“25–31 ni Maji. Maciu 14–15; Marika 6–7; Joni 5–6: ‘Dou Kakua ni Rere’” Lako Mai, Mo Muri Au—Me Baleti Ira na Lalai: Veiyalayalati Vou 2019 (2019)
“25–31 ni Maji. Maciu 14–15; Marika 6–7; Joni 5–6,” Lako Mai, Mo Muri Au—Me Baleti Ira na Lalai: 2019
Feed Them, mai vei Jorge Cocco
25–31 ni Maji
Maciu 14–15; Marika 6–7; Joni 5–6
“Dou Kakua ni Rere”
Ni o vakavakarau mo veivakavulici mai na Maciu 14–15; Marika 6–7; kei na Joni 5–6, vaqara na itukutuku eso ena yaga ki na nodra bula na gone o vakavulica. Na cava o nanuma ni na vukei ira me ra kila na itukutuku eso oqo? Ena rairai solia vei iko eso na vakasama na ituvatuva oqo.
Vola na Veika o Uqeti Kina
Sureta na Veiwasei
Vakaraitaka e dua na iyaloyalo kei Jisu ni taubale voli ena dela ni wai (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale), ka kerei ira na gone me ra wasea na veika era kila me baleta na italanoa.
Vakavulica na iVunau
Gone Lalai
E kila o Jisu Karisito na veika eda gadreva ka rawa ni vukei keda.
Ni o wilika na italanoa kei Jisu ena nona vakabula na tamata ena tobu mai Peciseita, vakananuma na ivakarau mo vukei ira kina na gone me ra raica na ivakavuvuli ni italanoa me baleta na yalovinaka, dauloloma kei na itovonibula tale eso nei Jisu.
iTaviqaravi e Rawa ni Caka
-
Vakayagataka na iyaloyalo Christ Healing the Sick at Bethesda (Gospel Art Book, naba. 42) mo tukuna vei ira na gone na italanoa ena Joni 5:1–9. Se vakaraitaka na vidio “Jesus Heals a Man on the Sabbath” (LDS.org). Kerei ira na gone me ra raitayaloyalotaka ni sai ira na tamata a vakabula o Jisu. Ena vakacava nodra nanuma ni sa vakabulai ira o Jisu?
-
Kerei ira na gone me ra vakayacana eso na ka e dau dredre vei ira se vakararawataki ira. Tukuna vei ira e dua na gauna ni nomu bula e a vukei iko kina na iVakabula ena dua na veivakatovolei dredre. Vakadinadinataka ni kila tu o Jisu na noda leqa kece sara ka vinakata me vukei keda.
Eda muria na ivakaraitaki nei Jisu ena noda yalovinaka vei ira tale eso.
Dua na sala a vakaraitaki loloma kina o Jisu oya na nodra vakani ni Nona imuri ena gauna era sa viakana kina. O na vukei ira vakacava na gone ni vulica me ra qarava eso tale me vakataki Jisu?
iTaviqaravi e Rawa ni Caka
-
Vakaraitaka vei ira na gone e dua na basikete kei na so na madrai ni o talanoataka tiko na italanoa ena Maciu 14:13–21. Vakamacalataka ni dina ga ni a vakasaqara o Jisu na vanua me rawa ni tiko duadua, era vinakata na tamata me ra tiko volekati Koya. Wasea na vo ni talanoa vei ira na gone, ka kerei ira me ra vakarogoca na veika a vakayacora o Jisu me vakaraitaka nona yalovinaka kei na loloma ena vukudra.
-
Kerei ira na gone me ra wasea na ivakarau ni nona yalovinaka vei ira e dua. Na cava e rawa ni ra cakava ena macawa oqo me ra yalovinaka kina vei ira tale eso? Ena isaunitaro kece era tukuna mai, droinitaka e dua na ibuli madrai se dua na ika ena papa. Tukuna vei ira na gone ena nodra cakava na veika oqo, era sa muria tiko na ivakaraitaki nei Jisu ena Nona vakani ira na lewe lima na udolu era sa viakana tu.
Na vakabauti Jisu Karisito e rawa ni vukei keda me da kakua ni rere.
A vakaraitaka o Pita na vakabauta cecere ena nona lako ena dela ni wai vei Jisu. Na lesoni cava beka ena italanoa oqo e rawa ni baleti ira na gone?
iTaviqaravi e Rawa ni Caka
-
Vakaraitaka na iyaloyalo Jesus Walking on the Water (Gospel Art Book, naba. 43) ni o tukuna na italanoa ena nomu vosa. Vakasamataka mo vakayagataka na tabana ni itaviqaravi ni macawa oqo me vukei ira na gone me ra talanoataka lesu vei iko. E rawa talega ni o kauta mai e dua na bilo wai lailai ka sureti ira na gone me ra raitayaloyalotaka ni ra “lako” tiko ena iqaqalo ni ligadra e dela ni wai.
-
Vakaraitaka na vidio “Wherefore Didst Thou Doubt?” (LDS.org), ka kerei ira na gone me ra wanonova toka se cava e vakavuna na rere nei Pita. Oti qai kerei ira me ra tukuna na gauna era a rere kina ka wasea se cava a vukei ira. Vukei ira ni raica na vakabauti Jisu Karisito ena vukei keda me da kakua ni rere.
