iVolanisere ni Lalai, 96–97, qai solia yadua vei ira na gone e dua na sorenitei me ra kauta i vale. Sureti ira me ra tea na sorenitei ka biuta ena dua na vanua me rawa ni ra sarava toka kina na kena tubu me vukea nodra nanuma me ra vakabauta na Tamada Vakalomalagi kei Jisu Karisito.

ivakatakilakila ni veivakavulici

Vakavulica na iVunau

Gone Qase Cake

Maciu 16:13–17

Na ivakadinadina kei Jisu Karisito e lako mai ena ivakatakila mai lomalagi.

Ena vukei ira vakacava na gone na ivakadinadina nei Pita ena Maciu 16:13–17 ena nodra taracake nodra ivakadinadina?

iTaviqaravi e Rawa ni Caka

• Taroga vei ira na gone se cava era na kaya ke dua e tarogi ira, “O cei o Jisu?” Sureti ira na gone me ra wilika na Maciu 16:13–17 me ra kila na ivakarau a sauma kina o Pita na taro oya. A rawata vakacava o koya na nona ivakadinadina kei Jisu? Na cava eda rawa ni cakava meda vaqaqacotaka kina na noda ivakadinadina?

• Vukei ira na gone me ra veidutaitaka na ivakarau eda kila kina na dina vakayalo mai na ivakarau eda kila kina na dina tale eso. Me ivakaraitaki, eda kila vakacava na kena balavu e dua na tamata se vakacava tu na ituvaki ni draki? Eda na kila vakacava ni o Jisu Karisito na Luve ni Kalou?

• Wasea nomu ivakadinadina kei Jisu Karisito, ka bolei ira na gone me ra rawata se vaqaqacotaka na nodra dui ivakadinadina.

Maciu 16:15–19

Era liutaka na Lotu i Jisu Karisito o ira era taura tu na idola ni matabete.

Na vulici ni Maciu 16:15–19 sa rawa ni taracake na nodra vakabauta na gone ni Lotu i Jisu Karisito ni Yalododonu Edaidai sai koya na kena vakalesui mai na Lotu vata ga a tauyavutaka o Jisu ena Nona bula voli e vuravura.

iTaviqaravi e Rawa ni Caka

• Vola Maciu 16:19 ena papa, vakalutuka e vica na vosa, oka kina na vosa “idola.” Kerei ira na gone mera raica na vosa e lutu tiko.

• Vakaraitaka na vidio “Priesthood Keys: The Restoration of Priesthood Keys” ena (LDS.org) se railesuva na itukutuku baleta na idola ni matabete ena Tudei ena Vakabauta, 126–27. Na cava na idola ni matebete? Na sala cava e tautauvata kina kei na ki dina na idola ni matabete?

• Vukei ira na gone me ra tuva ena papa na tamata ka tu vei ira na idola ni matabete. E tiko ena (Tudei ena Vakabauta, 126–27, e dua na ituvatuva e rawa ni vukei ira.) Sureta e dua ena nomu tabanalevu ka tu vua na idola eso oqo me vosa vei ira na kalasi ena vuna sa rui bibi kina na idola ni matabete.

• Vunia e vica na ki (se iyaloyalo ni ki) ena loma ni rumu, ka sureti ira na gone me ra vaqara. Ni sa kune kece mai na ki, vukei ira na gone me ra vakasamataka na veivakalougatataki eda dau marautaka baleta na idola ni matabete (kena ivakaraitaki, matavuvale tawamudu, papitaiso, kei na sakaramede).

Luke 9:28–36

O Jisu Karisito na Luve ni Kalou.

Na Vakamataliataki nei Karisito sa dua na gauna eso ena ivolanikalou a rogo kina na domo ni Kalou na Tamada ni vakadinadinataka voli na Luvena Daulomani. Na vulici ni itukutuku oqo vata kei ira na gone e rawa ni tara cake nodra vakabauti Jisu Karisito.

iTaviqaravi e Rawa ni Caka

• Sureti ira na gone me ra droinitaka na iyaloyalo ni Vakamataliataki nei Karisito, me vaka e kunei ena Maciu 17:1–9. Kerei ira me ra vakamacalataka nodra droini vei ira na kena vo. (Raica talega na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale.)

• Solia na gauna vei ira na gone me ra vakananuma titobu na ivakavuvuli ni italanoa oqo vei ira me baleti Jisu Karisito. Sureti ira mera vola na nodra vakasama ena papa. Sureta e vica na gone me ra wasea na ivakarau era kila kina ni o Jisu Karisito na Luve ni Kalou.

ivakatakilakila ni vuli

Vakauqeta na Vuli e Vale

Sureti ira na gone me ra taroga nodra itubutubu se so tale na lewe ni matavuvale ena sala era a rawata kina na nodra ivakadinadina kei Jisu Karisito.

Vakatorocaketaki Noda Veivakavulici

Vakayagataka na ivakatagi. Na sere ni Lalai kei na serenilotu e rawa ni vukei ira na gone ena itabayabaki kecega me ra kila ka nanuma na dina vakosipeli. Na lagasere sa rawa talega ni vakabulabulataki ira na gone ena sotavi ni ka vakavuli. (Raica na Veivakavulici ena iVakarau ni iVakabula, 22.)

tabana ni itaviqaravi: e rawa ni cakamana noda vakabauta