mga tawo nagmiting diha sa pond

The Camp Meeting, ni Worthington Whittredge

Mayo 3–9

Doktrina ug mga Pakigsaad 46–48

“Pangitaa sa Matinguhaon nga Paagi ang Labing Maayo nga mga Gasa”

Hunahunaa ang mga bata nga imong gitudloan samtang magbasa ka sa Doktrina ug mga Pakigsaad 46–48. Gamita ang “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan alang sa dugang nga mga ideya nga ikonsiderar.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga bata sa pagdrowing og mga hulagway sa butang nga ilang nakat-unan sa leksyon sa miaging semana o sa panimalay sa miaging semana. Pahinumdumi sila kon gikinahanglan. Dayon tuguti sila nga maghisgot mahitungod sa ilang mga litrato.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 46:2–6

Makatabang ko sa uban nga mobati nga gihangup sa simbahan.

Kitang tanan, lakip ang mga bata, gusto nga mobati nga gihangup ug gidawat. Unsaon ninyo sa paggamit niini nga mga bersikulo sa pagtabang sa mga bata sa paghimo sa uban nga mobati nga gihangup diha sa simbahan?

Posible nga mga Kalihokan

• Basaha ang Doktrina ug mga Pakigsaad 46:5 og kusog, ug sultihi ang mga bata sa imong kaugalingong mga pulong unsa ang gipasabut niini nga bersikulo. Pagpakita og mga litrato sa mga tawo sa tibuok kalibutan. Pangutan-a ang mga bata kinsa niining mga tawhana ang gusto sa Langitnong Amahan nga atong dapiton sa atong mga miting sa Simbahan. Tabangi ang mga bata nga magbansay sa pagdapit nimo o sa usag usa nga moadto sa miting o kalihokan sa Simbahan.

• Hangyoa ang mga bata sa paghunahuna nga usa ka higala moadto sa simbahan sa unang higayon. Tabangi sila sa paghunahuna og mga paagi nga sila makatabang sa ilang higala nga mobati nga gihangup. Tuguti sila nga magbansay unsay ilang isulti o buhaton kon sila makakita og usa ka higala nga naglakaw padulong sa chapel o lawak-klasehanan sa unang higayon.

Doktrina ug mga Pakigsaad 46:13–26

Ang Langitnong Amahan mipanalangin kanako sa Iyang mga gasa.

Ang matag usa sa mga bata nga imong gitudloan mao ang anak nga lalaki o babaye sa Langitnong Amahan, ug Siya mipanalangin kanila sa espirituhanong mga gasa.

Posible nga mga Kalihokan

• Gamita ang Doktrina ug mga Pakigsaad 46:13–26 o “Kapitulo 20: Ang mga Gasa sa Espiritu” (Mga Istorya sa Doktrina ug mga Pakigsaad, 77–80) sa pagpasabut sa mga bata sa pipila sa mga gasa nga gihatag sa Langitnong Amahan kanato pinaagi sa Iyang Espiritu ug ngano nga Siya mohatag niini. Kon posible, pagpakita og mga butang o mga litrato nga nagrepresentar sa matag gasa. Hunong panagsa aron mangutana sa mga bata sa unsa nga paagi nga kini nga mga gasa makapanalangin sa usa ka tawo.

• Hatagi ang usa ka bata og butang nga mahimong ipakigbahin, sama sa piraso sa pan o duha ka dulaan. Hangyoa ang bata sa pagpakigbahin unsay imong gihatag kaniya sa ubang mga sakop sa klase. Ipasabut nga ang Langitnong Amahan naghatag nato og mga gasa, ug Siya gusto nga kita mogamit niini sa pagtabang sa uban. Sultihi ang mga bata mahitungod sa panahon nga ikaw napanalanginan tungod kay dunay mipakigbahin sa iyang espirituhanong mga gasa.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 46:8–26

Ang Langitnong Amahan mihatag nako og espirituhanong mga gasa sa pagpanalangin sa uban.

Ang mga gasa nga gihulagway sa Doktrina ug mga Pakigsaad 46—ug daghan pang ubang espirituhanong mga gasa—nagagikan sa Dios pinaagi sa Espiritu Santo. Ikaw makatabang sa mga bata sa pag-ila sa mga gasa nga gihatag kanila—ug sa uban nga ilang mapangita—samtang kamo magtuon pagdungan sa Doktrina ug mga Pakigsaad 46.

Posible nga mga Kalihokan

• Isulat sa mga piraso sa papel ang pipila sa espirituhanong mga gasa nga makita sa Doktrina ug mga Pakigsaad 46:13–26 ug sa Ang mga Artikulo sa Hugot nga Pagtuo 1:7, ug tagoi kini libut sa kwarto. Dapita ang matag bata sa pagpangita sa usa sa mga papel ug pangitaon ang mga bersikulo kon asa gihisgutan kana nga gasa diha sa mga kasulatan. Dayon basaha pagdungan ang Doktrina ug mga Pakigsaad 46:8–9, 12. Ngano nga ang Langitnong Amahan mohatag nato og espirituhanong mga gasa?

• Tabangi ang mga bata sa paglista diha sa pisara sa mga gasa sa Espiritu nga gihisgutan sa Doktrina ug mga Pakigsaad 46. Samtang gilista ang matag gasa, hisguti sa unsa nga paagi kana nga gasa magamit sa pagpanalangin sa uban. Ang mga deskripsyon diha sa “Kapitulo 20: Mga Gasa sa Espiritu” (Mga Istorya sa Doktrina ug mga Pakigsaad, 77–80) makatabang. Sultihi ang mga bata nga matag usa nila adunay espirituhanong mga gasa. Awhaga sila sa paghangyo sa Langitnong Amahan sa pagtabang nila nga makaila sa ilang mga gasa ug sa unsa nga paagi sila makagamit niini sa pagtabang sa uban.

