“M̧aaj 9–15. Jekab 1–4: ‘Kom̧in Kōllaajrak Kom̧ n̄an Anij kōn Pinmuur eo an Kraist,’” Itok, Ļoor Eō—N̄an Būraimere: Bok in Mormon 2020 (2020)
“M̧aaj 9–15. Jekab 1–4,” Itok, Ļoor Eō—N̄an Būraimere: 2020
Jeorļo̧k Bōd, jān Greg K. Olsen
M̧aaj 9–15
Jekab 1–4
Kom̧in Kōllaajrak Kom̧ n̄an Anij kōn Pinmuur eo an Kraist
Ilo am̧ riiti Jekab 1–4, kejōkļo̧kjeņ kōn ewi wōt pedped ko jān jebta kein rej relukkuun aorōk n̄an ajri ro bwe ren katak. Kappukōt tōl eo an Jetōb n̄an jeļā wāween eo em̧m̧antata n̄an katakin pedped kein, im je en̄jake ko rej im̧we eok.
Je En̄jake ko Rej Im̧we Eok
Kajjitōk n̄an Kwaļo̧k
Kajjitōk ippān ajri ro n̄an kwaļo̧k juon men er ak baam̧le ko aer raar kōm̧m̧ane wiik in n̄an katak jān Jekab 1–4. Komaron̄ barāinwōt kajjitōk ippāer n̄an kwaļo̧k juon men rej keememej jān katak eo jān wiik eo ļo̧k. Ta kajjitōk ko komaron̄ kajjitōk ippāer n̄an jipan̄ er keememej?
Katakin Katak ko: Ajri ro Reddikļo̧k
Anij ej kūr ritōl ro an Kabun̄ in n̄an jipan̄ eō ļoor Jisōs Kraist.
Jipan̄ ajri ro meļeļe bwe renaaj jeraam̧m̧an n̄e rej ļoor kapilōk ko an ritōl ro an Kabun̄ in.
Makūtkūt ko Maron̄ Kōm̧m̧ani
-
Kōm̧m̧ani to̧ļe ak kein ikkure ko repidodo kōm̧m̧ani bwe ren bōk jikin Jekab im Josep, ļaddik ro jatin Nipai, ro me rekar ritōl ilo Kabun̄ eo. Kwaļo̧k jet eoon ko jān Jekab 1 im 2 n̄an kōmeļeļeik ta eo ritōl ro an Kabun̄ in kar kūr er n̄an kōm̧m̧ane. N̄an waanjon̄ak, ritōl ro rej kareel kōj n̄an “tōmak ilo Kraist” (Jekab 1:8), kūr kōj n̄an ukweļo̧k (lale Jekab 2:5–6, 9–10), im “kwaļo̧k naan an [Anij]” (Jekab 2:2, 11). Kōm̧m̧an bwe ajri ro ren kōjerbal to̧ļe ak kein ikkure ko n̄an kōm̧m̧an āinwōt n̄e rej kōm̧m̧an jet iaan men kein.
-
Kajjitōk ippān ajri ro n̄an kwaļo̧k jet iaan etan ritōl ro ilo Kabun̄ in me rejeļā, āinwōt ritōl ro an Būraimere, ro uwaan bisoprik eo, im rikanaan ko im rijilōk ro. Jipan̄ ajri ro ļōmņak kōn wāween ko me ritōl rein rej kōjeraam̧m̧an kōj.
Ritōl ro ad ilo Kabun̄ in rej jipan̄ kōj ļoor Jisōs Kraist.
Imaron̄ jipan̄ ro jet ilo iien aikuj n̄e ij jake jōbōļ eo ippāier.
Ajri ro me kwoj katakin er remeļeļe ke kōn kōjeraam̧m̧an ko me rej itok n̄e rej jake jōbōļ eo ippān ro jet me rej aikuj? Ewi wāween am̧ jipan̄ er jeļā bwe Jemedwōj Ilan̄ im Jisōs ekōņaan bwe ren jipan̄ ro jet?
Makūtkūt ko Maron̄ Kōm̧m̧ani
-
Kōmeļeļe bwe jet armej ilo iien ko an Jekab rekar lukkuun m̧weie, ak rekar jab kōņaan ajije ta ko ewōr ippāer n̄an armej ro me rekar jeramōļ. Riiti Jekab 2:17–19 n̄an jipan̄ ajri ro meļeļe katak ko an Jekab n̄an armej rein. Ilo am̧ kōm̧m̧ane, leļo̧k n̄an ajri ro pija ko ak men ko n̄an jibwi me ejjejet n̄an naan ko ak jentōj ko ilo eoon kein.
