pamilya nga nagbasa sa mga kasulatan

Disyembre 28–Enero 3

Doktrina ug mga Pakigsaad 1

“Patalinghug, O Kamo nga mga Katawhan”

Ang imong unang lakang sa pagpangandam sa pagtudlo kinahanglan nga magmainampuon sa pagtuon sa Doktrina ug mga Pakigsaad 1. Samtang ikaw nagbuhat, paminaw sa mga pag-aghat mahitungod sa mga panginahanglan sa mga bata, ug pangitaa ang mga baruganan nga makahuluganon ngadto kanila. Kini nga mga panghunahuna motabang kanimo sa pagplano og mga kalihokan sa pagtudlo niini nga mga baruganan.

Irekord ang Imong mga Impresyon

pagpaambit sa icon

Dapita ang Pagpaambit

Ipataas ang Doktrina ug mga Pakigsaad, ug hangyoa ang mga bata sa pagpakigbahin og bisan unsa nga ilang nahibaloan mahitungod niini nga basahon. Kinsa ang nagsulat niini? Unsay sulod niini? Ngano nga importante kini? Alang sa tabang, mahimo nga modangop ka ngadto sa “Kapitulo 23: Ang Doktrina ug mga Pakigsaad” (Mga Istorya sa Doktrina ug mga Pakigsaad, 90–92). Ipakigbahin ang imong gugma alang sa Doktrina ug mga Pakigsaad ug ang imong kahinam sa pagkat-on gikan niini karong tuiga.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 1:4

Pinaagi sa Iyang mga propeta, nagpasidaan ang Ginoo kanato kabahin sa espiritwal nga katalagman.

Ang Ginoo mipahayag nga ang Iyang tingog maoy usa ka “tingog sa pagpasidaan.” Unsaon nimo pagdasig ang mga bata sa pagpatalinghug ug pagsunod sa mga pasidaan nga Iyang gihatag?

Posible nga mga Kalihokan

• Pagunita ang mga bata og mga hulagway sa mga timaan nga pasidaan—sama sa mga peligro sa trapiko, ngil-ad nga panahon, o makahilo—ug pag-istorya mahitungod sa giunsa niini pagpasidaan kanato sa katalagman. O pag-istorya mahitungod sa usa ka panahon nga ikaw misunod og pasidaan. Itandi kini nga mga pasidaan ngadto sa mga pasidaan nga gihatag sa Ginoo kanato pinaagi sa Iyang mga propeta. Pagpamatuod nga Siya nagpasidaan kanato tungod kay Siya nahigugma kanato ug gusto kanato nga luwas (tan-awa usab ang pahina sa kalihokan niini nga semana).

• Basaha ngadto sa mga bata gikan sa Doktrina ug mga Pakigsaad 1:4: “Ug ang tingog sa pagpasidaan modangat ngadto sa tanan nga mga katawhan.” Pakigbahin og usa ka butang nga bag-ohay nga gitudlo sa propeta nga makahimo kanato nga hilwas. Pagpakita og may kalabutan nga mga hulagway, kon mahimo. Pag-istorya mahitungod kon giunsa nimo pagsunod ang tambag sa propeta.

Doktrina ug mga Pakigsaad 1:17, 29

Si Joseph Smith propeta sa Dios.

Samtang ikaw ug ang mga bata nagsugod sa pagtuon sa Doktrina ug mga Pakigsaad, tabangi sila sa pagtukod sa ilang mga pagpamatuod kabahin sa balaang tawag ni Joseph Smith.

Posible nga mga Kalihokan

• Pagpakita og litrato ni Propeta Joseph Smith (tan-awa sa Dali, Sunod Kanako—Alang sa mga Indibidwal ug mga Pamilya; tan-awa usab sa Libro sa mga Hulagway sa Ebanghelyo, nu. 87). Hangyoa ang mga bata sa pagbarug sunod sa litrato ug sa pagpakigbahin kon unsay ilang nahibaloan mahitungod ni Joseph Smith.

