Mormon Abridging the Plates, ni Tom Lovell

Oktubre 26–Nobyembre 1

Mormon 1–6

“Ako Manghinaut nga Madani Kamong Tanan … sa Paghinulsol”

Ang mga hitabo nga gihulagway diha sa Mormon 1–6 tingali malisud alang sa mga bata nga masabtan sa hingpit, apan makakat-on gihapon sila og mga pagtulun-an gikan sa asoy ni Mormon mahitungod sa pagpuyo nga matarung diha sa dautan nga kalibutan. Unsaon nimo paggamit sa iyang kasinatian aron sa pagtudlo sa mga bata kon unsaon sa pagpadayon nga matinuoron sa ebanghelyo?

Irekord ang Imong mga Impresyon

Dapita ang Pagpaambit

Unsay nahibaloan sa mga bata mahitungod ni Mormon? Awhaga sila sa pagpaambit sa ilang nakat-unan ngadto sa ilang mga pamilya. Ang pagpakita og hulagway ni Mormon sama sa anaa sa outline niini nga semana sa Dali, Sunod Kanako—Alang sa mga Indibidwal ug mga Pamilya makatabang.

Itudlo ang Doktrina: Mas Gagmay nga mga Bata

Mormon 1:1–3

Mahimo ako nga matarung sama ni Mormon.

Bisan kon ang mga bata nga imong gitudloan mga gagmay pa, sila makapalambo og espiritwal nga mga kinaiya ug magpuyo nga matarung.

Posible nga mga Kalihokan

• Basaha ang Mormon 1:1–3 ngadto sa mga bata, o gamita ang “Kapitulo 49: Si Mormon ug ang Iyang mga Pagtunlun-an” (Mga Sugilanon sa Ang Basahon ni Mormon, 138–42, o ang katugbang nga video sa ChurchofJesusChrist.org). Dapita sila sa pagpaminaw kon pila ang pangidaron ni Mormon sa dihang gihatagan siya ni Ammaron og espesyal nga misyon. Dayon hangyoa sila sa pag-ihap niini gamit ang ilang mga tudlo og ipataas kini. Aron tabangan ang mga bata sa paghunahuna kon unsa ka batan-on pa si Mormon niadtong panahona, pakit-a sila og hulagway sa usa ka bata nga nag-edad og 10 ka tuig. Tabangi sila nga makasabut sa mga kinaiya nga nakita ni Ammaron diha ni Mormon dihang bata pa siya, ug ipamatuod nga ang mga bata mahimong mapareha ni Mormon samtang sila magsunod ni Jesukristo.

• Pagdula og usa ka dula diin ang mga bata mosunod sa simpli nga mga aksyon nga imong buhaton. Dayon ipakita ang mga hulagway sa mga butang nga gihimo ni Jesus, ug paghisgut mahitungod sa paagi nga kita makasunod Kaniya (tan-awa sa Libro sa mga Hulagway sa Ebanghelyo, nu. 33–35, 41–42). Paghisgut sa mga pamaagi nga si Mormon misunod ni Jesukristo—sama pananglit, pinaagi sa pagtudlo sa ebanghelyo, pag-awhag sa mga tawo sa pagsunod sa Dios, ug paghigugma sa uban.

Mormon 3:3, 9

Ang Langitnong Amahan naghatag kanato og daghan nga mga panalangin.

Ang mga pagtulun-an ni Mormon makatabang sa mga bata nga makaila sa mga panalangin nga gihatag kanila sa Langitnong Amahan.

Posible nga mga Kalihokan

• Basaha ang Mormon 3:3 ug 9 ngadto sa mga bata, ug ipasabut nga ang mga Nephite wala moila nga ang Langitnong Amahan mipanalangin kanila. Tabangi ang mga bata sa paghunahuna sa mga panalangin nga gihatag sa Langitnong Amahan ngadto kanila. Pagpakita og mga hulagway o mga butang nga makahatag kanila og mga ideya. Unsa ang mahimo natong buhaton karon aron mapakita nato nga mapasalamaton kita ngadto sa Langitnong Amahan alang sa mga panalangin?