Doktrina ug mga Pakigsaad 47:1, 3

Akong marekord ang akong kasaysayan.

Ang Ginoo mitawag ni John Whitmer nga magtipig og kasaysayan sa Simbahan. Karon nabulahan kita pag-ayo tungod sa mga kasaysayan sa Simbahan nga gitipigan sa mga katuigan.

Posible nga mga Kalihokan

• Basaha pagdungan ang Doktrina ug mga Pakigsaad 47:1, 3, ug hangyoa ang mga bata sa pagdiskobre unsa ang gusto sa Ginoo nga buhaton ni John Whitmer. Unsay buot ipasabut sa pulong nga “kanunay” sa bersikulo 3? Sa unsa nga paagi kita napanalanginan sa pagkahibalo mahitungod sa kasaysayan sa Simbahan?

• Kon ang mga bata nga inyong gitudloan nagtipig og journal, hangyoa sila sa paghisgot mahitungod sa mga butang nga ilang gisulat sa ilang journal. Ang mga bata malingaw nga makadungog og istorya sa imong pagkabata gikan sa imong journal o sa journal sa usa ka katigulangan.

• Ipakita sa mga bata ang mga ehemplo sa mga paagi nga sila makatipig kanunay og kasaysayan sa ilang kinabuhi. Pananglitan, sila makasulat sa usa ka libro, makakolekta og mga litrato diha sa scrapbook, maka-type sa computer, o makahimo og audio o video nga mga recording. Tabangi ang mga bata nga maghimo og lista sa mga butang nga maayong ilakip sa ilang personal nga mga kasaysayan, sama sa ilang pagpamatuod ni Jesukristo. Dapita ang mga bata sa paghimo og paskin o poster nga dad-on sa balay uban sa pipila ka mga ideya sa pagpahinumdom nila sa pagrekord sa ilang personal nga mga kasaysayan.

  batang babaye nagtuon

  Ang mga journal mao ang usa ka paagi nga kita makatipig og kasaysayan.

Doktrina ug mga Pakigsaad 48:1–4

Ako makatabang sa uban pinaagi sa pagpakigbahin unsay gihatag kanako.

Ang Ginoo miawhag sa mga Santos sa Ohio sa pagtabang sa ubang mga Santos pinaagi sa pagpakigbahin sa ilang yuta ug sa ilang kwarta. Sa unsa nga paagi nimo magamit kini nga mga bersikulo aron sa pagtabang sa mga bata nga makakita og mga paagi sa pagpakigbahin ngadto sa uban unsa ang gihatag sa Dios kanila?

Posible nga mga Kalihokan

• Ipakita sa mga bata ang usa ka mapa sa New York ug Ohio (tan-awa sa ang outline alang sa Abril 12–18 sa Dali, Sunod Kanako—Alang sa mga Indibidwal ug mga Pamilya). Ipasabut nga ang Ginoo misugo sa mga Santos sa New York ug sa ubang dapit nga magpundok ngadto sa Ohio, apan daghan kanila walay igong kwarta nga itukod og balay kon sila moabut. Tabangi ang mga bata sa pagpangita diha sa Doktrina ug mga Pakigsaad 48:1–4 kon unsa ang gisugo sa Ginoo nga buhaton sa mga Santos sa Ohio aron makatabang. Pangutan-a ang mga bata unsay gusto nilang buhaton sa pagtabang kon sila nagpuyo sa Ohio niining higayuna. Unsay gihatag nato karon nga mahimong gamiton sa pagtabang sa uban? Pananglitan, tan-awa ang “The Coat” (video, ChurchofJesusChrist.org).

• Basaha og dungan ang Doktrina ug mga Pakigsaad 48:4, ug dapita ang mga bata sa pagpangita sa butang nga gisugo sa Ginoo nga buhaton sa mga Santos aron sa pagtabang sa Iyang buhat. Ipasabut nga ang pagtigum og kwarta motugot nila sa pagpalit og yuta ug pagtukod og templo sa umaabut. Unsay tiguman nato og kwarta aron kita makatabang sa paghimo sa buhat sa Ginoo? Ipakita ang video “First Things First” (ChurchofJesusChrist.org), ug hisguti sa unsa nga paagi nga ang mga bata sa video mituman sa sugo sa Ginoo sa pagtigum og kwarta.

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagpangutana sa mga sakop sa pamilya mahitungod sa espirituhanon nga gasa nga ilang gibati nga gihatag nganha kanila. Awhaga usab ang mga bata sa pag-ampo ug pagtinguha sa usa ka gasa sa Espiritu nga ilang gustong palamboon.

Pagpalambo sa Atong Pagtudlo

Tabangi ang mga bata sa pagkat-on gikan sa mga kasulatan. Ang gagmayng mga bata tingali dili pa kaayo makabasa, apan mahimo gihapon nimo silang tabangan nga makat-on gikan sa mga kasulatan. Sama pananglit, mahimo ka nga mobasa og usa ka tudling ug dapiton sila sa pagbarug o sa pagpataas sa ilang kamot kon makadungog sila og piho nga pulong o hugpong sa mga pulong.

pahina sa kalihokan: Ang Dios naghatag kanako og espirituhanong mga gasa