• Pagunita ang mga bata og litrato sa Manluluwas ug litrato ni Joseph Smith. Sultihi sila mahitungod sa unsay nahatag sa Manluluwas kanato pinaagi ni Joseph Smith, sama sa mga sugo (tan-awa sa bersikulo 17) ug Ang Basahon ni Mormon (tan-awa sa bersikulo 29). Sultihi ang mga bata nga diha sa Doktrina ug mga Pakigsaad makat-unan nila ang mahitungod sa mga sugo nga gihatag sa Ginoo ngadto sa Simbahan pinaagi ni Joseph Smith.

• Ipakigbahin ang imong mga pagbati mahitungod ni Joseph Smith, ug ipamatuod nga ang Dios “mitawag sa akong sulugoon si Joseph Smith, Jun., ug namulong ngadto kaniya gikan sa langit” (bersikulo 17).

Doktrina ug mga Pakigsaad 1:38

Ang mga pulong sa propeta mga pulong sa Dios.

Ang gitudloan nimong mga bata tingali nakadungog sa Presidente sa Simbahan nga namulong, apan tingali wala sila makaamgo nga ang iyang mga pulong gikan sa Dios. Tabangi sila sa pag-ila sa mga pulong sa propeta isip mga pulong sa Dios.

Posible nga mga Kalihokan

• Pagdula og yano nga dula pinaagi sa paghatag og mga panudlo ngadto sa usa ka bata ug hangyoa siya sa pagsulti og balik sa mga panudlo alang sa ubang mga bata. Tabangi sila sa pag-ila nga ang pagsunod sa mga panudlo sa bata sama sa pagsunod sa imong mga panudlo ug nga ang pagsunod sa propeta sama sa pagsunod sa Ginoo. Basaha ngadto kanila ang katapusang linya sa Doktrina ug mga Pakigsaad 1:38: “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”

• Pagdungan og kanta sa usa ka awit mahitungod sa mga propeta, sama sa katapusang bersikulo sa “Sunda ang Propeta” (Children’s Songbook, 58–59). Ipakigbahin ang imong pagpamatuod nga ang propeta nagsulti sa pulong sa Dios.

• Ipakigbahin ang usa ka litrato, rekording, o video clip sa buhi nga propeta. Pagpamatuod nga ang propeta nagsulti kanato kon unsa ang gusto sa Dios nga atong mahibaloan. Dapita ang mga bata sa pagpakigbahin unsa ang ilang gibati mahitungod sa propeta.

  sesyon sa kinatibuk-ang komperensya

  Nagtudlo kanato ang propeta kon unsa ang gusto sa Dios nga atong mahibaloan.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 1:15–17, 29–30

Nahibalo ang Ginoo sa mga hagit nga atong pagaatubangon, busa gipahiuli Niya ang ebanghelyo pinaagi ni Joseph Smith.

Makatabang ka sa mga bata sa pagpangandam alang sa umaabut nga mga hagit pinaagi sa pagtudlo kanila kon giunsa sa Pagpahiuli sa ebanghelyo paghatag og espiritwal nga pagpanalipod.

Posible nga mga Kalihokan

• Tabangi ang mga bata sa paghunahuna og pipila ka mga problema sa kalibutan karon. Ribyuha ang Doktrina ug mga Pakigsaad 1:15–16 uban kanila, ug tabangi sila sa pag-ila og pipila ka mga problema nga gipanagna sa Ginoo nga mahitabo. Dapita sila sa pagdiskubre diha sa mga bersikulo 17 ug 29–30 kon unsa ang nabuhat sa Ginoo sa pagtabang kanato sa pag-atubang sa mga hagit sa atong panahon.

• Hangyoa ang mga bata sa paghanduraw nga sila nangandam alang sa usa ka biyahe. Unsa ang ilang dad-on? Unsaon niini pagtabang nila nga nakahibalo nga moulan atol sa ilang biyahe o nga ang ilang kotse mahiyusan og ligid? Basaha og dungan ang bersikulo 17, ug paghisgot unsa ang nahibaloan sa Ginoo nga mahitabo kanato ug giunsa Niya pagpangandam alang niini. (Kon gikinahanglan, ipasabut nga ang “kalamidad” usa ka kalisdanan o grabe nga butang.) Giunsa sa mga sugo sa Dios pagtabang kanato sa pagtagad sa mga hagit sa atong panahon?

