“Abril 20–26. Mosiah 4–6: “Naindaklan a Panagbalbaliw,’” Umaykayo, Sumurot Kaniak—Para iti Primary: Libro ni Mormon 2020 (2020)
“Abril 20–26. Mosiah 4–6,” Umaykayo, Sumurot Kaniak—Para iti Primary: 2020
Iti Panagserbi ti Diosyo, ni Walter Rane
Abril 20–26
Mosiah 4–6
“Naindaklan a Panagbalbaliw”
Ania kadagiti sursuro ni Ari Benjamin iti Mosiah 4–6 ti kasayaatan a makatulong kadagiti ubbing a sursuruam a mangrugi a mangpadas iti “naindaklan a panagbalbaliw” (Mosiah 5:2) iti puspusoda? Isuratmo dagiti impresionmo bayat ti sikakararag a panagkalikagummo a manggun-od iti pannarabay.
Isuratmo dagiti Impresionmo
Yawis ti Panagbibinninglay
Isurat ti nagan ti tunggal ubing iti klasem iti piraso ti papel, ket ikabil dagiti papel iti a maysa a pagkargaan. Bayat iti panangalam iti tunggal nagan manipud iti pagkargaan, awisem dayta nga ubing a mangibinglay iti maysa a banag malagipda manipud iti adalen iti napalabas a lawas wenno maysa a banag a nasursuroda manipud iti Mosiah 4–6 iti pagtaengan itoy a lawas.
Isuro ti Doktrina: In-inaudi nga Ubbing
Mangyeg iti rag-o ti panagbabawi.
Tulongam dagiti ubbing a makasursuro maipapan iti nakaskasdaaw a sagut ti panagbabawi a sidadaan a magun-od gapu iti Pannubbot ni Jesucristo.
Dagiti Mabalin nga Aktibidad
-
Usarem ti Mosiah 4:1–3 ken 10 a mangisuro kadagiti ubbing no ania ti kaipapanan ti agbabawi. Kas pagarigan, tulongam ida a mangtakuat a nagladingit dagiti tao ni Ari Benjamin maipapan kadagiti basbasolda ket dimmawatda iti pammakawan (dagiti bersikulo 1–2), ket imbaga ni Ari Benjamin kadakuada da (wenno isardengda nga agaramid) dagiti basbasolda (bersikulo 10). Ibasam ti bersikulo 3 kadakuada, ket saludsodem no kasano ti panagrikna dagiti tao idi nagbabawida.
-
Saludsodem kadagiti ubbing no kasano ti rikna no marugitan dagiti kawestayo. Kasano ti riknatayo no agbalintayo manen a nadalus? Ilawlawag a kasla pananglaba kadagiti narugit a kawes, makapagbabawitayo no agaramidtayo iti biddut. Ipakitam ti ladawan ni Jesucristo, ken paneknekam nga addaan Isuna iti bileg a mangikkat kadagiti basbasoltayo ket mapagbalinnatayo a nadalus manen no agbabawitayo.
Nasken a tratuek dagiti dadduma iti ayat ken panangngaasi.
Kasano a mausarmo ti Mosiah 4:13–26 a mangisuro kadagiti ubbing nga “agpipinnateg, ken agpaay iti tunggal maysa”? (bersikulo 15).
Dagiti Mabalin nga Aktibidad
-
Mangidrowing iti maysa a bassit a puso iti pisara. Awisem dagiti ubbing a mangibinglay kadagiti wagas a pakapagbalinanda a naasi kadagiti dadduma. Tunggal gundaway a mangibinglayda, pugasem ti puso ket mangidrowing iti maysa a dakdakkel. Paneknekam a dumakdakkel ti panagayattayo para kadagiti dadduma no naasitayo kadakuada. Mangted kadagiti ubbing kadagiti sinan-puso a papel, ken awisem ida nga idrowing kadagiti puso dagiti wagas a pangipakitaanda iti ayat ken agbalin a naasi.
-
Tulongam dagiti ubbing a mangpanunot kadagiti tignay a maaramid bayat ti panangkansionda iti maysa a kanta maipapan iti panagayat kadagiti dadduma, a kas iti “Mangrugi Kaniak ti Panangngaasi” (Dagiti Himno ken Kanta dagiti Ubbing, 136).
