“Maaj 23–29. Inōs–Naan ko an Mormon: E ej Jerbal ilo N̄a n̄an Kōm̧m̧an Ankilaan,” Itok, Ļoor Eō—N̄an Būraimere: Bok in Mormon 2020 (2020)
“Maaj 23–29. Inōs–Naan ko an Mormon,” Itok, Ļoor Eō—N̄an Būraimere:2020
Jekab im Inōs, jān Scott Snow
Maaj 23–29
Inōs–Naan ko an Mormon
E ej Jerbal ilo N̄a n̄an Kōm̧m̧an Ankilaan
Inōs, Jarom, Omnai, im Naan ko an Mormon rej bok ko rekadu me ewōr ien katak ko raorōk n̄an ajri ro kwoj katakin. Pukot katak kein, im ļōmņak kōn wāween ko komaron̄ jipan̄ ajri ro ekkatak jeni. Ļōmņak ko ilo laajrak in emaron̄ jipan̄.
Je En̄jake ko Rej Im̧we Eok
Kajjitōk bwe ren Kwaļo̧k
Jipan̄ ajri ro keememej ta eo raar ekkatak jān katak eo an wiik eo ļo̧k. Raar ke kwaļo̧k ta eo raar ekkatak n̄an baam̧le eo aer ak ro jet?
Katakin Katak: Ajri ro Reddik
Imaron̄ kōnono n̄an Jemedwōj Ilan̄ ilo jar.
Inōs eaar en̄jake jet m̧ool ko kōn jar. Elmen am̧ naaj im̧we ajri ro n̄an ļoor waanjon̄ok eo an Inōs ilo aer jar?
M̧akūtkūt ko Maron̄ Kōm̧m̧ani
-
N̄an waanjon̄ok, kwaļo̧k juon pijai n Inōs, lale laajrak eo an wiik in ilo Itok, Ļoor—N̄an Kajjojo Armej im Baam̧le ko, ak kōjerbal pija Inōs Jar (Gospel Art Book, no. 72). Kajjitōk ippān ajri ro n̄an kōnono kōn ta eo eaar waļo̧k ilo pija eo, innām kwaļo̧k en̄jake eo an Inōs n̄an er. Komaron̄ kōjerbal “Jebta 11: Inōs” (Bwebwenato ko ilo Bok in Mormon, 30–31, ak pija in alooj ko ilo ChurchofJesusChrist.org).
-
Kajjitōk ippān ajri ro n̄an kwaļo̧k men ko rem̧m̧an ippāer n̄an kōnono ippān ro jineer im jemeer. Kōmeļeļe bwe jar n̄an Jemedwōj Ilan̄ ej wāween eo remaron̄ kōnono n̄an E. Ilo am̧ riiti Inōs 1:1–4 n̄an ajri ro, kajjitōk ippāer n̄an ānwōt n̄e er Inōs ilo aer kōkkidudu, bukwelōlō im jar, im ko jet. Kōmeļeļeik bwe Jemedwōj Ilan̄ eaar ron̄ jar ko an Inōs im kar jeo̧rļo̧k jerawiwi ko an.
-
Al juon al ippān doon kōn jar, āinwōt “A Child’s Prayer” (Children’s Songbook, 12–13). Kajjitōk ippān ajri ro n̄an kajutak peier aolep iien n̄e rej ron̄ naan eo “jar” ak bar ālijji naan eo. Kam̧ool kōn kajoor eo an jar ilo mour eo am̧.
Āinwōt ajri ro nejin Anij, jemaron̄ jar n̄an Jemedwōj Ilan̄.
Imaron̄ kōjeraam̧m̧an ro jet n̄e ij ron̄jake Jetōb Kwojarjar.
