2–8 ni Okosita

Vunau kei na Veiyalayalati 85–87

“Mo Dou Tudei ena Vanua Tabu”

Baleta ni sa yalani tu na nomu gauna vata kei ira na gone, qara na veituberi vakayalo mo kila na ivakavuvuli cava so mai na ivolanikalou mo vakadreta. Vakararavi ki na veivakauqeti o ciqoma.

Vola na Veika o Vakauqeti Kina

Sureta na Veiwasei

Vakaraitaka vei ira na gone eso nai yaloyalo se drau ni pepa eso ni itaviqaravi o sa vakayagataka ena lesoni sa oti oqo, ka sureti ira na gone me ra wasea na ka era nanuma ka vulica baleti ira, ena loma ni kalasi se mai ivale.

Vakavulica na iVunau: Gone Sobu

Vunau kei na Veiyalayalati 85:6

Na Yalo e vosa ena “domo lailai malumu.”

E kaya o Elder Richard G. Scott, “Kevaka o sega ni rawata tu e dua na ka ena nomu veimaliwai kei ira na nomu gonevuli mai na nodra vukei ni vakila ka muria na veivakauqeti ni Yalo, o sa na vakalougatataka vakalevu ka vakatawamudu sara na nodra bula” (“To Learn and to Teach More Effectively” [ Brigham Young University Education Week devotional, Aug 21, 2007], 5, speeches.byu.edu).

iTaviqaravi e Rawa ni Caka

• Wilika vei ira na gone na sala e vakamacalataka kina o Josefa Simici na Yalo: “Io, sa kaya vakaoqo na domo lailai malumu” (Vunau kei na Veiyalayalati 85: 6). Kerea na gone mera vakayacana eso na ka e lailai (vakaraitaka na iyaloyalo eso ke ra gadreva na veivuke). Sureti ira mera lolou sobu ki na qele mera vakalailaitaki ka toka malua vakataki ira. Vukei ira mera vakasamataka na sala e rawa ni lailai kina e dua na domo, ka laiva mera vakatovotovotaka ni rogoca tu ka vosa voli ena dua na domo lailai. Tukuna na gauna eso a vosa kina vei iko na Yalo ena dua na domo lailai, malumu.

• Vakavulica vei ira na gone e dua na sere baleta na Yalo, me vaka na “Jisu Karisito” (iVolanisere ni Gonelalai, 56). Sureti ira me ra lagata vata kei iko ena vakasolokakana. Na cava e vakavulica na sere oqo me baleta na Yalo Tabu? Vukei ira na gone mera nanuma na gauna era a rairai vakila kina na Nona veivakayarayarataki (vaka na gauna ni masu, laga sere ni lotu, se vukei ira tiko na tani).

Vunau kei na Veiyalayalati 86:11

Au rawa ni vaka tu na rarama kivei ira na tani.

Wase 86 e vakamacalataka na bibi ni cakacaka e vinakata na Turaga vei ira na Nona italai ena iotioti ni gauna. Dua na sala era rawa ni veivuke kina na gone ena cakacaka oqo oya mera seraka tu kivei ira na tamata wavoliti ira.

iTaviqaravi e Rawa ni Caka

• Wilika vei ira na gone na malanivosa oqo mai na Vunau kei na Veiyalayalati 86:11: “Dou sa kalougata kevaka dou sa tudei tiko ena noqu loloma, mo dou vu ni rarama vei ira na Matanitu Tani [se na tamata ka sega ni tiko vei ira na kosipeli].” E vakalougatataki keda vakacava na rarama? E na vakabeka evei ke sega vei keda na rarama? Eda rawa vakacava ni dua na rarama vei ira na tamata tale eso ka sega tu ni kila na kosipeli? Vukea na gone me ra vakasamataka na sala eso eda rawa ni wasea kina na veika vinaka i Jisu vei ira na tani.

• Kerea na gone mera raitayaloyalotaka ni tovolea tiko e dua na itokani me lako ena butobuto (bokoca na cina ke na veivuke). Cava na vuna e dredre kina na lako ena butobuto? Na cava eda rawa ni cakava meda vukea kina na noda itokani? Vakamacalataka ni gauna eda muria kina na iVakabula, e sa vakataka na vakacaudrevi ni cina me vakaraitaka na sala vei ira na tani.

• E levu tu na italanoa ena mekasini na Liaona kei na iTokani me baleta na ivakaraitaki vinaka ni gone eso. Vakaraica e dua mo wasea vei ira na gone ka na vakauqeti ira mera ivakaraitaki vinaka talega.

Vunau kei na Veiyalayalati 87

Sa rawa ni “vanua tabu” na noda itikotiko.

E sega ni dua na itikotiko e sa taucoko, ia sa tiko na ka eso eda rawa ni kitaka kece me yaco kina na noda itikotiko me vanua tabu ni vakacegu.

iTaviqaravi e Rawa ni Caka

• Vakamacalataka vei ira na gone ni a lomaleqataka o Josefa Simici na veika a yaco voli e vuravura. Vakalekalekataka na ikau ni wase 87, se wilika na “Chapter 30: A Revelation about War” (Doctrine and Covenants Stories, 117– 18; raica talega na vidio ena ChurchofJesusChrist.org). Kerei ira na gone mera vakarogoca na veika e rairai vakavuna na lomaleqa i Josefa. Me vakatavulici na ka e kaya na Turaga meda kitaka ena vu ni leqa eso oya, wilika na Vunau kei na Veiyalayalati 87:8.