-
Kajjitōk ippān ajri ro n̄an kwaļo̧k wāween ko me remaron̄ jāāre ta ko ewōr ippāer n̄an juon eo ej aikuj. Kam̧ool bwe jej jeraam̧m̧an n̄e jej jaake jōbōļ eo ippān ro jet.
-
Bōktok juon men n̄an kūlaaj eo me komaron̄ ajije ippān ajri ro. Leļo̧k jidik n̄an kajjojo ajri, im kōmeļeļeik bwe kwoj ajej. Kajjitōk ippāer ekōjkan aer kar en̄jake ke ajeje men eo ippāer. Ewi wāween aer en̄jake n̄e rej jake jōbōļ eo ippān ro jet? Jipan̄ er ļōmņak kōn juon men remaron̄ jake jōbōļ eo n̄an jipan̄ juon armej en̄jake m̧ōņōņō.
Imaron̄ kōkajoorļo̧k tōmak eo aō ilo Jisōs Kraist.
Ilo an kar Jekab mour jim̧we kōjekdoon jerawiwi ko ipeļaakin, tōmak eo an elukkuun kajoor jon̄an ekar jab ebooļoļ. Kejōkļo̧kjeņ kōn wāween am̧ maron̄ jipan̄ ajri ro meļeļe ta meļeļe in n̄an wōr juon tōmak me ejjab maron̄ ebooļoļ.
Makūtkūt ko Maron̄ Kōm̧m̧ani
-
Jipan̄ ajri ro ļōmņak kōn men ko me rej kōm̧m̧ani n̄an kōm̧m̧an bwe anbwinier en kajoorļo̧k. Ta eo jemaron̄ kōm̧m̧ane n̄an kōm̧m̧an bwe tōmak eo ad en kajoorļo̧k? Kōpelļo̧k jeje ko rekwojarjar n̄an Jekab 4:6, im jipan̄ ajri ro kappukōt ta eo Jekab im armej ro an rekar kōm̧m̧ane n̄an kōm̧m̧an bwe tōmak eo aer “edim.”
-
Al “The Wise Man and the Foolish Man” (Children’s Songbook, 281) ippān ajri ro. Ilo rejet eo juon in boot eo, jin̄aik juon em̧ eo ekar ekkaļ ioon bok. Ilo rejet eo juon in boot eo, jin̄aik juon em̧ eo ekar ekkal ioon pedped. Eļan̄n̄e emaron̄, bōktok bok im rekā n̄an kūlaaj eo. Ijo wōt epidodo an eppōkak ak em̧akūtkūti? Ewi wōt iaer, bok ak rekā, jekōņaan ke bwe tōmak eo ad en āinwōt ?
Katakin Katak ko: Ajri ro Rerūttoļo̧k
Anij ej kūr ritōl ro an Kabun̄ in n̄an jipan̄ eō ļoor Jisōs Kraist.
Ajri ro kwoj katakin er renaaj jeraam̧m̧an n̄e rej lōke im ļoor kapilōk eo an ritōl ro an Kabun̄ in.
Makūtkūt ko Maron̄ Kōm̧m̧ani
-
Riit ippān ajri ro Jekab 1:6–8 im 2:1–6, 11, jipan̄ er kappukōt naan ko me rej kōmeļeļeik wāween an ro karejaran Anij tōl Kabun̄ in. Kajjitōk ippāer n̄an je jentōj kein ilo m̧ōttan peba ko im likūt peba ko ilo ioon boot eo. Etke Anij ej kūr ritōl ro an Kabun̄ in n̄an tōl kōj? Kajjitōk ippān ajri ro n̄an kwaļo̧k en̄jake ko ilo aer katak ak bōk tōl jān juon ritōl an Kabun̄ ak rūkaki im kōjeraam̧m̧an ko rej būki.
-
Kajjitōk ippān ajri ro n̄an jin̄aiki juon pija in juon ritōl an Kabun̄ in me rejeļā kake, im kōtļo̧k bwe ro ilo kūlaaj eo ren kajidede wōn eo raar jin̄aiki. Ta eo ritōl rein rej kōm̧m̧an n̄an jipan̄ kōj ļoor Jisōs Kraist? Kajjitōk ippān ajri ro n̄an je jidik naan n̄an ritōl ro an Kabun̄ in, kam̧m̧oolol er kōn jerbal eo aer.
-
Kajjitōk ippān juon ritōl an Kabun̄ in ilo ijo rej jokwe ie n̄an jiron̄ ajri ro ta eo ekar kōm̧m̧ane n̄an kakūrm̧ool kūr eo an. Kajjitōk ippān ajri ro kwaļo̧k etan jet men ko remaron̄ kōm̧m̧ane n̄an rejtake ritōl ro aer.
