“Abril 27–Mayo 3. Mosiah 7–10: ‘a Babaen ti Bileg ti Apo,’” Umaykayo, Sumurot Kaniak—Para iti Primary: Libro ni Mormon 2020 (2020)
“Abril 27–Mayo 3. Mosiah 7–10,” Umaykayo, Sumurot Kaniak—Para iti Primary: 2020
Minerva K. Teichert (1888-1976), Ni Ammon iti Sanguanan ni Ari Limhi, 1949-1951, oil on masonite, 35 15/16 x 48 a pulgada. Brigham Young University Museum of Art, 1969.
Abril 27–Mayo 3
Mosiah 7–10
“Babaen ti Bileg ti Apo”
Sikakararag a mangbasa iti Mosiah 7–10, nga ut-utoben dagiti impresion a maawatmo. Kasano a makatulong dagitoy a kinapudno tapno mangipaay iti kasapulan dagiti ubbing a sursuruam?
Isuratmo dagiti Impresionmo
Yawis ti Panagbibinninglay
Allukoyem dagiti ubbing a mangibinglay iti ania man a banag a mabalinda nga ammuen maipapan kadagiti pasamak kadagitoy a kapitulo. Mabalin a masarakam ti tulong iti “Kapitulo 13: Zeniff” (Dagiti Estoria iti Libro ni Mormon, 36–37 wenno ti maitutop a video iti ChurchofJesusChrist.org).
Isuro ti Doktrina: In-inaudi nga Ubbing
Tinulongan ti Dios dagiti tao kadagiti nasantuan a kasuratan, ken matulongannak.
Kasapulan ti pammati dagiti tao ni Limhi, nga inadipen dagiti Lamanite, a tulongan ida ti Dios, isu nga impalagip ni Limhi kadakuada dagiti panawen idi tinulongan ti Dios dagiti taona.
Dagiti Mabalin nga Aktibidad
-
Kiddawem kadagiti ubbing a mangibinglay iti maysa a panawen idi kasapulanda ti tulong. Ilawlawag a nariribukan dagiti tao ni Ari Limhi, isu a nangibinglay isuna iti maysa nga estoria a makatulong kadakuada a maaddaan iti pammati. Ibasam ti Mosiah 7:19 kadagiti ubbing, ken ipakitam ti ladawan dagiti annak ti Israel a mangbalballasiw iti Nalabaga a Baybay (kitaen iti Moses Parting the Red Sea, ChurchofJesusChrist.org). Irebyum daytoy nga estoria ken ti estoria maipapan iti manna, ket tulongam kadagiti ubbing a mangyakem kadagiti estoria (kitaen kadagiti kapitulo 17 ken 18 iti Dagiti Estoria iti Daan a Tulag, wenno iti maitutop a video iti ChurchofJesusChrist.org). Kasano a timmulong ti Apo kadagiti tao? Paneknekam a matulongannatayo met ti Apo.
-
Ibasam ti Mosiah 7:33 kadagiti ubbing, ken tulongam ida a makaawat no ania ti isuro ti bersikulo nga aramidentayo tapno umawat iti tulong manipud iti Apo. Tulongam dagiti ubbing nga agpanunot kadagiti tignay a mangibagi kadagitoy a banag, ket ulitem ti bersikulo bayat ti panangaramidda kadagiti tignay. Ania dagiti sumagmamano a banag a kasapulantayo nga agpatulong? Kasano a maipakitatayo nga agtalektayo iti Apo? Ibinglaymo ti maysa a padas idi nagtalekka iti Apo ket tinulongannaka.
-
Pumili iti sumagmamano a berso iti “Book of Mormon Stories” wenno “Nephi’s Courage” (Children’s Songbook, 118–19, 120–21) a kantaen a kadua dagiti ubbing. Tulongam ida a mangilasin no kasano a tinulongan ti Apo dagiti tao iti Libro ni Mormon. Ibinglaymo dagiti dadduma pay nga estoria a mariknam a makatulong kadagiti ubbing nga agsursuro nga agtalek iti Apo.
Nangted ti Dios kadatayo kadagiti propeta, mammadto, ken mammaltiing.
