15–21 ni Maji

Vunau kei na Veiyalayalati 27–28

“Me Vakayacori na Veika Kecega Me Vaka na Kena iVakarau”

Na dina eso e vakavulici ena Vunau kei na Veiyalayalati 27–28 e rawa ni vaqaqacotaka na nodra ivakadinadina na gone o vakavulica. Ni o vakasamataka na nodra gagadre na gone, na dina cava so o sa vakauqeti mo vakanamata kina ena kalasi?

Vola na Veika o Vakauqeti Kina

Sureta na Veiwasei

Vakaraitaka e dua na iyaloyalo ni Parofita o Josefa Simici kei na iyaloyalo ni parofita nikua. Sureti ira na gone me ra vakayacana na tamata ena iyaloyalo ka wasea na veika era cakava na parofita.

Vakavulica na iVunau: Gone Sobu

Vunau kei na Veiyalayalati 27:1–2

Sa vukei au na sakaramede meu nanumi Jisu Karisito.

Era rawa ni vulica na gonelalai na bibi ni sakaramede ka raica na sala eso mera vakananuma kina na iVakabula ena gauna ni cakacaka tabu vakalotu oqo.

iTaviqaravi e Rawa ni Caka

• Vakaraitaka vei ira na gone e dua na iyaloyalo kei Jisu ni solia tiko na sakaramede vei ira na Nona iApositolo (raica na Gospel Art Book, naba 54). Ena vakacava tu beka ke da taura vata kei na iVakabula na sakaramede? (raica na Vunau kei na Veiyalayalati 27:5). Wilika na Vunau kei na Veiyalayalati 27:2, vakatekivu ena “dau nanuma vua na Tamada,” ka kerei ira na gone mera rogoca na ka e vinakata na iVakabula me da nanuma ni da taura na sakaramede.

• Vakaraitaka vei ira na gone eso na madrai kei na wai kei na iyaloyalo ni iVakabula. Me ra qai taura na gone na iyaloyalo ni o vakavulici ira ni sa dau vukei keda ni nanumi Jisu Karisito na sakaramede.

• Vukea na gone mera vakasamataka na veika era rawa ni cakava mera nanumi Jisu kina ena gauna ni sakaramede. Na cava e cakava na nodra matavuvale me vukea na nodra vakarokoroko yadua? Sureti ira na gone mera droinitaka e dua na iyaloyalo era rawa ni raica ena gauna ni sakaramede me vukei ira mera nanuma na iVakabula.

Vunau kei na Veiyalayalati 27:15–18

Sa taqomaki au na isasabai ni Kalou.

Vakasamataka na sala eso o rawa ni vukea kina na gone o vakavulica mera raica ni sa vaka tu na vakaiyaragi ni Kalou na muri ni vunau.

iTaviqaravi e Rawa ni Caka

• Vakaraitaka vei ira na gone e dua na iyaloyalo ni yaragi (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.). Ni ko wilika na Vunau kei na Veiyalayalati 27:15–18, vukei ira na gone me ra raica na veitiki ni yaragi ena iyaloyalo. Tukuna vei ira na gone na sala e sa vukei iko kina na iyaragi ni Kalou mo “vorata rawa na siga ca” (tikina e 15).

• Na idusidusi ena Efeso ena Lako Mai Mo Muri Au—Baleta na Lalai: Veiyalayalati Vou 2019 e tiko kina e dua na tabana ni taviqaravi ena iyaragi ni Kalou. Kotiva tani na veitiki ni yaragi, ka mera qai biuti ira na gone ena dua na ivakatakarakara ni o wilika na Vunau kei na Veiyalayalati 27:15–18. Vukea mera kila vakamatata na gone na veika era rawa ni cakava me tokari kina na iyaragi ni Kalou, vaka na masu, digidigi donu, qaravi ni tani, kei na so tale.

  

  Au rawa ni tokara na iyaragi ni Kalou.

Vunau kei na Veiyalayalati 28:2, 6–7

Sa liutaka na Lotu na parofita.

Era sa kila li na gone o vakavulica na vuna eda vaka parofita kina? Vakayagataka na Vunau kei na Veiyalayalati 28 mo vukea mera kila ni sai koya duadua ga na parofita e rawa ni liutaka na Lotu.

iTaviqaravi e Rawa ni Caka

• Wilika se tukuna ena nomu vosa ga na itukutuku kei Hiram Page (raica na “Chapter 14: The Prophet and Revelations for the Church,” Na iTukutuku ena Vunau kei na Veiyalayalati, 56–57). Wasea na nomu ivakadinadina ni a digitaki Josefa Simici na Tamada Vakalomalagi kei Jisu Karisito me liutaka na Lotu ena nona gauna (raica na Vunau kei na Veiyalayalati 28: 2). Wasea na nomu ivakadinadina ni sa kacivi na parofita edaidai me vukea na Turaga ena liutaki ni Nona Lotu ena gauna oqo.

• Kerea na gone me ra qitotaka na “follow the leader”—rawa ni duri tu ena muailiu ni rumu e dua na gone, ka mera qai vakatatamuria na vo ni gone na cavaga e cakava tiko. Sa rawa ni muataki oqo ki na kena veivosakitaki na vuna eda muria kina na parofita. O rawa ni vakaraitaka e dua na iyaloyalo i Jisu Karisito ka vakabibitaka ni da sa muria na parofita baleta ni sa muria o koya na iVakabula ka tukuna na vosa ni iVakabula.

