lima ka buotan nga mga dalagang birhen

Ang Pamanhonon Miabut, ni Elizabeth Gibbons

Nobyembre 15–21

Doktrina ug mga Pakigsaad 133–134

“Pag-andam Kamo alang sa Pag-anhi sa Pamanhonon”

Ikonsiderar ang mga panginahanglan sa mga bata nga imong gitudloan —kadtong nagtuon ug nagkat-on diha sa panimalay ug kadtong tingali wala. Unsaon nimo sa pagtabang kanila sa pagtudlo sa usag usa mahitungod sa mga butang nga ilang gikat-unan?

Irekord ang Imong mga Impresyon

pagpaambit nga icon

Dapita ang Pagpaambit

Pagpakita og usa ka hulagway nga imong gigamit sa bag-ohay lang nga leksyon sa Primary, ug dapita ang mga bata sa pagpaambit sa unsay ilang mahinumduman gikan sa leksyon.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 133:19–21, 25

Si Jesukristo moanhi pag-usab.

Diha sa seksyon 133, ang Ginoo mihulagway sa Iyang Ikaduhang Pag-anhi ug nagdapit sa Iyang katawhan nga mangandam alang niining mahimayaon nga panghitabo. Unsaon nimo sa pagtabang ang mga bata nga magpaabut sa pagbalik sa Manluluwas?

Posible nga mga Kalihokan

• Tagoi ang usa ka hulagway sa Ikaduhang Pag-anhi sa Manluluwas sa likod sa usa ka panapton, ingon nga ang panapton usa ka kurtina (mahimo nimong gamiton ang imahe diha sa outline niining semanaha sa Dali, Sunod Kanako—Alang sa mga Indibidwal ug mga Pamilya o sa Libro sa mga Hulagway sa Ebanghelyo, nu. 66). Dapita ang mga bata nga magpuli-puli sa pagwahing sa “kurtina” ug magpakaaron-ingnon nga naglantaw sila sa bintana. Hangyoa sila sa pagpaambit kon unsa ang ilang bation kon naglantaw sila sa bintana ug nakakita kang Jesus nga nanaog gikan sa langit. Basaha ang hugpong sa mga pulong nga “panglakaw kamo sa gawas aron sa pagsugat kaniya” (bersikulo 19), ug tabangi ang mga bata nga mosubli sa hugpong sa mga pulong.

• Ilalom sa lingkuranan sa matag bata, pagtago og usa ka litrato nga nagpakita og butang nga atong mahimo aron sa pag-andam alang sa Ikaduhang Pag-anhi ni Jesukristo (sama sa pagbasa sa mga kasulatan, pagpaambit sa ebanghelyo, o pagserbisyo sa atong mga pamilya). Ipapangita sa mga bata ang mga hulagway, ug hisguti kon sa unsang paagi nga ang pagbuhat niining mga butanga makatabang kanato nga maandam sa pagsugat sa Manluluwas kon mobalik na Siya.

• Kantaha og dungan ang usa ka awit mahitungod sa Ikaduhang Pag-anhi, sama sa “Kon Siya Moanhi Pag-usab” (Songbook sa mga Bata, 46–47). Ipaambit ang imong gugma alang sa Manluluwas ug sa imong mga pagbati mahitungod sa Iyang pagbalik dinhi sa yuta. Dapita ang mga bata sa pagpaambit usab sa ilang mga pagbati.

Doktrina ug mga Pakigsaad 133:52–53

Si Jesukristo mahigugmaon ug mabination.

Kining mga bersikulo naghulagway sa pipila sa daghang mga paagi nga gipakita sa Ginoo ang Iyang “mahigugmaon nga kalooy” ngadto sa Iyang katawhan. Unsay imong mabuhat aron matabangan ang mga bata nga mobati sa gugma sa Manluluwas alang kanila?

