mga batan-on nga anaa sa gawas sa templo

Abril 26–Mayo 2

Doktrina ug mga Pakigsaad 45

“Ang mga Saad … Matuman”

Si Presidente Russell M. Nelson nagtudlo: “Isulat ang mga ideya nga masulod sa inyong hunahuna. Isulat ang inyong mga gibati ug sundi kini sa paglihok sa unsay giaghat nga angay ninyong buhaton.” (“Pagpadayag alang sa Simbahan, Pagpadayag alang sa atong mga Kinabuhi,” Liahona, Mayo 2018, 95).

Irekord ang Imong mga Impresyon

Nagpuyo kita sa malisud nga mga panahon, ug makapabalaka kana. Bisan ang mga disipulo ni Jesus, sa dihang nakadungog sila nga nanagna Siya bahin sa mga kalamidad nga mahitabo sa atong panahon, “sila nabalaka” (Doktrina ug mga Pakigsaad 45:34). Ang nag-unang mga Santos sa Kirtland, Ohio, nabalaka usab sa malisud nga mga panahon diin sila nagpuyo. Apil sa ubang mga butang, adunay “daghan nga bakak nga mga taho … ug binuang nga mga sugilanon” nga nakapahuyang sa mensahe sa ebanghelyo (Doktrina ug mga Pakigsaad 45, ulohan sa seksyon). Apan ang tubag sa Ginoo, nianang panahona ug karon, mao ang “ayaw kabalaka” (bersikulo 35). Oo, adunay pagkadautan, apan adunay ebidensya usab nga gipadali sa Dios ang Iyang buhat. Oo, adunay mga katalagman nga gipanagna nga mag-una sa Ikaduhang Pag-anhi, ug kinahanglan kitang mahibalo bahin niini. Apan dili lamang kini mga pasidaan sa kakuyaw; mga timailhan usab kini nga ang mga saad sa Dios hapit na matuman. Tingali mao kini nganong ang Doktrina ug mga Pakigsaad 45—usa ka pagpadayag nga naghulagway sa daghan niining mga timailhan nga detalyado—nadawat “sa hingpit nga kalipay sa mga Santos” (ulohan sa seksyon).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 45:1–5

Si Jesukristo mao ang atong Manlalaban ngadto sa Amahan.

Mibati ka ba nga dili angayan o dili takus sa atubangan sa Dios? Mahimo nimong makita ang kasiguroan diha sa Doktrina ug mga Pakigsaad 45:1–5. Unsay gisugyot sa mga pulong sama sa “manlalaban” ug “nangamuyo” nganha kanimo? Sa unsang paagi nga ang Manluluwas nanlaban alang kanimo, o nangamuyo alang kanimo? Unsay kahulugan niini nganha kanimo nga masayud nga si Kristo mao ang imong Manlalaban?

Ang mosunod nga mga pulong gikan ni Presidente Joseph Fielding Smith makatabang kanimo sa pagpamalandong niining mga bersikulo: “Si Jesus [mao] ang atong manlalaban, nangamuyo alang kanato isip atong tigpataliwala pinaagi sa iyang pangalagad ug mga paningkamot nga mapasig-uli kita, nga magkauyon kita uban sa Dios” (sa Conference Report, Oct. 1953, 58).

Tan-awa usab sa 2 Nephi 2:8–9; Mosiah 15:7–9; Moroni 7:27–28; Doktrina ug mga Pakigsaad 29:5; 62:1.

Doktrina ug mga Pakigsaad 45:9–10

Ang ebanghelyo usa ka sukaranan ngadto sa kanasuran.

Sa karaang panahon, ang usa ka sukaranan mao ang usa ka bandera o bandila nga dad-on ngadto sa gubat. Nakahugpong ug nakapahiusa kini sa mga sundalo ug nakatabang kanila nga masayud kon asa magpundok ug unsa ang buhaton. Ang sukaranan usa usab ka ehemplo o lagda nga masukdan sa ubang mga butang. Samtang magbasa ka sa Doktrina ug mga Pakigsaad 45:9–10, pamalandungi kon sa unsang paagi nahimong sukaranan alang kanimo ang mga pakigsaad sa ebanghelyo. Unsa kaha ka lahi ang imong kinabuhi kon wala pa ka niining mga pakigsaad?

Tan-awa usab sa Isaias 5:26; 11:10–12; Doktrina ug mga Pakigsaad 115:5–6.

Doktrina ug mga Pakigsaad 45:11–75

Ang mga saad sa Ginoo matuman.

Gubat, kadautan, ug kalaglagan mag-una sa Ikaduhang Pag-anhi sa Manluluwas. Apan “ayaw kabalaka,” ang Ginoo miingon, “kay, kon kining tanan nga mga butang mahinabo, kamo masayud nga ang mga saad nga nabuhat nganha kaninyo matuman” (Doktrina ug mga Pakigsaad 45:35).

