“Pāpode 24–Maaj 1. 2 Nipai 26–30: ‘Juon Jerbal Ekōpaļpaļ im Kabwilōn̄lōn,’” Itok, Ļoor Eō—N̄an Būraimere: Bok in Mormon 2020 (2020)
“Pāpode 24–M̧aaj 1. 2 Nipai 26–30,” Itok, Ļoor Eō—N̄an Būraimere: 2020
Enaaj Tōl Eok Ilo Pein, jān Sandra Rast
Pāpode 24–Maaj 1
2 Nipai 26–30
“Juon Jerbal Ekōpaļpaļ im Kabwilōn̄lōn”
Mokta jen am̧ jinoe karōk in makūtkūt in ekkatak ko n̄an ajri ro ilo kūlaaj eo am̧, ekkatak jān 2 Nipai 26–30. Menin enaaj karuwaineneik Jetōb n̄an tōl karōk ko am̧.
Je En̄jake ko Rej Im̧we Eok
Kajjitōk n̄an Kwaļo̧k
Kotak juon kape in Bok in Mormon, im kōmeļeļe bwe Nipai ekar lo m̧okta ļo̧k ke Bok in Mormon enaaj lukkuun ļap tokjān ilo raan kein ad. Kajjitōk ippān ajri ro n̄an kwaļo̧k juon men eo em̧ōj aer kar katak jāne kōn Bok in Mormon ilo iiō in.
Katakin Katak ko: Ajri ro Reddikļo̧k
Jisōs Kraist ekōņaan bwe aolep ren itok n̄an E.
Nipai ekar kam̧ool bwe Rilo̧mo̧o̧r eo ej iakwe aolep, jekdoon wōn er, im Ej kajjitōk ippān aolep n̄an “bōk leen em̧m̧an eo An”
Makūtkūt ko Maron̄ Kōm̧m̧ani
-
Kwaļo̧k pija ko kōn armej ro jān laļ ko reoktak im m̧anit ko reoktak an armej ro (komaron̄ loi jet ilo māākijiin ko an Kabun̄ in). Kajjitōk ippān ajri ro n̄an kōmeļeļeik jet iaan meļeļe ko rej lo ilo pija ko. Kōpelļo̧k jeje ko rekwojarjar n̄an 2 Nipai 26:33 im riiti, “[Jisōs Kraist] ej kajjitōk ippāer aolep n̄an itok n̄an E.” Āliji naan in n̄an ajri ro ilo am̧ jitōn̄ļo̧k kajjojo pija. Innām jitōn̄ļo̧k kajjojo ajri im ba. “Jisōs Kraist ej kajjitōk ippem n̄an itok n̄an E.” Ta eo jemaron̄ kōm̧m̧ane n̄an itok n̄an Rilo̧mo̧o̧r?
-
Al juon al ippān ajri ro kōn iakwe aolep armej, ko āinwōt “I’ll Walk with You” ak “We Are Different” (Children’s Songbook, 140–41, 263). Kwaļo̧k naan ko ak jentōj ko ilo al ko me kwoj en̄jake aer kapene ennaan eo jān 2 Nipai 26:33.
Bok in Mormon ej juon kōjeraam̧m̧an.
Ļōmņak kōn wāween am̧ naaj jipan̄ juon ajri ilo kūlaaj eo am̧ en̄jake bwe Bok in Mormon “ej juon jeraam̧m̧an n̄an er jān Pein Anij” (2 Nipai 30:6).
Makūtkūt ko Maron̄ Kōm̧m̧ani
-
Kwaļo̧k n̄an ajri ro juon Bok in Mormon em̧ōj kitmi āinwōt juon menin letok, im ba n̄an er bwe juon men elukkuun aorōk ilowaan. Kōm̧m̧an bwe ren jibwe menin letok in, im leļo̧k jidik meļeļe n̄an jipan̄ er kajidedeik ta eo ilowaan; n̄an waanjon̄ak, ej juon men eo Irooj ekar letok n̄an kōj, ej jipan̄ kōj tōmak ilo Jisōs Kraist, im ko jet. Riit jān 2 Nipai 30:6: “Ej juon jeram̧m̧an n̄an er jān Pein Anij.” Kōm̧m̧an bwe ajri ro ren kōpelļo̧k menin letok eo, im kōmeļeļeik er bwe jej aikuj kōpelļo̧ke Bok in Mormon eo im riit n̄an bōk kōjeraam̧m̧an ko me rej pād ie.
