nanganta nga mga bata

Pagtubag sa mga Panginahanglan sa mga Bata nga adunay mga Kakulangan

Ang mga lider sa Primary responsable sa pagtudlo sa ebanghelyo ni Jesukristo ngadto sa tanang mga bata, lakip niadtong adunay mga kakulangan. Sa Primary, ang matag bata kinahanglan nga hangupon, higugmaon, amumahon, ug apilon. Niini nga kahimtang mas sayon alang sa tanang mga bata ang pagsabut sa gugma sa atong Langitnong Amahan ug ni Jesukristo ug mobati ug makaila sa impluwensya sa Espiritu Santo. Ang mosunod nga mga ideya makatabang kanimo sa pagtubag sa mga panginahanglan sa mga bata nga adunay mga kakulangan.

• Pagpakisayud mahitungod sa piho nga mga panginahanglan sa bata. Ang labing maayo nga paagi sa paghimo niini mao ang pagpakigsulti sa mga ginikanan sa bata o sa mga tig-atiman. Susiha kon sa unsang paagi nga mas makakat-on ang bata ug unsa nga mga pamaagi ang labing makatabang. Mahimo ka usab nga magpakitambag sa ubang mga lider sa Primary ug mga magtutudlo kinsa adunay kasinatian ug mga panabut nga ikapaambit.

• Paghimo og usa ka positibo nga kahimtang diin ang matag bata mobati nga luwas ug gihigugma. Kat-uni ang mga ngalan sa tanang mga bata sa imong klase, ug tabangi sila nga mobati nga gidawat, gihigugma, ug giapil. Ang mga bata nga adunay mga kakulangan sa kasagaran ginasaway, busa pangita og mga kahigayunan sa pagdayeg kanila alang sa maayo nga mga kinaiya. Tabangi ang ubang mga bata nga mahimong mahigugmaon ug madawaton.

• Paghimo og mga pagpahiangay aron ang tanan makaapil. Ang ginagmay nga mga kausaban mahimong himoon sa mga kalihokan aron sa pagsiguro nga ang tanang mga bata makakat-on, lakip na niadtong adunay pisikal nga mga limitasyon o mga kalisdanan sa pagkat-on. Sama pananglit, kon ang usa ka kalihokan nagsugyot sa pagpakita og usa ka hulagway, mahimo kamong manganta hinuon og usa ka kanta nga may kalabutan niini aron maapil ang mga bata nga adunay mga problema sa panan-aw.

• Pag-establisar og makanunayon nga mga kalihokan ug estraktura sa lawak klasehanan. Ang usa ka paagi sa pagbuhat niini mao ang paghimo og usa ka poster nga adunay iskedyul sa klase nga nagpakita kon unsa ang dagan sa klase. Ang imong iskedyul mahimong maglakip og mga pag-ampo, panahon sa pagtudlo, ug oras sa kalihokan. Makatabang kini nga makunhuran ang mga pagbati sa pagduda nga mahimong makapadugang sa kabalaka sa ubang mga bata.

• Paggamit og biswal nga mga tabang. Ang mga bata nga adunay mga kakulangan sa pagkat-on o mga hagit sa kinaiya mahimong makabenepisyo sa biswal nga tabang, sama sa mga hulagway nga magpakita og angay nga mga kinaiya sama sa pag-isa sa kamot sa dili pa motubag sa pangutana.

• Sabta ngano nga mahitabo ang mga mahagiton nga mga kinaiya. Pagkat-on mahitungod sa mga kakulangan o mga kahimtang nga makaimpluwensya sa usa ka bata sa paglihok nga dili angay. Bantayi og maayo kon unsay mahitabo sa higayon nga motumaw ang mahagiton nga mga kinaiya. Ikonsiderar sa mainampuong paagi kon unsaon pag-usab ang sitwasyon aron mas matabangan ang bata.

• Tabangi ang matag bata nga molambo ug mouswag. Si Propeta Joseph Smith nagtudlo, “Ang tanang mga salabutan ug mga espiritu nga sukad gipadala sa Dios nganhi sa kalibutan dali ra nga mapalambo” (Mga Pagtulun-an sa mga Presidente sa Simbahan: Joseph Smith [2007], 251). Ayaw paghunahuna nga ang usa ka bata nga adunay mga kakulangan dili makakat-on o makatampo. Hangyoa ang Ginoo nga tabangan ka nga masayud kon unsaon pagtabang sa mga bata nga makab-ot ang ilang espiritwal nga potensyal.