8–14 ni Maji

Vunau kei na Veiyalayalati 23–26

“Vaqaqacotaka na Lotu”

Ni ko vakavakarau mo veivakavulici, navuca na vakasama ni taviqaravi eso ena iwasewase ruarua vei ira na “Gone Sobu” kei ira na “Qase Cake”.

Vola na Veika o Vakauqeti Kina

Sureta na Veiwasei

Vakaraitaka e dua na iyaloyalo kei Ema Simici (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Sureti ira na gone me ra wasea na ka era kila tu me baleti koya, oka kina na veika era na rairai vulica tiko ena Vunau kei na Veiyalayalati 25 ena macawa sa oti. “E rawa ni veivuke naChapter 13: Joseph and Emma” (Na iTukutuku ena Vunau kei na Veiyalayalati, 51–55).

Vakavulica na iVunau: Gone Sobu

Vunau kei na Veiyalayalati 23:6; 26:1

Na Kalou e vinakata meu dau masu ka vuli mai na ivolanikalou ena veisiga.

Na Turaga a vakasalataki ira na iliuliu kei na veitokani taumada ni Lotu me ra dau masu (raica na Vunau kei na Veiyalayalati 23:6) ka vulica na ivolanikalou (raica na Vunau kei na Veiyalayalati 26: 1). O na vukei ira vakacava na gone me ra vakabibitaka na masumasu kei na ivolanikalou me tiki ni nodra bula?

iTaviqaravi e Rawa ni Caka

• Wiliwili vei ira na gone mai na Vunau kei na Veiyalayalati 23:6, vakatekivu ena “mo dau masu.” Vukea mera raica na sala kei na vanua duidui eso sa kaya na Turaga meda masu kina. Sureta mera droinitaka e dua na kedra iyaloyalo ni ra masu tiko ena dua vei ira na sala se vanua oya.

• Ke gadrevi, vakamacalataka vei ira na gone na ivakarau ni masu. Sa rawa ni veivuke e dua na sere me baleta na masu, vaka na “I Pray in Faith” (Children’s Songbook, 14).

• Wilika vei ira na gone, “Dou solia na nomudou gauna mo dou vulica kina vagumatua na ivolanikalou” (Vunau kei na Veiyalayalati 26: 1). Tukuna vei ira na vuna o vulica kina na ivolanikalou. Vukea mera vakasamataka na sala eso era rawa ni vuli kina mai na ivolanikalou, kevaka mada ga era sega ni wiliwili rawa.

• Lagata vata na “Search, Ponder, and Pray” (Children’s Songbook, 109) se dua tale na sere me baleta na masumasu kei na vuli ivolanikalou. Vukea na gone mera kunea na veivakalougatataki e yalataki tu ena sere. Tukuna vei ira baleta na veivakauqeti vakayalo o sa sotava ni o masu ka wilika na ivolanikalou.

Vunau kei na Veiyalayalati 25:11–12

Sa taleitaka o Jisu “na sere sa lagati ena yalodina.”

E kaya na Turaga ni sere tabu “e dodonu vei au.” Vukea na gone me ra raica na lagasere me kua ga ni dua na itaviqaravi lasa ia me sala talega ni sokalou ki Vua.

iTaviqaravi e Rawa ni Caka

• Sureta na gone yadua me ra wasea na nodra serenilotu taleitaki se sere ni Lotu, ka lagata vata eso. Wilika vei ira na gone na Vunau kei na Veiyalayalati 25:12 ka sureti ira me ra raitayaloyalotaka na ivakarau ni nanuma ni Tamada Vakalomalagi kei Jisu ni Rau rogoca ni da lagata na sere oqo.

• Vakavulici ira na gone ena dua na sere baleta na lagasere, vaka na “Lift Up Your Voice and Sing” (Children’s Songbook, 252), se dua na sere baleti Jisu Karisito, vaka na “He Sent His Son” (Children’s Songbook, 34–35). Sureta me ra lagata na sere vata kei na nodra matavuvale ena macawa oqo.

  

  Na lagasere e dua na sala eda rawa ni vakaraitaka kina na noda lomana na Kalou.

Vunau kei na Veiyalayalati 25:13, 15

Au rawa ni vakavakarau meu cakava na veiyalayalati tabu.

Sa vakavakarau tiko na gone o vakavulica me ra cakava na matai ni veiyalayalati kei na Tamada Vakalomalagi ena gauna era sa papitaiso kina. O rawa vakacava ni vukei ira ni raica na kena vakasakiti na noda veiyalayalati?

iTaviqaravi e Rawa ni Caka

• Wilika na Vunau kei na Veiyalayalati 25:13 kivei ira na gone. Vakamacalataka ni vosa na “dei tikoga” ena tikina oqo e kena ibalebale na tautauri kaukauwa tu ki na dua na ka. Me vukea mera kila vakavinaka, solia wavoki ena rumu e dua na ka kaukauwa, vaka e dua na vatu (se tiki ni kaukamea), ka sureti ira na gone me ra qumia matua ena nodra igu. Vakamacalataka na ibalebale ni kukube ki na noda veiyalayalati oya na tauri tu (se maroroi) ni yalayala eso eda cakava kei na Tamada Vakalomalagi ka sega ni vakalaiva (se vakasuka).

• Vakayagataka na tabana ni taviqaravi ena macawa oqo mo vakavulici ira na gone ena gauna eso eda caka veiyalayalati kina kei na Tamada Vakalomalagi. Wilika na Vunau kei na Veiyalayalati 25:15, ka vakamacalataka ni “sala ni yalododonu” e matataka na veivakalougatataki ni lesu tale ka bula vata kei na Kalou, ka noda Tui Vakalomalagi.

