“Maati 2–8. 2 Nibwaai 31–33: ‘Aio te Kawai,’” Nakomai, Iriirai—Ibukin te Moanrinan: Ana Boki Moomon 2020 (2020)
“Maati 2–8. 2 Nibwaai 31–33,” Nakomai, Iriirai—Ibukin te Moanrinan: 2020
Kristo ngke e Reireiniia Ana Reirei, iroun Justin Kunz
Maati 2–8
2 Nibwaai 31–33
“Aio te Kawai”
Waakina am katauraoi man warekan 2 Nibwaai 31–33. Ukoukora ana kairi te Tamnei iaon te bwai are ko na reireiniia iai ataei. Te kabwarabwara aei e kona ni karekea am iango.
Korea am Namakin
Kaungaa te Tibwatibwa
Ibukina bwa Nibwaai e reirei taekan ana bwabetito Kristo, tuangiia ataei bwa a na tibwaua te bwai are a tia n reiakinna n taekan te bwabetito. A kona naba n tibwauai iango ao namakin iaon aia bwabetito ke aia bwabetito raoraoia ke kain aia utu.
Reirei te Reirei: Ataei aika a Uarereke
Iesu Kristo e reireinai arou n oki nakon Tamara are i Karawa.
Nibwaai e reirei bwa iriirakin ana banna ni katooto te Tia Kamaiu ao ana reirei bon ti ngaia te kawai are “e na kona ni kamaiuaki iai te aomata i nanon uean te Atua.” (2 Nibwaai 31:21).
Waaki ni Kakukurei aika a Kona ni Karaoaki
-
Kaota te tamnei te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu ngkai ko kakimototoa rongorongon ana bwabetito Iesu (taraa 2 Nibwaai 31:4–13). Kabwarabwaraa bwa te bwabetito bon teuana te mwaneka n te kawai n oki rikaaki ni maeka ma Tamara are i Karawa. Kaoa temanna ae e a tibwa tia ni bwabetitoaki bwa e na karakina nakoia ataei aron ana namakin teuanne ke neienne iaon te bwabetito.
-
Kabwarabwaraa bwa Iesu Kristo e reireiniira te bwai ae ti riai ni karaoia bwa ti aonga n oki nakoina imwiin matera. Korea te kawai iaon te burakibooti, ao katoka tamnein Kristo n tokina. Anganiia ataei tamnei ake a tei ibukin ana reirei Kristo (te onimaki iroun Kristo, rairannano, bwabetito, ana bwaintangira te Tamnei ae Raoiroi, ao te teimatoa ni ua te toki). Buokiia katikui tamnei iaon te kawai.
-
Buokiia ataei bwa a na reiakina te kaaua n taekan te onimaki. Ikotaki n anenea teuana te moan reirei n te euangkerio, n aron “Faith,” “When I Am Baptized,” ke “Choose the Right Way” (Aia Boki n Anene Ataei, 96–97, 103, 160–61).
I kona ni kakukureiai n ana taeka Kristo.
E na kanga bwaai ake ko a tia n rinanona ni “kanuai[ko] n ana taeka Kristo” (2 Nibwaai 32:3) buokiia ataei bwa a na kona n ota n te kibuntaeka aei?
Waaki ni Kakukurei aika a Kona ni Karaoaki
-
Tuangiia ataei bwa a na atongi aran kanaia aika a tatangiria, ao kaoia bwa a na karaoa te kaotioti bwa a na kanga ni kanuaiia iai. Wareka 2 Nibwaai 32:3, ao tuangiia ataei bwa a na kakauongo nakon te bwai are e taekinna Nibwaai are ti riai ni kanuaira iai. Tera ae nanonaki ni kanuaira man koroboki aika tabu? Kabwarabwaraa bwa koroboki aika tabu bon teuana te tabo are ti kona ni kunei iai ana taeka Kristo.
-
Korea te taeka ae Atua ao te Uea iaon te burakibooti. Kaoia ataei bwa a na kaukia nakon iteranibaan koroboki aika a tabu ni kakaai iai taeka aikai. Anganiia buokaia ngkana a kainnanoia. Kakoaua bwa ngkai ti wareki koroboki aika tabu, ti kona n reiakina taekan te Atua.
Tamara are i Karawa e tangirai bwa N na tataro n taainako.
Kiibu aikai a kona ni kaungaia ataei bwa a na karika te tataro bwa mwakoron maiuia ni katoa bong.
Waaki ni Kakukurei aika a Kona ni Karaoaki
-
Titirakiniia ataei bwa nningai aia tai n tataro. A tatataro n te moaningabong? n te tairiki? imwain te amwarake.? Buokiia ataei n iangoi aia mwakuri ni kaotia bwa nningai ae ti kona iai n tataro, n aron ae ngkana ti a tibwa uti, ti nako ni maatu, ao n amwarake —ke n taai riki tabeua. Wareki nakoia taekan te moan rain ke te kauoua man 2 Nibwaai 32:9, ao katuruturua te kibuntaeka ae “tataro n tainako.”
-
Titirakiniia ataei bwa e kanga aroia n tataro. Tera ae a karaoia ma atuuia, baia, ao a bati riki? Baikara bwaai aika a taekini? Tuangiia bwa a na iangoia bwa aongkoa ko aki ataa aron te tataro, ao anganiia bwa a na reireiniko. Bukin tera Tamara are i Karawa e tangiriira bwa ti na tataro?
Ti Kona ni maroro ma te Atua rinanon ara tataro.
