si Joseph Smith nagtudlo didto sa Nauvoo

Si Joseph Smith didto sa Nauvoo, 1840, ni Theodore Gorka

Nobyembre 8–14

Doktrina ug mga Pakigsaad 129–132

“Kon Kita Makadawat og Bisan Unsa nga Panalangin gikan sa Dios, Kini Tungod sa Pagsunod”

Si Elder David A. Bednar mipasabut: “Ang pag-istorya ug pagsulti lamang dili pagtudlo. Ang pagsangyaw sa ebanghelyo sa pamaagi sa Ginoo naglakip sa pag-obserbar ug pagpaminaw ug pag-ila” (“Becoming a Preach My Gospel Missionary,” New Era, Okt. 2013, 6). Unsa ang gitudlo sa Espiritu kanimo samtang nagtudlo ka ug naminaw sa mga bata nga imong gitudloan?

Irekord ang Imong mga Impresyon

pagpaambit nga icon

Dapita ang Pagpaambit

Pagpili og hilisgutan gikan sa mga seksyon 129–32, ug tuguti ang mga bata nga mosulti kanimo kon unsay ila nang nakat-unan mahitungod niana nga hilisgutan. Sama pananglit, unsay ilang nahibaloan mahitungod sa Langitnong Amahan o sa Dios nga Kapangulohan? mahitungod sa mahangturong kaminyoon? mahitungod sa celestial nga gingharian?

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 130:20–21; 132:5

Ang mga panalangin nagagikan sa pagkamasulundon ngadto sa Dios.

Si Joseph Smith nagtudlo nga ang tanang panalangin gikan sa Dios gipasikad sa atong pagkamasulundon ngadto sa Iyang mga balaod. Unsaon nimo pagtudlo kini nga baruganan sa paagi nga masabtan sa mga bata?

Posible nga mga Kalihokan

• Ipaambit ang usa ka yano nga pagtandi ngadto sa mga bata nga nagpakita kon unsa kaimportante ang pagsunod sa mga instruksyon; sama pananglit, pakig-istorya kanila mahitungod sa mga lakang nga kinahanglan gayud natong sundon sa pag-andam og pagkaon o pagdula o paghimo og usa ka butang. Unsa ang mahitabo kon dili kita mosunod sa mga instruksyon? (Tingali ikaw adunay personal nga kasinatan nga imong mapaambit.) Basaha ang Doktrina ug mga Pakigsaad 130:21, ug itandi kining mga instruksyon ngadto sa mga sugo nga kinahanglan gayud natong sundon aron makadawat sa mga panalangin gikan sa Langitnong Amahan.

• Hangyoa ang mga bata kon makahunahuna ba sila og usa ka higayon sa dihang misunod sila og usa sa mga sugo sa Dios. Unsa ang ilang gibati? Kantaha og dungan ang usa ka awit mahitungod sa pagsunod, sama sa “Sunda ang Kasugoan” (Songbook sa mga Bata, 68–69), ug sa pag-ila sa mga panalangin sa pagkamasulundon nga gihisgutan diha sa awit. Hisguti ang pipila sa mga butang nga gipabuhat sa Dios kanato. Unsaon kita pagpanalangin sa Dios kon motuman kita niadtong mga sugo?

Doktrina ug mga Pakigsaad 130:22

Ang Langitnong Amahan ug si Jesukristo adunay imortal nga pisikal nga mga lawas.

Kon makasabut kita nga ang Dios nga Amahan ug si Jesukristo adunay mga lawas sama kanato, mobati kita nga mas mahiduol Kanila, ug ang atong relasyon ngadto Kanila mapalig-on.

Posible nga mga Kalihokan

• Ipakita sa mga bata ang usa ka hulagway ni Jesukristo, ug dapita sila sa pagtudlo ngadto sa Iyang mga mata, ba-ba, ug uban pang mga bahin sa Iyang lawas. Dayon dapita sila sa pagbarug ug sa pagtudlo niadtong samang mga bahin sa ilang kaugalingong mga lawas. Basaha gikan sa Doktrina ug mga Pakigsaad 130:22: “Ang Amahan adunay lawas nga unod ug mga bukog … ; ang Anak usab.” Ipamatuod nga ang atong mga lawas susama sa mga lawas sa Langitnong Amahan ug ni Jesukristo.

