“Mayo 11–17. Mosiah 18–24: ‘Simrektayon iti Maysa a Katulagan Kenkuana,’” Umaykayo, Sumurot Kaniak—Para iti Primary: Libro ni Mormon 2020 (2020)
“Mayo 11–17. Mosiah 18–24,” Umaykayo, Sumurot Kaniak—Para iti Primary: 2020
Minerva K. Teichert (1888–1976), Ti Panaglibas ni Ari Benjamin ken dagiti Taona, 1949 1951, oil on masonite, 35 7/8 x 48 inches. Brigham Young University of Art, 1969.
Mayo 11–17
Mosiah 18–24
Simrektayon iti Maysa a Katulagan Kenkuana
Bayat ti panangbasam ti Mosiah 18–24, panunotem dagiti ubbing a sursuruam. Makatulong kenka ti Espiritu Santo a mangilasin kadagiti kinapudno a napategto kadakuada.
Isuratmo dagiti Impresionmo
Yawis ti Panagbibinninglay
Ipakitam ti ladawan ti maysa a tao a mabumbuniagan, ken awisem dagiti ubbing a mangibinglay iti maysa a banag nga ammoda maipapan iti panagbuniag. Mabalinda nga ibinglay ti maysa a banag a nasursuroda bayat ti panangbasada iti Mosiah 18–24 a kadua dagiti pamiliada, bayat ti itatabunoda iti panagbuniag, wenno iti sabali pay nga okasion.
Isuro ti Doktrina: In-inaudi nga Ubbing
No mabuniaganak, agaramidak iti katulagan iti Dios.
Maysa kadagiti kapatgan a wagas tapno matulongan dagiti ubbing nga agsagana para iti panagbuniag ket isu ti panangisuro kadakuada maipanggep iti katulagan nga aramidenda no mabuniaganda.
Dagiti Mabalin nga Aktibidad
-
Irebyu ti estoria ni Alma ken dagiti taona iti Dandanum ti Mormon babaen ti panangusar iti Mosiah 18:7–16 wenno “Kapitulo 15: Mangisuro ken Mamuniag ni Alma” (Dagiti Estoria iti Libro ni Mormon, 43–44, wenno ti katupagna a video iti ChurchofJesusChrist.org). Ipakita ti ladawan a masarakan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket paisaritam kadagiti ubbing kenka no ania ti ammoda maipapan iti estoria.
-
Babaen ti panangusar iti Mosiah 18:8–10 kas pangiwanwan, isurom kadagiti ubbing iti bukodmo a balikas ti sumagmamano kadagiti banag nga ikaridanto nga aramiden no mabuniaganda. Kas pagarigan, ikaridanto a sumurot iti Nailangitan nga Ama ken ni Jesus babaen iti panangliwliwa kadagiti tao a naliday. Ibinglaymo ti estoria maipapan iti no kasano a tinungpalmo wenno ti maysa a tao nga am-ammom dagitoy a kari. (Kitaen met iti D&K 20:77, 79; Carole M. Stephens, “We Have Great Reason to Rejoice,” Ensign wenno Liahona, Nob. 2013, 115–17.)
-
Ilawlawag a no mabuniagantayo, agaramid met ti Nailangitan nga Ama kadagiti kari kadatayo. Ibinglay dagitoy a kari, kas nailadawan iti Mosiah 18:9–10.
No mabuniaganak, agbalinak a miembro ti Simbaan ni Jesucristo.
Tulongam dagiti ubbing a makaawat no ania ti kayat a sawen ti agbalin a miembro ti Simbaan babaen ti panagbuniag ken kumpirmasion.
Dagiti Mabalin nga Aktibidad
-
Awisem ti maysa a tao a nabiit pay a nabuniagan a mangibinglay iti padasna. Basaem ti Mosiah 18:17, ket ilawlawag a no mabuniagantayo agbalintayo a miembro ti Ti Simbaan ni Jesucristo dagiti Santo iti Ud-udina nga Aldaw ken agkari a sumurot ken ni Jesus.
