“Marso 4–10. Mateo 8–9; Marcos 2–5: ‘Ang Imong Pagsalig Nakapaayo Kanimo’” Dali, Sunod Kanako—Alang sa Primary: Bag-ong Tugon 2019 (2019)
“Marso 4–10. Mateo 8–9; Marcos 2–5,” Dali, Sunod Kanako—Alang sa Primary: 2019
Pagpang-ayo diha sa Iyang mga Pako, ni Jon McNaughton
Marso 4–10
Mateo 8–9; Marcos 2–5
“Ang Imong Pagsalig Nakapaayo Kanimo”
Sugdi pinaagi sa pagbasa sa Mateo 8–9 ug Marcos 2–5. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.
Irekord ang Imong mga Impresyon
Awhaga ang Pagpaambit
Hangyoa ang mga bata sa pagpaambit og istorya ni Jesus nga nagpahigayon og milagro (tan-awa ang lista sa mga milagro sa outline niini nga semana diha sa Dali, Sunod Kanako—Alang sa mga Indibidwal ug mga Pamilya). Mahimo usab nga mopakita ka og konektado nga mga hulagway (tan-awa sa Libro sa mga Hulagway sa Ebanghelyo, nu. 40, 41, o sa LDS.org).
Itudlo ang Doktrina
Mas Gagmay nga mga Bata
Si Jesus adunay gahum sa paghimo og mga milagro.
Samtang magbasa ka mahitungod sa mga milagro sa Manluluwas sa pag-ayo, pamalandungi unsa nga mga milagro ang ipaambit. Unsaon nimo pagtabang ang mga bata nga imong gitudloan nga makasabut sa tahas sa hugot nga pagtuo diha sa mga milagro nga gihimo ni Jesus?
Posible nga mga Kalihokan
-
Ipaambit ang istorya sa tawo nga paralitiko gikan sa Marcos 2:1–12. Alang sa tabang, tan-awa ang “Kapitulo 23: Ang Tawo nga Dili Makalakaw,” Mga Istorya sa Bag-ong Tugon, 57–58. Sultihi ang mga bata nga dili makalakaw ang tawo nga paralitiko. Tabangi sila nga makasabut nga kining tawhana giayo ug gipasaylo sa Manluluwas.
-
Dapita ang mga bata nga magpakaaron-ingnon nga “mao pay pagmata” nila sama sa anak nga babaye ni Jairo samtang magbasa ka gikan sa Marcos 5:22–23, 35–43. Tabangi sila nga makasabut nga gihimong posible ni Jesus nga kitang tanan makabaton og kinabuhing dayon.
-
Basaha ang Marcos 5:34. Tabangi ang mga bata nga makasag-ulo sa mga pulong nga “Ang imong pagsalig nakapaayo kanimo,” tingali pinaagi sa paghatag sa matag bata og usa ka pulong ug dayon ipasulti sa mga bata ang ilang mga pulong sa eksaktong han-ay. Aduna ba silay kaila nga naayo sa dihang nasakit sila?
-
Hangyoa ang mga bata sa pagpiyong sa ilang mga mata ug sa pagpaminaw samtang mobasa ka gikan sa Mateo 9:27–30. Kon mobasa ka mahitungod ni Jesus nga miayo sa buta nga mga tawo, dapita ang mga bata sa pag-abli sa ilang mga mata. Unsa kaha ang bation sa mga bata kon giayo sila ni Jesus?
-
Dapita ang mga bata sa paghisgot og higayon nga nagkasakit sila. Isaysay ang usa sa mga istorya ni Jesus nga nag-ayo sa masakiton, ug pagpamatuod nga ang gahum ni Jesus makaayo ug mopanalangin kanato samtang mag-ampo kita ug modawat sa mga panalangin sa priesthood. Ipasabut nga bisan tuod ang Ginoo usahay dili mohatag kanato sa mga milagro nga atong gitinguha, nahigugma Siya kanato ug nasayud sa atong mga panginahanglan. Mohatag Siya kanato sa kahupayan nga atong gikinahanglan.
Kon mahadlok ko o mameligro, si Jesus makatabang kanako nga mobati og kalinaw.
Ang istorya ni Jesus nga nagpahunong sa unos makatabang sa mga bata nga masayud nga makahatag Siya kanila og kalinaw kon mobati sila og kahadlok.
Posible nga mga Kalihokan
-
Tabangi ang mga bata nga maghanduraw nga anaa sila sa sakayan samtang imong basahon ang Marcos 4:35–41. (Tan-awa usab sa “Kapitulo 21: [Si] Jesus Mimando sa mga Hangin ug mga Balud,” Mga Istorya sa Bag-ong Tugon, 53.) Hangyoa ang mga bata sa paghulagway kon unsa kaha ang ilang gibati kon didto pa sila. Kanus-a man nahadlok ang mga bata? Giunsa nila pagkakita og kahupayan?
-
Dapita ang mga bata sa paghimo sa tingog sa unos ug sa paghunong kon adunay moingon nga “Hilum, hunong.” Ipamatuod nga sama nga si Jesus makahatag kanato og kalinaw kon adunay unos sa gawas, Siya makahatag kanato og kalinaw sa atong mga kasingkasing kon dili maayo ang atong gibati.
