“Marso 11–17. Mateo 10–12; Marcos 2; Lucas 7; 11: ‘Kining Napulog Duha Gipalakaw ni Jesus’” Dali, Sunod Kanako—Alang sa Primary: Bag-ong Tugon 2019 (2019)
“Marso 11–17. Mateo 10–12; Marcos 2; Lucas 7; 11,” Dali, Sunod Kanako—Alang sa Primary: 2019
Marso 11–17
Mateo 10–12; Marcos 2; Lucas 7; 11
“Kining Napulog Duha Gipalakaw ni Jesus”
Samtang imong basahon ang Mateo 10–12; Marcos 2; ug Lucas 7; 11, makadawat ka og mga pag-aghat gikan sa Espiritu Santo nga motabang kanimo sa pagpangandam. Kini nga mga pag-aghat, lakip ang Dali, Sunod Kanako—Alang sa mga Indibidwal ug mga Pamilya ug kini nga outline, makatabang sa imong pagpangandam.
Irekord ang Imong mga Impresyon
Awhaga ang Pagpaambit
Awhaga ang mga bata sa pagpaambit kon giunsa nila sa pagbalaan ang adlaw nga Igpapahulay.
Itudlo ang Doktrina
Mas Gagmay nga mga Bata
Mitawag si Jesus og Napulog Duha ka mga Apostoles ug mihatag kanila og gahum sa paghimo sa Iyang buhat.
Nasayud ba ang mga bata nga imong gitudloan nga aduna kitay Napulog Duha ka mga Apostoles karon? Unsaon nimo paggamit niini nga mga bersikulo sa pagtudlo kanila mahitungod sa kaimportante sa modernong mga Apostoles ug sa unsay gipabuhat kanila?
Posible nga mga Kalihokan
-
I-summarize ang Mateo 10:1–10 sa yano nga mga pulong. (Tan-awa ang Kristo Nag-orden sa mga Apostoles, Libro sa mga Hulagway sa Ebanghelyo, nu. 38.) Ipasabut nga si Jesus mitawag og mga Apostoles sa pagtabang Kaniya sa pagtukod sa Iyang Simbahan.
-
Ipaihap sa mga bata ang mga Apostoles diha sa litrato Kristo Nag-orden sa mga Apostoles (Libro sa mga Hulagway sa Ebanghelyo, nu. 38) ug diha sa litrato sa Korum sa Napulog Duha ka mga Apostoles karon (tan-awa sa LDS.org o sa usa ka isyu sa kinatibuk-ang komperensya nga Liahona). Ipasabut nga aduna kitay Napulog Duha ka mga Apostoles karon, sama sa panahon ni Jesus.
-
Pagtago og mga hulagway sa modernong mga Apostoles libut sa kwarto (alang sa mga litrato, tan-awa ang bag-ong isyu sa kinatibuk-ang komperensya sa Liahona). Dapita ang mga bata sa pagpangita sa mga hulagway, ug sultihi sila og gamay mahitungod sa matag Apostol.
-
Dapita ang usa ka bata sa pagkupot og litrato sa Unang Kapangulohan ug litrato sa Korum sa Napulog Duha ka mga Apostoles. Hangyoa ang bata nga giyahan ang ubang mga bata libut sa kwarto padulong sa usa ka hulagway ni Jesus. Pagpamatuod nga ang mga propeta ug apostoles mogiya kanato ngadto ni Jesukristo.
-
Ipaambit ang imong pagpamatuod kabahin sa mga Apostoles sa Ginoo.
Ang Napulog Duha ka mga Apostoles naghimo sa buhat sa Ginoo karon.
Si Jesus motabang kanako kon moduol ako Kaniya.
Ang mga bata mobati og kahupayan nga masayud nga si Jesus motabang kanila sa ilang mga palas-anon kon sila moduol ngadto Kaniya.
