“Marso 30–Abril 12. Paskua ti Panagungar: “Agungarto … nga Addaan iti Pagpaimbag kadagiti Payakna,’” Umaykayo, Sumurot Kaniak—Para iti Primary: Libro ni Mormon 2020 (2020)
“Marso 30–Abril 12. Paskua ti Panagungar,” Umaykayo, Sumurot Kaniak—Para iti Primary: 2020
Ni Cristo ken dagiti Apostol, ni Del Parson
Marso 30–Abril 12
Paskua ti Panagungar
“Agungarto … nga Addaan iti Pagpaimbag kadagiti Payakna”
Bayat ti panangbasam kadagiti nasantuan a kasuratan a nasingasing ditoy ken iti Umaykayo, Sumurot Kaniak—Para kadagiti Indibidual ken Pamilia, tulongannakanto ti Espiritu a mangammo no ania ti ipokusmo tapno matulongan dagiti ubbing a mangrikna iti ayat ti Mangisalakan iti Domingo ti Paskua ti Panagungar.
Isuratmo Dagiti Impresionmo
Yawis ti Panagbibinninglay
Kasaom dagiti ubbing maipapan iti banag nga ar-aramidem a manglagip iti Mangisalakan iti Paskua ti Panagungar. Awisen ida a mangibinglay no ania ti aramidenda.
Isuro ti Doktrina: In-inaudi nga Ubbing
1 Nephi 11:27; Mosiah 3:5; 15:7; Helaman 14:16–17
Ammo dagiti propeta iti Libro ni Mormon nga umay ni Jesucristo.
Makatulong ti panagsursuro no ania ti insuro dagiti propeta iti Libro ni Mormon maipapan iti mision ni Jesucristo ken iti naindagaan a panagserbi ni Jesucristo a mangpapigsa iti pammati dagiti ubbing Kenkuana.
Dagiti Mabalin nga Aktibidad
-
Ipakita ti ladawan ti Mangisalakan a mabumbuniagan, mangag-agas kadagiti dadduma, mailanlansa iti krus, ken kas maysa a nagungar a parsua (kitaen iti panid iti aktibidad iti daytoy a lawas wenno iti Libro ti Arte ti Ebanghelio, num. 35, 41, 57, 59). Kiddawem kadagiti ubbing a mangibaga kenka no ania ti mapaspasamak iti tunggal ladawan. Ilawlawag nga adu a tawen sakbay nga immay ni Jesus iti daga, impalgak ti Dios kadagiti propeta iti Libro ni Mormon nga aramidenna dagitoy a banag. Basaen ti 1 Nephi 11:27; Mosiah 3:5; 15:7; ken Helaman 14:16–17, ken tulongam dagiti ubbing nga iparis dagitoy nasantuan a kasuratan kadagiti maitutop a ladawan.
-
Bayat ti panangitrabaho dagiti ubbing iti panid ti aktibidad iti daytoy a lawas, pagsasaritaan maipapan kadagiti nailadawan a propeta ken no ania ti insuroda maipapan ken ni Jesucristo. Ibinglay kadagiti ubbing dagiti sumagmamano a nakaskasdaaw a banag nga inaramid ni Jesus para kadatayo.
Nagungar ni Jesucristo.
Isuro kadagiti ubbing a mainayon kadagiti tao a nakakita iti nangungar a Mangisalakan iti Jerusalem, rinibu ti nakakita Kenkuana idi nagparang Isuna iti kontinente iti America.
Dagiti Mabalin nga Aktibidad
-
Ipakita dagiti ladawan ti ipapatay ken Panagungar ti Mangisalakan. Saludsodem kadagiti ubbing no ania ti ammoda maipapan kadagitoy a pasamak. No kasapulan, usarem ti “Kapitulo 53: Nailansa ni Jesus iti Krus” ken “Kapitulo 54: Nagungar ni Jesus” (Dagiti Estoria iti Baro a Tulag, 136–38, 139–44, wenno ti maitutop a video iti ChurchofJesusChrist.org) a mangisarita kadagiti ubbing kadagitoy nga estoria.
