Si Lehi ug ang Liahona, ni Joseph Brickey

Enero 27–Pebrero 2

1 Nephi 16–22

“Ako Moandam og Agianan alang Kaninyo”

Ang makapadasig nga mga istorya diha sa 1 Nephi 16–22 nagtudlo og mga kamatuoran nga makapanalangin sa mga bata sa imong klase. Basaha kini nga mga kapitulo ug irekord ang mga impresyon nga imong madawat.

Irekord ang Imong mga Impresyon

Dapita ang Pagpaambit

Isulat diha sa pisara ang mosunod nga mga pulong, o pagpakita og mga hulagway niini: ang Liahona, ang gapasan [bayanan sa pana], ug ang barko. Pagdapit og tulo ka mga bata nga motagsa-tagsa og pili og usa sa mga pulong o mga hulagway ug mopaambit sa parte sa istorya ni Nephi nga naghisgot niana nga butang. Hatagi og tabang kon gikinahanglan.

Itudlo ang Doktrina: Mas Gagmay nga mga Bata

1 Nephi 16:10, 28–29; 18:8–13, 20–22

Ang Ginoo makagiya ug makadumala kanako.

Tudloi ang mga bata nga bisan kon mag-atubang sila og lisud nga mga hagit, ang Ginoo makagiya kanila (tan-awa sa 1 Nephi 16:29).

Posible nga mga Kalihokan

• Pakit-a ang mga bata og usa ka kompas, usa ka mapa, o laing butang nga makatabang kanato sa pagtultol sa agianan, ug ipasabut kon unsaon sa paggamit niini nga mga himan. Itandi kini nga mga himan ngadto sa Liahona samtang imong i-summarize ang istorya diha sa 1 Nephi 16:10, 28–29 ug 18:9–13, 20–22. Ipasabut nga sa dihang ang pamilya ni Lehi wala magmasulundon, ang Liahona wala molihok (tan-awa usab sa 1 Nephi 18:9–12, 20–22). Unsa ang nagtabang kanato karon aron makatultol sa atong dalan pabalik ngadto sa Langitnong Amahan?

• Pagdala og usa ka kahon nga gisudlan og pipila ka mga timailhan nga naghulagway og usa ka lokasyon sa sulod o libut sa gambalay [building] sa simbahan. Gamita ang kahon ug mga timailhan aron morepresentar sa Liahona, ug papuli-puliha ang mga bata sa pagpili og mga timailhan ug sa pagtag-an kon unsa ang lokasyon. Dayon pagdungan og adto sa lokasyon. Ipasabut nga kon mopakita kita og pagtuo ug mosunod sa direksyon nga gihatag sa Ginoo kanato, motabang Siya kanato nga makabalik ngadto Kaniya (tan-awa sa Alma 37:38–42). Sa unsang paagi ang Langitnong Amahan mogiya kanato sa atong panaw pabalik Kaniya?

1 Nephi 16:14–32

Mahimo akong maayong ehemplo ngadto sa akong pamilya.

Ang mga inter-aksyon ni Nephi sa iyang pamilya panahon sa kalisud makatabang sa mga bata nga makakita nga bisan og mga batan-on pa sila, pwede silang mahimong mga ehemplo ngadto sa ilang mga pamilya.

Posible nga mga Kalihokan

• I-assign ang matag bata sa pagdrowing og hulagway sa usa ka butang gikan sa istorya sa nabali nga gapasan [bayanan sa pana] ni Nephi (tan-awa sa 1 Nephi 16:14–32), sama ni Nephi, gapasan, o ang Liahona. Dayon gamita ang mga hulagway sa pagsugilon sa istorya diha sa klase, ug papuli-puliha ang mga bata sa pagbuhat sa samang butang. Sa unsang paagi kita mahimong sama ni Nephi kon ang atong mga pamilya nag-atubang og lisud nga mga panahon?