Kasano a mausarmo ti Mosiah 8:16–17 a mangisuro kadagiti ubbing maipapan iti akem ti maysa a propeta kas maysa a mammadto?
Dagiti Mabalin nga Aktibidad
-
Ipakitam kadagiti ubbing no kasano nga ingatoda dagiti imada agingga kadagiti matada a kasla kumitkitada babaen ti anteohos wenno largabista. Basaen ti Mosiah 8:17, ket kiddawen kadagiti ubbing a mangikabil iti “anteohosda” iti tunggal kanito a mangngeganda ti balikas a “mammadto.” Ilawlawag a nangted kadatayo ti Dios kadagiti propeta ket maysa kadagiti akem ti maysa a propeta ti panagbalin a “mammadto” gapu ta mabalinna a “makita” dagiti banag a dumteng. Mangibinglay iti sumagmamano a pagarigan dagiti banag a nakita ken naipalgak dagiti propeta kadatayo (agraman dagiti nasantuan a kasuratan), wenno mangibinglay iti maysa a pagarigan ti maipapan iti panagakem ti propeta a kas maysa a mammadto (kas iti 1 Nephi 11:20–21).
-
Agaramidka kadagiti papel a sinan-tugot, ken idrowing kadagitoy dagiti ladawan ti bambanag nga imbalakad dagiti propeta nga aramidentayo. Ikabilmo dagitoy a sinan-tugot iti maysa a dalan iti lawlaw ti siled, ket ilawlawagmo dagiti ladawan. Pagsisinnublatem dagiti ubbing a mangyakem kas maysa a propeta ken mangtarabay kadagiti dadduma pay nga ubbing iti panangsurot kadagitoy a sinan-tugot.
-
Ipakitam ti ladawan a masarakan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket kiddawem dagiti ubbing a mangiladawan no ania ti makitada. Ilawlawag a maysa a mammadto ni Propeta Joseph Smith. Nangted ti Apo kenkuana kadagiti ramit a maawagan iti Urim ken Tumim ken bato ti mammadto a mausar iti pannakaipatarus ti Libro ni Mormon.
-
Ipakita ti ababa a paset ti mensahe iti kallabes a komperensia manipud iti Presidente ti Simbaan (wenno ipakitam ti ladawanna ket basaem ti maysa a banag nga insurona). Iburaymo ti pammaneknekmo a maysa isuna a propeta, mammadto, ken mammaltiing.
Isuro ti Doktrina: In-inauna nga Ubbing
Mosiah 7:18–20, 33; 9:14–19; 10:6–10, 19–21
Tinulongan ti Dios dagiti tao kadagiti nasantuan a kasuratan, ken matulongannak.
Ni Zeniff ken dagiti taona, a nagnaed iti daga dagiti Lamanite, ket rarauten dagiti Lamanite ket agkasapulanda iti tulong ti Dios. Ania ti masursuro dagiti ubbing manipud iti daytoy nga estoria maipapan iti panangtulong ti Dios kadagiti annakna?
Dagiti Mabalin nga Aktibidad
-
Bingaybingayem dagiti ubbing iti tallo a grupo, ket awisem ti tunggal grupo nga agadal iti maysa kadagiti sumaganad nga estoria iti nasantuan a kasuratan: dagiti Israelita a bumalballasiw iti Nalabaga a Baybay (kitaen iti Exodo 14:10–14, 21–31), ti pamilia ni Lehi nga agdaldaliasat iti langalang (kitaen iti 1 Nephi 16:9–16; 17:1–6), ken dagiti tao ni Zeniff a maisalsalakan manipud kadagiti Lamanite (kitaen iti Mosiah 9:14–19; 10:6–10, 19–21). Kasano nga impakita dagiti tao kadagitoy nga estoria a nagtalekda iti Dios? Kasano a timmulong ti Dios kadakuada? Kasano ti panangtulongna kadatayo no agtalektayo Kenkuana?
-
Awisem ti tallo nga ubbing a mangisurat iti maysa a pannubok wenno karit a pakaipasanguanda iti pisarra. Kiddawem ti maysa nga ubing a mangbasa iti Mosiah 7:33, ket allukoyem dagiti dadduma pay nga ubbing a mangpugas iti maysa kadagiti pannubok wenno karit iti tunggal kanito a mangngeganda ti maysa a banag a mabalinda nga aramiden tapno umawat iti tulong ti Apo. Kasano a makatulong kadatayo ti panagtalek iti Apo a mangparmek kadagiti karittayo?