-
Iti panangusarmo kadagiti ladawan manipud iti Libro ti Arte ti Ebanghelio wenno Umaykayo, Sumurot Kaniak—Para kadagiti Indibidual ken Pamilia, ibagam kadagiti ubbing maipapan iti isasarungkar ti nangungar a Mangisalakan iti kontinente ti America, kas nailadawan iti 3 Nephi 11:1–17. Ulitem ti estoria iti sumagmamano a daras, a mangaw-awis kadagiti ubbing a tulongandaka. Yunay-unaymo dagiti detalye a mariknam a napateg kadagiti ubbing. Kangrunaanna, yunay-unay nga uray no natay ni Jesus iti krus, makita dagiti tao a nagungaren Isuna itan. Pagsisinnublatem dagiti ubbing a mangisalaysay iti estoria iti bukodda a balikas.
-
Aggigiddan a mangkanta iti “Easter Hosanna” wenno ti maudi a bersikulo ti “Book of Mormon Stories” (Children’s Songbook, 68–69, 118–19). Awisem dagiti ubbing nga agdrowing kadagiti ladawan ti maysa a banag nga iladawan ti kanta. Kalpasanna kiddawem kadagiti ubbing a mangibinglay kadagiti drowingda ken no ania iti panagkunada a mariknada koma no addada sadiay idi sarungkaran ni Jesus dagiti Nephite.
Ammo ni Jesucristo no kasano a liwliwaennak.
Gapu ta sinagaba ni Jesucristo “ti saem ken saksakit dagiti taona” (Alma 7:11), ammona no kasano ti mariknatayo, uray no awan ti sabali pay a makarikna.
Dagiti Mabalin nga Aktibidad
-
Ibasa kadagiti ubbing dagiti umuna a sumagmamano a linia ti Mosiah 3:7, ket awisem ida nga agpammarang a marikriknada ti “saem … , bisin, waw, ken bannog [kinabannog].” Kiddawem kadakuada a mangibinglay iti panawen idi nariknada dagitoy a banag. Kalpasanna isaritam kadagiti ubbing a daytoy a bersikulo ti mangiladawan iti sumagmamano a banag a narikna ni Jesucristo idi nagsagaba Isuna iti Minuyongan ti Getsemani. Gapu iti daytoy, ammona no kasano a matulongannatayo no mariknatayo dagitoy a banag.
-
Basaem ti Alma 7:11 iti napigsa, ket saludsodem kadagiti ubbing no adda ammoda a maysa a tao a masakit wenno agsagsagaba iti saem. Paneknekam a narikna ni Jesucristo dagiti amin a “saem ken saksakit[tayo]” tapno maawatanna no kasano a maliwliwanatayo (Alma 7:12).
Isuro ti Doktrina: In-inauna nga Ubbing
2 Nephi 9:10–15; Alma 11:41–45; 40:21–23
Gapu ta nagungar ni Jesus, agungarakto met.
Nalawag nga iladawan ti Libro ni Mormon no ania ti kaipapanan ti panagungar ken asino ti agungarto. Kasano a matulongam dagiti ubbing a mangtakuat kadagitoy a kinapudno.
Dagiti Mabalin nga Aktibidad
-
Kiddawem kadagiti ubbing nga isaritada kenka no ania ti ammoda maipapan iti ipapatay ken Panagungar ni Jesucristo. Isurat iti pisarra dagiti saludsod a kas kadagiti Ania ti kayat a sawen ti agungarto? ken Asino ti agungarto? Tulongam dagiti ubbing a mangsapul kadagiti sungbat iti 2 Nephi 9:10–15; Alma 11:41–45; ken Alma 40:21–23 ken ibinglay iti klase no ania ti nasarakanda.
-
Isaritam kadagiti ubbing maipapan iti maysa a tao nga ammom a natayen. Kiddawem kadakuada nga agpammarangda a dimo ammo ti maipapan iti Panagungar. Kasano a matulongandaka a makaawat no ania daytoy? Allukoyem ida a mangusar iti 2 Nephi 9:10–15; Alma 11:41–45; wenno Alma 40:21–23 tapno maisuroda kenka ti maipapan iti panagungar. Awisen pay ida a mangibinglay iti pammaneknek maipapan iti Panagungar ti Mangisalakan kas paset ti sungbatda.