Posible nga mga Kalihokan

• Ipakita ang usa ka hulagway nga nagpakita nga si Jesus mahigugmaon ug mabination (tan-awa sa Libro sa mga Hulagway sa Ebanghelyo, nu. 42, 47). Hangyoa ang mga bata sa pagpaambit og uban pang mga butang nga gibuhat ni Jesus sa pagpakita sa Iyang gugma ug pagkamabination. Basaha ang hugpong sa mga pulong nga “sila mohisgot sa mahigugmaon nga kalooy sa ilang Ginoo” (bersikulo 52), ug tabangi ang mga bata sa paghunahuna og mga paagi nga makasulti sila sa uban mahitungod sa gugma sa Manluluwas.

• Kantaha ang usa ka awit mahitungod sa gugma sa Manluluwas, sama sa “Si Jesus Ang Atong Mahigugmaong Higala” (Songbook sa mga Bata, 37). Ipaambit ang imong pagpamatuod kon giunsa pagpakita sa Manluluwas ang iyang gugma alang kanimo.

Doktrina ug mga Pakigsaad 134:5

Gusto sa Ginoo nga akong sundon ang balaod.

Ang gagmay nga mga bata adunay mga lagda nga sundon diha sa panimalay, sa eskwelahan, ug sa ubang dapit. Makatabang ka nga ilang masabtan nga ang Ginoo nagpaabut kanato nga mosunod sa mga lagda ug mga balaod sa komunidad ug sa nasud.

Posible nga mga Kalihokan

• Dapita ang mga bata sa pagdula og yano nga dula nga dili magsunod og bisan unsang mga lagda, ug dayon ipadula nila kini nga adunay mga lagda. Sa unsang paagi nga ang mga lagda makatabang kanato? Ipahayag ang imong pasalamat alang sa mga balaod sa yuta.

• Tabangi ang mga bata nga mosubli sa ikadose nga artikulo sa hugot nga pagtuo. Hatagi og gibug-aton ang mahinungdanong mga pulong, sama sa “pagsunod, pagtahud, ug pagpaluyo,” ug istoryahi ang mga bata kon unsay buot ipasabut niadtong mga pulong. Ipaambit kanila nganong importante ang pagsunod sa balaod.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 133:4–5, 14–15

Ang Ginoo gusto nga ako limpyo.

Ang Doktrina ug mga Pakigsaad 133 makatabang sa mga bata nga masabtan kon unsaon pagpabilin sa ilang kaugalingon nga limpyo gikan sa kalibutanong mga impluwensya sa ilang palibut.

Posible nga mga Kalihokan

• Dapita ang mga bata sa pagbasa sa “Babel, Babelonia” diha sa Giya ngadto sa mga Kasulatan (scriptures.ChurchofJesusChrist.org) aron mahibalo kon unsa ang Babelonia ug unsay girepresentar niini. Dayon basaha og dungan ang Doktrina ug mga Pakigsaad 133:4–5, 14–15. Unsa ang gipasabut sa “gawas kamo gikan sa Babelonia”? (bersikulo 5). Unsa ang pipila ka dapit ug mga sitwasyon nga gusto sa Ginoo nga atong likayan? Unsay atong mahimo aron malikayan kini?

• Pagbutang og karatula sa usa ka kilid sa kwarto nga nag-ingon og “Zion,” ug pagbutang og laing karatula diha sa laing kilid nga nag-ingon og “Babelonia.” Pagsulat diha sa mga ginunting nga papel og mga pulong gikan sa Doktrina ug mga Pakigsaad 133:4–5, 14–15 nga naghulagway sa Zion o Babelonia (sama sa “dautan,” “limpyo,” o “kalaglagan”), ug dapita ang mga bata sa pagbutang sa matag papel ubos sa tukma nga karatula.

Doktrina ug mga Pakigsaad 133:19–25, 46–52

Si Jesus ang maghari dinhi sa yuta.

Si Elder D. Todd Christofferson miingon, “Hilabihan kaimportante nga maandam ang kalibutan sa Ikaduhang Pag-anhi ni Ginoong Jesukristo” (“Pagpangandam alang sa Pagbalik sa Ginoo,” Liahona, Mayo 2019, 81). Unsaon nimo pagtabang ang mga bata nga makasabut kon unsaon nila pag-apil niining mahinungdanon kaayo nga buhat?

