iBulubulu ena Were

Epereli 15-21

Siganimate

“Ko Iko Bulubulu, Sa Evei na Nomu Gumatua?”

Vakayagataka nomu gauna vata kei ira na gone me vukea nodra raica na Siganimate ni dua na gauna ni reki vua na iVakabula ka vakatitobutaka na nodra vakavinavinaka ena Nona solibula. Na vakasama eso ena ituvatuva oqo e rawa ni moici me vukea nomu vakavulici ira na gone ena itabayabaki cava ga.

Vola na Veika o Uqeti Kina

ivakatakilakila ni veiwasei

Sureta na Veiwasei

Me vukei ira na gone me ra wasea na veika era kila baleti Jisu Karisito kei na Nona Veisorovaki, e rawa ni o vakaraitaka na iyaloyalo ni iVakabula e Kecisemani, ena kauveilatai, vakakina ni sa oti Nona Tucake Tale (raica na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale kei na Gospel Art Book, naba 56, 57, 58, 59, kei na 60).

ivakatakilakila ni veivakavulici

Vakavulica na iVunau

Gone Sobu

Sa noqu iVakabula o Jisu Karisito.

Ni o wilika me baleta na Veisorovaki nei Jisu Karisito, vakananuma titobu na ivakarau e rawa ni o vukei ira kina na gone me ra vakila na levu ni nona lomani ira o Jisu.

iTaviqaravi e Rawa ni Caka

• Vakavulica vei ira na gone baleta ni da sa ivalavala ca kecega, ena sega ni rawa ni da lesu tale vua na Kalou ke sega na iVakabula sa mai vakararawataki ena vuku ni noda ivalavala ca. E rawa ni vakabulai keda mai na noda ivalavala ca o Jisu Karisito kevaka eda veivutuni. Taura tu e dua na iloilo, me ra qai veivuke na gone ena nodra raici ira kina. Ni ra sa tukuna na gone yadua, “O Jisu e lomani [yaca ni gone], ka rawa ni vakabulai [yaca ni gone].”

• Vakaraitaka na iyaloyalo Jesus Praying in Gethsemane (Gospel Art Book, naba 56) ni o tukuna na italanoa ni vakararawataki nei Jisu mai Kecisemani me baleta na ivalavala ca ni kai vuravura (raica na Maciu 26:36–46; Luke 22:39–44). Vakamacalataka baleta na Nona vakararawataki, e rawa ni da vosoti ni da digidigi cala. E rawa ni o vakayagataka na “Wase 51: Jesus Suffers in the Garden of Gethsemane,” New Testament Stories, 129-32, se na kena vidio ena (LDS.org).

• Lagata vata “I Feel My Savior’s Love,” Children’s Songbook, 74–75. Na vosa cava ena sere e vakamacalataka na loloma ni iVakabula? Taroga vei ira na gone na ivakarau e rawa ni ra vukei ira kina na tani me ra vakila na loloma ni iVakabula.

Baleta ni sa tucake tale o Jisu Karisito, au na bula tale.

E rawa vakacava mo vukei ira na gone me ra kila ni ena vukui Jisu Karisito, eda na tucake tale ena dua na siga kei ira na noda daulomani?

iTaviqaravi e Rawa ni Caka

• Vakavulica vei ira na gone na italanoa ni Siganimate ni o vakayagataka na iyaloyalo kei Karisito e Kecisemani, ena kauveilatai, vakakina ni oti Nona Tucake Tale, ka kunei ena Gospel Art Book (naba 56, 57, 58, 59, kei na 60), kei na iyaloyalo tabanipepa taucoko ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Me ratou taura cake tu na yaloyalo e vica na gone ni o talanoa. Tukuna vei ira na gone baleta e vica na tamata era a raici Jisu ni oti Nona tucake tale, me vakataki Meri (raica na Joni 20:1–18) se Tomasi (raica Joni 20:24–29).

• Tovolea mo kila se ra kila na gone na vuna eda dau marautaka kina na Siganimate. Vakamacalataka ena Siganimate eda marautaka kina na siga bibi duadua ena itukutuku makawa—na siga a tucake tale kina mai na mate o Jisu Karisito. Taroga kevaka e dua na gone e vinakata me wasea na veika e dau cakava nona matavuvale me vakananuma kina na Tucake Tale nei Jisu Karisito.

• Vakamacalataka ni tucake tale e kena ibalebale me da bula tale ni sa oti na mate. Wasea nomu ivakadinadina ni ena vukui Jisu Karisito, eda na tucake tale—eda na bula tale ni sa oti noda mate, ka da na sega tale ni mate.

• Vakayagataka e dua na qaniliga me vakavulici kina vei ira na gone ni da vakayago taucoko (matataki ena qaniliga) kei na yaloda (matataki ena ligada). Ni da sa mate, ena bula tikoga na yaloda, ia na yagoda sa sega. Ni da sa tucake tale, erau sa cokoti vata tale na yaloda kei na yagoda. Me ra veivuke na gone ena nodra daramaka na qaniliga ka luvata tale.