Vakavulica na iVunau
Gone Qase Cake
E vakavulici keda o Jisu Karisito me baleta na Tamada Vakalomalagi.
E rawa vakacava ni vukea nodra vulica na gone na veika baleta na Tamada Vakalomalagi na ivakavuvuli nei Jisu me baleta na Tamana?
iTaviqaravi e Rawa ni Caka
-
Cakava e rua na iwasewase ni kadi veisotari ka volai kina na vosa a vakayagataka o Jisu me vakavuvulitaki Tamada Vakalomalagi kina ena Joni 5, me vaka na loloma, bula, kei na cakacaka (raica na Joni 5:20, 26, 36). Vakatoboicutaka na kadi, ka kerei ira na gone me ra vaqara na kena veisa ena nodra vukica cake e rua na kadi ena dua na gauna. Ni sa kune na veisa yadua, wilika na tikina e tiko kina na vosa, ka tarogi ira na gone se na cava e vakavulica vei keda na vosa oya me baleti Tamada Vakalomalagi.
-
Kerei ira na gone me ra wilika na Joni 5:30, qai vakacavara na iyatuvosa oqo: “Niu sa sega ni muria na lomaqu, a …” A cakava vakacava o Karisito na lomai Tamana Vakalomalagi? E rawa vakacava ni da cakava na lomana na Tamada Vakalomalagi?
Na noda isolisoli lalai ena yaga vakalevu.
E dua na gonetagane lailai a solia na madrai kei na ika a vakayagataka o Jisu me vakania kina na lewe lima na udolu. Ena rawa vakacava ni o vukei ira na gone o vakavulica me ra raica na ivakarau e rawa ni ra cau kina ena cakacaka ni Turaga?
iTaviqaravi e Rawa ni Caka
-
Wasea e vica na bisikete se tiki ni madrai vei ira na gone. Vukei ira me ra raitayaloyalotaka se na vakaevei na kedra lewelevu na lima na udolu na tamata. Se na vakaevei beka na nodra vakani na lewelevu vakaoya ena lima ga na ibuli madrai kei na rua na ika?
-
Sureta e dua na gone me tukuna na italanoa ni nodra vakani na lewe lima na udolu ena nona vosa ga vakataki koya. Ena rawa vakacava ni da vakataki koya na gonetagane ena Joni 6:9? Sureti ira na gone me ra droinitaka na ibuli madrai kei na ika ena pepa ka vola kina eso na ka e rawa ni ra solia vua na Turaga me vukea na Nona cakacaka.
-
Solia vei ira na gone e dua na ibulibuli tasereki lailai me ra vakasotara vata. Na cava ena yaco kevaka e dua na tikina e yali tiko? Vakamacalataka ni o keda sa vaka e dua na tiki ni ibulibuli—e dui tu vei keda kece e dua na ka bibi me da cau kina ki na nodra bula eso tale. Era cau vakacava na gone ki na nodra matavuvale se nodra kalasi.
A cakacaka mana o Jisu ena vakani ni 5,000 na tamata ena lima na ibuli kei na rua na ika.
Na vakabauti Jisu Karisito e rawa ni vukei keda me da kakua ni rere.
E vakaitavi vakabibi sara na vakabauta kei na rere ena italanoa ni nodrau lako e dela ni wai o Jisu kei Pita. Na cava e rawa ni ra vulica na gone mai na italanoa oqo?
iTaviqaravi e Rawa ni Caka
-
Vakaraitaka na iyaloyalo ena iituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Kerei ira na gone me ra raica e dua na tikina ena Maciu 14 ka vakamacalataka na iyaloyalo.
-
Kerei ira na gone me ra vaqara na ivakatakilakila ni vakabauta kei na ivakatakilakila ni rere ni ra wilika na Maciu 14:22–33. Vakaraitaka na vidio “Wherefore Didst Thou Doubt?” (LDS.org). Na cava na ibalebale ni vakabauti Jisu Karisito? Eda na sosomitaka vakacava na rere ena vakabauta?
-
Kerei ira na gone me ra raitayaloyalotaka ni ra a tiko ka taukena e dua na itaba ena nodrau a lako ena dela ni wai o Jisu kei Pita. Na tiki ni gauna cava era na digitaka me ra tabaka kei na vuna? Vakatura me ra vaqaqara ena Maciu 14:22–33 ena vakasama eso. Sureti ira me ra droinitaka e dua na iyaloyalo ni tiki ni gauna era digitaka, wasea na nodra iyaloyalo, ka vakamacalataka na vuna era digitaka kina na tiki ni gauna oya.
Vakauqeta na Vuli e Vale
Kevaka era sa vakacavara na gone na tabana ni itaviqaravi ni macawa oqo, sureti ira me ra vakayagataka ni vakavulica nodra matavuvale ena veika era sa vulica nikua.
Vakatorocaketaki Noda Veivakavulici
Sureta na veiwasei. Taroga na nodra vakasama, na veika era vakila, kei na ka era sa sotava na gone. O na raica ni dau tu vei ira na vakasama rawarawa ia e bibi sara.