“Maati 16–22. Iakobwa 5–7: ‘Te Uea e Mwakuri ma Ngaira,’” Nakomai, Iriirai—Ibukin te Moanrinan: Ana Boki Moomon 2020 (2020)
“Maati 16–22. Iakobwa 5–7,” Nakomai, Iriirai—Ibukin te Moanrinan: 2020
Te Kaikonaki n te Kai te Oriwa, iroun Brad Teare
Maati 16–22
Iakobwa 5–7
Te Uea e Mwakuri ma Ngaira
Kamatebwai, iango, ao tataro bwa ko na ataia bwa ko na kanga n reireiniia ataei te koaua are e reke n Iakobwa 5–7. Korei namakin.ake ko karekei.
Korea Am Namakin
Kaungaa te Tibwatibwa
Ni moanakin te marooro iaon te rongorongo are e kuneaki n Iakobwa 5–7, kaoiia ataei bwa a na marooroakin bwaai inanona maiuia are e buokiia n namakina ana tangira Tamara are i Karawa ao Iesu Kristo. Ti kanga ni kaota ara tangira nakoia tabeman?
Reirei te Reirei: Ataei aika a Uarereke
Mitinare a beku ibukiia natin Tamara are i Karawa.
Iangoia bwa ko na kanga n tibwaua te kaikonaki iaon te kai te oriwa n te kawai are a na kona n ota iai ataei.
Waaki ni Kakukurei aika a Kona ni Karaoaki
-
Kaota tamnein te aroka, ke nakonako i tinaniku n taratarai aroka, ao ni kakimototoa ni manga rinanon oin te iango n kaikonakan te kai te oriwa n Iakobwa 5. Te katooto: Uean te onaroka ni kurebe (are e kona n tei ibukin Iesu) e mwakuri korakora n tararuai kai aika oriwa (are e kona n tei ibukiia aomata iaon te aba) ibukina bwa E tabeaianga irouia. E weteia taan mwakuri (ake a kona n tei ibukiia mitinare) bwa a na ibuobuoki n tararuai aroka. Anaa teuana ke uoua te kiibu man Iakobwa 5 bwa ko na warekia nakoia ataei (n aron kibu 71–72).
-
Titirakiniia ataei ngkana iai ae a ataia ae e a tia n nako ni mitinare, ke maroroakina temanna ae ko kinaa. Buokiia ataei ni koteia iaon te mwabe te tabo are a mwakuri iai mitinare akanne. Kabwarabwaraa bwa Iakobwa e kabootaua te aonaaba ma te kurubu n aroka aika taian oriwa. Aroka kaanga ai aroia aomata iaon te aba, ao tararuaakin aroka akanne kanga ai aron are a karaoia mitinare nakoia natin te Atua. Tera ae a karaoia mitinare ni kakabwaiaia natin te Atua? Ni kabane taratarai kaeka tabeua ibukin te titiraki aei n te kuna n aron “Called to Serve” (Aia Boki n Anene Ataei, 174–75). Ti na kanga n riki n ai aroia mitinare?
Te Mwakuri ni mitinare bon teuana te kawai are ti kona ni buokiia iai natin te Atua n oki Nakoina.
Tamau are i Karawa e tangirai.
Ko na kanga n reireiniia kain am kiraati bwa te Atua e tangiriia natina ni kabane ao e taakina “baina n nanoanga” nakoia?
Waaki ni Kakukurei aika a Kona ni Karaoaki
-
Kaoiia ataei bwa a na inga i bon irouia. Tera ara namakin ngkana temanna ae e tangiriira e inga nakoira? Wareka Iakobwa 6:5 nakoia ataei, ao kabwarabwaraa bwa te kibuntaeka anne “[te Atua] e na teimatoa ma ngkami” ao “e arora baina n nanoanga nakoimi” reireiniia bwa Tamara are i Karawa e tangiriira ao e tangiria bwa ti na oki nakoina n te bong teuana.
-
Ni kabane anenea taekan te tangira, n aron “I Feel My Savior’s Love” (Aia Boki n Anene Ataei, 74–75). Kaoiia ataei bwa a na atongi aran bwaai ake a buokiia n namakin ana tangira te Tia Kamaiu.
I kona n tei ibukin te bwai ae I ataia bwa e koaua.
Iakobwa bon te banna ni katooto ae rangi n tamaroa iroun temanna ae matoatoa ana koaua are e buokia ni katana te koaua ngke e kaitaraaki.
Waaki ni Kakukurei aika a Kona ni Karaoaki
-
Karakina rongorongon Iakobwa ao Tierem (Iakobwa 7:1–23) n te aro are a kona n ota iai ataei. Ko kona ni kabongana “Mwakoro 10: Iakobwa ao Tierem” (Karaki man Ana Boki Moomon, 27–29, ke te witeo are e irekereke mangaia iaon ChurchofJesusChrist.org). Manga karakina riki te karaki, ma n te tai aei anganiia ataei bwa a na ibuobuoki ni karini kabwarabwara. Titirakiniia bwa tera ae a reiakinna mairoun Iakobwa. Ti na kanga ni irii ana banna ni katooto?
-
Kaoiia ataei bwa a na anenea te kuna ae taekan rinean te eeti, n aron “Dare to Do Right” ke “Stand for the Right” (Aia Boki n Anene Ataei, 158, 159). Tuangiia bwa a na tei n te tai are a anenea iai taian taeka n aron eeti ke koaua.
Reirei te Reirei: Ataei aika a Ikawai
Te Uea e tabeaianga ibukiia Ana botanaomata.
