I Will Bring You up Again out of the Depths, ni Jonathan Arthur Clarke

Nobyembre 16–22

Ether 6–11

“Nga ang Dautan Mahunong”

Ang mga ideya niini nga outline dili mga instruksyon nga kinahanglan imong sundon. Kini gituyo aron sa pagdasig sa imong pagkamamugnaon ug sa pagdapit og inspirasyon.

Irekord ang Imong mga Impresyon

Dapita ang Pagpaambit

Gamita ang mga hulagway gikan sa mga outline niining semanaha ug sa miaging semana diha sa Dali, Sunod Kanako—Alang sa mga Indibidwal ug mga Pamilya aron sa pagtabang sa mga bata nga maka-ribyu sa unsay ilang nakat-unan mahitungod sa mga Jaredite nga mitabok sa dagat. Papuli-puliha sila sa pagpakigbahin sa unsay ilang nahibaloan.

Itudlo ang Doktrina: Mas Gagmay nga mga Bata

Ether 6:2–12

Ang Langitnong Amahan makahupay kanako kon ako mahadlok.

Tingali makahahadlok kaayo alang sa mga Jaredite nga sila “gikuso-kuso sa mga balud sa dagat pinaagi sa ka kusog sa hangin” (Ether 6:5). Apan ang Ginoo miluwas kanila gikan sa kakuyaw ug mitabang kanila. Unsaon nimo pagtabang ang mga bata nga moduol sa Ginoo kon mahadlok sila?

Posible nga mga Kalihokan

• Gamit ang mga pulong ug mga hugpong sa mga pulong gikan sa Ether 6:2–12, ihulagway ngadto sa mga bata ang panaw sa mga Jaredite tabok sa dagat. Dapita ang mga bata sa pagpakaaron-ingnon nga misaka sila pasulod sa mga kasko ug magpakaaron-ingnon nga ang ilang kasko giduso ug gitabunan sa mga balud. Unsa man kaha ang bation kon anaa kita sa sulod sa usa ka tinuod nga kasko sa unoson nga katubigan? Unsay atong buhaton kon mahadlok kita? Dungan nga magbasa sa mga bersikulo 7 ug 9 aron masayud unsa ang gibuhat sa mga Jaredite dihang nalisang sila.

• Paghisgut mahitungod sa usa ka panahon sa dihang nahadlok ka ug ang Langitnong Amahan mihupay kanimo. Ipakigbahin sa mga bata ang usa ka himno nga makatabang kanimo nga “[mo]pasalamat ug [mo]dayeg sa Ginoo” (Ether 6:9) alang sa Iyang tabang. Tugoti ang mga bata sa pagpakigbahin sa ilang paborito nga mga kanta sa Primary, ug kantaha ninyong tanan ang pipila niini.

• Gamita ang pahina sa kalihokan niining semanaha aron sa pagtabang sa mga bata sa paghimo og papel nga mga kasko. Ipasabut nga ang mga kasko nakatabang sa mga Jaredite nga magpabiling luwas bisan kon sila giliyokan sa tubig (tan-awa sa Ether 6:7, 10). Unsa ang gihatag sa Langitnong Amahan kanato aron magpabilin kita nga luwas sa atong panaw balik ngadto Kaniya?

Ether 6:9, 12, 30; 7:27; 10:2

Mahimo akong mapasalamaton.

Sa pag-abot nila nga luwas didto sa gisaad nga yuta, ang mga Jaredite mapasalamaton kaayo nga sila “mihilak sa kalipay” (Ether 6:12). Unsaon nimo pag-awhag og usa ka mapasalamaton nga pagbati sa mga bata nga imong gitudloan?

Posible nga mga Kalihokan

• Basaha ngadto sa mga bata ang mga hugpong sa mga pulong gikan sa Ether 6:9 ug 12 aron sa pagtudlo kanila kon giunsa sa mga Jaredite pagpakita sa ilang pasalamat ngadto sa Ginoo sa pagtabang nila nga makaabut sa gisaad nga yuta. Hangyoa ang mga bata sa pagngalan og pipila ka butang nga sila mapasalamaton. Dungan nga manganta, sama sa gibuhat sa mga Jaredite, og usa ka kanta nga nagpadayag og pasalamat, sama sa “Ako Nagpasalamat Kanimo, Mahal nga Amahan” (Songbook sa mga Bata, 9).

