16–22 ni Okosita

Vunau kei na Veiyalayalati 89–92

“Ai Vakavuvuli ka Salavata kei na Kena Yalayala”

Ni ko vulica na dina eso ena Vunau kei na Veiyalayalati 89–92, vakasamataka vagumatua na sala eso o rawa ni vukea kina na gone mera kila vakamatata.

Vola na Veika o Vakauqeti Kina

Sureta na Veiwasei

Sureta na gone mera droinitaka ka tukuna na ka vinaka eso era sa cakava ena macawa oqo me qarauni kina na yagodra kei na yalodra.

Vakavulica na iVunau: Gone Sobu

Vunau kei na Veiyalayalati 89

Au na vakalougatataki ni’u talairawarawa tu ki na Vosa ni Vuku.

Vakavulica na gone ni yagoda e sa isolisoli mai vua na Tamada Vakalomalagi ka sa vinakata o Koya meda qarava vakavinaka.

Na yagoda e sa isolisoli mai vua na Kalou.

iTaviqaravi e Rawa ni Caka

• Me vukea na gone mera kila vakavinaka na ivakaro ni Turaga ena Vunau kei na Veiyalayalati 89:10–17, droinitaka se vakaraitaka na iyaloyalo ni veika vinaka eda rawa ni kania se cakava me bulabula kina na yagoda (raica talega na draunipepa ni itaviqaravi: ena macawa oqo). Vukea talega na gone mera kila vakavinaka ni alakaolo, tavako, ti, kofi, kei na waigaga tale eso e vakaleqa na yagoda ka sa veivakasalataki na Turaga meda kakua ni vakayagataka. Sureta na gone mera digitaka e dua na ka era rawa ni cakava ena macawa oqo me bulabula tiko kina na yagodra.

• Sureta na gone mera veivukevuke ni droinitaka e dua na iyaloyalo ena papa ka matataka e dua na ka e vakavulici ena na Vosa ni Vuku. Me ra qai vakilakila na vo ni gone na ka e droinitaka tiko na tamata yadua. Veivosakitaka na ivakaro ni Turaga ena wase 89 e semati ki na droini.

• Vakayagataka na ivakaraitaki oqo, se so tale o vakasamataka, me vakaraitaka na sala eda sa vakalougatataki kina ena talairawarawa ki na Vosa ni Vuku (raica na Vunau kei na Veiyalayalati 89:18–21). Cakava vata e dua na vakatovotovo, vaka na taubale se cici voli, ka qai vakalecalecataka ni o sa “ceguoca” se “malumalumu mai” (tikina e 20). Vakadinadinataka na yalayala eso ni Turaga.

• Vakaraitaka e dua na yaloyalo ni valetabu, ka sureta na gone mera vakamacalataka na ka era raica. Vakayagataka e dua na sere ni bulabula vakayago, vaka na “Koni solia Mai vei Au Nomuni Vale” (Volanisere ni Gonelalai, 73), me vakavulici ira na gone ni sa vaka na valetabu ni yaloda na yagoda ka sa vinakata na Kalou meda vakabulabulataka tiko na yagoda. Vukea na gone mera vakasamataka na sala eso eda rawa ni qarava kina na yagoda, ka mera qai matanataka.

Vunau kei na Veiyalayalati 90:5

Sa solia vei keda na Kalou o ira na parofita mera tuberi ka taqomaki keda.

Vukea na gone mera kila vakamatata na sala era rawa ni vukei keda kina na parofita ni Kalou meda taqomaki tu mai na cava ni bula.

iTaviqaravi e Rawa ni Caka

• Vakaraitaka vei ira na gone na kedra itaba na parofita ni gauna makawa, ka tukuna vei ira na sala era veivakasalataki kina na parofta oqo vei ira na tamata ena nodra gauna. (Ena vakasama eso, raica na “Vakamuria na Parofita,” Volanisere ni Gonelalai,, 58-59.)

• Cava na vuna meda vakarorogo kina vei ira na parofita ni Kalou? Vakaraitaka na kena itaba na noda parofita bula nikua, ka wasea na veika e sa vakavulici se vakaroti keda kina ena gauna wale tiko ga oqo. Sureta na gone mera vakasamataka na sala eso eda rawa ni muria kina na parofita. Wasea na nomu ivakadinadina me baleta na dina era vakavulici ena Vunau kei na Veiyalayalati 90:5. (Kila tu ni “ivakatakila” e kena ibalebale na ivakatakila se o ira na parofita ka ciqoma.)

Vakavulica na iVunau: Gone Qase Cake

Vunau kei na Veiyalayalati 89

Sa dau vukei au na vosa ni Vuku me’u bulabula tu vakayago ka vakayalo.

A vakasalataki ira na itabagone o Elder Gary E. Stevenson mera tuva taumada na ka era na cakava ni yaco na veitemaki ni alakaolo se waigaga. Qai vakavulica o koya, “O na raica ni lailai na veirawai ni veitemaki vei iko. O sa na rairai vakatulewataka oti tu na sala mo na vakavakarau kina kei na ka o na cakava. O na sega ni gadreva edua na vakatulewa ena veigauna kece” (“Nomu iVolaniqito ni Matabete,” Ensign se Liaona, Me 2019, 48). Vakauqeta na gone o vakavulica mera navuca oqo—ena vo ni nodra bula—mera na bulataka na Vosa ni Vuku.

iTaviqaravi e Rawa ni Caka

• Wasei ira na gone kina ruarua na ilawalawa, ka kerea e dua na ilawalawa me wilika na Vunau kei na Veiyalayalati 89:1–4 kei na ilawalawa kadua me wilika na tikina e 18–21. Kerea mera vakasamataka vagumatua na taro eso vakaoqo: Cava na vuna e solia kina vei keda na Turaga na Vosa ni Vuku? E rawa vakacava ni vakalougatataki au vakayago ka vakayalo na bulataki ni Vosa ni Vuku?