• Dapita ang matag bata sa paggunting og lingin nga papel ug drowingan og naguol nga nawong ang usa ka habig ug malipayon nga nawong diha sa pikas. Samtang imong isaysay ang istorya sa nabali nga bayanan sa pana ni Nephi, dapita sila sa paggamit sa mga nawong aron ipakita kon unsa ang gibati sa pamilya ni Nephi atol sa lain-laing parte sa istorya. Giunsa pagtabang ni Nephi nga magmalipayon ang iyang pamilya? Unsay atong mabuhat aron magmalipayon ang atong mga pamilya?

1 Nephi 17:7–19; 18:1–4

Ang Langitnong Amahan makatabang nako sa pagbuhat og lisud nga mga butang.

Sama ni Nephi, ang mga bata nga imong gitudloan nagkat-on sa pagbuhat og mga butang nga daw lisud. Ang kasinatian ni Nephi makatabang kanila nga mahibalo nga ang Langitnong Amahan motabang kanila kon mohangyo sila.

Posible nga mga Kalihokan

• Sultihi ang mga bata sa istorya ni Nephi nga gisugo sa paghimo og barko, gamit ang 1 Nephi 17:7–19 ug 18:1–4. Mahimo usab nimong gamiton ang “Kapitulo 7: Pagtukod sa Barko” (Mga Sugilanon sa Basahon ni Mormon,21–22). Ang pahina sa kalihokan niining semanaha makalig-on sa baruganan nga ang Langitnong Amahan mitabang ni Nephi, ug Siya motabang kanato.

  Ang Ginoo Misugo ni Nephi sa Paghimo og Barko | 1 Nephi 17:7–10

• Kantaha og dungan ang ikaduhang bersikulo sa “Ang Kaisug ni Nephi” (Songbook sa mga Bata, 64–65). Unsay nakatabang ni Nephi nga makabaton og kaisug sa dihang gibugal-bugalan siya sa iyang mga igsoon tungod sa pagpaningkamot sa paghimo sa barko?

Itudlo ang Doktrina: Mas Dagko nga mga Bata

1 Nephi 16:10, 28–29; 17:13–15; 18:8–13, 20–22

Kon akong sundon ang mga sugo, ang Ginoo mogiya kanako.

Gamita ang istorya sa pamilya ni Lehi nga nagiyahan sa Liahona aron ipakita sa mga bata kon sa unsang paagi ang Dios mogiya kanila samtang maningkamot sila sa pagbuhat sa Iyang kabubut-on.

Posible nga mga Kalihokan

• Pagpili og usa o sobra pa sa mosunod nga mga tudling aron basahon uban sa mga bata: 1 Nephi 16:10, 28–29; 17:13–15; ug 18:8–13, 20–22. Hangyoa sila sa pagpangita kon unsay kinahanglan natong buhaton aron makakuha og giya ug direksyon gikan sa Dios ug hisguti kon unsay ilang nakat-unan.

• Human maribyu ang mga istorya sa 1 Nephi 16–18, pang-interbyu og pipila ka mga bata nga daw mipanaw sila uban sa pamilya ni Lehi. Mahimo kang mangutana og sama niini: Nganong mapasalamaton man kamo sa Liahona? Unsay gikinahanglan ninyong buhaton aron molihok ang Liahona? (tan-awa sa 1 Nephi 16:28–29). Dapita ang klase sa paghisgot sa mga butang nga gihatag sa Ginoo aron sa paggiya kanato sa atong panahon.

• Hangyoa ang mga bata sa paghunahuna sa unsang paagi nila magamit ang istorya sa Liahona aron sa pagtabang sa usa ka higala kinsa kinahanglan nga mohimo og importante nga desisyon. Isugyot nga agig dugang sa 1 Nephi 16:10, 26–31 ug 18:9–22, mahimo usab nilang tan-awon ang Alma 37:38–44. Pagpaambit og kasinatian diin ang Langitnong Amahan mitabang kanimo atol sa lisud nga panahon, o dapita ang mga bata sa pagpaambit og usa ka kasinatian. Unsa ang kinahanglan natong buhaton aron makadawat sa Iyang tabang?