Posible nga mga Kalihokan
-
Basaha ang Mateo 11:28–30 ug ipakita ang hulagway sa giyugohan nga mga baka diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Ipasabut nga ang giyugohan nga mga baka mas bug-at ang mabira og dungan kay sa kon magtinagsa-tagsa og bira. Ipamatuod nga kon kita mobati og kaguol, kabalaka, o kahadlok, mahimo kitang mangita ni Jesus ug motabang Siya kanato.
-
Hangyoa ang usa ka bata sa pag-alsa og bug-at nga butang. Kon maglisud siya, tanyagi og tabang. Sa unsang paagi si Jesus motabang kanato sa pagbuhat sa lisud nga mga butang? Mibati na ba sukad ang mga bata sa Iyang tabang?
Makabalaan ako sa adlawng Igpapahulay.
Unsa ang pipila ka makalingaw nga mga paagi nga imong matudloan ang mga bata mahitungod sa adlaw nga Igpapahulay ug nganong ato kining ibalaan?
Posible nga mga Kalihokan
-
Basaha og kusog ang Mateo 12:10–13. Dapita ang mga bata nga mobarug ug molingkod sa matag higayon nga moingon ka og “Igpapahulay,” ug isulti uban kanila ang mga pulong nga “[Matarung] ang pagbuhat og maayo sa adlaw nga igpapahulay” (Mateo 12:12). Unsa kaha ang pagsabut nila niana?
-
Pagpakita og kalendaryo ngadto sa mga bata ug i-highlight ang adlaw nga Igpapahulay alang kanila. Unsay atong buhaton sa ubang mga adlaw sa semana? Unsay atong mabuhat sa Igpapahulay aron mahimo kining lahi sa ubang mga adlaw? (tan-awa sa Isaias 58:13–14).
-
Hangyoa ang mga bata sa pagdrowing og maayong mga butang nga ilang mabuhat sa adlaw nga Igpapahulay (tan-awa ang pahina sa kalihokan karong semanaha).
-
Dapita ang mga bata sa paghimo og mga aksyon nga motabang kanila sa paghinumdom sa mga paagi nga makapangandam kita alang sa Igpapahulay samtang ilang kantahon ang awit nga “Sabado,” Songbook sa mga Bata, 105.
-
Pagdrowing og mga mata, mga dunggan, ba-ba, ug mga kamot diha sa pisara. Hangyoa ang mga bata nga mosulti kanimo unsa ang buhaton sa matag usa niini nga mga bahin sa atong mga lawas aron sa pagbalaan sa adlaw nga Igpapahulay.
Itudlo ang Doktrina
Mas Dagko nga mga Bata
Ang Napulog Duha ka mga Apostoles makatudlo kanako mahitungod ni Jesus.
Sa unsang paagi ang pagkat-on mahitungod sa Napulog Duha ka mga Apostoles sa panahon ni Kristo makatabang sa mga bata nga mas makasabut sa unsay gibuhat sa Napulog Duha ka mga Apostoles karon?
Posible nga mga Kalihokan
-
Ipakita ang hulagway sa mga Apostoles sa panahon ni Jesus ug sa atong panahon (tan-awa sa Kristo Nag-orden sa mga Apostoles, Libro sa mga Hulagway sa Ebanghelyo, nu. 38, ug sa usa ka bag-ong isyu sa komperensya sa mga magasin sa Simbahan). Hangyoa ang mga bata sa pagbasa sa Mateo 10:1–10 ug Marcos 3:14–15 aron masayran kon unsa ang gipangbuhat sa mga Apostoles.
-
Dapita ang pipila ka mga bata nga motungha nga andam sa pagpaambit sa usa ka istorya nga gisugilon sa usa sa buhi nga mga Apostoles. Sa unsang paagi ang buhi nga mga Apostoles nagtabang kanako nga mahimong mas sama sa Manluluwas?
-
Isulat ang mga ngalan sa modernong mga Apostoles sa mga piraso sa papel. Dapita ang mga bata nga itakdo ang ngalan sa matag Apostol ngadto sa iyang litrato (LDS.org). Mahimong balikon kini nga kalihokan sa pipila ka higayon.