• Basaha ngadto sa mga bata ang Ether 10:2 aron sa pagpakita nga bisan sa paglabay sa daghang mga katuigan, ang mga Jaredite nakahinumdom gihapon kon giunsa pagtabang sa Ginoo ang ilang mga katigulangan nga makatabok sa lawod. Tabangi ang mga bata sa paghunahuna og mga paagi nga ang Ginoo mipanalangin kanila. Dayon padrowinga ang mga bata og mga hulagway nga mopahinumdom kanila niini nga mga panalangin (o tabangi sila sa pagpili gikan sa pipila ka mga hulagway nga imong gidala, tingali gikan sa usa ka magasin sa Simbahan).

Ether 7:24–27

Ako mapanalanginan kon akong sundon ang propeta.

Ang basahon ni Ether klaro kaayo nga nagpakita nga sa panahon nga ang mga Jaredite misunod sa mga propeta, napanalanginan sila, ug sa dihang misalikway sila sa mga propeta, ang ilang mga kinabuhi mas nalisud. Paghunahuna og mga paagi nga makatabang ka sa mga bata nga makasabut nga tinuod gihapon kini alang kanato.

Posible nga mga Kalihokan

• Ipakita ang usa ka hulagway sa buhing propeta, ug pangutan-a ang mga bata kon unsa ang ilang nahibaloan mahitungod kaniya. Unsay buhaton sa usa ka propeta? Ipasabut nga may mga propeta usab ang mga Jaredite, ug sa matag higayon nga misunod sila sa mga propeta, napanalanginan sila ug nagmalipayon (tan-awa sa Ether 7:24–27). Unsaon man nato sa pagsunod sa propeta?

• Dungan nga manganta og usa ka kanta mahitungod sa mga propeta, sama sa “Sunda ang Propeta” (Songbook sa mga Bata, 58; tan-awa usab sa Libro sa mga Hulagway sa Ebanghelyo, nu. 4–27, 67–87). Pakigsulti sa mga bata mahitungod sa mga butang nga gitudlo sa mga propeta nga atong buhaton (sama pananglit, pagbasa sa atong mga kasulatan kada adlaw, pagbalaan sa adlaw nga Igpapahulay, o pagpangalagad sa uban), ug dapita sila nga i-aksyon ang pagsunod niana nga tambag kon ikaw moingon nga “Sunda ang propeta!”

Itudlo ang Doktrina: Mas Dagko nga mga Bata

Ether 6:2–12

Makasalig ako sa Langitnong Amahan sa paggiya kanako ngadto sa kinabuhing dayon.

Ang asoy sa mga panaw sa mga Jaredite tabok sa dagat ikatandi sa atong panaw latas sa mortalidad. Kining duha nga mga panaw usahay makuyaw ug nagkinahanglan og pagtuo nga ang Ginoo mogiya ug mopanalipud kanato.

Posible nga mga Kalihokan

• Magbasa og dungan sa Ether 6:2–12, nga maghunong-hunong sa makadaghan aron ang mga bata maka-drowing og mga hulagway sa unsay ilang gibasa. Sa unsang paagi ang panaw sa mga Jaredite sama sa atong mga kinabuhi? Tabangi ang mga bata sa pag-ila ug pagngalan [label] kon unsa ang girepresentar sa lain-laing bahin sa ilang mga drowing sa atong kinabuhi. Sama pananglit, ang mga Jaredite mahimong magrepresentar kanato. Ang mga kasko mahimong magrepresentar sa atong mga panimalay, sa Simbahan, o sa ebanghelyo. Unsa man kaha ang girepresentar sa hangin, sa tubig, sa nagsidlak nga mga bato, ug sa gisaad nga yuta?

• Tabangi ang mga bata sa pagpangita og mga pulong ug hugpong sa mga pulong diha sa Ether 6:2–12 nga nagpakita kon sa unsang paagi ang mga Jaredite misalig sa Dios. Ipaambit ang mga ehemplo kon sa unsang paagi ang pagsalig sa Dios nakatabang kanimo sa malisud nga mga panahon sa imong kinabuhi. Awhaga ang mga bata sa pagpaambit sa bisan unsang susama nila nga mga kasinatian.