1 Nephi 16:14–39; 18:1–5

Ang akong pamatasan ug mga pagpili makahimo og maayo nga impluwensya sa akong pamilya.

Ang pagtuo ni Nephi usa ka dakong panalangin sa dihang ang iyang pamilya nag-atubang og mga pagsulay. Unsaon nimo pagtabang ang mga bata nga makat-on gikan sa iyang ehemplo?

Posible nga mga Kalihokan

• Dapita ang mga bata sa pagdrowing og mga hulagway nga nagpakita sa istorya sa nabali nga bayanan sa pana ni Nephi (tan-awa sa 1 Nephi 16:14–39). Ribyuha ang istorya ngadto kanila, kon gikinahanglan. Samtang mopaambit sila sa ilang mga gidrowing, tabangi sila nga mahibalo sa mga paagi diin ang pagkamatinud-anon ni Nephi mipanalangin sa iyang pamilya. Dapita ang mga bata sa pagpamalandong sa mga hagit nga giatubang nila o sa ilang pamilya. Unsa ang ilang mabuhat aron mosunod sa ehemplo ni Nephi?

• Basaha og dungan ang pipila ka mga bersikulo sa 1 Nephi 16:21–32. Hisguti ang pipila ka mga tumong sa mga pamilya sa mga bata, sama sa paghimo og regular nga family home evening o pag-ampo sa pamilya. Sa unsang paagi nga ang mga bata makatabang sa ilang pamilya sa pagkab-ot niini nga mga tumong? Dapita sila sa pagplano nga mohimo og usa ka butang aron sa pagtabang sa ilang mga pamilya nga makab-ot ang ilang mga tumong karong semanaha.

1 Nephi 19:22–24

Mahimo nakong mapahisama ang mga kasulatan sa akong kinabuhi.

Tabangi ang mga bata nga makakita nga ang mga istorya diha sa mga kasulatan labaw pa kay sa mga istorya lang—naglangkob kini og mga baruganan nga makapanalangin sa ilang mga kinabuhi.

Posible nga mga Kalihokan

• Hangyoa ang usa ka bata sa pagbasa og kusog sa 1 Nephi 19:22–24, ug pangutan-a ang mga bata kon unsa sa ilang hunahuna ang gipasabut sa “mipahisama sa tanan nga mga kasulatan” ngari kanato. Tabangi sila nga makadiskubre kon sa unsang paagi gipahisama ni Nephi ang usa ka istorya sa kasulatan ngadto sa iyang kasinatian sa pagkuha sa mga palid nga tumbaga (tan-awa sa 1 Nephi 4:1–4; tan-awa usab sa Exodo 14). Sa unsang paagi ang paghinumdom niini nga istorya nakatabang ni Nephi ug sa iyang mga igsoon?

• Ribyuha ang pipila ka mga istorya nga nakat-unan sa mga bata mahitungod ni Lehi ug sa iyang pamilya gikan sa 1 Nephi, ug dapita sila sa pagpaambit sa unsay ilang nakat-unan gikan niini nga mga istorya. Tabangi sila sa paghunahuna og mga sitwasyon sa ilang kinabuhi nga tingali susama niini nga mga istorya. Sama pananglit, ang paghangyo sa Ginoo kang Nephi sa paghimo og usa ka barko mahimong makapahinumdom kanila sa mga panahon nga kinahanglan nilang mohimo og lisud nga butang ug nangayo og tabang sa Ginoo.

Awhaga ang Pagkat-on diha sa Panimalay

Dapita ang mga bata sa pagpili og usa ka istorya gikan sa 1 Nephi 16–22 ug sa pagpaambit ngadto sa ilang mga pamilya kon sa unsang paagi sila mahimong “mopahisama” niana nga istorya sa ilang kinabuhi.

Pagpalambo sa Atong Pagtudlo

Paggamit og mga istorya. Ang mga istorya makatabang sa mga bata nga makasabut sa mga baruganan sa ebanghelyo tungod kay nagpakita kini kon giunsa sa uban sa pagsunod niadto nga mga baruganan.