“Eprōļ 20–26. Mosaia 4–6: ‘Juon Oktak Ekajoor,’” Itok, Ļoor Eō—N̄an Būraimere: Bok in Mormon 2020 (2020)
“Eprōļ 20–26. Mosaia 4–6,” Itok, Ļoor Eō—N̄an Būraimere: 2020
Ilo Jerbal eo Am̧ n̄an Anij, jān Walter Rane
Eprōļ 20–26
Mosaia 4–6
“Juon Oktak Ekajoor”
Ewi wōt katak ko an Kiin̄ Benjamin ilo Mosaia 4–6 enaaj em̧m̧an tata an jipan̄ ajri ro kwoj katakin er jino n̄an en̄jake “juon oktak ekajoor” (Mosaia 5:2) ilo būruwier? Je im̧we ko am̧ ilo am̧ jar n̄an pukōt tōl.
Je En̄jake ko Rej Im̧we Eok
Kajjitōk bwe ren Kwaļo̧k
Je etan kajjojo ajri ro ilo kūlaaj eo am̧ ioon peba jidikdik ko, im likūt peba jidikdik ko ilo juon nine. Ilo am̧ kanōk lōn̄tak kajjojo āt ko jān nine eo, kajjitōk ippān ajri eo n̄an kwaļo̧k juon men ej keememej jān katak eo an wiik eo ļo̧k ak juon men raar katak jān Mosaia 4–6 ilo m̧weo wiik in.
Katakin Katak eo: Ajri ro Reddikļo̧k
Ukweļo̧k ej bōktok lan̄lōn̄.
Jipan̄ ajri ro katak kōn menin letok eo aiboojoj an ukweļo̧k me ej pād kōnke kōn Pinmuur eo an Jisōs Kraist.
M̧akūtkūt Maron̄ Kōm̧m̧ani
-
Kōjerbal Mosaia 4:1–3 im 10 n̄an katakin ajri ro ta meļeļe in n̄an ukweļo̧k. N̄an waanjon̄ak, jipan̄ er lo bwe armej ro an Kiin̄ Benjamin raar en̄jake būrom̧ōj kōn jerawiwi ko aer im kar kajjitōk kōn jeorļo̧k bōd (eoon ko 1–2), im Kiin̄ Benjamin eaar jiron̄ er n̄an joļo̧k (ak bōjrak jān kōm̧m̧ani) jeraiwiw ko aer (eoon 10). Riiti eoon 3 n̄an er, im kajjitōk ekōjkan an armej ro kar en̄jake ke raar ukweļo̧k.
-
Kajjitōk ippān ajri ro ekōjkan ad en̄jake n̄e jej katoone nuknuk ko ad. Ekōjkan ad en̄jake n̄e jej erom̧ bar erreo? Kōmeļeļeik bwe āinwōt kwaļ nuknuk ko rettoon, jemaron̄ ukweļo̧k n̄e jej kōm̧m̧ane juon bōd. Kwaļo̧k juon pija in Jisōs Kraist, im kam̧ool bwe Ewōr an kajoor n̄an kōm̧akūtļo̧k jerawiwi ko ad im kōm̧m̧an bwe jān bar erreo eļan̄n̄e jej ukweļo̧k. Al ippān doon eoon ruo in “Help Me, Dear Father” (Children’s Songbook, 99). Kajjitōk ippān ajri ro ta eo al eo ej katakin kōn ukweļo̧k.
Ij aikuj kōm̧m̧an n̄an ro jet kōn iakwe im jouj.
Ekōjkan am̧ maron̄ kōjerbal Mosaia 4:13–26 n̄an katakin ajri ro “n̄an iakwe doon, im n̄an jipjipan̄ doon”? (eoon 15).
M̧akūtkūt Maron̄ Kōm̧m̧ani
-
Jin̄aik juon menono edik ioon boot eo. Kajjitōk ippān ajri ro n̄an kwaļo̧k wāween ko remaron̄ jouj n̄an ro jet. Kajjojo iien rej kwaļo̧k, jeerļo̧k menono eo im jin̄aik juon eo ekilepļo̧k. Kam̧ool bwe ad iakwe n̄an doon ej eddōkļo̧k ilo ad jouj n̄an er. Leļo̧k n̄an ajri ro peba annan̄in menono ko, im karuwaineneik er n̄an jin̄a ioon menono ko wāween ko remaron̄ kwaļo̧k iakwe im jouj.