Ke eaar kobaik Bok in Mormon, kar im̧we Mormon n̄an kobaik pileij ko reddik an Nipai. Eaar jab jeļā etke pileij ko reddik kar aikuji, ak rainin jej jeraam̧m̧an kōnke eaar ļoore im̧we in. Waanjon̄ok in emaron̄ im̧we ajri ro n̄an ļoor Jetōb eo.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kwaļo̧k bwebwento ko raar ekkatak jān Bok in Mormon ilo kar iiō in (pija ko jān Itok, Ļoor—N̄an Kajjojo im Baam̧le ko ak Gospel Art Book emaron̄ jipan̄ er keememejje). Kōmeļeļeik bwe epād ippād bwebwenato kein ilo Bok in Mormon kōnke Mormon eaar ron̄jake ke Jetōb Kwojarjar eaar jiron̄ e bwe en kobaiki. Etke Jemedwōj Ilan̄ eaar kōņaan bwe jen būki bwebwenato kein?
-
Kwaļo̧k juon jān māākjiin ko an Kabun̄ in ak jān ennaan ko an kweilo̧k eo eļap kōn juon eo im eaar ļoor im̧we ko an Jetōb Kwojarjar eo. Ak kwaļo̧k juon iaan en̄jake ko am̧. Kajjitōk ippān ajri ro n̄an jin̄aiki pija ko ilo bwebwenato ko. Elmen an kar armej rein ilo bwebwenato kein kar jeraam̧m̧an kōnke raar ļoor Jetōb Kwojarjar eo?
-
Kajjitōk ippān juon ward membōr bwe en lowaj kūlaaj eo im kwaļo̧k juon en̄jake ke eaar ļoor im̧we eo jān Jetōb Kwojarjar eo. Elmen an kar kōjeraam̧m̧an ro jet? Kōmeļeļeik bwe Jemedwōj Ilan̄ ekōņaan jipan̄ im kōjeraam̧m̧an ro jet, kōn menin Eaar jilkintok Jetōb Kwojarjar eo n̄an tōl kōj.
-
Al juon al ippān doon kōn Jetōb Kwojarjar, āinwōt “The Still Small Voice” (Children’s Songbook, 106–7). Al jidik kake ilo wāween ko roktak, āinwōt m̧ōkaj, kadikdik, ak ilo unojdikdik. N̄e kwoj unojdikdik ilo al, kōpeļļo̧k n̄an Naan ko an Mormon 1:7, im ba ke Mormon eaar kōmeļeļeik bwe Jetōb Kwojarjar āinwōt unoojdikdik.
Katakin Katak: Ajri ro Rōtūttoļo̧k
Jemedwōj Ilan̄ ej ron̄jake im uwaake jar ko aō.
Emaron̄ in pidodo bwe jar ko ad ren erom̧ waan bajjōk. En̄jake eo an Inōs ej juon kakeememej bwe bōk uwaak ko n̄an jar ko ad jet iien ebōk juon “likarōk” im “elōn̄ en̄taan ko” (Inōs 1:2 11).
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kiil mejeer im anto̧o̧ne aer kōnono n̄an Jemedwōj Ilan̄ jeļm̧ae doon. Ta eo rekōņaan kōnono Ippān kake? Kajjitōk ippān ajri ro n̄an ļōmņak kōn aer jeļm̧ae Jemedwōj Ilan̄ kajjojo raan n̄e rej jar.
-
Kajjitōk ippān ajri ro n̄an leia im riiti Inōs 1:1–5. Kajjitōk ippāer n̄an pukot eoon ko kōn naan eo im kōmeļeļeik tukadu in jar ko an Inōs innām kwaļo̧k ta eo raar loe n̄an kūlaaj eo. Ta eo naan kein rej kwaļo̧k kōn Inōs im en̄jake eo an? Kōtļo̧k an ajri ro kwaļo̧k jabdewōt me eim̧we er kōn jar ko an Inōs. Kwaļo̧k juon en̄jake ke am̧ “ean̄den” im kwaar “kūr n̄an” Irooj (Inōs 1:4). Kōtļo̧k an ajri ro ļōmņak kōn juon men raar maron̄ kōm̧m̧ane n̄an kōm̧m̧an bwe jar ko aer en ļap meļeļeier.