-
Riiti 2 Nipai 28:2 n̄an ajri ro. Kōmeļeļeik bwe Nipai ekar lo bwe Bok in Mormon enaaj kar “kōtmāne bwe raorōk” n̄an kōj eo me meļeļein bwe enaaj jipan̄ im kōjeraam̧m̧an kōj. Ba n̄an ajri ro etke Bok in Mormon em̧ōj kōtmāne bwe eaorōk n̄an eok. Kwaļo̧k juon eoon em̧m̧antata ippam̧ ak bwebwenato jān Bok in Mormon, im kajjitōk ippān ajri ro n̄an kwaļo̧k eoon ak bwebwenato eo em̧m̧an tata ippāer. Kwaļo̧k pija ko jān Gospel Art Book n̄an leļo̧k n̄an er ļōmņak.
Jemedwōj Ilan̄ ej katakin kōj jidik kōn jidik.
Bōlen komaron̄ in ļōmņak kōn juon menin katak ak m̧akūtkūt eo me enaaj jipan̄ ajri ro lo ta meļeļe in n̄an katak “ļain im bar ļain.” Elmakot ko itulaļ remaron̄ jino jet ļōmņak ko.
Makūtkūt ko Maron̄ Kōm̧m̧ani
-
Jipan̄ ajri ro karōke juon bajōļ epidodo ak kalōk juon men kōn būļak ko. Leļo̧k n̄an er juon bajōļ ak juon block ilo juon iien, im ilo aer ekkal, kōmeļeļeik bwe en̄in ej wāween an Jemedwōj Ilan̄ katakin kōj—juon m̧ool ilo juon iien. Ta eo enaaj waļo̧k eļan̄n̄e jekar kajjieon̄ kobaik aolep m̧ōttan kein ippān doon ilo juon wōt iien?
-
Katakin ajri ro juon kapeel juon ļo̧k juon, āinwōt kilen loklok to ak jin̄aik juon pija. Riiti jān 2 Nipai 28:30: “Inaaj leļo̧k n̄an ro nejin armej lain im bar lain , … ijin jidik im ijjuweo jidik.” Etke Anij ej katakin kōj jidik kōn jidik?
Katakin Katak ko: Ajri ro Rerūttoļo̧k
Jisōs Kraist ekōņaan bwe aolep ren itok n̄an E.
Jipan̄ ajri ro en̄jake bwe kajjitōk eo n̄an itok n̄an Kraist ej n̄an er im n̄an aolep armej.
Makūtkūt ko Maron̄ Kōm̧m̧ani
-
Kōnono ippān ajri ro kōn iien ko n̄e rej kūr ro m̧ōttaer ak baam̧le ko aer n̄an itok n̄an juon iien eaorōk, āinwōt kemem. Ta eo rekar kōm̧m̧ane n̄an kipel armej ro bwe ren itok? Riit ippān ajri ro 2 Nipai 26:23–28, 33, im jipan̄ er pukōt ta eo Irooj ej kajjitōk ippād n̄an kōm̧m̧ane. Kajjitōk ippān ajri ro n̄an kōm̧m̧ane juon kaat ak leta in karuwainene juon armej n̄an itok n̄an Jisōs Kraist. Rōjan̄ er n̄an kōjerbal naan ko jān eoon kein ilo naan in kajjitōk ko aer (eļan̄n̄e emenin aikuj, je jet iaan naan ko ilo boot eo n̄an jipan̄).
-
Riiti 2 Nipai 26:33 ippān ajri ro, im jipan̄ er kōm̧m̧an laajrak in wōn ro, ekkar n̄an eoon in, ej kūr n̄an “bōk leen em̧m̧an eo an [Irooj].” (Komaron̄ aikuj kōmeļeļeik bwe “rejjan̄in ron̄ kōn E” ro me rejjab tōmak ilo Anij.) Kajjitōk ippāer n̄an kobaik et ko etaer make ilo laajrak eo. Ewi wāween ad bōk leen em̧m̧an eo an [Irooj]?