• Tabangi ang mga bata sa paghunahuna og mga panalangin nga gihatag sa Langitnong Amahan ngadto kanila, ug hangyoa sila sa pagdrowing og mga hulagway sa uban niini nga mga panalangin. Dapita sila sa pag sab-it sa ilang mga hulagway bisan asa sa ilang panimalay diin makita nila kini ug mahinumdom nga ang Langtinong Amahan nanalangin kanila sa daghang mga paagi. Mahimo usab nimo silang dapiton sa pag-ila sa mga panalangin nga nagagikan sa Langitnong Amahan samtang sila manganta sa unang bersikulo sa “Ako Nagpasalamat Kanimo, Mahal nga Amahan” (Songbook sa mga Bata, 9).

Mormon 3:12

Gusto sa Langitnong Amahan nga higugmaon nako ang matag usa.

Unsaon nimo pagtabang sa mga bata nga imong gitudloan aron makabaton og tinguha nga mobati og gugma alang sa tanan nga anaa sa ilang palibut?

Posible nga mga Kalihokan

• Hangyoa ang matag bata sa pagdrowing og tawo diha sa pisara, ug ipakita nga ang matag tawo nga ilang gidrowing lahi kay sa uban. Pagdrowing og dako nga kasingkasing nga mopalibut sa tanan nga mga drowing. Tabangi ang mga bata aron makasabut nga ang Langitnong Amahan ganahan nga higugmaon nato ang tanang tawo. Basaha ang Mormon 3:12, hatagan og gibug-aton ang mga pulong nga “gugma” ug “gihigugma.” Unsa man ang gihimo ni Mormon aron sa pagpakita sa iyang gugma alang sa uban?

• Panganta kamo bahin sa paghigugma sa uban, sama sa “Si Jesus Miingon Higugmaa ang Tanan” (Songbook sa mga Bata 39), samtang magpasundayag og mga hulagway sa mga bata gikan sa tibuok kalibutan. Ipamatuod ang gugma sa Dios alang sa tanan Niyang mga anak. Kompletuha ang pahina sa kalihokan niining semanaha uban sa mga bata.

Itudlo ang Doktrina: Mas Dagko nga mga Bata

Mormon 1:1–3; 2:1, 23–24; 3:1–3, 12, 17–22

Mahimo ako nga matarung sama ni Mormon.

Si Mormon bata pa kaayo dihang si Ammaron nakamatikud nga siya responsable na aron moatiman sa sagrado nga mga talaan. Unsa ang matarung nga mga kinaiya nga nakita nimo sa mga bata nga imong gitudloan?

Posible nga mga Kalihokan

• Dapita ang matag bata sa pagbasa sa usa sa mosunod nga mga tudling, ug tabangi sila sa pagpaambit unsa ang ilang nakat-unan mahitungod ni Mormon: Mormon 1:1–3; 2:1, 23–24; ug 3:1–3, 12, 20–22. Dayon ipaambit ang matarung nga mga kinaiya nga imong nakita sa matag bata.

• Ipakita ang hulagway ni Mormon (tan-awa ang hulagway diha sa outline niining semanaha sa Dali, Sunod Kanako—Alang sa mga Indibidwal ug mga Pamilya). Tabangi ang mga bata aron makasabut nga tungod kay responsable ug masaligan na si Mormon sa pag-atiman ug pagtipig sa mga talaan sa mga Nephite, anaa kanato ang Basahon ni Mormon karon. Pakigsulti sa mga bata mahitungod sa unsa ang ipasabut sa responsable ug masaligan. Dapita sila sa pagpamalandong og mga paagi nga sila mahimong mas responsable.

  

  Mormon, Age 10, ni Scott M. Snow

Mormon 2:8–15; 5:10–11

Ang diosnong kasubo mogiya ngadto sa tinuod nga kausaban.

