Kraist eo em̧ōj an jerkakpeje ippān Rijilōk ro An

Kraist im Rijilōk ro, jān Del Parson

M̧aaj 30–Eprōļ 12

Ijtō

“Enaaj Jerkak … kōn Kōmour ilo Pein Bao ko Pein”

Ilo am̧ riiti eoon ko me kar elmakoti ijin im ilo Itok, Ļoor Eō—N̄an Kajjojo Armej im Baam̧le ko, Jetōb enaaj jipan̄ eok jeļā ta eo kwoj kalimjōke n̄an jipan̄ ajri ro en̄jake iakwe eo an Rilo̧mo̧o̧r ilo Jabōt in Ijtō eo.

Je En̄jake ko Rej Im̧we Eok

pija ej bōk jikin kwaļo̧k

Kajjitōk n̄an Kwaļo̧k

Kōnono ippān ajri ro kōn men ko kwoj kōm̧m̧ani n̄an kakeememej Rilo̧mo̧o̧r ilo Ijtō. Kajjitōk ippāer n̄an kwaļo̧k ta ko rej kōm̧m̧ani.

pija ej bōk jikin katakin

Katakin Katak ko: Ajri ro Reddikļo̧k

1 Nipai 11:27; Mosaia 3:5; 15:7; Hilamōn 14:16–17

Rikanaan ro ilo Bok in Mormon rekar jeļā bwe Jisōs Kraist enaaj kar itok.

Katak ta eo rikanaan ro ilo Bok in Mormon eo rekar katakin kōn mijen eo an Jisōs Kraist im iien kwaļo̧k naan eo an ioon laļ in emaron̄ jipan̄ kōkajoorļo̧k tōmak eo an ajri ro ilo E.

M̧akūtkūt ko Maron̄ Kōm̧m̧ani

• Kwaļo̧k pija ko pijaan Rilo̧mo̧o̧r ke ekar peptaij, kōmour ro jet, ke kar debwāāle, im ke ekar jerkakpeje (lale peij in m̧akūtkūt ko an wiik in ak Bok in Gospel Pija, nōm̧ba ko. 35, 41, 57, 59). Kajjitōk ippān ajri ro n̄an jiron̄ eok ta eo ej waļo̧k ilo kajjojo pija ko. Kōmeļeļe bwe elōn̄ iiō ko m̧oktaļo̧k jān an kar Jisōs itok n̄an laļ in, Anij ekar kwaļo̧k n̄an rikanaan ro ilo Bok in Mormon ke Enaaj kar kōm̧m̧ani men kein. Riiti 1 Nipai 11:27; Mosaia 3:5; 15:7; im Hilamōn 14:16–17, im jipan̄ ajri ro karōk eoon kein ippān pija ko me rekkar n̄ani.

• Ilo an ajri ro kōm̧m̧ane peij in m̧akūtkūt eo an wiik in, kōnono kōn pijaan rikanaan ro im ta ko rekar katakin kōn Jisōs Kraist. Kwaļo̧k ippān ajri ro jet iaan men ko reaibojooj me Jisōs ekar kōm̧m̧ani n̄an er.

3 Nipai 11:1–17

Jisōs Kraist ekar jerkakpeje.

Katakin ajri ro bwe n̄an kobaļo̧k ippān armej ro me rekar loe Rilo̧mo̧o̧r eo ekar jerkakpeje ilo Jerusalem, taujin armej rekar loe E ke ekar waļo̧kļo̧k ilo Amedka.

M̧akūtkūt ko Maron̄ Kōm̧m̧ani

• Kwaļo̧k pija ko kōn mej eo im Jerkakpeje eo an Rilo̧mo̧o̧r. Kajjitōk ippān ajri ro ta eo rejeļā kōn iien kein. N̄e emenin aikuj, kōjerbal “Jebta 53: Jisōs Ej Dōbwāāļ” im “Jebta 54: Jisōs Ej Jerkak” (Bwebwenato ko ilo Kallim̧ur Ekāāl, 136–38, 139–44, ak pija in alooj ko me rejjejet n̄ane ilo ChurchofJesusChrist.org) n̄an jiron̄ ajri ro bwebwenato kein.