-
Jipan̄ ajri ro ļōmņak kōn kōļ ko n̄an kōm̧m̧ani ilo aer al juon al kōn iakwe ro jet, āinwōt “Jouj Ej Ijjino Ippa” ak “Jouj Ej Ijjino Ippa ak Jouj Ej Ijjino Ippa” (Children’s Songbook, 61, 136).
N̄e ij kōm̧m̧ani bujen ko ippān Anij, ij bōk ioō make etan Kraist.
Kejōkļo̧kjeņ kōn ekōjkan am̧ maron̄ jipan̄ ajri ro kwoj katakin er m̧aanjabpopo n̄an kōm̧m̧ani bujen peptaij ko ippān Anij im n̄an “ān̄inn̄in ro nejin Kraist” (Mosaia 5:7).
M̧akūtkūt Maron̄ Kōm̧m̧ani
-
Jipan̄ ajri ro kōm̧m̧ani pāāj ko rej kwaļo̧k etan “Jisōs Kraist” im keddāpi n̄an jōōt ko aer ioon menono eo aer (lale peij in m̧akūtkūt eo an wiik in). Kōmeļeļeik bwe Kiin̄ Benjamin eaar katakin armej ro an bwe n̄e jej kōm̧m̧ani bujen ko, ak kallm̧ur ko, ippān Anij, ej āinwōt kōm̧m̧an bwe etan Kraist en “jeje iien otemjej ilo [būruwōd]” (Mosaia 5:12). Ta eo jej kallim̧ur n̄an kōm̧m̧ane n̄e jej peptaij im bōk kwokwoj eo? (lale Mosaia 5:8; K&B 20:37, 77, 79).
-
Kajjitōk ippān ajri ro ta eo renaaj kar kōm̧m̧ane n̄an erom̧ ro m̧ōttā ippān juon (n̄an waanjon̄ak, kōnono ippāer, kōm̧m̧an juon men ippāer, im joļo̧k iien ippāer). Riiti Mosaia 5:13 n̄an ajri ro. Ta eo jemaron̄ kōm̧m̧ane n̄an ad em̧m̧anļo̧k ad jeļā kajien Jisōs Kraist bwe E en jab “ruwaimejet” n̄an kōj?
Katakin Katak eo: Ajri ro Rōrūttoļo̧k
Imaron̄ ukweļo̧k.
Ekōjkan am̧ maron̄ jipan̄ ajri ro meļeļe ta meļeļe in n̄an ukweļo̧k? Eoon ta ko ilo Mosaia 4:1–11 kwoj en̄jake renaaj jipan̄ er?
M̧akūtkūt ko Maron̄ Kōm̧m̧ani
-
Je naan eo jeorļo̧k bōd ioon boot eo. Riit ippān doon Mosaia 4:1–3, im kajjitōk ippān ajri ro n̄an kappukōt naan ko ilo eoon 3 me rej kōmeļeļeik kōjeraam̧m̧an ko me rej itok n̄e jej ukweļo̧k im bōk jeorļo̧k bōd.
-
Kajjitōk ippān ajri ro n̄an ba men ko jej aikuj kōm̧m̧ani n̄an maron̄ lukkuun in im m̧ool in ukweļo̧k. Jipan̄ er pukōt jet iaan men kein ilo Mosaia 4:10, im ekōnono kaki meļeļe ko an naan ko im eoon ko loi ilo eoon jab eo. Kwaļo̧k juon bwebwenato me ej kōmeļeļeiki ukweļo̧k, bōlen jān mour eo am̧ make ak jān juon māākjiin ekāāl an Kabun̄ in.
-
Jipan̄ ajri ro pukōt naan ko ilo Mosaia 4:6, 9, im 11 me rej kōmeļeļeik Jemedwōj Ilan̄. Etke eaorōk n̄an meļeļe ewi jekjek in Jemedwōj Ilan̄ n̄e jej aikuj in ukweļo̧k? Kwaļo̧k naan in kam̧ool eo am̧ kōn ekōjkan am̧ kar en̄jake iakwe eo an Anij ke kwar ukweļo̧k.
Gospel eo ej im̧we eō n̄an kōm̧m̧an n̄an ro jet kōn iakwe im jouj.
Kiin̄ Benjamin eaar katakin bwe n̄e jej itok n̄an Kraist im bōk jeorļo̧k in jerawiwi ko ad, jej “obrak kōn iakwe eo an Anij” (Mosaia 4:12), eo ej tōlļo̧k kōj n̄an iakwe im jouj n̄an ro jet.