Imaron̄ jipan̄ ro jet en̄jake m̧ōņōņō jān jake jōbōļ eo ippāer.
Rikaļoor ro rem̧ool an Jisōs Kraist rej m̧ōņōņō in ajije ta eo ewōr ippāer n̄an ro jet. Rōjan̄ ajri ro n̄an kam̧ōņōņōik ajri ro rej pād ilo aikuj ilo aer jake jōbōļ eo ippāer.
Makūtkūt ko Maron̄ Kōm̧m̧ani
-
Jiron̄ ajri ro bwe elōn̄ armej ro ilo tōre eo an Jekab rekar utiej bōro im lāj kōnke raar iakwe m̧weiek ko aer (lale Jekab 2:12–14, 17–21). Kajjitōk ippān jejjo ajri ro n̄an riiti Jekab 2:17–19 im kōļap ainikier, im jipan̄ er bwe ren meļeļe jabdewōt naan ko reppen. Ta eo jej aikuj kappukōte m̧okta jān ad kappukōt m̧weie? Ta eo jej aikuj kappukōte n̄an kōm̧m̧ane kōn aolep m̧weie ko jej būki?
-
Riiti Jekab 2:17 n̄an ajri ro. Ta kōjeraam̧m̧an ko Jemedwōj Ilan̄ ekar kwaļo̧ki ippād? Etke E ekōņaan bwe jen jake jōbōļ eo ippān doon? Kajjitōk ippān ajri ro n̄an kwaļo̧k iien ko me rekar ajije juon men n̄an bar juon armej, ekoba ekōjkan aer kar en̄jake im ekōjkan an armej eo juon kar en̄jake.
Imaron̄ kōkajoorļo̧k tōmak eo aō ilo Jisōs Kraist.
Tōmak eo an Jekab ekar dim ke ej kappukōt naan ko an rikanaan ro im kar bōk naan in kam̧ool an make (lale Jekab 4:6). Ewi wāween am̧ jipān̄ ajri ro ikdeelel n̄an kalōk tōmak eo aer me emaron̄ jab ebooļoļ?
Makūtkūt ko Maron̄ Kōm̧m̧ani
-
Kajjitōk ippān ajri ro n̄an ļōmņak kōn men ko me rej erom̧ kajoor im jo̧kne ilo iien eo aitok kitien, eo āinwōt juon wōjke kileplep. Ewi wāween an tōmak āinwōt men ko raar ļōmņak kaki? Ta naan ko ilo Jekab 4:6, 10–11 rej kōmeļeļeik ta eo jemaron̄ kōm̧m̧ane n̄an kōm̧m̧an bwe tōmak eo ad en jab ebooļoļ? Kajjitōk ippān ajri ro n̄an kōm̧m̧ane juon laajrak ioon boot eo kōn wāween ko remaron̄ kōkajoorļo̧k tōmak eo aer ilo Jisōs Kraist.
-
Kwaļo̧k waanjon̄ak eo an Elder Neil L. Andersen kōn juon wōjke eo ej eddōk ilo juon mejatoto eo ekkōtoto “An̄jiwiwi ko in Jetōb” (Ensign ak Liaona, Eprōļ 2014, 18–21), ak kwaļo̧k pija in alooj eo “An̄jiwiwi ko in Jetōb” (ChurchofJesusChrist.org). Etke eaorōk bwe tōmak eo ad en jab ebooļoļ im en kajoor āinwōt okar in juon wōjke? Ta eo an̄jiwiwi ko rej bōk jikin? Ta eo jemaron̄ kōm̧m̧ane n̄an kalōk juon tōmak ejjab ebooļoļ? Jipan̄ ajri ro ļōmņak kōn waanjon̄ak ko jet ko me rej katakin n̄e ej wōr ippād tōmak eo me ejjab maron̄ ebooļoļ.
Kōketak Ekkatak ilo Mweo
Kajjitōk ippān ajri ro n̄an ļōmņak kōn juon men remaron̄ ajije ippān baam̧le ko aer—ekoba kwaļo̧k juon men raar katak ilo kūlaaj rainin. Leļo̧k n̄an er iien ko rem̧m̧an ilo juon katak tokālik n̄an kōnono kōn ta eo raar kwaļo̧ke.
Kōkōm̧anm̧anļo̧k Ad Katakin
Rōjan̄ n̄an kautiej Jipan̄ ajri ro meļeļe bwe wāween eo eaorōk kōn kautiej ej ļōmņak kōn Jemedwōj Ilan̄ im Jisōs Kraist. Komaron̄ kakeememej er n̄an kautiej ilo aer al mera im ak in̄ūrn̄ūri juon al ak kwaļo̧k juon pija in Jisōs.