Pebrero 17–23

2 Nephi 11–25

“Kami Nalipay diha kang Kristo”

Ang imong pagpangandam sa pagtudlo magsugod samtang imong basahon ang 2 Nephi 11–25. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.

Irekord ang Imong mga Impresyon

Dapita ang Pagpaambit

Ribyuha kadiyot uban sa mga bata unsay ilang nakat-unan mahitungod sa Manluluwas ug sa Iyang Pag-ula sa miaging semana. Kon ilang gipaambit ang ilang nakat-unan ngadto sa ilang mga pamilya, awhaga sila sa paghisgot kabahin niana.

Itudlo ang Doktrina: Mas Gagmay nga mga Bata

2 Nephi 12:2–3

Ang templo mao ang balay sa Ginoo.

Ang panagna ni Isaias mahitungod sa “bukid sa balay sa Ginoo” mahimong usa ka oportunidad sa pagtudlo sa mga bata mahitungod sa templo ug sa pagtabang kanila nga maghinam-hinam sa pag-adto didto sa umaabut.

Posible nga mga Kalihokan

• Pagunita ang usa ka bata og hulagway sa templo (ang outline niini nga semana sa Dali, Sunod Kanako—Alang sa mga Indibidwal ug mga Pamilya adunay usa), ug hangyoa ang mga bata sa pagpaambit sa unsay ilang nahibaloan mahitungod sa templo. Basaha ang 2 Nephi 12:3, ug ipasabut nga niini nga bersikulo usa ka propeta nga ginganlan og Isaias nanagna nga adunay mga templo sa katapusang mga adlaw. Basaha pag-usab ang bersikulo, ug hatagi og gibug-aton nga kon kita moadto sa templo, ang Ginoo “motudlo kanato sa iyang mga pamaagi” ug motabang nato nga “mosubay sa iyang mga dalan.”

• Paghimo og dalan diha sa salog, ug sa tumoy sa dalan, pagbutang og gitabonan nga litrato sa templo. Palakta ang mga bata subay sa dalan, ug samtang nagbuhat sila niini, tabangi sila sa pagsulti sa hugpong sa mga pulong nga “mosubay sa iyang mga dalan.” Kon moabut na sa tumoy sa dalan ang mga bata, ipakuha nila ang tabon sa litrato. Unsay gipasabut sa pagsubay sa mga dalan sa Dios?

• Kantaha uban sa mga bata ang usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99). Tabangi sila sa pagpangita sa mga pulong diha sa kanta nga nagtudlo kon unsa ang templo ug unsa ang atong buhaton didto.

2 Nephi 19:6; 25:26

“Kami nalipay diha kang Kristo.”

Si Nephi ug Isaias adunay mga pagpamatuod mahitungod sa Manluluwas, ug ang ilang mga pagpamatuod nakahimo kanila nga malipayon. Tabangi ang mga bata nga makakita nga ikaw “nalipay diha kang Kristo.”

Posible nga mga Kalihokan

• Dapita ang usa ka bata sa paggunit og hulagway sa pagkatawo ni Jesukristo (sama sa Libro sa mga Hulagway sa Ebanghelyo, nu. 30), ug tabangi ang mga bata sa pagpangita sa batang Jesus diha sa hulagway. Basaha ang 2 Nephi 19:6 o ipasalida ang video nga “Usa ka Manluluwas Natawo—Video sa Pasko” (ChurchofJesusChrist.org), ug hangyoa ang mga bata nga itudlo si Jesus kon madungog nila ang mga pulong nga bata ug anak. Ipasabut nga si propeta Isaias, kinsa misulat sa mga pulong diha sa 2 Nephi 19:6, nasayud kabahin sa pagkatawo ni Jesus gatusan ka tuig sa wala pa kini mahitabo.

  A Savior Is Born

• Pagsugilon og istorya mahitungod ni Jesukristo nga naghatag og kalipay sa uban. Hisguti ang malipayong mga higayon diha sa istorya. Basaha ang 2 Nephi 25: 26 ug hisguti kon nganong ikaw “nalipay diha kang Kristo.” Hangyoa ang mga bata sa paghisgot kon sa unsang paagi si Jesus naghatag kanila og kalipay.

2 Nephi 21:6–9; 22

Ang Milenyum maoy usa ka panahon sa kalinaw ug kalipay.

Human sa Iyang Ikaduhang Pag-anhi, si Jesukristo mopuyo uban sa Iyang katawhan atol sa panahon sa kalinaw nga gitawag og Milenyum.

Posible nga mga Kalihokan

• Pakit-a ang mga bata og mga hulagway sa mga hayop nga gihisgutan diha sa 2 Nephi 21:6–7, ug hangyoa ang mga bata sa paghingalan sa mga hayop. Ipasabut nga kini nga mga hayop sa kasagaran magkaaway, apan mitudlo si Isaias nga human sa pag-anhi pag-usab ni Jesukristo, adunay usa ka panahon sa kalinaw, nga gitawag og Milenyum, diin ang mga hayop dili mopasakit sa usag usa. Unsaon nato sa pagsunod ang ehemplo niini nga mga hayop sa paagi sa atong pagtratar sa uban? Dapita ang mga bata sa pagdrowing og mga hulagway niini nga mga hayop nga malinawong nagpuyo nga magkauban.