Si Mormon nakakita nga ang dautan nga mga Nephite nagmasulub-on, apan ang ilang kasubo dili ang matang nga makadasig kanila sa paghinulsol (tan-awa sa Mormon 2:13). Unsaon nimo pagtabang sa mga bata nga makasabut sa kalainan tali sa kalibutanon nga kasubo ug sa diosnong kasubo nga mogiya ngadto sa paghinulsol?

Posible nga mga Kalihokan

• Isulat ang mosunod nga mga ulohan diha sa pisara: Kasubo nga mogiya ngadto sa paghinulsol ug Kasubo nga dili mogiya ngadto sa paghinulsol. Dapita ang mga bata sa pagpulipuli og basa sa mga bersikulo gikan sa Mormon 2:8, 10–15. Tabangi sila sa pagsulat sa mga butang nga ilang nakat-unan mahitungod sa kasubo ubos sa tukma nga mga ulohan diha sa pisara. Unsaon nato pagsiguro nga ang kasubo nga atong gibati alang sa atong mga sala mogiya kanato ngadto sa kausaban?

• Dapita ang usa ka sakop sa bishopric o usa ka ginikanan sa usa sa mga bata sa pagpaambit sa klase kon sa unsang paagi ang diosnon nga kasubo makatabang kanato nga mausab aron mas mahisama sa Langitnong Amahan ug ni Jesukristo. Nganong importante man nga makaila kita kon ang atong gibati diosnon ba nga kasubo o kalibutanon nga kasubo? Dapita ang mga bata sa pagsiksik sa Mormon 2:12 aron sa pagpangita og mga hinungdan ngano nga ang paghinulsol kinahanglan nga mohimo sa atong “[mga] kasingkasing … sa paglipay” (Mormon 2:12).

Mormon 3:12

Akong mabati ang gugma sa Langitnong Amahan alang sa uban.

Sa kasagaran mas sayon ang paghigugma niadtong naghigugma kanato o sama kanato, apan gipakita ni Mormon nga pinaagi sa tabang sa Langitnong Amahan, makahimo kita sa paghigugma niadtong kinsa adunay lahi nga pagtuo o binuhatan kay kanato.

Posible nga mga Kalihokan

• Tabangi ang usa ka bata sa pagbasa sa Mormon 3:12, ug dapita ang mga bata sa pagsulat og usa ka kapahayag nga naglangkub sa ilang nakat-unan gikan ni Mormon mahitungod sa paghigugma sa uban. Dapita ang mga bata sa pagpakigbahin kon unsay ilang gisulat. Sa unsang paagi nato mabati ang gugma sa Dios alang sa uban? (tan-awa sa Moroni 7:48). Unsa ang atong mahimo aron mapakita ang atong gugma alang sa mga tawo sa atong klase ug sa atong mga pamilya?

• Dapita ang mga bata sa pagkompleto sa pahina sa kalihokan niining semanaha. Tabangi sila sa paghunahuna og makahuluganon nga mga paagi sa pagtabang diha sa gugma niadtong mga tawo nga tingali lahi kay kanato.

Awhaga ang Pagkat-on diha sa Panimalay

Awhaga ang mga bata sa pagbutang sa pahina sa kalihokan niining semanaha bisan asa sa ilang panimalay aron sila mapahinumduman sa pagpakita og gugma alang sa uban. Hatagi sila og kahigayunan sa usa ka umaabot nga klase aron mopaambit kon unsa ang ilang gibuhat.

Pagpalambo sa Atong Pagtudlo

Usab-usabon ang mga kalihokan nga mohaum sa edad sa mga bata nga imong gitudloan. Ang mas gagmayng mga bata nagkinahanglan og detalyado nga mga pagpasabut ug makakat-on gikan sa mas yano nga pamaagi sa pagtudlo. Samtang magkahingkod sila, mas modaghan ang ilang matampo ug mahimong mas hanas sa pagpaambit sa ilang mga hunahuna. Hatagi ang tanang mga bata og haum-sa-pangidaron nga mga kahigayunan sa pagpaambit, pagpamatuod, ug pag-apil, ug siguroa ang paghatag og tabang kon gikinahanglan. (Tan-awa sa Pagtudlo Sumala sa Pamaagi sa Manluluwas, 25–26.)