batan-on sa gawas sa templo

Abril 26–Mayo 2

Doktrina ug mga Pakigsaad 45

“Ang mga Saad … Pagatumanon”

Isip usa ka magtutudlo, ang imong labing importante nga pagpangandam mao ang espiritwal. Sugdi pinaagi sa pagtuon sa Doktrina ug mga Pakigsaad 45 ug pag-ampo alang sa giya sa Espiritu Santo. Kini nga outline naghatag og mga ideya nga makatabang kanimo. Ikaw makakita usab og mga ideya sa outline niining semanaha sa Dali, Sunod Kanako—Alang sa mga Indibidwal ug mga Pamilya o sa Liahona o Friend.

Irekord ang Imong mga Impresyon

pagpaambit nga icon

Dapita ang Pagpaambit

Hangyoa ang mga bata kon gusto ba sila nga mopakigbahin sa butang nga ilang nakat-unan gikan sa mga kasulatan niining semanaha. Pagpili og usa nga mopakigbahin, ug hangyoa ang ubang mga bata sa pagpataas sa ilang mga kamot kon sila nakat-on sa susamang butang.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 45:32

Ako “magbarug sa balaan nga mga dapit.”

Sa Doktrina ug mga Pakigsaad 45:32, ang Ginoo mitudlo nga ang Iyang mga disipulo makakaplag og kasiguroan sa katapusang mga adlaw pinaagi sa pagbarug sa balaan nga mga dapit—mga dapit nga espesyal ngadto sa Ginoo. Unsaon nimo sa pagtabang ang mga bata nga makaila sa balaan nga mga dapit sa ilang kinabuhi?

Posible nga mga Kalihokan

• Pagbutang og mga litrato sa usa ka panimalay, gambalay sa usa ka simbahan, ug usa ka templo sa managlahi nga mga dapit sa tibuok kwarto. Paghatag og timailhan nga naghulagway niini nga mga dapit, ug dapita ang mga bata sa pagbarug duol sa litrato nga imong gihulagway. Basaha ang unang linya gikan sa Doktrina ug mga Pakigsaad 45:32. Pagpamatuod nga kita mapanalanginan kon kita mogahin og panahon sa balaan nga mga dapit sama sa atong mga panimalay, sa mga gambalay sa atong simbahan, ug sa templo. Hangyoa ang mga bata sa paghisgot mahitungod unsay ilang gibati sa dihang sila anaa sa balaan nga mga dapit sama niini.

• Dapita ang mga bata sa pagkompleto sa pahina sa kalihokan niining semanaha. Tabangi sila sa pagsulat sa “Ako makatabang sa akong panimalay nga mahimong usa ka balaan nga dapit” ug sa “Doktrina ug mga Pakigsaad 45:32” sa ilang drowing. Unsay ilang mahimo sa pagtabang sa ilang panimalay nga mahimong usa ka balaan nga dapit?

• Aron matabangan ang mga bata nga maghunahuna unsay gipasabut sa “dili mabalhin,” hangyoa sila sa pagbarug nga dili maglihok sulod sa usa ka minuto. Basaha ang unang linya gikan sa Doktrina ug mga Pakigsaad 45:32. Tabangi ang mga bata nga makasabut nga sa “pagbarug sa balaan nga mga dapit, ug … dili mabalhin” nagpasabut sa pagpili sa matarung sa tanang higayon, bisan unsa pay nahitabo. Dapita sila nga “dili mabalhin” gikan sa matarung nga mga hunahuna ug mga lihok.

Doktrina ug mga Pakigsaad 45:44–45

Si Jesukristo moanhi pag-usab.

Sa dihang ang mga Santos sa Kirtland, Ohio, nakadungog sa pagpadayag nga makita sa Doktrina ug mga Pakigsaad 45, nga naghisgot sa katapusan nga mga adlaw ug sa Ikaduhang Pag-anhi sa Manluluwas, sila malipayong midawat niini. Ikonsiderar unsaon nimo sa pagtabang ang mga bata nga makaandam nga malipayon alang sa Ikaduhang Pag-anhi.