Doktrina ug mga Pakigsaad 1:30

Ang Simbahan ni Jesukristo sa mga Santos sa Ulahing mga Adlaw mao ang “tinuod ug buhi nga simbahan” sa Ginoo.

Unsaon nimo pagtabang ang mga bata sa pagpasalamat sa dakong mga panalangin nga nasakop “sa mao lamang ang tinuod ug buhi nga simbahan”?

Posible nga mga Kalihokan

• Dapita ang mga bata sa paglista og pipila ka mga butang nga buhi ug pipila ka mga butang nga dili (kon mahimo, pagdala og mga litrato o mga ehemplo). Unsa ang kalainan tali sa usa ka buhi nga butang ug sa dili buhi nga butang? Basaha og dungan ang bersikulo 30. Unsa ang gipasabut niini nga ang Simbahan “tinuod”? nga kini “buhi”?

• Pagpakita og hulagway, sama sa usa ka painting sa Manluluwas, ug hangyoa ang mga bata sa paghulagway niini nga ang mga suga sa kwarto gipalong. Gamita kini nga kalihokan sa pagtabang nga ang mga bata makahibalo nga alang sa daghang katawhan, ang tinuod nga Simbahan sa Manluluwas anaa sa “pagkawala mailhi” ug “kangitngit.” Sa unsang paagi kita makatabang sa uban nga makahibalo mahitungod sa Simbahan?

Doktrina ug mga Pakigsaad 1:37–38

Ang pulong sa Ginoo molungtad sa kahangturan.

Makatabang ka sa mga bata sa pagtukod sa ilang hugot nga pagtuo diha ni Jesukristo pinaagi sa pagtudlo kanila nga ang Iyang pulong tinuod ug kasaligan.

Posible nga mga Kalihokan

• Tabangi ang mga bata sa pagtandi sa mga butang nga lumalabay, sama sa bula o gapas nga yelo, [snowflake] ngadto sa mga butang nga ingon og permanente, sama sa bukid o sa adlaw. Hangyoa sila sa pagpangita diha sa mga bersikulo 37–38 og usa ka butang nga gisulti sa Ginoo nga permanente. Nganong usa ka panalangin ang mahibalo nga ang pulong sa Dios “dili mahanaw”?

• Tabangi ang mga bata sa pagsabut nga ang “tingog sa akong mga sulugoon” naglakip sa mga tingog sa akong mga apostoles ug mga propeta. Tabangi ang mga bata sa pagpangita og “mga panagna ug mga saad” diha sa bag-ohay nga kinatibuk-ang komperensya nga pakigpulong sa usa sa mga sulugoon sa Ginoo. Pagpamatuod nga kini nga mga pulong dinasig sa Ginoo ug “tanan matuman.”

pagkat-on nga icon

Awhaga ang Pagkat-on diha sa Panimalay

Ribyuha uban sa mga bata kon unsa ang ilang nakat-unan karon, ug dapita sila sa pagpili og usa ka butang nga ilang gihunahuna nga kinahanglan ang tanan makahibalo. Awhaga sila sa pagpakigbahin niini ngadto sa usa ka higala o sakop sa pamilya.

Pagpalambo sa Atong Pagtudlo

Ang mga bata nagkat-on sa daghang paagi. “Dili tanang mga bata managsama, ug ang matag bata kusog nga naglambo. Ang imong mga paninguha sa pagtudlo sa mga bata mahimong labing epektibo samtang ikaw maggamit og nagkalainlaing mga pamaagi sa pagtudlo,” lakip ang mga istorya, mga tabang sa pagtan-aw, [visual aids] ug musika (Pagtudlo sumala sa Pamaagi sa Manluluwas, 25).

pahina sa kalihokan: ang propeta nagpasidaan kanato sa espiritwal nga katalagman