  

  Journey of the Jaredites across Asia, ni Minerva Teichert

Ether 6:30; 7:27; 10:2

Ang paghinumdom unsa ang nahimo sa Ginoo ngari kanako nagdala og kalinaw.

Ang usa ka butang nga nagpalahi sa matarung nga mga hari nga Jaredite gikan niadtong mga dautan mao nga ang matarung nga mga hari “nahinumdom sa mahinungdanon nga mga butang nga ang Ginoo nakahimo” alang kanila (Ether 7:27). Unsaon nimo pagdasig ang mga bata nga makahinumdom sa unsay gihimo sa Ginoo alang kanila?

Posible nga mga Kalihokan

• Hangyoa ang mga bata sa pagbasa sa Ether 6:30; 7:27; ug 10:2 sa tagsa-tagsa o sa gagmay nga mga grupo ug mangita og usa ka butang nga magkaparehas niini nga mga bersikulo. Ipakigbahin ang imong mga pagbati mahitungod sa unsa ang nabuhat sa Ginoo alang kanimo, ug dapita ang mga bata sa pagbuhat sa ingon.

• Ipaambit sa mga bata kon giunsa nimo pagpaningkamot sa paghinumdom sa mga pamaagi nga gipanalanginan ka sa Ginoo ug ang imong pamilya. Tabangi ang mga bata sa paghunahuna og mga paagi nga makapahinumdom sa ilang mga kaugalingon kon unsa ang nahimo sa Ginoo alang kanila. Hatagi ang kada usa og usa ka piraso nga papel, ug dapita sila sa pagpamalandong ug sa pagsulat og usa ka butang nga Iyang nahimo alang kanila sa dili pa dugay. Isugyot nga mag-anad sila sa pagsulat sa mga panalangin nga ilang namatikdan gikan sa Ginoo.

Ether 9:28–35; 11:5–8

Ang Ginoo maloloy-on kon ako maghinulsol.

Bisan kon ang mga Jaredite sa kasagaran misalikway sa mga propeta ug nahimong mga dautan, ang Ginoo kanunay nga mipasaylo kanila sa panahon nga sila nagpaubos sa ilang mga kaugalingon ug naghinulsol.

Posible nga mga Kalihokan

• Dungan nga magbasa sa Ether 9:28–35, ug tabangi ang mga bata sa paghunahuna og tulo o upat ka mugbo nga mga kapahayag nga naglangkob kon unsa ang nahitabo niini nga mga bersikulo. Dayon basaha ang Ether 11:5–8, ug tabangi ang mga bata sa pag-ila sa mga pagkaparehas tali sa duha ka mga asoy. Unsa ang atong makat-unan gikan niini nga mga istorya?

• Hangyoa ang mga bata sa paghunahuna og mga tawo sa Basahon ni Mormon kinsa nagpaubos sa ilang mga kaugalingon ug napasaylo. Gamita ang mga hulagway gikan sa Libro sa mga Hulagway sa Ebanghelyo o sa Dali, Sunod Kanako—Alang sa mga Indibidwal ug mga Pamilya aron sa pagtabang kanila nga mahinumdom. Ipaambit ang imong pagpamatuod nga ang Ginoo mopasaylo kanato kon kita sinsero nga maghinulsol.

Awhaga ang Pagkat-on diha sa Panimalay

Dapita ang mga bata sa pagpaambit sa ilang mga pamilya og usa ka butang nga gihimo sa Langitnong Amahan alang kanila nga sila mapasalamaton.

Pagpalambo sa Atong Pagtudlo

Tabangi ang mga bata nga mahimong mamugnaon. “Samtang ikaw magtudlo sa mga bata, tugoti sila sa paghimo, pagdrowing, pagkolor, pagsulat, ug pagmugna. Kini nga mga butang dili lang makalingaw nga mga kalihokan—mahinungdanon kini sa pagkat-on” (Pagtudlo sumala sa Pamaagi sa Manluluwas, 25).