-
Ipakitam kadagiti ubbing dagiti ladawan a mangibagi kadagiti banag a nailadawan iti Mosiah 18:17–28. Kas pagarigan, ti ladawan a Pannakaorden iti Kinasaserdote (Libro ti Arte ti Ebanghelio, num. 106) ket mabalin a mangibagi iti bersikulo 18, ken ti ladawan a Panagbayad iti Apagkapullo (Libro ti Arte ti Ebanghelio, num. 113) ket mabalin a mangibagi kadagiti bersikulo 27–28. Ipaladawam kadagiti ubbing no ania ti makitada kadagiti ladawan, ken usarem dagiti ladawan ken dagiti bersikulo a makatulong kadakuada a mangkita no ania ti kayat a sawen ti agbalin a maysa a miembro ti Simbaan.
Agaramidtayo ti katulagan iti Dios no mabuniagantayo.
Mapalag-an ti Dios dagiti dagensenko.
Kaano idi pinalag-an ti Dios dagiti dagensenmo? Panunotem dagiti wagas a mabalinmo a pangibinglayan kadagiti padas ken pammaneknekmo kadagiti ubbing.
Dagiti Mabalin nga Aktibidad
-
Tulongam dagiti ubbing nga agpanunot kadagiti simple a tignay a mabalin nga aramidenda bayat ti panangisaritam no ania ti napasamak kadagiti tao ni Alma iti Mosiah 24:8–17. Ilawlawag a gapu ta pinili ni Alma ti mangsurot kadagiti pannursuro ni Abinadi maipapan ken ni Jesus, saan a nasayaat ti panangtratoda kenkuana ken dagiti taona, ngem dida pulos nagsardeng iti panamati ken ni Jesus.
-
Basaem ti Mosiah 24:14–15 kadagiti ubbing. Punnuem ti maysa a bag kadagiti nadadagsen a banag (a mangibagi kadagiti dagensen), ken awisem ti maysa nga ubing a mangiggem iti bag. Ilawlawag a no naliday, masakit, wenno addaantayo iti dadduma pay a parikut, mabalin a mariknatayo a kasla agbakbaklaytayo iti nadagsen a maysa a banag. Awisem dagiti ubbing nga agsisinnublatda a mangtulong iti ubing a mangbagkat ti bag tapno agbalin daytoy a nalaglag-an. Ilawlawag a mabalin a palag-anen ti Nailangitan nga Ama dagiti dagensentayo no agkalikagumtayo a manggun-od iti tulongna babaen iti kararag, panagserbi kadagiti dadduma, ken dadduma pay.
Isuro ti Doktrina: In-inauna nga Ubbing
No mabuniaganak, agaramidak iti katulagan iti Dios.
Kasano a matulongam dagiti ubbing a sursuruam a makaawat iti katulagan nga aramidentayo iti panagbuniag?
Dagiti Mabalin nga Aktibidad
-
Ikkam ti tunggal ubing iti maysa a piraso ti papel. Aggigiddan a basaen ti Mosiah 18:8–10, ket awisem dagiti ubbing a mangisurat wenno mangidrowing iti maysa a bangir ti papelda kadagiti kari nga aramidentayo iti panagbuniag ken, iti sabali a bangir, dagiti bendision nga ikari ti Nailangitan nga Ama kadatayo. Paibinglay kadagiti ubbing no ania ti nakitada. Bayat ti panangibinglayda, agsaludsodka kas kadagitoy: Kasanotayo a “makipagladingit kadagiti agladladingit”? Ania ti kayat a sawen ti agbalin a saksi ti Dios “iti amin a lugar”? (bersikulo 9). Ania ti mabalin nga aramidentayo a mangtungpal kadagiti katulagantayo?
-
Awisem dagiti sumagmamano nga ubbing a nabuniaganen tapno mangibinglay no ania ti malagipda maipapan iti padasda. Ania ti namagbalin dayta nga aldaw a naisangsangayan? Kasano ti nariknada? Ilawlawag nga iti tunggal Domingo pabaruenda ti katulaganda iti panagbuniag no makiranudda iti sakramento. Tulongam dagiti ubbing a mangidilig iti katulagan iti panagbuniag a nailadawan iti Mosiah 18:8–10 kadagiti kararag iti sakramento (kitaen iti D&K 20:77, 79). Kasano a mapagbalintayo ti sakramento a maysa a naisangsangayan, naraem a kanito, kas met laeng idi panawen ti panagbuniagtayo?