• Kōjerbal pija ko jān Bok In Gospel Pija ak Itok, Ļoor Eō—N̄an Kajjojo Armej ak Baam̧le ko, ba n̄an ajri ro kōn loļo̧k eo an Rilo̧mo̧o̧r ālkin an kar jerkakpeje n̄an Amedka, āinwōt an kōmeļeļe ilo 3 Nipai 11:1–17. Āliji bwebwenato ko jejjo alen, kajjitōk ippān ajri ro n̄an jipan̄ eok. Kwaļo̧k meļeļe ko me kwoj en̄jaki me remaron̄ aorōk n̄an ajri ro. Ilo m̧ool, āliji bwe men̄e Jisōs ekar mej ioon debwāāl eo, armej ro remaron̄ kar lo bwe em̧ōj An kiiō jerkakpeje. Kōm̧m̧an bwe ajri ro ren kajjojo bōk koņaer āliji ejja bwebwenato eo wōt ilo naan ko aer make.

• Al ippān doon “Easter Hosanna” ak eoon eo āliktata ilo “Bwebwenato ko ilo Bok in Mormon” (Children’s Songbook, 68–69, 118–19). Kajjitōk ippān ajri ro n̄an jin̄aik pija ko kōn juon men eo me al eo ej kōmeļeļeiki. Innām kajjitōk ippān ajri ro n̄an kwaļo̧k jin̄a ko aer im ta eo rej ļōmņake enaaj kar ewi wāween kar en̄jake n̄an pād ijo ke Jisōs eaar loļo̧k armej in Nipai ro.

Mosaia 3:7; Alma 7:11–12

Jisōs Kraist ejeļā wāween kaenōm̧m̧an eō.

Kōnke Jisōs Kraist ekar en̄taan “metak ko im nan̄inmej ko an armej ro an” (Alma 7:11), Ejeļā ewi wāween ad en̄jake, aaet ejjeļo̧k bar juon ejeļā.

M̧akūtkūt ko Maron̄ Kōm̧m̧ani

• Riit n̄an ajri ro ļain ko jinoin tata ilo Mosaia 3:7, im kajjitōk ippāer n̄an āinwōt n̄e rej en̄jake “metak … , kwōle, maro, im kijeļo̧k [mōk].” Kajjitōk ippāer n̄an kwaļo̧k iien ko me rekar en̄jake men kein. Innām jiron̄ ajri ro bwe eoon in ej kōmeļeļeik jet iaan men ko me Jisōs Kraist ekar en̄jake ke Ekar en̄taan ilo Jikin Kallip Gethsemane. Kōn wōt menin, Ejeļā wāween jipan̄ kōj n̄e jej en̄jake men kein.

• Riiti Alma 7:11 kōļap ainikiem̧, im kajjitōk ippān ajri ro eļan̄n̄e rejeļā kōn juon armej eo enan̄inmej ak ej pād ilo metak. Kam̧ool bwe Jisōs Kraist eaar en̄jake aolep ad “metak im nan̄inmej” bwe En maron̄ meļeļe ekōjkan an kaenōm̧m̧an kōj (Alma 7:12).

pija ej bōk jikin katakin

Katakin Katak ko: Ajri ro Rerūttoļo̧k

2 Nipai 9:10–15; Alma 11:41–45; 40:21–23

Kōnke Jisōs Kraist ekar jerkakpeje, Inaaj barāinwōt jerkakpeje.

Bok in Mormon ej lukkuun kalikkar ilo an kōmeļeļe ta meļeļein jerkakpeje im wōn ro renaaj jerkakpeje. Ewi wāween am̧ jipan̄ ajri ro lo m̧ool kein?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an jiron̄ eok ta eo rejeļā kōn mej im Jerkakpeje eo an Jisōs Kraist. Je ioon boot eo kajjitōk ko āinwōt in Ta meļeļein n̄an jerkakpeje im Wōn ro enaaj jerkakpeje? Jipan̄ ajri ro pukōt uwaak ko ilo 2 Nipai 9:10–15; Alma 11:41–45; im Alma 40:21–23 im kwaļo̧k n̄an kūlaaj eo ta eo rekar loe.

• Jiron̄ ajri ro kōn juon eo me kwojeļā em̧ōj an jako. Kajjitōk ippāer n̄an āinwōt n̄e kwojjab jeļā kōn Jerkakpeje eo. Ewi wāween aer naaj kar jipan̄ eok ta meļeļein? Rōjan̄ er n̄an kōjerbal 2 Nipai 9:10–15; Alma 11:41–45; ak Alma 40:21–23 n̄an katakin eok kōn jerkakpeje eo. Bar kajjitōk ippāer bwe ren kwaļo̧k naan in kam̧ool eo kōn Jerkakpeje eo an Rilo̧mo̧o̧r āinwōt m̧ōttan uwaak ko aer.

Jisōs ej Jar ilo Jikin Kallip Gethsemane

Gethsemane, jān Michael T. Malm

Inōs 1:2–8; Mosaia 27:8–24; Alma 13:11–12; 24:7–19

Pinmuur eo an Jisōs Kraist ej karreoik eō im ukōt eō.