M̧akūtkūt ko Maron̄ Kōm̧m̧ani
-
Jipan̄ ajri ro etale Mosaia 4:13–16, 26 im kwaļo̧k eoon ko me rej kōmeļeļeik ekōjkan ad maron̄ jerbal n̄an doon. Kajjitōk ippān ajri ro n̄an kōm̧m̧an kōl kōn men kein ak jin̄a pija ko aer, im kōm̧m̧an bwe ajri ro jet ren kajidedeik eoon eo. Ekōjkan ad maron̄ kwaļo̧k iakwe im jouj ilo m̧weo, ilo jikuuļ, im ilo m̧ōn jar eo?
-
Kajjitōk ippān ajri ro n̄an kwaļo̧k juon en̄jake me raar iakwe ak jerbal n̄an juon im ekōjkan an en̄jake jab eo kar kōm̧m̧an bwe ren en̄jake. Ta jet iaan un ko armej remaron̄ in jab kōņaan jerbal n̄an ro jet? Kajjitōk ippān ajri ro ta eo renaaj kar ba n̄an juon n̄an kareel er n̄an jipan̄ armej ro rej pād ilo aikuj. Remaron̄ lo ļōmņak ko ilo Mosaia 4:16–26.
Jisōs Kraist eaar katakin kōj n̄an jouj n̄an ro jet.
N̄e ij peptaij im bōk kwojkwoj eo, ij bōk ioo make etan Kraist.
Elōn̄ iaan ajri ro kwoj katakin er em̧ōj aer bōlen kar peptaij im rej bar kōkāāl bujen ko aer kōn kwojkwoj eo. Bar kakeememej er bwe m̧ōttan eo eaorōk an bujen peptaij eo aer ej bōk ioer make etan Jisōs Kraist.
M̧akūtkūt ko Maron̄ Kōm̧m̧ani
-
Jin̄aik juon doulul ioon boot eo, im likūt juon pija in Jisōs Kraist ilo ioļapļap in doulul eo. Kajjitōk ippān ajri ro n̄an jin̄aik pija ko kōn er make ilo am̧ riiti Mosaia 5:8 ippān doon. Ta eo eoon in ej ba jej aikuj bōk iood make? Ta eo jaar “deļo̧n̄ n̄ane”? Kajjitōk ippān ajri ro n̄an je etan Kraist ioon pija ko kōn er make im likūti pija ko ilo doulul eo ippān Rilo̧mo̧or eo. Ta bujen ko jej kōm̧m̧ani n̄e jej peptaij im bōk kwojkwoj eo? (lale Mosaia 18:8–9; K&B 20:77, 79).
-
Kōnono n̄an ajri ro kōn etke armej rej likūt etaer ilo men ko, āinwōt jerbal ko ilo jikuuļ, nuknuk in ikkure ko, im ko eierļo̧k (lale Mosaia 5:14–15). Ekōjkan ad maron̄ kwaļo̧k bwe etan Kraist em̧ōj ad “jeje iien otemjej ilo [būruwōd]”? (Mosaia 5:12).
-
Kajjitōk ippān juon likao ak jiron̄ jān ward eo n̄an lowaj kūlaaj eo am̧ im kōmeļeļeik bujen ko jej bar kōkāāli ilo ad bōk m̧ōttan kwojkwoj eo. Riiti jar ko an kwojkwoj eo ilo Katak im Bujen ko 20:77 im 79 ippān ajri ro, kajjitōk ippāer n̄an pukōt eoon ko me rej kōmeļeļeik ta eo jej bujen n̄an kōm̧m̧ane im ta eo Anij ej kallim̧uri kōj n̄an kōro̧o̧ltok.
Kōketak n̄an Ekkatak ilo M̧weo
Kajjitōk ippān ajri ro n̄an jin̄aik juon men me raar katak rainin im kōjerbal pija eo aer n̄an katakin baam̧le ko aer.
Kōkōm̧anm̧anļo̧k Ad Katakin
Katakin ajri ro n̄an je im̧we ko rej en̄jake. Aaet ajri ro remaron̄ katak iminene eo an je im̧weo ko ilo jetōb—n̄an waanjon̄ak, jān kōkaļļeik jeje ko rekwojarjar, jin̄aik pija ko, ak jei men ko reļam waan ilo jōnōļ eo.