• Vakaraitaka na iyaloyalo ni dua na valetabu, ka wasea na vuna e vanua tabu kina na valetabu. Vakaraitaka na iyaloyalo ni dua na itikotiko, ka vukea na gone mera vakasamataka na sala era rawa ni kitaka kina na nodra itikotiko me ka tabu vaka na valetabu (raica na draunipepa ni itaviqaravi ena macawa oqo). Cava na vuna eda vinakata kina ni tiko ena vanua tabu?

Vakavulica na iVunau: Gone Qase Cake

Vunau kei na Veiyalayalati 85:6

Na Yalo e vosa ena “domo lailai malumu.”

Sa vuqa tu na veivakasosataki e vuravura e rawa ni dredre kina meda rogoca na Yalo. O na vukea vakacava na gone mera rogoca na domo ni Yalo?

iTaviqaravi e Rawa ni Caka

• Taroga na gone na cava era na kaya ke dua e tarogi ira se ra kila vakacava na gauna e vosa kina vei ira na Yalo Tabu. Sureti ira mera wilika e dua na sala a vakamacalataka kina o Josefa Simici na domo ni Yalo ena Vunau kei na Veiyalayalati 85: 6.

• Vakatagitaka vakamalua e dua na serenilotu se sere ni gone, ka kerea e dua na gone me vakilakila na sere cava oya ni ra vakasosa voli na kena vo, vaka na vakasausau se vakabutubutu. Qai kerea na vo ni gone mera muduka, ka veivosakitaka na sala e vakakina oqo na rogoci ni Yalo Tabu ni da vagalalataka na veivakasosataki mai na noda bula. Vukea na gone mera vakasamataka na veivakasosataki era rawa ni vagalalataka me rawa ni ra vakila wasoma kina na Yalo.

Vunau kei na Veiyalayalati 86

Au rawa ni veivuke ni sokumuna na tamata ni Kalou.

Na vosa vakatautauvata ni sila vinaka kei na sila ca e sa baleta na “veisiga e muri, ena gauna sara ga oqo” (Vunau kei na veiyalayalati na 86:4). Vakayagataka na vosa vakatautauvata oqo me vukea nodra vakauqeti na gone mera vakaitavi ena “kumuni vata ni sila vinaka” (tikina e 7).

iTaviqaravi e Rawa ni Caka

• Tukuna vei ira na gone na vosa vakatautauvata ni sila vinaka kei na sila ca, se sureta e dua na gone me talanoataka (raica na Maciu 13:24–30). Sureta na gone mera droinitaka na iyaloyalo ni dua na ka mai na vosa vakatautauvata. Qai wilika vata na Vunau kei na Veiyalayalati 86:1– 7, ka sureta na gone mera vola ena nodra droini na cava e matataka na ka era droinitaka.

• Vakarautaka e vica na iyaloyalo se droini lalai ni sila, ka vunitaka wavolita na rumu. Sureta na gone yadua me veivuke ni kumuna vata na sila ka vola toka kina na yaca ni dua era rawa ni “kumuna vata” vei Jisu Karisito. Na cava na ibalebale ni nodra kumuni vata na tamata vei Jisu Karisito? Na cava na sala eso eda rawa ni vakayacora kina? Na cava na ibalebale meda “tudei tiko ena loloma [ni iVakabula]”, ka na vukei keda vakacava oya ni vakasokumuna na tamata kivei Koya? (Vunau kei na Veiyalayalati 86:11).

Vunau kei na Veiyalayalati 87

Au rawa ni “tudei … ena vanua tabu.”

Era na sotava na gone o vakavulica na veika rerevaki vakayalo ka vakayago ena nodra bula taucoko. Sa rawa ni o veivuke ena vakarautaki ni nodra sotava na veika rerevaki oya ena nodra vakavulici mera kunea ka tudei tu ena vanua tabu.

Na veiqaravi ena valetabu sa dua na sala eda rawa ni veivuke kina ni vakasokumuni ira na tamata ni Kalou.

iTaviqaravi e Rawa ni Caka

• Wilika vata na Vunau kei na Veiyalayalati 87:6 me vulici na veika e kaya na Turaga ni na yaco ena gauna mai muri. Kerea na gone mera veivosakitaka na bolebole eso era sotava tu ena so na gauna na nodra icaba. Sureta me ra raica ena tikina e 8 na ka e tukuna na Turaga me da kitaka ena veigauna dredre. Tukuna vei ira na gone na vanua tabu eso ena nomu bula.

• Vukea na gone mera cakava e dua na lisi ni vanua tabu, vakanananu tabu, kei na cakacaka tabu eso e vukei ira ni sotava na ka rerevaki vakayalo (me baleta na kena vakasama, raica na vidio “Standing in Holy Places” and “Stand Ye in Holy Places—Bloom Where You’re Planted,” ChurchofJesusChrist.org). Sureta mera maroroya toka na nodra lisi ka goleva ena gauna e gadrevi kina.

Vakauqeta na Vuli e Vale

Sureta na gone mera digitaka e dua na ka era na kitaka me caka kina na nodra itikotiko se nodra bula me dua na “vanua tabu.”

Vakatorocaketaki Noda Veivakavulici

Vakayagataka nomu kaukauwa ni vakasama. Kakua ni yalani iko ki na vakasama ni taviqaravi eso e vakatututaki ena ituvatuva oqo. Na veivakasama oqo ena vakacilava kina na nomu vakasama ni bulibuli ka. Vakasamataka na ka era na taleitaka na gone ena nomu kalasi kei na ka ena vukea nodra vuli.