-
Kiddawem iti maysa a nabiit pay a nabuniagan a mangibinglay no kasano a naammuanna ti maipapan iti Simbaan ken no ania ti nariknana a nabuniagan. Pagsaludsodem dagiti ubbing, kas iti no ania ti nakatulong iti dayta a tao nga agtarigagay a mangaramid kadagiti kari iti Mosiah 18:7–16.
Kamengak iti Ti Simbaan ni Jesucristo dagiti Santo iti Ud-udina nga Aldaw.
Kasano a maparegtam dagiti ubbing nga agbalin a managyaman kadagiti bendision ti panagbalin a miembro ti Simbaan?
Dagiti Mabalin nga Aktibidad
-
Awisem dagiti ubbing a mangbasa iti Mosiah 18:17–28, a mangsapsapul kadagiti pannursuro ti Simbaan ni Cristo iti aldaw ni Alma a kapada iti aldawtayo. Isurat dagiti sungbatda kadagiti bloke wenno tasa, ken pausarmo kadagiti ubbing dagitoy a mangbangon iti maysa a pasdek a mangibagi iti Simbaan ni Jesucristo.
-
Makikanta kadagiti ubbing wenno basaen dagiti balikas iti “The Church of Jesus Christ” (Children’s Songbook, 77), ket awisem ida a dumngeg kadagiti banag nga ikaritayo nga aramiden kas miembro ti Simbaan. Tulongam ida nga agpanunot kadagiti wagas a pakapagtungpalan kadagitoy a kari.
Mosiah 21:1–5, 13–16; 22:1–11; 24:8–22
Mapalag-an ti Dios dagiti dagensenko.
Ti estoria maipapan kadagiti tao ni Alma ket makaipakita kadagiti ubbing a no dadduma tumulong ti Dios babaen iti panangpapigsana kadatayo nga agibtur kadagiti pannuboktayo imbes nga ikkatenna dagitoy. Kasano a matulongam ida a makasursuro manipud iti daytoy nga estoria?
Dagiti Mabalin nga Aktibidad
-
Tulongam dagiti ubbing a mangilasin kadagiti kangrunaan a pasamak manipud kadagiti pakaammuan dagiti tao ni Limhi iti Mosiah 21:1–5, 13–16; ken 22:1–11 ken dagiti tao ni Alma iti Mosiah 24:8–22. Kalpasanna kiddawem ti tunggal ubing a mangidrowing iti maysa kadagitoy a pasamak. Awisem dagiti ubbing a mangurnos kadagiti drowingda iti husto nga urnos a mangisarita iti estoria. Bayat ti panangurnosda, yunay-unay a tinulongan ti Dios dagiti tao a mangibaklay kadagiti dagensenda.
-
Awisem dagiti ubbing a mangbasa iti Mosiah 21:14–15 ken 24:13–14. Kasano a simmungbat ti Apo kadagiti kararag dagiti tao ni Limhi ken dagiti tao ni Alma? Kiddawem kadagiti ubbing a mangibinglay iti panawen idi nagkararagda para iti tulong iti maysa a pannubok ket tinulongan ida ti Nailangitan nga Ama, wenno ibinglaymo dagiti bukodmo a padas.
Yallukoy ti Panagsursuro iti Pagtaengan
Awisem dagiti ubbing a mangilawlawag iti maysa iti klase no ania ti ikarida wenno inkaridan nga aramiden kas paset ti katulagan iti panagbuniagda.
Panangpadur-as iti Panangisurotayo
Ikasom dagiti ubbing. No kasla saan a makatalna dagiti ubbing, mabalin a daytoy ti gundaway tapno mangpadas iti sabali pay nga aktibidad wenno agpagnapagna biit ken siuulimek. Iti sabali a bangir, no makiraman ken agsursuroda, saanmo a piliten ti mangituloy tapno laeng maisurom ti ad-adu pay a material nga adalen.