• Kantaha og dungan ang usa ka awit mahitungod sa atong mga lawas, sama sa “Ulo, Abaga, Tuhod ug Tiil” (Songbook sa mga Bata, 129), ug dapita ang mga bata sa paghimo og mga aksyon nga mag-uban sa mga pulong. Hangyoa ang mga bata sa pagsulti kanimo og pipila ka mga butang nga ilang mabuhat gamit ang ilang mga lawas. Ipahayag ang imong pasalamat alang sa lawas nga gihatag sa Dios kanimo. Unsaon nato pagpakita nga mapasalamaton kita niining espesyal nga gasa?

• Dapita ang mga bata sa pagdrowing og mga hulagway sa Langitnong Amahan, ni Jesukristo, ug sa ilang kaugalingon. Tabangi sila nga makakita kon sa unsang paagi nga ang atong mga lawas susama sa Langitnong Amahan ug ni Jesukristo.

Doktrina ug mga Pakigsaad 132:19

Ang Langitnong Amahan mihimo niini nga posible alang sa mga pamilya nga mag-uban sa kahangturan.

Pinaagi sa gahum sa Ginoo sa pagsilyo ug sa mga ordinansa sa templo, ang atong mga relasyon sa pamilya molungtad sa kahangturan kon motuman kita sa atong mga pakigsaad.

Posible nga mga Kalihokan

• Tabangi ang mga bata sa paghunahuna og mga ehemplo sa mga butang nga dili molungtad sa hangtud—pagkaon nga mapan-os, mga bulak nga malawos, ug uban pa. Ipakita ang litrato sa imong pamilya, ug ipaambit kon unsay imong gibati mahitungod niini. Ipamatuod nga gihimo kining posible sa Ginoo, pinaagi sa mga ordinansa sa templo, nga ang mga pamilya molungtad sa kahangturan.

• Ablihi ang Doktrina ug mga Pakigsaad ngadto sa seksyon 132, ug sultihi ang mga bata nga usa kini ka pagpadayag ngadto ni Joseph Smith mahitungod sa kaminyoon ug sa mga pamilya. Ipakita kanila ang bersikulo 19, ug ipasabut og maayo ang mga pulong nga “hangtud sa tanan nga kahangturan” samtang magbasa ka niini. Dapita ang mga bata sa pagbasa niining mga pulong uban nimo.

• Tabangi ang mga bata sa paghimo sa mga munyeka nga hinimo sa papel nga nagrepresentar sa mga sakop sa ilang pamilya (tan-awa sa pahina sa kalihokan niining semanaha). Guntinga kini, ug isulod kini sa usa ka sobre o isukip kini kauban sa klip sa papel aron magrepresentar sa gahum sa pagsilyo nga makapahimo sa atong mga pamilya nga mahangturon.

  babaye ug batang babaye diha sa nataran sa templo

  Ang mga ordinansa sa templo motugot nga ang mga pamilya magkauban sa kahangturan.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 130:18–19

Gusto sa Langitnong Amahan nga makabaton ko og kahibalo ug salabutan.

Daghang butang nga atong maangkon niining kinabuhia nga dili mauban nato ngadto sa sunod nga kinabuhi. Apan ang atong “kahibalo ug salabutan” mauban (Doktrina ug mga Pakigsaad 130:19).

Posible nga mga Kalihokan

• Hangyoa ang mga bata sa pagpaambit kanimo og usa ka butang nga ilang nakat-unan sa eskwelahan o gikan sa ilang mga ginikanan. Dapita sila sa pagbasa sa Doktrina ug mga Pakigsaad 130:18–19 aron masayud kon unsay mahitabo sa atong kahibalo ug salabutan sa sunod nga kinabuhi.

• Unsa ang gitudlo sa bersikulo 19 kon unsaon nato pagbaton og kahibalo ug salabutan? Unsaon nato aron mahimong makugihon ug masulundon samtang magtinguha kita nga makakat-on? (Alang sa dugang pa bahin niining hilisgutan, tan-awa sa “Edukasyon” diha sa Alang sa Kalig-on sa mga Kabatan-onan [mga pahina 9–10].)

Doktrina ug mga Pakigsaad 130:20–21; 132:5, 21–23

Ang mga panalangin nagagikan sa pagkamasulundon ngadto sa Dios.