No agaramidak kadagiti katulagan iti Dios, awatek iti bagik ti nagan ni Cristo.
Utobem no kasano a matulongam dagiti ubbing a sursuruam nga agsagana nga agaramid kadagiti katulagan iti panagbuniag iti Dios ken “maawagankayo nga annak ni Cristo” (Mosiah 5:7).
Dagiti Mabalin nga Aktibidad
-
Tulongam dagiti ubbing a mangaramid kadagiti tsapa a mangipakita iti nagan ni “Jesucristo” ket ikabitmo dagitoy kadagiti kamisetada iti rabaw dagiti puspusoda (kitaen iti panid ti aktibidad iti daytoy a lawas). Ilawlawag nga insuro ni Ari Benjamin kadagiti taona a no agaramidtayo kadagiti katulagan, wenno kari, iti Dios, maipada daytoy iti kaadda iti nagan ni Cristo a “kanayon a naisurat iti puspuso[tayo]” (Mosiah 5:12). Ania ti ikaritayo nga aramiden no mabuniagan ken makiranudtayo iti sakramento? (kitaen iti Mosiah 5:8; DkK 20:37, 77, 79).
-
Kiddawen kadagiti ubbing no ania ti aramidenda tapno agbalin a gayyem iti maysa a tao (kas pagarigan, kasaritam ida, agaramid kadagiti banag a kadakuada, ken mangbubos iti oras kadakuada). Ibasam ti Mosiah 5:13 kadagiti ubbing. Ania ti maaramidtayo tapno maam-ammotayo ni Jesucristo a nasaysayaat tapno iti kasta saan a “ganggannaet” Isuna kadatayo?
Isuro ti Doktrina: In-inauna nga Ubbing
Makapagbabawiak.
Kasano a matulongam dagiti ubbing a makaawat no ania ti kaipapanan ti agbabawi? Ania kadagiti bersikulo iti Mosiah 4:1–11 ti mariknam a makatulong kadakuada?
Dagiti Mabalin nga Aktibidad
-
Isurat ti balikas a pammakawan iti pisarra. Aggigiddan a basaen ti Mosiah 4:1–3, ket kiddawen kadagiti ubbing nga agsapul kadagiti balikas iti bersikulo 3 a mangiladawan kadagiti bendision a sumangbay no agbabawi ken umawattayo iti pammakawan.
-
Kiddawem kadagiti ubbing a manginagan kadagiti banag a nasken nga aramidentayo tapno agbabawitayo a naan-anay ken sipupudno. Tulongam ida a mangsarak iti sumagmamano kadagitoy a banag iti Mosiah 4:10, ket paglilinnawagan ti kaipapanan dagiti balikas ken ragup dagiti balikas a masarakan iti dayta a bersikulo. Ibinglay ti estoria a mangiladawan iti panagbabawi, nalabit a manipud iti bukodmo a biag wenno manipud iti kaudian nga isyu ti magasin iti Simbaan.
-
Tulongam dagiti ubbing a mangbirok kadagiti balikas iti Mosiah 4:6, 9, ken 11 a mangiladawan iti Nailangitan nga Ama. Apay a napateg a maawatantayo no ania ti langa ti Nailangitan nga Ama no kasapulantayo ti agbabawi? Ibinglay ti pammaneknekmo maipapan iti no kasano a nariknam ti ayat ti Dios idi nagbabawika.
Mangparegta kaniak ti ebanghelio a mangtrato kadagiti dadduma iti ayat ken kinaasi.
Insuro ni Ari Benjamin a no umasidegtayo ken ni Cristo ken umawattayo ti pannakaugas dagiti basbasoltayo, “mapno[tayo] iti ayat ti Dios” (Mosiah 4:12), a mangiturong kadatayo nga agbalin a managayat ken manangngaasi kadagiti dadduma.