Getsemani, ni Michael T. Malm
Enos 1:2–8; Mosiah 27:8–24; Alma 13:11–12; 24:7–19
Dalusan ken balbaliwannak ti Pannubbot ni Jesucristo.
Mangted iti adu a pagarigan ti Libro ni Mormon kadagiti tao a nagbalbaliw gapu iti Pannubbot ti Mangisalakan. Ibilangmo no kasano a maparegta dagitoy a padas dagiti ubbing tapno agbabawi ken umasidegda iti Mangisalakan.
Dagiti Mabalin nga Aktibidad
-
Ipakita kadagiti ubbing ti nadalus a puraw a kamiseta ken ti narugit a puraw a kamiseta. Aggigiddan a basaen ti Alma 13:11–12. Kasano a nadalusan dagiti tao manipud kadagiti basolda? Kasano a nangiparikna daytoy kadakuada maipapan iti basol? Isaritam no kasano ti mariknam no agbabawi ken umawatka iti pammakawan, ket ibinglaymo ti pammaneknekmo maipapan iti bileg ti Mangisalakan a mangdalus kadatayo manipud iti basol.
-
Awisem dagiti ubbing a pumili iti maysa kadagiti sumaganad a tao a sursuruen: Enos (kitaen iti Enos 1:2–8), Alma nga Ub-ubing (kitaen iti Mosiah 27:8–24), wenno dagiti Anti-Nephi-Lehi (kitaen iti Alma 24:7–19). Bayat ti aggigiddan a panangbasayo iti estoria, awisem dagiti ubbing a mangkita no kasano a nagbalbaliw daytoy a tao wenno grupo gapu iti Pannubbot ni Jesucristo. Kasano a masurottayo dagiti pagwadan dagitoy a tao?
Inawat ni Jesucristo iti Bagina dagiti basol, saem ken saksakit.
Mainayon iti panagsagabana gapu kadagiti basbasoltayo, sinagaba pay ti Mangisalakan dagiti saem, sakittayo, ken dadduma pay nga an-anayentayo tapno maammuanna no kasano a maliwliwanatayo.
Dagiti Mabalin nga Aktibidad
-
Dutokam ti tunggal ubing a mangsukisok iti maysa kadagiti sumaganad a bersikulo tapno saraken no ania ti sinagaba ni Jesucristo: Mosiah 3:7; Mosiah 15:5; wenno Alma 7:11. Awisem ida a mangilista iti pisarra no ania ti nasarakanda ket panunotenda dagiti panawen idi nariknada ti sumagmamano kadagitoy a banag. Segun iti Alma 7:12, apay a sinagaba ni Jesus amin daytoy? Apay a napateg a maammuan a sinagabana dagitoy a banag para kadatayo?
-
Aggigiddan a mangkanta iti himno a maipapan iti Mangisalakan, a kas iti “I Know That My Redeemer Lives” (Hymns, no. 136). Awisem dagiti ubbing a mangsarak iti himno kadagiti ragup ti balikas a mangiladawan no kasano a liwliwaennatayo ti Mangisalakan, ken isaritada no apay a napateg kadakuada dagitoy a ragup ti balikas. Ibinglaymo dagiti riknam maipapan ken ni Jesucristo, ket awisem dagiti ubbing a mangibinglay kadagiti riknada.
Yallukoy ti Panagsursuro iti Pagtaengan
Awisem dagiti ubbing a mangsapul iti maysa a tao itoy a lawas nga agkasapulan iti liwliwa. Allukoyem ida a mangibinglay iti daytoy a tao no ania ti nasursuroda maipapan iti Mangisalakan nga umaw-awat iti Bagina ti saemtayo tapno maliwliwanatayo.
Panangpadur-as iti Panangisurotayo
Yawis ti Panagbibinninglay Saludsoden kadagiti ubbing maipapan kadagiti kapanunotan, rikna, ken padasda. Mammuamto a masansan nga addaanda iti simple ngem nauneg a pannakaawat ken pannakaammo [insights].