Mangipaay ti Dios kadagiti propeta, mammadto, ken mammaltiing a pagimbagan ti sangkataw-an.
Kanunongantayo ti Umuna a Panguluen ken dagiti Sangapulo-ket-dua nga Apostol kas propeta, mammadto, ken mammaltiing. Kasano a masursuruam dagiti ubbing maipapan iti pateg dagiti propeta?
Dagiti Mabalin nga Aktibidad
-
Pumili kadagiti sumagmamano a napapateg a balikas manipud iti Mosiah 8:12–19, ken isurat dagitoy iti pisarra. Awisem ti maysa nga ubing a mangbasa kadagitoy a bersikulo, ken kiddawem kadagiti dadduma pay nga ubbing a mangingato kadagiti imada no mangngeganda ti tunggal balikas iti pisara. Isardeng ti panagbasa ket ilawlawag ti tunggal balikas kas maysa a klase.
-
Kiddawen kadagiti ubbing a mangrebyu iti Mosiah 8:16–18 tapno masursuro no ania ti kayat a sawen ti mammadto. Isurat daytoy a binatog iti pisarra: Ti mammadto ket kas iti . Tulongam dagiti ubbing nga agpanunot kadagiti wagas a mangileppas iti binatog tapno mailawlawag no apay a maysa a bendision ti mammadto kadatayo—kas pagarigan, ti mammadto ket kas iti maysa nga agbambantay, a mangballaag kadatayo iti pagpeggadan.
-
Pumili iti maysa a ragup dagiti balikas manipud iti Mosiah 8:16–17, ken isurat daytoy iti pisarra, sukatan ti tunggal balikas iti maysa a naaramid a simbolo. Mangted kadagiti ubbing ti listaan dagiti simbolo ken dagiti balikas nga ibagi dagitoy, ken paibuksilam wenno “paipatarus” kadakuada ti ragup ti balikas kas iti aramiden dagiti mammadto. Ania dagiti sumagmamano a dadduma pay a wagas a “dakkel a pagimbagan” kadatayo dagiti propeta, mammadto, ken mammaltiing? (Mosiah 8:18).
No nakapsutak, mapapigsanak ti Apo.
No maipasango dagiti ubbing kadagiti karit, mariknada no dadduma a nakapuyda ken awan gawayda. Usarem ti pakaammuan dagiti tao ni Zeniff tapno maisuro kadagiti ubbing a makaawatda iti pigsa manipud iti Apo.
Dagiti Mabalin nga Aktibidad
-
Kiddawem kadagiti ubbing a mangibinglay kadagiti wagas a pakapagbalinanda a napigsa iti bagi. Ania ti kayat a sawen ti maaddaan iti “bileg ti tattao”? (Kitaen iti Mosiah 10:11). Ania ti kayat a sawen ti maaddaan iti “bileg ti Apo”? (kitaen iti Mosiah 9:17–18; 10:10). Kasano a maawattayo ti bileg ti Apo?
-
Awisem dagiti ubbing a mangidrowing iti ladawan ti maysa a tao a mariknada nga addaan iti bileg ti Apo ket ibinglay no apay nga indrowingda daytoy a tao.
Yallukoy ti Panagsursuro iti Pagtaengan
Awisem dagiti ubbing a mangibinglay kadagiti pamiliada ti maysa nga estoria manipud kadagiti nasantuan a kasuratan a mangparegta kadakuada nga “agtalek[da] iti Dios” (Mosiah 7:19).
Panangpadur-as iti Panangisurotayo
Agdamag kadagiti naparegta a saludsod. Agdamag kadagiti saludsod a mangawis kadagiti ubbing a mangibinglay kadagiti pammaneknekda maipapan kadagiti kinapudno ti ebanghelio. Kas pagarigan, no paglilinawaganyo dagiti propeta, mabalin a kiddawem kadagiti ubbing a mangibinglay no kasano a binendisionan ida dagiti propeta.