Bok in Mormon ej letok elōn̄ waanjon̄ak ko kōn armej ro me rekar oktak kōn Pinmuur eo an Rilo̧mo̧o̧r. Ļōmņak kōn en̄jake kein me remaron̄ im̧we ajri ro n̄an ukweļo̧k im oktakļok n̄an Rilo̧mo̧o̧r.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro juon jōōt mouj erreo im juon jōōt mouj etonoon. Riit ippān doon Alma 13:11–12. Ewi wāween an kar armej ro kōm̧m̧an bwe ren erreo jān jerawiwi ko aer? Ewi wāween an kar menin kōm̧m̧an bwe ren en̄jake kōn ta eo jerawiwi? Kōnono kōn ewi wāween am̧ en̄jake n̄e kwoj ukweļo̧k im bōk jeorļo̧k bōd, im kwaļo̧k am̧ naan in kam̧ool kōn kajoor eo an Rilo̧mo̧o̧r n̄an karreoik kōj jān jerawiwi.

• Kajjitōk ippān ajri ro n̄an kālet juon iaan armej rein rej ellaajrak n̄an katak kake: Inōs (lale Inōs 1:2–8), Alma eo Edik (lale Mosaia 27:8–24), ak Antai-Nipai-Liai ro (lale Alma 24:7–19). Ilo am̧ riiti bwebwenato in ippān doon, kajjitōk ippān ajri ro n̄an kile ewi wāween an armej in ak kūrub in kar oktak kōn Pinmuur eo an Jisōs Kraist. Ewi wāween ad maron̄ ļoor waajon̄ak ko an armej rein?

Mosaia 3:7; 15:5; Alma 7:11

Jisōs Kraist ekar bōk Ioon Make jerawiwi ko aō, metak ko, im nan̄inmej ko.

Ilo kakobaba n̄an en̄taan eo kōn jerawiwi ko ad, Rilo̧mo̧o̧r eaar barāinwōt en̄taan kōn metak ko ad, nan̄inmej ko, im barāinwōt m̧ōjņo̧ ilo en̄jake im kōļmenļo̧kjeņ ko bwe En jeļā ewi wāween kaenōm̧m̧an kōj.

M̧akūtkūt ko Maron̄ Kōm̧m̧ani

• Jitōn̄ kajjojo ajri n̄an kappukōt juon iaan eoon kein n̄an kappukōt ta eo Jisōs Kraist ekar en̄taan kake: Mosaia 3:7; Mosaia 15:5; ak Alma 7:11. Kajjitōk ippāer n̄an kōllaajrak ioon bo̧o̧t eo ta eo rekar loe im n̄an ļōmņak kōn iien ko me rekar en̄jake jet iaan men kein. Ekkar n̄an Alma 7:12, etke Jisōs ekar en̄taan kōn aolep men kein? Etke eaorōk bwe jen jeļā ke Ekar en̄taan kōn men kein n̄an kōj?

• Al ippān doon juon al kōn Rilo̧mo̧o̧r, āinwōt “Ijeļā Aō RiPinmuur Ej Mour” (Al ko Al in Ajri, no. 136). Kajjitōk ippān ajri ro n̄an pukōt al eo n̄an naan ko me rej kōmeļeļeik wāween an Rilo̧mo̧o̧r kaenōm̧m̧an kōj, im kōnono kōn etke jentōj kein eļap meļeļeier n̄an er. Kwaļo̧k en̄jake ko am̧ kōn Jisōs Kraist, im kajjitōk ippān ajri ro n̄an kwaļo̧k en̄jake ko aer make.

pija ej bōk jikin ekkatak

Kōketak Ekkatak ilo Mweo

Kajjitōk ippān ajri ro n̄an pukōt juon armej ilo wiik in me ej aikuj kaenōm̧m̧an. Rōjan̄ er n̄an kwaļo̧k n̄an armej in ta eo rekar katak kake kōn Rilo̧mo̧o̧r ilo an bōk Ioon Make metak ko ad bwe En maron̄ kaenōm̧m̧an kōj.

Kōkōm̧anm̧anļo̧k Ad Katakin

Kajjitōk n̄an Kwaļo̧k Kajjitōk ippān ajri ro kōn ļōmņak ko aer, en̄jake, im imminene ko. Kwonaaj loe bwe ekkā an wōr ippāer kōļmenļo̧kjeņ ko reļem waan em̧ool rekajoor.

peij in m̧akūtkūt eo: Rikanaan ro ilo Bok in Mormon rej kam̧ool kōn Jisōs Kraist