Posible nga mga Kalihokan

• Ipakita ang hulagway gikan sa outline niining semanaha sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa paghimo og usa ka lista sa mga butang nga ilang nahibaloan mahitungod sa Ikaduhang Pag-anhi ni Jesukristo. Dayon, gamit ang Doktrina ug mga Pakigsaad 133:19–25, 46–52, dapita sila sa pagdugang og mga butang ngadto sa ilang lista. Ipaambit ang imong pagpamatuod nga ang Ikaduhang Pag-anhi mahimong usa ka malipayong adlaw alang sa mga matarung.

• Aron matabangan ang mga bata nga makasabut sa bersikulo 19, istoryahi sila kon unsaon kaha sa usa ka pangasaw-onon pagpangandam alang sa iyang kasal (tingali usa ka tawo kinsa bag-ohay lang nga naminyo makatabang niini nga panag-istoryahanay). Sa unsa nga paagi nga susama kita sa usa ka pangasaw-onon nga nangandam “alang sa pag-anhi sa Pamanhonon,” nga si Jesukristo? Kon sa imong hunahuna makatabang, ribyuha ngadto sa mga bata ang sambingay sa napulo ka mga birhen, (tan-awa sa Mateo 25:1–13). Nganong importante man nga mangandam alang sa Ikaduhang Pag-anhi sa Manluluwas? Unsay atong mabuhat karon aron maandam?

Doktrina ug mga Pakigsaad 134:1–2

Gusto sa Ginoo nga akong sundon ang balaod.

Bisan kon adunay nagkalain-laing mga matang sa panggamhanan sa tibuok kalibutan, gusto sa Ginoo nga atong “[buligan] ug [ampingan ang] … mga panggamhanan diin [kita] nagpuyo” (Doktrina ug mga Pakigsaad 134:5).

Posible nga mga Kalihokan

• Dapita ang mga bata sa paglista sa mga lagda o mga balaod nga ilang gisunod. Unsa kaha ang mahitabo sa kinabuhi kon walay usa nga misunod niining mga balaod? Basaha ang Doktrina ug mga Pakigsaad 134:1–2 ngadto sa mga bata, nga tabangan silang makasabut sa bisan unsa nga mga pulong o mga hugpong sa mga pulong nga tingali wala nila masabti. Nganong gusto man sa Ginoo nga kita adunay panggamhanan ug mga balaod?

• Isulat ang matag pulong o hugpong sa mga pulong gikan sa ika-onse ug ika-dose nga mga artikulo sa hugot nga pagtuo sa laing piraso sa papel. Isagul-sagol ang mga papel, ug hangyoa ang mga bata nga magtinabangay sa pagpahimutang niini sa eksakto nga pagkahan-ay. Unsaon nato pagpakita nga kita nagtuo sa unsay gitudlo niining mga artikulo sa hugot nga pagtuo?

pagkat-on nga icon

Awhaga ang Pagkat-on diha sa Panimalay

Hatagi og usa ka pangutana ang matag bata nga ipangutana ngadto sa usa ka sakop sa pamilya didto sa panimalay. Sama pananglit, kon nahibalo ka mahitungod sa Ikaduhang Pag-anhi sa Manluluwas, ang bata mahimong mangutana, “Unsay atong mabuhat aron maandam alang sa pag-anhi pag-usab ni Jesus?”

Pagpalambo sa Atong Pagtudlo

Tinguhaa ang pagsabut sa mga bata nga imong gitudloan. Nakaila ka sa mga bata nga imong gitudloan. Ang mga ideya niini nga outline mahimong usabon aron labing maayong makatubag sa ilang mga panginahanglan. Aron matabangan ka, adto sa tanang kalihokan nga gilista niini nga outline, dili lang kadtong gitumong alang sa edad sa mga bata nga imong gitudloan. (Tan-awa sa Pagtudlo sumala sa Pamaagi sa Manluluwas, 7.)

pahina sa kalihokan: gusto sa Ginoo nga mosunod ko sa balaod