Vakavulica na iVunau: Gone Qase Cake

Vunau kei na Veiyalayalati 27:1–2

Sa vukei au na sakaramede meu nanumi Jisu Karisito.

E rawa vakacava ni vukei ira na gone o vakavulica na vulici ni ivakavuvuli ena Vunau kei na Veiyalayalati 27:1–2 me vakaibalebale vakalevu cake kina na vakayagataki ni sakaramede?

iTaviqaravi e Rawa ni Caka

• Sureti ira na gone me ra vola na veika era nanuma ena vinakata na iVakabula mera kila me baleta na sakaramede. Kevaka e gadrevi, sa rawa ni ra wilika na “Sakaramede” ena iDusidusi ki na iVolanikalou (scriptures.ChurchofJesusChrist.org). Me ra qai wasea na veika era sa vola, ka kerei ira me ra vakuria ena nodra lisi ni wiliki oti na Vunau kei na Veiyalayalati 27:1–2. Ena vakaimawe vakacava na ivakarau ni nodra taura na sakaramede ena vei Sigatabu na veika sa koto ena nodra lisi?

• Vukea mera vakasamataka na gone se cava na ibalebale ni kena tauri na sakaramede “ena mata sa vakatabakidua ki na lagilagi ni [Kalou]” (tikina 2). Veivosakitaka na veitaro oqo: Na cava eso na ivakatatao e rawa ni vakanamata kina na matada se vakasama ena gauna ni sakaramede? Na cava eda rawa ni cakava me vagolea na noda vakasama kivua na iVakabula ni da vakayagataka na sakaramede? Ena vukei keda vakacava oqo ni muri Koya tiko ena veisiga?

Vunau kei na Veiyalayalati 27:15–18

Sa vukei au na iyaragi ni Kalou ni vorata na ca.

Era na sotava na gone o vakavulica e vuqa na veivakayarayarataki ca ena nodra bula taucoko. E vinakata na Tamada Vakalomalagi me vukei ira me ra vorata na ca. Rawa vakacava ni o vakauqeti ira me ra tokara na iyaragi ni Kalou?

iTaviqaravi e Rawa ni Caka

• Sureti ira na gone me ra wilika na Vunau kei na Veiyalayalati 27:15–18 ka droinitaka na veitiki ni yaragi e tukuni tiko (ke gadrevi, e rawa ni ra raica na ivakatakilakila ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Na cava e vakavulica vei keda na vosa eso e vakamacalataki koto ena tiki ni yaragi yadua ena kena gadrevi me valuti na ca e wavoliti keda tu (vaka na, yalododonu, vakabauta, veivakabulai, kei na so tale)?

• Sureti ira na gone me ra vakasamataka na veika era rawa ni cakava me ra vorata kina na veitemaki e wavoliti ira tu. Kerea mera vakacavara na yatuvosa “Eda tokara na iyaragi ni Kalou e veisiga ena …” vata kei na nodra nanuma. Vukea mera raica na sala e sa vukei ira tiko kina ni tokara na iyaragi ni Kalou na nodra sasaga ni lako kivei Karisito.

Vunau kei na Veiyalayalati 28:1–7, 15

E sa tuberi au na Tamada Vakalomalagi ena Yalo Tabu.

Na Vunau kei na Veiyalayalati 28:1–7, 15 e rawa ni vukei ira na gone o vakavulica me ra kila vakamatata ni da sa rawa ni tuberi kecega mai na Yalo Tabu, ia na ivakatakila me baleta na Lotu ena dau soli tu ga kivua na parofita.

iTaviqaravi e Rawa ni Caka

• Wasea na italanoa kei Hiram Page ena nona kaya ni a ciqoma na ivakatakila me baleta na Lotu (raica na “Chapter 14: The Prophet and Revelations for the Church,” Na iTukutuku ena Vunau kei na Veiyalayalati, 56–57). Eda na sausaumi vakacava ki na ka e mai tukuna tiko o Hiram Page? Wilika vata na Vunau kei na Veiyalayalati 28:1–7, 15 ena vakasama eso.

• Vukea na gone me ra vaqara na ivolanikalou eso oqo ka cakava e dua na lisi ni sala eso e rawa ni tuberi ira kina na Yalo Tabu: Vunau kei na Veiyalayalati 28:1, 4, 15; Joni 14:26; Moronai 8:26; 10:4–5. Me ra cakacaka veisasa kevaka ena vinaka kina. Cava na vuna e sa rui bibi kina na isolisoli ni Yalo Tabu? Wasea na sala e sa tuberi iko kina na Yalo Tabu.

Vakauqeta na Vuli e Vale

Sureti ira na gone me ra taroga nodra itubutubu ke rawa ni ra vakatavulica e dua na lesoni ni bogi e vale ena dua na ka era a vulica ena kalasi.

Vakatorocaketaki Noda Veivakavulici

Vakayagataka na ivakatagi. Na sere ni Lalai kei na serenilotu e rawa ni vukei ira na gone ena tabayabaki kecega me ra kila ka tugana na dina ni kosipeli ena dua na sala veivakananumi. Sa rawa talega ni ra vakabulabulataki ira na gone ena vulika.