Reirei te Reirei: Ataei aika a Ikawai
Iesu Kristo e reireinai arou n okira Tamara are i karawa.
Ti kona n oki nakon te Atua Imwin te maiu aei man irakin ana reirei Iesu Kristo are e reirei iai: te onimaki iroun Kristo, rairannano, bwabetito, ana bwaintangira te Tamnei ae Raoiroi, ao n teimatoa ni uaa te toki.
Waaki ni Kakukurei aika a Kona ni Karaoaki
-
Katekei tamnei n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu, ao tuangiia ataei bwa a na tibwaua te bwai are a ataia n ana bwabetito Iesu (taraa Mataio 3:13–17). Katikui taeka ni kamangaoa iaon te burakibooti: Iesu e kakoaua nakon te Tama bwa E na ongeaba Nakoina. Kaoiia ataei bwa a na wareka 2 Nibwaai 31:7 n te kiraati ao ni kaeti nnen taeka nakon nneia ae eeti.
-
Titirakiniia ataei bwa tera ae a na taekinna nakon temanna are e katauraoi bwa e na bwabetitoaki, ao buokiia ni korei aia reirei nako aon kaati aika uarereke are a kona n angan temanna. Ti na kanga n reitinako n iriira ana banna ni katooto Iesu imwiin ara bwabetito?
-
Kabwarabwaraa bwa ana reirei Kristo e kairi bwaai ake e anga reirei iai ake ti kainnanoi bwa ti aonga ni kona n oki nakon Tamara arei i Karawa. Koroboki iaon te beeba ae kaokoro te onimaki iroun Kristo, rairannano, bwabetito, ana bwaintangira te Tamnei ae Raoiroi, ao teimatoa ni uaa te toki, ao kamaenakoi inanon te ruu. Warekia nakoia ataei 2 Nibwaai 31:11–19, ao kaoia ataei bwa a na ikaruoruo ni kibakiba man te beeba teuana nakon te beeba teuana ngkai a ongo taekinan reirei aikai. Buokiia bwa a na iangoa te bwai are a rinanona man reirei nako.
I kona ni kakukureiai n ana taeka Kristo.
Bukin tera a riai ataei n ota ni kakaawakin kanuaiko n ana taeka Kristo?
Waaki ni Kakukurei aika a Kona ni Karaoaki
-
Tuangiia ataei bwa a iangoia angkoa iai te baka n amwarake. Tera te amwarake ae a tangiria ikekei? Tera ae a na kanna moa? Ngkanne kaoia bwa a na iangoia bwa tera te baka n amwarake iaon koroboki aika tabu ae kona n nanonaki ngkai kam wareka 2 Nibwaai 32:3. Bukin tera Nibwaai e kabongana te taeka baka n amwarake n reireiniia arora ni kamatebwaia ana taeka te Atua? Tera bukina ngkai e aki ti kangai wareware? Tera ae nanonaki ni kanuaira man koroboki aika tabu? Tibwauaia ma ataei te kakabwaia are ko karekea ngkai ko a tia ni kamatebwai iaon koroboki aika tabu.
-
Katiaa te iteraniba ibukin te waaki ni kakukurei ma ataei, ao kaoiia bwa a na karaoa aia kouru bwa a na karaoa tao teuana te bwai are a na kamatebwaia iaon koroboki aika tabu n te wiiki aei.
Tamara are i Karawa e tangirai bwa N na tataro n tainako.
Te tia kakaitara e kaririira bwa ti na aki tataro. Iangoi bwa ko na kanga ni buokiia ataei ni katinanikua te kariiri aei ao n “tataro n taainako” (2 Nibwaai 32:9).
Waaki ni Kakukurei aika a Kona ni Karaoaki
-
Rinea te kibuntaeka iaon te tataro man 2 Nibwaai 32:8–9, koreia iaon te burakibooti, ao rabuni taekana n te mwakoro ni beeba. Kaoia ataei bwa a na ikaruoruo ni kanakoa teuana te beeba imwiin teuana ni karokoa ae a kona ni keetina te kibuntaeka anne.
-
Wareka 2 Nibwaai 32:8–9 ni bootaki, ao tuangiia ataei bwa a na tibwaua te bwai are a reiakinna n te tataro man kibu aikai. Tera ae nanonaki bwa ko na “tataro n tainako”? (kibu 9). Ti na kanga ni karaoa aei?
-
Tera ae e karika temanna bwa e na aki tangiria n tataro? Tibwuaa te bwai ae ko rinanona ngke ko tataro e ngae ngke ko aki kan karaoia. Tera aron am namakin imwiina? Kaoa te ataei bwa e na wareka te kauoua n itera n 2 Nibwaai 32:8, ao anganiia ataei aia tai n iangoia. Bukin tera e aki tangiria Tatan bwa ti na tataro? Ti na kanga ni kaururingiira bwa ti na tataro riki ngkana ti aki kan karaoia?
Kaungaa te Kamatebwai n te Mweenga
Kaungaia ataei bwa a na kakaea temanna—te rao, tariia ke mwaneia, ke kain te utu temanna—a kona n reireiniia aroia n tataro.
Kanakoraoan Ara Anga reirei
Ataei a rangi ni kakamwakuri. Kaoia ataei bwa a na karaoi kaotioti man karaki man koroboki aika tabu ao anene. Kabongana aroia ni takaremwaremwa ni karakai riki bwaai ake a reiakini. (Taraa Teaching in the Savior’s Way, 25–26.)