-
Kōnono ippān ajri ro ilo tukaduin kōn wāween an ajri ro ipeļaakin laļ in oktak jān doon, ak rej kam̧ool bwe Irooj ej iakwe aolepāer (lale 2 Nipai 26:24, 33). Kajjitōk ippān ajri ro n̄an jin̄aiki pija in Jisōs ippān elōn̄ ajri ro reoktak jān doon.
Jemedwōj Ilan̄ ej kwaļo̧k m̧ool “lain im bar lain.”
Nipai ekar kakkōļ ņae m̧wil ko me rej kwaļo̧k ke rejjab bar aikuj eļapļo̧k m̧ool jān Anij. Jipan̄ ajri ro watōk bwe ekkatak gospel eo āinwōt juon jibadbad ej ukot juon mour eaitok.
Makūtkūt ko Maron̄ Kōm̧m̧ani
-
Kālet juon naan jān 2 Nipai 28:30, im kajjitōk ippān juon ajri n̄an je naan eo m̧oktata ioon boot eo. Innām kajjitōk ippān bar juon ajri n̄an je naan eo tok juon, im ko jet m̧ae iien em̧ōj je aolepān naan ko. Ewi wāween an m̧akūtkūt in āinļo̧k wōt wāween eo Anij ej letok n̄an kōj m̧ool eo?
-
Jipan̄ ajri ro riiti im meļeļe 2 Nipai 28:27–30, kappukōt uwaak ko n̄an juon kajjitōk āinwōt in: Ta eo eoon kein rej katakin kōn armej ro me rej tōmak ebwe jon̄an m̧ool eo rejeļā kake rejjab bar aikuj eļapļo̧k? Kajjitōk ippāer n̄an kwaļo̧k wāween ko jemaron̄ kwaļo̧k n̄an Irooj bwe jekōņaan bōk eļapļo̧k m̧ool ko jān E.
Bok in Mormon im Baibōļ eo rej jerbal ippān doon.
Kōnke ewōr ippād Baibōļ eo, jet armej rej tōmak bwe Bok in Mormon ejjab menin aikuj. Eoon kein remaron̄ jipan̄ ajri ro meļeļe, im kōmeļeļeik n̄an ro jet, etke jej kam̧m̧oolol kōn bok in jeje ko rekwojarjar jim̧or.
Makūtkūt ko Maron̄ Kōm̧m̧ani
-
Leļo̧k juon kape in Bok in Mormon im bar juon kape in Baibōļ. Kajjitōk ippāer wāween an bok kein āinwōt juon im wāween aer oktak. Kwaļo̧k n̄an ajri ro juon māāp in laļ in, im jipan̄ er māāje kajjojo bok ko ippānļo̧k jikin ko ilo laļ in ijo ekar itok jān e. Riiti im ekōnono kōn 2 Nipai 29:8. Etke Anij ekar leļo̧k ruo “naan in kam̧ool ko” ak bok in jeje ko rekwojarjar me ej katakin er kōn E?
-
Kajjitōk ippān ajri ro n̄an pijaikļo̧k an juon m̧ōttāer kar ba, “Ijjab aikuj in riiti Bok in Mormon. Emōj aō riiti Baibōļ eo. Riit ippān doon 2 Nipai 29:7–11, kōmeļeļeik naan ko im katak ko me remenin aikuj. Innām kajjitōk ippāer n̄an kwaļo̧k ļōmņak ko aer kōn ta eo remaron̄ ba n̄an ro m̧ōttāer.
Kōketak Ekkatak ilo Mweo
Kajjitōk ippān ajri ro n̄an kōmeļeļeik baam̧le ko aer wāween an Baibōļ eo im Bok in Mormin jerbal ippān doon n̄an kam̧ool kōn Jisōs Kraist.
Kōkōm̧anm̧anļo̧k Ad Katakin
Pedped wōt ioon armej ro, ejjab katak ko. Ļōmņak ko ilo unin tōl in rej elmakot wōt. Kwoj anemkwoj ukukōti n̄an aikuj ko im maron̄ ko an ajri ro kwoj katakin.