“Beberuare 24–Maati 1. 2 Nibwaai 26–30: ‘Te Mwakuri ae Kamiimi ma ni Kakuba,’” Nakomai, Iriirai—Ibukin te Moanrinan: Ana Boki Moomon 2020 (2020)
“Beberuare 24–Maati 1. 2 Nibwaai 26–30,” Nakomai, Iriirai—Ibukin te Moanrinan: Ana Boki Moomon 2020
E na kairiko ni Baina, iroun Sandra Rast
Beberuare 24–Maati 1
2 Nibwaai 26:30
“Te Mwakuri ae Kamiimi ma ni Kakuba”
Imwain ae ko moana bairean te reirei ni waaki ni kakukurei ibukiia ataei n am kiraati, kamatebwaia 2 Nibwaai 26–30. Aio are e na kaoa te Tamnei ni kairiko n am katauraoi.
Korea Am Namakin
Kaungaa te Tibwatibwa
Taua ieta Ana Boki Moomon, ao kabwarabwaraa bwa Nibwaai e a kaman nooria bwa Ana Boki Moomon e na rangi ni kakawaki n ara bong. Tuangiia ataei bwa a na tibwai tabeua bwaai ake a tia n reiakini ibukin Ana Boki Moomon n te ririki aio.
Reirei te Reirei: Ataei aika a Uarereke
E tangiriia aomata nako Iesu Kristo bwa a na nakoina.
E anga ana koaua Nibwaai bwa te Tia Kamaiu e tangiriia aomata nako, e aki kakawaki bwa antai ngaiia, ao E kaoiia ni kabane bwa a na “katoonga ana raoiroi.”
Waaki ni Kakukurei Aika a Kona ni Karaoaki
-
Kaota tamneia aomata man aba nako ao a kakaokoro aron kateia (ko kona ni kunei tabeua n nutibeeban te Ekaretia). Tuangiia ataei bwa a na kabwarabwarai nako tabeua mwakoron te bwai are a nooria n te tamnei. Kauka te koroboki ae tabu nakon 2 Nibwaai 26:33 ao wareka, “[Iesu Kristo] e weteiia ni kabane bwa a na nakoina.” Manga taekina riki te mwakoro n taeka aio ma ataei ngkai ko kotei tamnei teuana imwin teuana. Ngkanne koteiia ataei n tatabemaniia ao atonga, “E kaoko Iesu Kristo bwa ko na nakoina.” Tera ae ti kona ni karaoia n nakon te Tia Kamaiu?
-
Anene ma ataei n anenea te anene iaon te tangira nakoia aomata nako, n aron “I’ll Walk with You” ke “We Are Different” (Aia Boki n Anene Ataei, 140–41, 263). Mwanewei taeka ke mwakoro n taeka n te anene ake ko namakin bwa a kakorakora riki te rongorongo n 2 Nibwaai 26:33.
Ana Boki Moomon bon te kakabwaia.
Iangoia bwa ko na kanga ni buokiia ataei n am kiraati n namakinna bwa ana Boki Moomon bon “te kakabwaia nakoia mai i nanon bain te Atua ”(2 Nibwaai 30:6).
Waaki ni Kakukurei aika a Kona ni Karaoaki
-
Kaota nakoia ataei Ana Boki Moomon ae e batianaki bwa te bwai n tangira, ao tuangiia bwa iai inanona te bwai ae e kakawaki. Anganiia bwa a na taua te bwai n tangira anne, ao anganiia tabeua kairi iango ni buokiia kabwarabwaraana bwa a na ketinna bwa tera, te katooto, te bwai ae e anganiira te Uea, e buokiira bwa ti na kakoaua Iesu Kristo, ao a bati riki. Wareware man 2 Nibwaai 30:6: “Bon te kakabwaia nakoia mai i nanon bain te Atua.” Anganiia ataei bwa a na kauka te bwai n tangira, ao ngkanne kabwarabwaraa bwa ti na riai ni kauka Ana Boki Moomon ao ni warekia ni karekei kakabwaia ake a mena inanona.
-
Wareka 2 Nibwaai 28:2 nakoia ataei. Kabwarabwaraa bwa e nooria Nibwaai ae ana Boki Moomon “e na rangi ni kakawaki” nakoira, are nanona bwa e na buokiira ao ni kakabwaiaira. Tuangiia ataei bwa bukin tera Ana Boki Moomon e rangi ni kakawaki ibukim. Tibwaua te kibu ae e mamate nanom iai ke te karaki man Ana Boki Moomon, ao kaoiia ataei bwa a na tibwaua aia kibu ke karaki. Kaoti tamnei man Te Boki n Tamnei n te Euangkerio ni karekei aia iango.
E reireinai Tamara are i Karawa teutana imwin teutana.
Tao ko na bae n iangoa te anga reirei ae ko kabongana te bwai ke waaki ni kakukurei are e na buokiia ataei n nooria bwa tera ae nanonaki n reirei “teutana imwin teutana.” Iango tabeua aika inano a na kona ni karekei riki iango.
Waaki ni Kakukurei aika a Kona ni Karaoaki
-
Buokiia ataei ni karaoa te tamnei ae e katomatomaki ae e bebete karaoana ke karaoi bwaai tabeua man te buraoki. Anganiia te tamnei ae e katomatomaki ke te buraoki teuana imwin teuana, ao inanon aia tai ni katea te bwai teuana, kabwarabwaraa bwa aio aron reiakinara iroun Tamara are i Karawa—–teuana te koaua imwin teuana. Tera ae e na riki ngkana ti kataia ni kanimwi mwakorokoro ni kabane n ti teuana te tai?