Posible nga mga Kalihokan

• Tabangi ang mga bata sa paghunahuna unsay ilang bation kon sila makahibalo nga usa ka tawo nga espesyal ang moabut aron mobisita kanila, sama sa usa ka apohan o usa ka higala. Sa unsa nga paagi sila mangandam alang sa pagbisita? Ipakita ang usa ka litrato sa Manluluwas, ug basaha ang bahin o tanan sa Doktrina ug mga Pakigsaad 45:44–45. Sultihi ang mga bata unsay imong gibati mahitungod sa pag-anhi pag-usab sa Manluluwas, ug tuguti sila nga mopakigbahin sa ilang mga pagbati.

• Ipakita ang litrato sa Ikaduhang Pag-anhi sa Manluluwas (tan-awa sa outline niining semanaha sa Dali, Sunod Kanako—Alang sa mga Indibidwal ug mga Pamilya), ug hangyoa ang mga bata sa pagpakigbahin unsay ilang gibati sa dihang sila nakakita sa litrato. Ipakigbahin ang imong pagpamatuod nga si Jesukristo moanhi pag-usab.

• Kantaha ang usa ka awit mahitungod sa Ikaduhang Pag-anhi sa Manluluwas, sama sa “Kon Siya Moanhi Pag-usab” (Songbook sa mga Bata, 46–47). Gamita ang kanta sa paghisgot og mga paagi nga kita makaandam alang sa pag-anhi pag-usab ni Jesus, sama sa paghimo sa kabubut-on sa Dios ug pagpasiga sa atong kahayag alang sa uban.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 45:3–5

Si Jesukristo mao ang atong Manlalaban uban sa Amahan.

Unsaon nimo pagtabang ang mga bata nga malig-on ang ilang pagtuo nga si Jesukristo mao ang ilang Manlalaban? Sa unsa nga paagi nimo nakat-unan kini sa imong kaugalingon?

Posible nga mga Kalihokan

• Pagsulat og pipila ka pulong nga makita sa Doktrina ug mga Pakigsaad 45:3–5 sa lahi nga mga piraso sa papel. Hatagi ang mga bata og minuto sa pagtuon niini nga mga bersikulo diha sa ilang mga kasulatan, ug dayon dapita sila sa pagsira sa ilang mga kasulatan ug pagbutang sa mga pulong diha sa mga papel sa han-ay nga makita kini diha sa bersikulo. Sumala niini nga mga bersikulo, unsa ang gisulti sa Manluluwas nga pangamuyo sa atong kawsa sa atubangan sa Langitnong Amahan?

• Tabangi ang mga bata nga mohatag og kahulugan sa pulong manlalaban, tingali pinaagi sa pagpangita niini sa diksyonaryo. Unsay gibuhat sa Manluluwas nga nakapahimo nga posible niini alang Kaniya nga mahimong atong Manlalaban? Ipakigbahin ang imong mga pagbati unsay nahimo ni Jesukristo alang nato, ug tuguti ang mga bata nga mopakigbahin sa ilang mga pagbati.

Doktrina ug mga Pakigsaad 45:9

Ang ebanghelyo ni Jesukristo mao ang kahayag sa kalibutan.

Tabangi ang mga bata nga imong gitudloan nga maghunahuna sa mga paagi nga ang ebanghelyo nag-andam sa kalibutan alang sa Ikaduhang Pag-anhi sa Manluluwas.

Posible nga mga Kalihokan

• Ipakita ang mga litrato sa usa ka kahayag ug usa ka bandera, o pagdrowing niining mga butanga diha sa pisara. Dapita ang mga bata sa pagbasa sa Doktrina ug mga Pakigsaad 45:9 ug paghunahuna og mga paagi nga ang ebanghelyo sama sa usa ka kahayag, usa ka sumbanan (o bandila), ug usa ka mensahero. Mahimo nimong ipasabut nga sa karaan, ang usa ka sumbanan mao ang usa ka bandila o bandera nga gidala ngadto sa panggubatan. Kini makatabang sa mga kasundalohan nga makahibalo asa magpundok ug unsay buhaton.