• Basaha ang 2 Nephi 22:5, ug hangyoa ang mga bata sa pagtabang kanimo sa pagpangita og usa ka kanta nga naghulagway sa “hamili nga mga butang” nga nabuhat sa Ginoo. Ang pipila ka mga ehemplo mahimong maglakip sa “Gihigugma Ako sa Langitnong Amahan” (Songbook sa mga Bata, 16–17) o “How Great Thou Art” (Hymns, nu. 86). Kantaha og dungan ang kanta. Ipasabut nga sa Milenyum, ang tanan masayud mahitungod sa “hamili nga mga butang” nga nabuhat sa Ginoo.

Itudlo ang Doktrina: Mas Dagko nga mga Bata

2 Nephi 12:2–3

Ang templo mao ang balay sa Ginoo.

Unsaon nimo paggamit niini nga mga bersikulo aron matabangan ang mga bata nga maghinam-hinam sa adlaw nga makatambong sila sa templo?

Posible nga mga Kalihokan

• Pagpakita og hulagway sa templo (ang outline niini nga semana diha sa Dali, Sunod Kanako—Alang sa mga Indibidwal ug mga Pamilya adunay usa). Hangyoa ang usa ka bata sa pagbasa sa 2 Nephi 12:2–3, ug dapita ang ubang mga bata sa pagpaminaw sa mga rason nganong si Isaias miingon nga nagkinahanglan kita og mga templo. Mahimo nimong ipasabut nga si Isaias mitawag sa templo nga “ang bukid sa balay sa Ginoo.” Nganong ang bukid usa ka maayo nga simbolo alang sa templo?

• Dapita ang mga bata sa pagdrowing og hulagway sa ilang kaugalingon nga miadto sa templo. Kon mahimo, hangyoa ang usa sa mga young men o young women sa ward sa pagsulti sa mga bata kon sama sa unsa ang pagpahigayon og mga bunyag alang sa mga patay didto sa templo. Kini nga batan-on o laing tawo sa ward mahimong motudlo sa mga bata unsaon sa pagpangita sa mga ngalan sa ilang mga katigulangan kinsa nagkinahanglan sa mga ordinansa sa templo.

2 Nephi 15:20

Si Satanas mosulay sa paglibug kanako mahitungod sa maayo ug dautan.

Nagpuyo kita sa kalibutan diin, sama sa gipanagna ni Isaias, ang mga tawo motawag sa pagkadautan nga matarung, ug ang pagkamatarung nga dautan. Unsaon nimo sa pagtabang ang mga bata nga makaila sa ingon nga pagpangilad?

Posible nga mga Kalihokan

• Pakit-a ang mga bata og usa ka butang nga pait o aslom, sama sa atsara o lemon, sulod sa putos sa kendi. Basaha og dungan ang 2 Nephi 15:20, ug ipasabut nga mosulay si Satanas sa paghimo sa mga butang nga dautan nga matarung tan-awon. Tabangi ang mga bata sa paghunahuna sa mga paagi nga gibuhat kini ni Satanas. Unsaon nato pagkamatngon sa iyang mga pagpanglingla?

• Nganong ilipat-lipat man sa mangingisda ang iyang taga? Nganong ilipat-lipat man ni Satanas ang sala?

  Ikaw Mahimong Gawasnon

2 Nephi 17:14; 19:6; 25:23–26

“Kami nalipay diha kang Kristo.”

Ang mga bata kinahanglang masayud nga ang ebanghelyo ni Jesukristo makapalipay. Unsaon nimo sila sa pagtabang nga “[ma]lipay diha kang Kristo”?

Posible nga mga Kalihokan

• Tabangi ang mga bata sa pagpangita sa mga ngalan ni Jesukristo diha sa 2 Nephi 17:14 ug 19:6. Tingali kinahanglan nimong ipasabut nga ang “Emmanuel” maoy usa niini nga mga ngalan, ug nagpasabut kini nga “ang Dios uban kanato.” Unsa ang gitudlo kanato sa matag usa niini nga mga ngalan mahitungod Kaniya?

• Pagbutang og hulagway sa Manluluwas diha sa pisara, ug basaha og dungan ang 2 Nephi 25:26. Nganong daghan man kaayo og gisulti ug gisulat si Nephi mahitungod ni Jesukristo? Pasulata ang matag bata diha sa pisara, duol sa hulagway ni Jesus, og usa ka butang mahitungod sa Manluluwas nga naghatag kanila og kalipay.

• Hangyoa ang mga bata sa paghunahuna og usa ka tawo nga gusto nila nga “[ma]dasig … sa pagtuo kang Kristo” (2 Nephi 25:23). Unsaon nato sa pagpahayag ngadto sa uban ang kalipay nga gihatag sa Manluluwas sa atong kinabuhi? Ipasulat o ipadrama-drama sa mga bata ang pipila ka mga butang nga ilang mabuhat sa pagtabang sa tawo nga ilang gihunahuna nga motuo kang Jesukristo.

Awhaga ang Pagkat-on diha sa Panimalay

Dapita ang mga bata sa paghunahuna og usa ka butang nga ilang mahimo aron mapakita sa ilang mga pamilya nga sila “nalipay diha kang Kristo.”

Pagpalambo sa Atong Pagtudlo

Tuguti ang mga bata nga mahimong mamugnaon. “Samtang ikaw nagtudlo sa mga bata, tugoti sila sa paghimo, pagdrowing, pagkolor, pagsulat, ug pagmugna. Kini nga mga butang dili lang makalingaw nga mga kalihokan—mahinungdanon kini sa pagkat-on” (Pagtudlo sumala sa Pamaagi sa Manluluwas, 25).