-
Reireiniia ataei te rabakau teutana i mwin teutana, n aron kabaean te kamronron ke korean te tamnei. Wareware man 2 Nibwaai 28:30: “N na anganiia natiia aomata teutana i mwin teutana, … te reirei teuana i mwin teuana.” E aera ngkai te Atua e reireirniira teutana i mwin teutana?
Reirei te Reirei: Ataei aika a Ikawai
E tangiriia aomata nako Iesu Kristo bwa a na nakoina.
Buokiia ataei n namakinna bwa te kakao n nakomai nakon Kristo e bon kaineti nakoia ao nakoia aomata nako.
Waaki ni Kakukurei aika a Kona ni Karaoaki
-
Marooro ma ataei ibukin te tai are a kaoiia raoraoia ke aia utu bwa a na kaea te bootaki, n aron bukamaruan te rekenibong. Tera ae a karaoia ni kaungaia aomata bwa a na roko? Wareware ma ataei n 2 Nibwaai 26:23–28, 33, ao buokiia bwa a na ataia tera ae e kaoira te Uea bwa ti na karaoia. Tuangiia ataei bwa a na karaoa te kaati ke te reta ni kaoiia tabeman n roko nakon Iesu Kristo. Kaungaia bwa a na kabongana te mwakoro n taeka man kibu aikai n aia kakao (ngkana e kainnanoaki, korei tabeua mwakoro n taeka iaon te burakibooti bwa te buoka).
-
Wareka 2 Nibwaai 26:33 ma ataei, ao buokiia bwa a na korei araa ni karinanna bwa antai, ni kaineti ma te kibu aio ae e kaoaki bwa e na “katoonga ana raoiroi [te Uea].” (Ko na kainnanoia ni kabwarabwaraa bwa “beekan” bon naake aki kakoaua te Atua.) Kaoiia bwa a na karina araia n te karinnan n ara are a korei. Ti kanga ni katoonga ana raoiroi te Uea?
-
Marooro ma ataei teutana te tai ibukin ae a kanga ataei ni kabutaa te aonaba ni kaokoro, ao kaota koauan ae te Uea e tangiriia ni kabane (taraa 2 Nibwaai 26:24 33). Kaoiia ataei bwa a na korea tamnein Iesu ma ataei aika kakaokoro.
E kaotii koaua Tamara are i Karawa “teutana i mwin teutana.”
E kauring Nibwaai ni kaitara te anua are ti aki kainnanoi riki taian koaua mai iroun te Atua. Buokiia ataei bwa a na mataata ae reiakinan te euangkerio bwa te keerake, karekean te maiu ae e kakaeaki.
Waaki ni Kakukurei aika a Kona ni Karaoaki
-
Rinea te mwakoro n taeka man 2 Nibwaai 28:30, ao tuanga ataei bwa e na korea te moan taeka iaon te burakibooti. Ngkanne tuanga temanna te ataei bwa e na korea te taeka are imwina, karaoa aio ni karokoa e bane te kibu n taeka ni koreaki. E kanga te waaki ni kakukurei aei n titebo ma te kawai are te Atua e anganiira te koaua?
-
Buokiia ataei ni wareka ao ni mataata n 2 Nibwaai 28:27–30, kakaai kaekaan titiraki n aron aei: Tera ae e taekinaki ni kiibu aikai ibukin te aomata are a kakoaua bwa iai irouia te koaua ae e tau ao aki manga kainnanoi riki? Tuangiia bwa a na iangoi kawai ae ti kona ni kaotia nakon te Uea bwa ti tangiria ni karekei riki koaua mai Irouna.
Ana Boki Moomon ao te Baibwara a uaia ni mwakuri.
Ibukina bwa iai iroura te Baibwara, tabeman aomata a kakoaua bwa e aki riai ae a na iai Ana Boki Moomon. Kiibu aikai a na kona ni buokiia ataei ni mataata, ao ni kabwarabwaraa nakoia tabeman, bwa e aera ngkai ti kakaitau ibukin booki aika tabu aikai.
Waaki ni Kakukurei aika a Kona ni Karaoaki
-
Angan temanna te ataei Ana Boki Moomon ao are temanna te Baibwara. Titirakiniia bwa a kanga booki aikai n titebo ao a kanga ni kaokoro. Kaota nakoia ataei mwaben te aonaaba, ao buokiia bwa a na kaota te tabo n te aonaaba are a nako mai iai booki akanne. Wareka ao maroroakina 2 Nibwaai 29:8. Bukin tera te Atua e anganiira “kakoaua” aika uoua ke booki aika a tabu ae e reireiniira Arona?
-
Tuangiia ataei bwa a na iangoia ae raoraoia e tuangiia, “I aki kainnanoia bwa N na wareka Ana Boki Moomon. I a tia ni wareka te Baibwara.” Baane wareka 2 Nibwaai 29:7–11, kabwarabwarai kiibu n taeka ao nanoia ngkana e kainnanoaki. Ngkane tuangiia bwa a na tibwauai iango bwa tera ae a na riai n taekinna nakon raoraoia.
Kaungaa te Kamatebwai n te Mweenga
Kaoiia ataei bwa a na kabwarabwaraa nakoia aia utu bwa e kanga te Baibwara ao Ana Boki Moomon n uaia ni mwakuri ni kakoaua ibukin Iesu Kristo.
Kanakoraoan Ara Anga reirei
Kabanea am tai iaoia aomata, tiaki n te reirei. Iango inanon te kabwarabwara aio bon ti iango ni kairi. Ko kona ni biti ni kangaraoa kainnanon ao ana konabwai te ataei are ko reiakiniia.