  Kapitan Moroni naggunit sa Bandila sa Kalingkawasan

  Bandila sa Kalingkawasan, ni Larry Conrad Winborg

• Tabangi ang mga bata sa pagmemorya sa tanan o bahin sa bersikulo 9 pinaagi sa pagsulat niini diha sa pisara ug pag-anam sa pagpapas sa pipila ka mga pulong.

Doktrina ug mga Pakigsaad 45:37–38

Si Jesukristo moanhi pag-usab.

Mahimong makahadlok alang sa mga bata ang pagbasa mahitungod sa mga gubat, pagkadautan, ug kalaglagan nga gipanagna nga mahitabo sa dili pa ang Ikaduhang Pag-anhi sa Manluluwas. Unsaon nimo sila sa pagtabang nga magmalipayon nga magpaabut niining gisaad nga adlaw?

Posible nga mga Kalihokan

• Pangutan-a ang mga bata unsaon nila sa pagkahibalo kon ang bag-ong panahon duol na. Unsa nga mga timailhan ang ilang pangitaon? Ipasabut nga ingon nga adunay mga timailhan sa bag-ong panahon, adunay mga timailhan sa Ikaduhang Pag-anhi. Basaha og dungan ang Doktrina ug mga Pakigsaad 45:37–38. Unsa ang gisulti ni Jesus nga sama sa unsa ang mga timailhan sa Iyang Ikaduhang Pag-anhi? Aron matabangan ang mga bata nga makadiskobre sa mga timailhan nga atong pangitaon, sanguni ang matag bata (o grupo sa mga bata) sa pagbasa og pipila ka bersikulo gikan sa Doktrina ug mga Pakigsaad 45 nga naghulagway niini nga mga timailhan. Ang mga bersikulo 26–27, 31–33, 40–42 mahimong gamiton, alang sa ehemplo. Tuguti ang mga bata nga mopakigbahin unsa ang ilang nakit-an. Hain niini nga mga timailhan ang natuman karon?

• Sa lahi nga mga piraso sa papel, isulat ang pipila ka mga saad kabahin sa umaabut nga mga panghitabo nga inyong makit-an sa iyang pagtuon sa seksyon 45. Pipila ka mga ehemplo niini nga mga saad makita sa mga bersikulo 44–45, 51–52, 55, 58–59, 66–71. Ilista diha sa pisara ang mga bersikulo diin ang mga saad makita. Hatagi ang mga bata og mga papel, ug hangyoa sila sa paggamit sa ilang mga kasulatan sa pagpahaum sa mga bersikulo nga anaa diha sa pisara ngadto sa mga saad. Hisguti unsa ang gipasabut niini nga mga saad, ug dapita ang mga bata sa pagpakigbahin unsa nga mga saad ang motabang nila nga mobati nga nadasig mahitungod sa Ikaduhang Pag-anhi sa Manluluwas.

pagkat-on nga icon

Awhaga ang Pagkat-on diha sa Panimalay

Dapita ang mga bata sa paghunahuna og usa ka butang nga ilang nakat-unan atol sa klase nga mahimo nilang ipakigbahin uban sa ilang mga pamilya. Hangyoa ang pipila kanila sa pagpakigbahin sa klase unsa ang ilang gusto nga ipakigbahin sa panimalay.

Pagpalambo sa Atong Pagtudlo

Tabangi ang mga bata nga makaila sa Espiritu. Samtang ikaw magtudlo sa mga bata, sultihi sila kon ikaw mobati sa Espiritu Santo. Hisguti giunsa nimo sa pag-ila ang Iyang presensya. Sama pananglit, ikaw mahimong mobati og kalinaw o kalipay samtang nagkanta og usa ka awit mahitungod sa Manluluwas. Ang pag-ila niini nga mga pagbati makatabang sa mga bata nga makamatikod kon sila mobati sa Espiritu.

pahina sa kalihokan: Ako makabarug sa balaan nga mga dapit