-
Kajjitōk ippān ajri ro n̄an kōlaajraki men ko rej jar kaki, emaron̄ ioon boot eo ak ilo peij in m̧akūtkūt eo an wiik eo. Innām kajjitōk ippāer n̄an lale Inōs 1:2, 9, 13–14, and 16 kōn men ko Inōs eaar jar kaki, im kobaik men ko ilo laajrak eo. Kōnono elmen an ajri ro maron̄ ļoor waanjon̄ok eo an Inōs ilo aer jar; n̄an waanjon̄ok, komaron̄ kōnono etke Inōs eaar kōņaan jar kōn Rileman ro—ro kar aer rikōjdāt—im kūr ajri ro bwe ren jar ilo wiik in kōn juon eo ejjab jouj n̄an er.
Imaron̄ kōjeraam̧m̧an ro jet n̄e ij ron̄jake Jetōb Kwojarjar.
Irooj eaar jeļā bwe 116 peij ko raar ukook m̧okta an Bok in Mormon renaaj jako (lale K&B 10; Armej ro Rekwojarjar, Volume 1, jebta 5). N̄an bōk jikin jako in, Eaar im̧we Mormon kōn Jetōb eo n̄an kadedeļo̧k pileij ko reddik an Nipai ilo Bok in Mormon. Elmen am̧ maron̄ im̧we ajri ro n̄an ļoor waanjon̄ok eo an Mormon n̄an ron̄jake Jetōb?
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an bōk kūņaer n̄an riiti eoon ko jān naan ko an Mormon 1:3–8 juon ilo̧k juon, innām jipan̄ er kakeememej ta eo raar ekkatak jān kajjojo eoon. Kōmeļeļe bwe Mormon eaar ļoor Jetōb n̄an kobaik pileij ko reddik an Nipai (eo me epād kiiō ippād āinwōt 1 Nipai n̄an Omnai) ilo Bok in Mormon. Elmen ad kar jeraam̧m̧an kōn an Mormon kar ron̄jake Jetōb eo? Elmen an Bok in Mormon kar oktak eļan̄n̄e en kar jab ron̄jake? Kwaļo̧k juon en̄jake eo me kwaar im̧we jen Jetōb Kwojarjar n̄an kōm̧m̧ane juon men kar kōjeraam̧m̧an juon. Kajjitōk ippān ajri ro n̄an kwaļo̧k ejja en̄jake ko aer.
-
Kūr juon ajri bwe en riiti Naan ko an Mormon 1:7 im bar juon bwe en riit Katak im Bujen ko 8:2–3. Ta eo eoon kein rej kwaļo̧k elmen an Jetōb Kwojarjar eo kōnono n̄an kōj? Jipan̄ ajri ro kalikkar tōre ko raar en̄jake im̧we ko jān Jetōb Kwojarjar eo. Kōjerbal Moronai 7:12 im kōmeļeļe bwe eļan̄n̄e juon ļōmņak ej em̧m̧an n̄an im̧we kōj n̄an kōm̧m̧ani men ko rem̧m̧an, ej itok jān Jetōb Kwojarjar. N̄an waanjon̄ok, ļōmņak in kwaļo̧k pija in alooj eo “Preparation of Thomas S. Monson: Aolep iien Ļoor Im̧we ko an Jetōb” (ChurchofJesusChrist.org). Kajjitōk ippān ajri ro n̄an ron̄jake im̧we ko n̄an kōm̧m̧ani im ļoori.
Kōketak n̄an Ekkatak ilo Mweo
Rōjan̄ ajri ro n̄an kajjitōk ippān ro uwaan baam̧le eo aer n̄an kwaļo̧k en̄jake ko aer kōn jar ak Jetōb Kwojarjar eo.
Kōkōm̧anm̧an Ad Katakin
Kōjerbal al. Al ko an Būraimere im al in jar ko remaron̄ jipan̄ aolep ajri ro ilo jabdewōt iiō meļeļe im keememej m̧ool ko an gospel in. Al emaron̄ bar dāpij ito lim̧o eo an ajri ro n̄an ekkatak. (Lale Teaching in the Savior’s Way, 22.)