• Cakava eso na vosa me vakaleweni ena vakayagataki ni veimalanivosa mai na Vunau kei na Veiyalayalati 89, vaka na “ sa soli me yaga vei ira na tamata kei ira na manumanu yavaiva” se “Io era na ka sega ni ceguoca” (tikina e 14, 20). Sureta na gone mera veisasa ka vakaraica na isaunitaro ena wase 89. E rawa ni ra tuva na vosa na gone ki na veiwase oqo: veika vinaka ki na yagoda, veika ca ki na yagoda, kei na veivakalougatataki.

• Sureta e dua na gone me wilika na Vunau kei na veiyalayalati na 89:4 kei na dua tale me wilika na vosacavuti e cake mai vei Elder Stevenson. Cava na vuna meda navuca kina oqo meda talairawarawa ki na Vosa ni Vuku mai na kena waraki me yacova na gauna ni veivakatovolei? Vukea mera dramataka na gone na cava era na cakava kevaka edua, ke nodra itokani mada ga, e solia vei ira e dua na ka e veivorati kei na Vosa ni Vuku. E taqomaki keda vakacava na talairawarawa ki na Vosa ni Vuku?

Vunau kei na Veiyalayalati 90:2, 5, 14–16

E taura tu na Mataveiliutaki Taumada “na idola ni matanitu.”

Na ivakasala ni Turaga me baleta na Mataveiliutaki Taumada ena 1833 (Josefa Simici, Sidini Rikitoni, kei Veretariki G.Viliame e rawa ni vukea me vaqaqacotaka na nodra ivakadinadina na gone me baleta na Mataveiliutaki Taumada ena gauna oqo.

iTaviqaravi e Rawa ni Caka

• Sureta na gone mera vaqaqara ena Vunau kei na Veiyalayalati 90:14–16 ka vola na veika a kerea na Turaga me vakayacora na Mataveiliutaki Taumada. Vakaraitaka vei ira na gone na kedratou itaba na Mataveiliutaki Taumada ena gauna oqo, ka wasea e dua na ka me baleti ratou. (O rawa ni wilika na kedra itukutuku ni bula ena “Living Prophets and Church Leaders” ena ChurchofJesusChrist.org.) Wasea na nomu ivakadinadina me baleta na nodra veikacivi tabu kei na veivakalougatataki o sa ciqoma mai na muri ni nodra ivakasala.

• Railesuva kei ira na gone e dua na ka a vakavuvulitaka e dua na lewe ni Mataveiliutaki Taumada. Qai wilika vata na Vunau kei na Veiyalayalati 90:5. Dusimaka ni “ivakatakila” sa ra ivakatakila se o ira na parofita ka ciqoma. Na cava na ibalebale ni “ciqoma tu vakamamada … na ivakatakila”? Eda na vakaraitaka vakacava ni ra sa ka bibi vei keda o ira na parofita kei na veika era vakavulica?

Vunau kei na Veiyalayalati 91

Sa rawa ni vukei au na Yalo meu kila na ka dina.

Ni o wilika na ka a tukuna na Turaga vei Josefa Simici me baleta na Apokirifa, vakasamataka na sala e rawa ni vukei ira kina na gone na ivakasala oqo ni veidutaitaka na ka dina kei na ka cala era na sotava ena nodra bula taucoko.

iTaviqaravi e Rawa ni Caka

• Wilika vata na ulu ni iwase ni Vunau kei na Veiyalayalati 91 me vukei ira na gone ni kila vakavinaka se cava na Apokirifa (raica talega na iDusidusi ki na iVolanikalou, “Apocrypha,” scriptures.ChurchofJesusChrist.org). Vukea na gone mera vakasamataka na vanua tale eso, vaka na vakau itukutuku, eda na rairai raica kina e “vuqa na ka … e dina tu” kei na “vuqa na ka … e sega ni dina tu” (tikina e 1–2). Qai sureta na gone mera vakaraica na wase 91 mera vulica na ka e tukuna na Turaga eda rawa ni cakava meda veidutaitaka kina na ka dina kei na ka cala.

• Wilika vata na Vunau kei na Veiyalayalati 91:4–6, ka tarogi ira na gone se cava e vakavulica na veitikina oqo me baleta na Yalo Tabu. Sureta na gone mera wasea na ka era sotava ena gauna e “[vakatakila] kina na Yalo na dina” vei ira. Wasea talega na ka o sotava vakai iko. Ena sala cava tale e rawa ni vukei keda kina na Yalo?

Vakauqeta na Vuli e Vale

Sureta na gone mera wasea ki na nodra matavuvale na ka era sa vulica nikua ena qarauni ni yagodra kei na yalodra se na nodra takete ni talairawarawa tu ki na Vosa ni Vuku.

Vakatorocaketaki Noda Veivakavulici

Vakasaqara na veika e uqeti iko. Na idusidusi oqo era sega ni ivakasala e dodonu mo muria kece ni o veivakavulici. Ia, era sa nanumi me vakauqeta na nomu sasaga vakai iko ni o vakasamataka vagumatua na veika era gadeva tu na gone o vakavulica. (Raica na Veivakavulici ena iVakarau ni iVakabula, 7.)