Iakobwa e tibwaua te kaikonaki iaon te kai te oriwa ni buokiia ni kaoia Ana botanaomata n nakomai nakon Kristo. E kona ni kakoroa nanon te kantaninga ibukiia ataei ake ko reireiniia.
Waaki ni Kakukurei aika a Kona ni Karaoaki
-
Warekia ao kabwarabwaraa nakoia ataei oin raoi kibu ni kakimototoa te kaikonaki n te kai te oriwa, n aron Iakobwa 5:3–4, 28–29, 47, ao 70–72, ao kaioia ataei bwa a na korea tamnein bwaai ake a kabwarabwaraki ni kiibu aikai. Tera ae ti reiakinna man kibu aikai n aron ana namakin te Uea ibukiia Ana botanaomata? Tuangiia ataei bwa a na bakaea ae aongkoa a tararua te kai te oriwa ngkai ko kakimototoi kibu 61–71 (a kona ni karaoa ae a keniken, tebo aroka, ao a mwaiti riki). Kaoiia ataei tabeman bwa a na wareka Iakobwa 5:11, 41, 47, ao 72, n taratarai bwaai ake a kaota mwaitin tabeaiangan Uean te nne ni kurebe (Iesu Kristo) ibukin kaai. Tera ae e karaoia te Tia Kamaiu ni kaota tabeaiangana ibukira? Te witeo “Old Testament Olive Vineyard” (ChurchofJesusChrist.org) e kona n ibuobuoki n te waaki ni kakukurei aei.
-
Korei tabeua rinanin kanikina n Iakobwa 5 iaon te burakibooti, n aron te nne ni kurebe, uean te nnen ni kurebe, te toro, ao te kai te oriwa. Imwina karaoa te rinan riki teuana, n teina ae aki baireaki, ni bwaai ake a tei ibukin kanikina aikai, n aron te aonaaba, te Tia Kamaiu, taan kairiiri n te Ekaretia ke mitinare, ao ana aomata te Atua. Ikotaki wareki kiibu man Iakobwa 5 ake a taekin kanikina aikai, ao buokiia ataei bwa a na korea te rain iaon te burakibooti ni katomai kanikina akanne ma nanoia (taraa, te katooto, kibu 3–4, 28–29, 47, 70–72).
Tamau are i Karawa e tangirai ao e na kabwarai au bure ngkana I raira nanou.
E kakaawaki buokaia ataei ake ko reireiniia bwa a na ota bwa te Atua e tangiriia ao e na kabwarai aia bure n tainako ngkai a rairi nanoia ni koaua.
Waaki ni Kakukurei aika a Kona ni Karaoaki
-
Korea te taibora iaon te burakibooti ma ana kaorom aika uoua n atuuna Tamara are i Karawa ao Ngaira. Ikotaki wareka Iakobwa 6:4–5, ao tuangiia iteran te kiraati bwa a na taratarai kibuntaeka ake a kaineti nakon te Atua ao iterana are teuana a na taratarai kibuntaeka ake a kaineti nakoira. Korei bwaai ake a kunei iaon kaorom ake a bootau ma ngaia. Buokiia ni kabwarabwarai taeka ake a aki ota iai.
-
Tibwaua ana karaki Allen D. Haynie iaon te kabarekareka n te bokaboka n ana marooro “Remembering in Whom We Have Trusted” (Ensign ke Riaona, Nobembwa. 2015, 121–22). Tera ae reireiniira te rongorongo aei n te bwai are ti kainnanoia bwa ti na kamaiuaki iai n abanuean te Atua? Tera riki ae ti reiakinna man Iakobwa 6:4–5?
I kona n tei ibukin te bwai are I ataia bwa e bon koaua.
Ko na kanga ni kaungaia ataei bwa a na tei ibukin te koaua n aron are e karaoia Iakobwa?
Waaki ni Kakukurei aika a Kona ni Karaoaki
-
Kaoiia ataei bwa a na karaoi kaotioti ni ikakarabakau imarenaia Iakobwa ao Tierem, ni kabongana Iakobwa 7:1–23 bwa te kairi. Ke kaota te witeo iaon “Iakobwa ao Tierem” (ChurchofJesusChrist.org). Tuangiia ataei bwa a na marooroakina te mwakoro are a tatangiria man te karaki. E kanga Iakobwa n tei ibukin te bwai are e ataia bwa e eeti? Kaoia ataei bwa a na tibwaua te bwai are a rinanona ngkana a tei ibukin te bwai ae eeti, ke tibwaua are bon mai iroum.
-
Kaoia ataei bwa a na anenea taekan rinean te eeti, n aron “Dare to Do Right” ke “Stand for the Right” (Aia Boki Ataei n Anene, 158, 159). Tibwatibwaia inanon te kurubu, ao kaoia bwa a na karaoa te baena n anainano ke te boutita are e tei ibukin te bwai teuana are a tei ibukina ke a kakoauaa.
Kaunga te Kamatebwai n te Mweenga
Kaoia ataei bwa a na iangoa te kawai are e kona ni buokiia aia utu n namakina ana tangira te Uea—te katooto, man kabwarabwaraan te bwai are a reiakinna n aron Uean te nnen ni kurebe n tararuai arokana oriwa.
Kanakoraoan Ara Angareirei
Ataei a tatangiria n tibwai bwaai ake a reiakin. E ngae ngke a tabe n rikirake, ataei a kona ni kakorakoraia kain aia utu. Kaungaia bwa a na tibwaua ma aia utu bwaai ake a reiakin n te Moanrinan. (Taraa Teaching in the Savior’s Way, 30.)