Vakavulica na iVunau: Gone Qase Cake

Vunau kei na Veiyalayalati 23:3–7; 25:7

E vinakata o Jisu meu vaqaqacotaki ira era tu wavoliti au.

Ena gauna a tauyavutaki taumada kina na Lotu, a sega soti ni levu na lewena. A kerei ira na Yalododonu na Turaga me ra tara cake na Lotu ena wasei ni kosipeli kei na veivaqaqacotaki vakai keda. Eda rawa ni cakava na ka vataga nikua.

iTaviqaravi e Rawa ni Caka

• Kerea na gone me ra raica vakararaba sara na vosa “veivakauqeti” kei na “vakauqeta” ena Vunau kei na Veiyalayalati 23:3–7; 25:7. Vukei ira ni vakamacalataka na vosa oqo. E rawa vakacava ni vaqaqacotaki ira na vakauqeti ni dua na tamata? Sureti ira na gone me ra matanataka na “vakauqeti” ni dua ia me vakayacori tiko ena loloma.

• E rawa vakacava ni da vakavinakataka cake na cakacaka ni nodra vaqaqacotaki na lewe ni Lotu tale eso? Me vakaraitaka na ivakavuvuli oqo, solia ki na gone e dua na itavi e gadrevi kina e vuqa na dauveivukei. Qai kerea na vo ni gone me ra veivuke, ka veivosakitaka na kena mai rawarawa sara na itavi. Wasea e dua na ka o sotava o a vaqaqacotaki kina ena veiqaravi ni dua na itokani lewe ni Lotu.

Vunau kei na Veiyalayalati 24:1, 8

Sa rawa ni vakacegui au na iVakabula “mai na [noqu] vakararawataki.”

A sotava o Josefa Simici e vuqa na veivakatovolei, ia sa rawa vua me “dau vosota na ka rarawa” baleta ni sa yalataka na Turaga ni na dau tiko vata ga kei koya.

iTaviqaravi e Rawa ni Caka

• Vukea na gone me ra vola ena papa eso na veivakararawataki se bolebole e a sotava voli o Josefa Simici kei na so tale na Yalododonu taumada (raica na “Chapter 11: More People Join the Church,” Na iTukutuku ena Vunau kei na Veiyalayalati, 46–47, se na kena vidio ena ChurchofJesusChrist.org). Qai sureta me ra dikeva na ka a tukuna na Turaga vei Josefa me baleta na nona vakararawataki ena Vunau kei na Veiyalayalati 24:1, 8. E rawa vakacava ni da vaqara na veivuke ni iVakabula ena gauna eda sotavi dredre tu kina?

• Me ra vakavulici na gone ni so na gauna sa gadrevi me da “vosota na [noda] vakararawataki”, e rawa ni o vakaraitaka na vidio “Continue in Patience” (ChurchofJesusChrist.org). Kerea na gone me ra vakasamataka e dua na ka era vinakata saraga ia me ra waraka. Cava na vuna e vinakata kina vei keda na Turaga ena so na gauna meda dau vosota ena gauna bolebole eso ni noda bula? E dau vakatakila vakacava vei keda o Koya ni sa “tiko vata kei [keda]” ena gauna ni noda rarawa?

Vunau kei na Veiyalayalati 25:13

Au rawa ni “dei tikoga ki na veiyalayalati” au sa cakava.

Ni oti toka ga na papitaiso i Ema Simici, a tukuna vua na Turaga, “Mo dei tikoga ki na veiyalayalati ko sa cakava.” Navuca na sala e rawa ni vakalougatataki ira kina na gone o vakavulica na ivakasala oqo.

iTaviqaravi e Rawa ni Caka

• Wilika vata na Vunau kei na Veiyalayalati 25:13, ka tarogi ira na gone ena ibalebale ni tikina oqo meda “dei tikoga ki na veiyalayalati” eda cakava. Me ivakaraitaki, solia wavoki na iyaya eso era vesu kaukauwa vata tu ka mera qai tovolea ni basuka na gone. Cava na vuna e vosa vinaka kina na “dei tikoga” me vakamacalataka na ivakarau eda vakananuma kina na noda veiyalayalati?

• Ke gadrevi, railesuva kei ira na gone na veiyalayalati eda cakava ni da sa papitaiso (raica na Mosaia 18:8–10; Vunau kei na Veiyalayalati 20:37). Na cava na kena ibalebale vei iko mo “dei tikoga” ki na veiyalayalati oqo?

• Railesuva vata eso na ka o kila tu me baleta na bula nei Ema Simici (raica na “Wase 13: Josefa kei Ema” [Na iTukutuku ena Vunau kei na Veiyalayalati, 51–55], se na kena vidio ena ChurchofJesusChrist.org). Solia ki na gone e dua se rua na tikina mai na wase 25, ka sureta mera wasea na sala a rairai vukei Ema kina na ivakasala kei na ilesilesi ni iVakabula me “dei tikoga ki na veiyalayalati” e sa cakava. E rawa vakacava ni da muria na nona ivakaraitaki?

Vakauqeta na Vuli e Vale

Sureti ira na gone me digitaka e dua na tikina taleitaki o ni a veivosakitaka vata, vola na kena idusidusi, ka wasea ki na dua na lewe ni matavuvale se itokani.

Vakatorocaketaki Noda Veivakavulici

Vakauqeta na vakarokoroko Vukea na gone me ra kila vakamatata ni sa dua na tiki bibi ni vakarokoroko na vakananumi ni Tamada Vakalomalagi kei Jisu Karisito. O na rairai vakananumi ira mera dau vakarokoroko ni lagati se vagugutaki malua tu e dua na sere se vakaraitaki e dua na iyaloyalo kei Jisu.