Pamalandungi kon unsaon sa Ginoo pagpanalangin kanimo kon mosunod ka sa Iyang mga balaod. Unsa nga mga kasinatian ang imong mapaambit ngadto sa mga bata aron pagdasig kanila?

Posible nga mga Kalihokan

• Kantaha ang usa ka awit mahitungod sa pagkamasulundon, sama sa “Sunda ang Kasugoan” (Songbook sa mga Bata, 68–69), ug dapita ang mga bata sa pagbasa sa Doktrina ug mga Pakigsaad 130:20–21 ug 132:5. Tabangi sila sa pagpangita sa mga pulong ug mga ideya diha sa kasulatan nga susama niadtong anaa sa awit. Sa unsang paagi kita makadawat og mga panalangin gikan sa Dios? Hangyoa ang mga bata sa pagpaambit kon giunsa sila pagpanalangin tungod sa pagsunod sa mga sugo sa Dios.

• Basaha og dungan ang Doktrina ug mga Pakigsaad 132:21–23, ug dapita ang mga bata sa pagdrowing og mga hulagway nga nagrepresentar sa unsay ilang nakat-unan gikan niining mga bersikulo. Awhaga sila nga mahimong mamugnaon, ug isugyot nga maglakip diha sa ilang mga drowing sa mga balaod o mga sugo nga makatabang kanato aron magpabilin diha sa pig-ot nga dalan paingon sa kinabuhing dayon.

Doktrina ug mga Pakigsaad 131:1–4; 132:15, 19

Ang Langitnong Amahan mihimo niini nga posible alang sa mga pamilya nga mag-uban sa kahangturan.

Bisan unsa pa man ang kasamtangang sitwasyon sa atong pamilya, makahimo kita og mga pagpili karon nga moandam kanato sa pagdawat sa mga panalangin sa usa ka mahangturong pamilya sa umaabut.

Posible nga mga Kalihokan

• Hangyoa ang pipila ka bata sa pagbasa sa Doktrina ug mga Pakigsaad 131:1–4 ug ang uban sa pagbasa sa 132:15. Tabangi sila nga makadiskubre kon unsay gitudlo niining mga bersikulo mahitungod sa kaminyoon. Pagpili og mahinungdanong mga hugpong sa mga pulong gikan sa 132:19 (sama sa “kon ang tawo mangasawa,” “walay katapusan nga pakigsaad,” “gibugkos,” “mosunod sa akong pakigsaad,” “hangtud sa tanan nga kahangturan,” ug “hangtud sa hangtud”), ug hangyoa ang mga bata sa pagpangita niining mga hugpong sa mga pulong diha sa bersikulo. Unsa ang gitudlo niining mga hugpong sa mga pulong mahitungod sa kaminyoon?

• Kantaha ang “Mga Pamilya Mahimong Manag-uban sa Kahangturan” (Songbook sa mga Bata, 98), o ribyuha ang “Kapitulo 54: Usa ka Pagpadayag mahitungod sa Kaminyoon” (Mga Istorya sa Doktrina ug mga Pakigsaad, 198). Hangyoa ang klase sa pagpaminaw ug mahimong andam nga mopaambit kon unsa ang kinahanglan gayud natong himoon aron ang atong mga pamilya mahimong mahangturon. Ipamatuod nga bisan unsa pa ang kasamtangang sitwasyon sa atong pamilya, mahimo kitang mangandam sa atong kaugalingon nga mahimong kabahin sa usa ka mahangturon nga pamilya.

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagsulti sa ilang mga pamilya kon unsa nila sila kamahal ug gustong mahiusa isip usa ka pamilya sa kahangturan.

Pagpalambo sa Atong Pagtudlo

Magmahimong sensitibo sa mga sitwasyon sa pamilya. “Ang mga bata karon anaa sa nagkalain-lain ug komplikado nga mga kahimtang sa pamilya. … [Kita] kinahanglang motabang [niadtong] mibati nga nag-inusara, napasagdan, o wala mahisakop” (Neil L. Andersen, “Bisan Kinsa nga Magadawat Kanila, Magadawat Kanako,” Liahona, Mayo 2016, 49, 52).

pahina sa kalihokan: ang mga pamilya mahimong mag-uban sa hangtud