Samtang magtuon ka sa Doktrina ug mga Pakigsaad 45:11–75, ikonsiderar ang pag-focus dili lamang sa makapabalaka nga mga panghitabo nga gipanagna apan sa mga panalangin nga gisaad usab sa Ginoo (pananglitan, ang mga saad diha sa mga bersikulo 54–59 mahitungod sa milenyal nga paghari sa Manluluwas). Makahimo ka niini pinaagi sa paghimo og mga lista o pinaagi sa pagbutang og label o pagmarka sa mga bersikulo. Unsay imong nakita nga makatabang nimo nga “dili mabalaka” mahitungod sa katapusang mga adlaw?

Doktrina ug mga Pakigsaad 45:31–32, 56–57

“Barug sa balaan nga mga dapit,” ug ayaw pagbalhin.

Usa ka rason nga ang Manluluwas ug ang Iyang mga propeta nagtudlo kanato mahitungod sa mga timailhan sa Ikaduhang Pag-anhi mao ang pagtabang nato aron makapangandam. Unsay imong nakat-unan sa Doktrina ug mga Pakigsaad 45:31–32, 56–57 mahitungod sa pagpangandam alang sa Ikaduhang Pag-anhi sa Ginoo? Tingali makatabang ang pagribyu sa sambingay sa napulo ka mga birhen, nga makita diha sa Mateo 25:1–13. Gitandi sa Manluluwas ang lana diha niini nga sambingay ngadto sa kamatuoran ug sa Balaang Espiritu (tan-awa sa Doktrina ug mga Pakigsaad 45:57). Unsa ang mga ideya nga imong mabatunan kon mobasa ka sa sambingay niini nga paagi?

ang napulo ka mga birhen

Sambingay sa Napulo ka mga Birhen, ni Dan Burr

Doktrina ug mga Pakigsaad 45:11–15, 66–71

Ang Zion usa ka dapit sa kahilwasan [safety] alang sa mga Santos sa Dios.

Ang mga Santos sa panahon ni Joseph Smith mahinamon nga motukod sa Zion, ang Bag-ong Jerusalem, sigun sa gihulagway diha sa Basahon ni Mormon (tan-awa sa Ether 13:2–9) ug sa dinasig nga pag-usab ni Joseph Smith sa Biblia (tan-awa sa Moises 7:62–64). Unsay imong nakat-unan mahitungod sa Zion—ang karaang siyudad sa panahon ni Enoch ug ang siyudad sa ulahing adlaw—gikan sa Doktrina ug mga Pakigsaad 45:11–15, 66–71?

Karon ang sugo sa pag-establisar sa Zion nagpasabut sa pag-establisar sa gingharian sa Dios kon asa kita nagpuyo—kon asa nga ang mga anak sa Dios magpundok sa kahilwasan sa Iyang “walay katapusan nga pakigsaad” (bersikulo 9). Unsay imong mahimo sa pagtabang sa pagtukod sa Zion kon asa ka?

Tan-awa usab sa Giya ngadto sa mga Kasulatan, “Zion,” scriptures.ChurchofJesusChrist.org.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 45:3–5.Unsay mahimo sa usa ka manlalaban alang kanato? Hisguti kon nganong ang Manluluwas gitawag nga atong Manlalaban.

Doktrina ug mga Pakigsaad 45:9–10.Kon ang inyong pamilya adunay usa ka “sukaranan,” o bandila, nga morepresentar sa inyong pasalig sa ebanghelyo, unsa kahay hitsura niini? Tingali makalingaw nga dungan nga maghimo og bandila sa pamilya ug maghisgot kon sa unsang paagi ka makatabang sa uban nga mosunod sa mga sumbanan sa ebanghelyo.

Doktrina ug mga Pakigsaad 45:32.Unsa man ang atong “balaan nga mga dapit”? Unsa ang buot ipasabut sa “dili mabalhin”? Unsaon nato paghimo ang atong panimalay nga usa ka balaan nga dapit?

Doktrina ug mga Pakigsaad 45:39–44.Unsaon nimo pagtabang ang mga sakop sa pamilya nga masabtan kon unsay gipasabut sa magbantay alang sa Ikaduhang Pag-anhi sa Manluluwas? Siguro mahimo kang maghunahuna og usa ka panghitabo nga imong gipaabut ug mopaambit og mga paagi nga ikaw “nagbantay” alang niana nga panghitabo. O mahimo kamong dungan nga magluto ug magbantay alang sa mga timailhan nga andam na kining kaunon. Unsa ang atong gibuhat aron makabantay sa Ikaduhang Pag-anhi sa Manluluwas?

Doktrina ug mga Pakigsaad 45:55.Ang pagbasa sa 1 Nephi 22:26 ug Pinadayag 20:1–3 makatabang sa inyong pamilya nga masabtan kon sa unsang paagi nga si Satanas “pagagapuson” panahon sa Milenyum. Unsaon man nato paggapos si Satanas sa atong kinabuhi?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Kon Siya Moanhi Pag-usab,” Songbook sa mga Bata, 46-47; tan-awa usab sa “Mga Ideya sa Pagpalambo sa Inyong Pamilya nga Pagtuon sa Kasulatan.”

Pagpalambo sa Personal nga Pagtuon

Gamita ang mga tabang sa pagtuon. Gamita ang Giya ngadto sa mga Kasulatan aron makabaton og mga ideya sa mga kasulatan.

si Kristo nga mikunsad

Ang Pag-anhi ni Kristo, ni Jubal Aviles Saenz