-
Ipaambit ang pipila ka mga ehemplo sa mga pagpamatuod sa modernong Apostoles mahitungod ni Kristo ngadto sa mga bata (tan-awa ang mga mensahe sa bag-ong kinatibuk-ang komperensya o “Ang Buhi nga Kristo: Ang Pagpamatuod sa mga Apostoles,”).
-
Tabangi ang mga bata sa pagsag-ulo ug pagsabut sa Mga Artikulo sa Hugot nga Pagtuo 1:6.
Si Jesus motabang kanako kon moduol ako Kaniya.
Unsaon nimo pagtabang ang mga bata nga makasabut nga ang Manluluwas mohatag kanila og pahulay gikan sa ilang mga hagit kon sila moduol Kaniya?
Posible nga mga Kalihokan
-
Dapita ang mga bata sa pagpaambit og panahon nga nabalaka o nahingawa sila kabahin sa usa ka butang. Dapita sila sa pagsiksik sa Mateo 11:28–30 alang sa tambag nga makatabang kanila sa susama nga mga sirkumstansya.
-
Dapita ang mga bata sa pagdrowing og mga hulagway sa unsay ilang gibuhat aron moduol kang Jesus ug magkat-on mahitungod Kaniya. Ang ikaupat nga artikulo sa hugot nga pagtuo makahatag kanila og mga giya.
Ang Igpapahulay maoy usa ka adlaw nga magbuhat og maayong mga butang nga mas makapaduol nako ngadto sa Dios.
Ang mga bata nga imong gitudloan malig-on samtang hatagan nimo og gibug-aton ang mga katuyoan ug mga panalangin sa pagbalaan sa adlawng Igpapahulay.
Posible nga mga Kalihokan
-
Dapita ang usa ka bata sa pag-role-play sa tawo kansang kamot giayo sa Manluluwas (tan-awa sa Mateo 12:10–13). Laing bata ang mointerbyu kaniya mahitungod sa kasinatian.
-
Basaha og dungan ang Mateo 12:12. Unsa ang pipila ka maayong mga butang nga atong mabuhat sa Igpapahulay? Ipadrowing sa mga bata ang ilang mga ideya diha sa pahina sa kalihokan karong semanaha, mogunting sa mga piraso, ug magpuli-puli sa pagsulbad sa mga puzzle sa usag usa.
-
Pagtago og pipila ka mga hulagway sa mga tawo nga nagbuhat og mga butang nga nagpakita og gugma alang sa Langitnong Amahan sa adlaw nga Igpapahulay. Hangyoa ang mga bata sa pagpangita sa mga hulagway ug sa pagpaambit kon sa unsang paagi ang pagbuhat sa mga butang diha sa mga hulagway nagpakita sa atong gugma sa Dios.
-
Hatagi ang matag bata og usa ka bag nga sudlan sa mga ideya sa maayong mga butang nga buhaton panahon sa Igpapahulay. Makakita sila og pipila ka mga ideya diha sa “Pagtuman sa Adlaw nga Igpapahulay” diha sa Alang sa Kalig-on sa mga Kabatan-onan, 30–31.
Awhaga ang Pagkat-on diha sa Panimalay
Dapita ang mga bata sa pagpaambit og mga ideya sa pagbalaan sa adlawng Igpapahulay ngadto sa ilang mga pamilya.
Pagpalambo sa Atong Pagtudlo
I-awhag ang balaang pagtahud. Tabangi ang mga bata nga makasabut nga ang usa ka importante nga aspeto sa balaan nga pagtahud mao ang paghunahuna mahitungod sa Langitnong Amahan ug ni Jesukristo. Mahimo nimong pahinumduman ang mga bata nga magbaton og balaang pagtahud pinaagi sa hinay nga pagkanta o pag-hum og usa ka awit o sa pag-display og hulagway ni Jesus.