• Lagata vata e dua na sere ni Siganimate, me vaka na “Did Jesus Really Live Again?” se “Jesus Has Risen,” Children’s Songbook, 64, 70, ka vakaraitaka vei ira na gone na iyaloyalo kei Jisu ni oti Nona tucake tale (Gospel Art Book, naba 59, 60, 61).

• Vakaraitaka na kena iyaloyalo e dua o kila ni sa mate. Wasea nomu ivakadinadina ni na tucake tale mai na mate o koya ena vuku ni Veisorovaki kei na Tucake Tale nei Jisu Karisito.

• Sarava vata na vidio “Jesus Is Resurrected” se na “The Risen Lord Appears to the Apostles” (LDS.org). Na iKuri ni itukutuku ni Siganimate e rawa ni laurai ena mormon.org/easter.

Karisito vata kei Meri ena ibuluubulu lala

He is Risen, mai vei Greg Olsen

ivakatakilakila ni veivakavulici

Vakavulica na iVunau

Gone Qase Cake

A vakararawataki o Jisu ena vukuqu mai Kecisemani kei na kauveilatai.

Ni o vulica na Veisorovaki ni iVakabula vakananuma titobu na ivakarau mo vukei ira kina na gone me ra vulica ka nanuma ni a vakararawataki ko Karisito mai Kecisemani kei na kauveilatai me baleta nodra ivalavala ca, nodra tauvimate, kei na rarawa.

iTaviqaravi e Rawa ni Caka

• Wilika vata kei ira na gone na Luke 22:39–44 kei na veitikina digitaki mai na Maciu 27:29–50. Sureti ira me ra vaqara na vosa ka na vukei ira me ra vakila na veika a sotava na iVakabula mai Kecisemani kei na kauveilatai.

• Vukei ira na gone me ra cavuqaqataka na ikatolu ni yavu ni vakabauta. Wasea nomu ivakadinadina ni tu vei Jisu Karisito na kaukauwa me vakabulai keda mai na ivalavala ca kei na mate.

• Vukei ira na gone me ra vakarautaka eso na vosa leleka baleta na Veisorovaki nei Jisu Karisito ka rawa ni ra wasea vei ira na tani. Vakayaloqaqataki ira me ra okata e dua na ivolanikalou kei na nodra ivakadinadina ena nodra vosa. Kevaka era gadreva na ikuri ni veivuke, e rawa ni ra wilika na “Veisorovaki i Jisu Karisito” ena Tudei ena Vakabauta (14–21).

Baleta ni sa tucake tale o Jisu Karisito, au na bula tale.

Ena dua na siga ena mate kina e dua na nodra daulomani na gone kece o vakavulica kevaka e se bera ni vakakina. Vukei ira me ra kila, baleta ni sa tucake tale o Jisu Karisito, eda na tucake tale vakakina.

iTaviqaravi e Rawa ni Caka

• Vakaraitaka na Gospel Art Book, naba 57, 58, kei na 59, ka kerei ira na gone me ra vakasotara na iyaloyalo kei na veimalanivosa oqo: Maciu 27:29–38, 59–60; Joni 20:10–18.

• Sureti ira na gone me ra dui wilika na “Resurrection” ena Bible Dictionary ka vola eso na taro ni veitarogi e rawa ni ra taroga baleta na veika era wilika. Solia na gauna vei ira na gone me ra taroga vei ira vakataki ira na nodra taro ka vaqara vata na kena isau

• Vukei ira na gone me ra raica na idusidusi vakaiulutaga ena Children’s Songbook me ra kunea e dua na sere era na vinakata me ra vulica me baleti Jisu Karisito se na Tucake Tale. Lagata vata vakavica na sere. Taroga vei ira na gone na veika era vulica mai na sere oqo.

• Ni se bera na kalasi, sureta e vica na gone me ra vakarau mai me ra wasea nodra ivakadinadina me baleta na Veisorovaki kei na Tucake Tale ni iVakabula. Sureti ira na gone me ra vola nodra ivakadinadina me ra wasea e vale.

ivakatakilakila ni vuli

Vakauqeta na Vuli e Vale

Me vukei ira na gone me ra wasea na veika era vulica vata kei ira nodra matavuvale, vakauqeti ira me ra lagata e dua na sere baleti Jisu Karisito e vale ena macawa oqo.

Vakatorocaketaki Noda Veivakavulici

Dau yaga vei ira na gone na tokarua. Kua ni rere mo tokaruataka vakavica vata na itaviqaravi, vakauasivi vei ira na gone sobu. Na tokarua ena vukei ira na gone me ra nanuma na veika o vakavulica.

tabana ni itaviqaravi: Au na bula tale