Dagiti Mabalin nga Aktibidad
-
Tulongam dagiti ubbing a mangsapul iti Mosiah 4:13–16, 26 ken mangilasin kadagiti ragup dagiti balikas a mangiladawan no kasano a makapagserbitayo kadagiti dadduma. Awisem ida a mangyakem kadagitoy a banag wenno mangidrowing kadagiti ladawanda, ken bay-am a pugtuan dagiti dadduma nga ubbing ti ragup dagiti balikas. Kasano a maipakitatayo ti ayat ken panangngaasi iti pagtaengan, iti eskuela, wenno iti simbaan?
-
Awisem dagiti ubbing a mangibinglay iti maysa a padas a nagayat wenno nagserbida iti maysa a tao ken no kasano ti panangriknada iti dayta a padas. Ania dagiti sumagmamano a rason a ti mabalin a saan a pangayatan dagiti tao ti agserbi kadagiti dadduma? Salusodem kadagiti ubbing no ania ti koma ti ibagada iti maysa a tao a mangallukoy kadakuada a tumulong kadagiti tao nga agkasapulan. Mabalinda sapulen dagiti kapanunotan iti Mosiah 4:16–26.
Insuronatayo ni Jesucristo nga agbalin a naasi kadagiti dadduma.
No mabuniagan ken makiranudak iti sakramento, awatek iti bagik ti nagan ni Cristo.
Nalabit nga adu kadagiti ubbing a sursuruam ti nabuniaganen ken mangpabpabaro kadagiti katulaganda babaen ti sakramento. Ipalagip kadakuada a ti maysa a napateg a paset ti katulagan iti panagbuniagda ket isu ti panangawat iti bagbagida ti nagan ni Jesucristo.
Dagiti Mabalin nga Aktibidad
-
Mangidrowing iti maysa a sirkulo iti pisara, ket mangipan iti maysa a ladawan ni Jesucristo iti tengnga ti sirkulo. Awisem dagiti ubbing a mangidrowing iti ladawan ti bagbagida bayat ti aggigiddan a panangbasayo iti Mosiah 5:8 . Ania ti ibaga daytoy a bersikulo nga awatentayo iti bagbagitayo? Ania ti “nakitulaganatayo”? Awisem dagiti ubbing a mangisurat iti nagan ni Cristo kadagiti ladawanda ket ikabilda dagiti ladawan iti sirkulo a kadua ti Mangisalakan. Ania dagiti katulagan nga aramidentayo no mabuniagan ken awatentayo ti sakramento? (kitaen iti Mosiah 18:8–9; DkK 20:77, 79).
-
Makisarita kadagiti ubbing maipapan iti no apay nga ikabil dagiti tao ti naganda kadagiti banag, kas kadagiti naidutok nga aramiden iti pagadalan, dagiti ay-ayam a jersey, ken dadduma pay (kitaen iti Mosiah 5:14–15). Kasano a maipakitatayo nga addaantayo iti nagan ni Cristo a “kanayon a naisurat iti puspuso[tayo]”? (Mosiah 5:12).
-
Awisem ti maysa nga agtutubo a lalaki wenno babai manipud iti ward a sumarungkar iti klasem ken mangilawlawag kadagiti katulagan a pabaruentayo babaen ti pannakiranud iti sakramento. Ibasam dagiti kararag ti sakramento iti Doktrina ken Katulagan 20: 77 ken 79 kadagiti ubbing, ken awisem ida a mangsapul kadagiti ragup ti balikas a mangiladawan no ania ti katulagan nga aramidentayo ken no ania dagiti ikari ti Dios kadatayo kas supapak.
Yallukoy ti Panagsursuro iti Pagtaengan
Awisem dagiti ubbing a mangidrowing iti maysa a banag a nasursuroda iti agdama ket usarem ti drowingda a mangisuro kadagiti pamiliada.
Panangpadur-as iti Panangisurotayo
Suruam dagiti ubbing a mangisurat kadagiti impresion. Masursuro uray dagiti ubbing nga agsurat kadagiti naespirituan a parikna—kas pagarigan, babaen ti panangmarka kadagiti nasantuan a kasuratan, panagdrowing kadagiti ladawan, wenno panagsurat kadagiti simple nga iserrek iti diurnal.