“Usa ka Sundanan sa Pagtudlo,” Dali, Sunod Kanako—Alang sa Primary: Doktrina ug mga Pakigsaad 2021 (2020)
“Usa ka Sundanan sa Pagtudlo,” Dali, Sunod Kanako—Alang sa Primary: 2021
Usa ka Sundanan sa Pagtudlo
Niini nga kapanguhaan, makita nimo ang mosunod nga tulo ka lakang nga sundanan nga gibalik-balik sa matag outline: dapita ang pagpaambit, itudlo ang doktrina, ug awhaga ang pagkat-on diha sa panimalay. Sa daghang mga sitwasyon, samtang magtudlo ka, ang mga elemento niining sundanan mahimong magsapaw o mahitabo sa laing han-ay. Sama pananglit, ikonsiderar nga ang pagpaambit usa ka oportunidad sa pagtudlo sa doktrina, ug ang pagtudlo sa doktrina kinahanglang maglakip og mga pagdapit nga mopaambit. Sa samang paagi, ang pag-awhag sa pagkat-on diha sa panimalay mahimong mahitabo sa tibuok panaghisgot sa klase. Tuguti ang mga pagpahiangay nga natural lang nga mahitabo niini nga sundanan, magsunod sa mga pag-aghat sa Espiritu aron matubag ang mga panginahanglan sa mga bata nga imong gitudloan.
Dapita ang Pagpaambit
Isip kabahin sa matag klase, dapita ang mga bata sa pagpaambit sa ilang mga pagbati, mga hunahuna, mga panabut, ug mga pagpamatuod mahitungod sa mga baruganan nga imong gitudlo. Ang ilang mga komentaryo mahimong maglakip sa mga kasinatian nga ilang nasinati sa pagkat-on diha sa panimalay. Mahimo usab nimong ribyuhon kon unsa ang ilang nakat-unan sa miaging semana ug pangutana kon sa unsang paagi kini nakaimpluwensya sa ilang kinabuhi.
Itudlo ang Doktrina
Ang Dali, Sunod Kanako—Alang sa mga Indibidwal ug mga Pamilya makatabang kanimo aron mas makasabut sa doktrina nga imong itudlo sa mga bata. Ikonsiderar kon unsa nga mga bersikulo sa kasulatan, mga kinutlo, mga kasinatian, mga pangutana, ug uban pang mga kapanguhaan ang mahimo nimong ipaambit aron sa pagtabang sa mga bata nga makakat-on ug mobuhat sumala sa mga baruganan sa ebanghelyo. Pangita og mamugnaong mga paagi aron sa pagtabang nila nga maghinam-hinam sa unsay ilang gikat-unan.
Awhaga ang Pagkat-on diha sa Panimalay
Tungod kay ang panimalay mao ang sentro sa pagkat-on sa ebanghelyo, usa sa imong mga tumong isip usa ka magtutudlo sa Primary mao ang pag-awhag sa pagkat-on diha sa panimalay. Unsaon nimo pagtabang ang mga bata sa pagpaambit ngadto sa ilang mga pamilya sa unsay ilang nakat-unan sa klase? Unsaon nimo pag-awhag ang mga bata ug ang ilang mga ginikanan nga magpadayon sa pagkat-on gikan sa Doktrina ug mga Pakigsaad diha sa panimalay?