-
Paghunahuna og mga aksyon nga mobagay sa ikatulo nga bersikulo sa “Suginli Ko sa mga Kaagi ni Jesus,” Songbook sa mga Bata, 36.
Si Kristo nga Nagpakalma sa Unos, ni Robert T. Barrett
Itudlo ang Doktrina
Mas Dagko nga mga Bata
Si Jesus makahimo og mga milagro sa akong kinabuhi kon ako adunay hugot nga pagtuo diha Kaniya.
Si Jesus mihimo og daghang milagro panahon sa Iyang mortal nga pangalagad. Unsaon nimo pagtabang ang mga bata nga makaamgo nga ang mga milagro mahitabo karon?
Posible nga mga Kalihokan
-
Hangyoa ang mga bata sa pagpili og usa sa mosunod nga mga milagro aron basahon ug drowingon: Marcos 2:1–12; Marcos 5:22–23, 35–43; o Marcos 5:24–34. Dapita ang mga bata sa pagpasabut sa ilang mga drowing ngadto sa klase. Unsa ang ilang nakat-unan mahitungod ni Jesus gikan niini nga mga istorya?
-
Hangyoa ang mga bata nga i-aksyon ang ilang bation kon sila masakit, maguol, mahadlok, o mabalaka. Sa unsang paagi makatabang si Jesus kanato kon aduna kita niini nga mga pagbati? Ipamatuod nga si Jesus makatabang sa mga bata sa tanan niini nga mga sitwasyon.
-
Dapita ang mga bata sa pagpaambit og mga kasinatian sa dihang sila o ang ilang kaila nakadawat og panalangin sa priesthood. Sa unsang paagi naayo o napanalanginan kanang tawhana?
Makapakita ako og gugma sa uban sama sa gibuhat ni Jesus.
Mipakita si Jesus og dakong gugma pinaagi sa pag-ayo sa mga masakiton ug may balatian. Pamalandungi kon unsaon nimo sa pagtudlo sa mga bata sa pagpakita og kalooy alang sa mga tawo nga nanginahanglan.
Posible nga mga Kalihokan
-
Pagpili og usa o daghan pa sa mga milagro ni Jesus aron ribyuhon uban sa mga bata, sama niadtong diha sa Marcos 2:1–12; Marcos 5:22–23, 35–43; o Marcos 5:24–34. Dapita ang mga bata sa pagpaambit og higayon nga mitabang sila og laing tawo ug unsa ang ilang gibati.
-
Pahinumdumi ang mga bata nga ang pagtabang sa uban usa ka parte sa ilang mga pakigsaad sa bunyag (tan-awa sa Mosiah 18:8–10; Alma 34:28).
Kon mahadlok ko o mameligro, si Jesus makatabang kanako nga mobati og kalinaw.
Ang mga bata kinahanglang masayud nga ang Manluluwas makahatag kanila og kalinaw kon mag-atubang sila og mga unos sa kinabuhi—karon ug sa umaabut.
Posible nga mga Kalihokan
-
Hangyoa ang usa sa mga bata sa paggamit sa Marcos 4:35–41 ug ang hulagway nga [Si] Jesus Mibadlong sa Unos (Libro sa mga Hulagway sa Ebanghelyo,nu. 40) sa pagsugilon sa istorya ni Jesus nga mipahunong sa unos. Hangyoa ang mga bata sa paghulagway kon unsa kaha ang ilang gibati kon didto pa sila.
-
Dapita ang mga bata sa pagpaambit og mga kasinatian sa dihang mibati sila og kalinaw human mag-ampo alang sa tabang. Pahinumdumi sila nga kini nga kalinaw gikan sa Manluluwas.
-
Hatagi ang matag bata og papel nga giporma og dag-um, ug hangyoa sila sa pagsulat niini og usa ka pagsulay nga tingali nasinati sa usa ka tawo. Ibutang ang tanang mga dag-um diha sa pisara, nga nagtabon sa hulagway sa Manluluwas. Dapita ang usa ka bata sa pagtangtang sa usa sa mga dag-um ug pagsugyot og mga paagi nga makatabang kita og tawo nga aduna niana nga pagsulay nga makakaplag og kalinaw. Kon ang tanan nga mga dag-um natangtang na, pagpamatuod sa gahum sa Manluluwas sa pagpakalma sa mga unos sa atong kinabuhi.
Awhaga ang Pagkat-on diha sa Panimalay
Tabangi ang mga bata sa pagsulat og usa ka buhat sa serbisyo nga ilang buhaton alang sa usa ka tawo karong semanaha.
Pagpalambo sa Atong Pagtudlo
Ang mga bata aktibo. Usahay imong bation nga ang enerhiya sa mga bata makabalda sa pagkat-on. Apan magamit nimo ang ilang aktibo nga mga kinaiya pinaagi sa pagdapit kanila sa pagdrama-drama sa usa ka istorya o paghimo og mga aksyon nga mobagay sa mga panghitabo sa usa ka kanta o kasulatan. (Tan-awa sa Pagtudlo sa Pamaagi sa Manluluwas, 25.)