“20–26 Sānuali. 1 Nīfai 11–15: ‘Fakamahafu ʻAki ʻa e Māʻoniʻoní pea mo e Mālohi ʻo e ʻOtuá,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“20–26 Sānuali. 1 Nīfai 11–15,” Haʻu, ʻo Muimui ʻIate Au—Maʻá e Palaimelí: 2020
Melie Ange ʻi ha Toe Melie, tā ʻe Miguel Angel González Romero
20–26 Sānuali
1 Nīfai 11–15
“Fakamahafu ʻAki ʻa e Māʻoniʻoní pea mo e Mālohi ʻo e ʻOtuá”
Lau e 1 Nīfai 11–15 mo fakakaukau ki he fānau ʻokú ke akoʻí, pea lekooti ha ngaahi ongo te ke maʻu.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Fakaʻaliʻali ha fakatātā ʻo e mata meʻa-hā-mai ʻa Līhai ki he ʻakau ʻo e moʻuí, pea fakaafeʻi ʻa e fānaú ke nau vahevahe ʻa e meʻa ʻoku nau manatuʻi ne nau ako ʻi he uike kuo ʻosí ʻo kau ki he mata meʻa-hā-maí. Fehuʻi ange pe kuo nau ako ha meʻa foʻou kau ki he mata meʻa-hā-maí talu mei ai.
Akoʻi e Tokāteliné: Fānau Iiki Angé
Naʻe fekauʻi mai ʻe he Tamai Hēvaní ʻa Sīsū Kalaisi ki he māmaní, koeʻuhi ʻokú Ne ʻofa ʻiate au.
Naʻe mamata ʻa Nīfai ki he moʻui mo e ngāue fakafaifekau ʻa Sīsū Kalaisí ʻi ha mata-meʻa-hā-mai. Fakalaulauloto ki he ngaahi meʻa ʻe lava ke ako ʻe he fānaú mei he 1 Nīfai 11 kau ki he Fakamoʻuí.
Ngaahi ʻEkitivitī ʻe Ala Fakahokó
-
ʻOange ki he fānau takitaha ha fakatātā ʻokú ne fakatātaaʻi ha taha ʻo e ngaahi meʻa naʻe hoko ʻi he moʻui ʻa e Fakamoʻuí ʻa ia naʻe kikiteʻi ʻi he 1 Nīfai 11:20, 24, 27, 31, mo e 33 (vakai, Tohi Fakatātā ʻo e Ongoongoleleí, fika 30, 35, 39, 42, 57). ʻI hoʻo lau ʻa e ngaahi veesi ko ʻení, kole ki he fānaú ke nau puke hake ʻenau fakatātaá ʻi he taimi ʻoku nau fanongo ai ki he veesi ʻoku hoa mo iá.
-
Talanoa ki he fānaú kau ki he ngaahi meʻa ʻe niʻihi naʻe ʻiloʻi ʻe Nīfai ʻe fakahoko ʻe Sīsū Kalaisi lolotonga ʻEne moʻuí (vakai, 1 Nīfai 11:16–33), pea fakaʻaliʻali ange ha ngaahi fakatātā ʻo e meʻa ko ʻeni naʻe hokó (hangē ko ʻení, vakai, Tohi Fakatātā ʻo e Ongoongoleleí, fika 41, 46, 47, 49, 56, 57, 58, 59). Vahevahe ha meʻa kuo fai ʻe he Fakamoʻuí maʻau. Fakaʻaliʻali ha ngaahi fakatātā ke tokoniʻi e fānaú ke nau fakakaukau ki he ngaahi founga te tau lava ai ʻo vahevahe ʻa e ʻofa ʻa e ʻOtuá Tohi Fakatātā ʻo e Ongoongoleleí, fika 109, 110, 115).
ʻOku akoʻi ʻe he Tohi ʻa Molomoná ha ngaahi moʻoni pelepelengesi.
Ko e hā e ʻuhinga ʻokú ke houngaʻia ai ʻi he Tohi ʻa Molomoná? Fakakaukau ki he founga te ke ala vahevahe ai ki he fānaú ʻa hoʻo fakamoʻoni ki he Tohi ʻa Molomoná.
Ngaahi ʻEkitivitī ʻe Ala Fakahokó
-
Tā ha fakatātā ʻi he palakipoé, pea fakaafeʻi ʻa e fānaú ke liliu pe toʻo ha ngaahi konga ʻo e fakatātaá ke hā kehe ai. Tokoniʻi ke mahino kiate kinautolu, naʻe liliu ha ngaahi meʻa ʻi he Tohi Tapú pea toʻo ʻi ha taimi ʻo hangē ko e fakatātā ko ʻení. Lau e ngaahi konga ʻo e 1 Nīfai 13:40 ʻokú ne akoʻi mai e anga hono tokoniʻi kitautolu ʻe he Tohi ʻa Molomoná (ʻa ia ʻoku ʻui ʻe Nīfai ko e “ngaahi lekooti fakamuimui ko ʻení”) ke mahino ʻa e “ngaahi meʻa mahinongofua mo mahuʻinga” ʻa ia ne mole mei he Tohi Tapú.
-
Fufuuʻi takai ʻi he lokí ha ngaahi fakatātā ʻoku nau fakafofongaʻi ʻa e ngaahi moʻoni ʻo e ongoongoleleí ʻa ia ʻoku fakamahino ʻi he Tohi ʻa Molomoná, hangē ko e papitaisó, ko e sākalamēnití, pea mo e toetuʻú. Fakaafeʻi ʻa e fānaú ke nau fekumi ki he ngaahi fakatātā ko ʻení. Fakamatalaʻi ange ʻoku ʻomi ʻe he Tohi ʻa Molomoná ha ngaahi moʻoni ʻo e ongoongoleleí ʻa ia kuo mole.
ʻOku ʻomi ʻe he folofola ʻa e ʻOtuá ʻa e mālohi kiate au.
Te ke fakaʻaongaʻi fēfē ʻa e fakatātā ʻo e vaʻa ukameá ke akoʻi ʻaki e fānaú kau ki he ivi, maluʻi, pea mo e mālohi ʻo e folofola ʻa e ʻOtuá?
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo e misi ʻa Līhaí, hangē ko ia ʻi he fokotuʻutuʻu ʻi he uike kuo ʻosí ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Fakaafeʻi e fānaú ke nau kumi e vaʻa ukameá ʻi he fakatātaá, pea tokoniʻi kinautolu ke mahino e founga ʻoku maluʻi ai kitautolu ʻi he taimi ʻoku tau piki maʻu ai ki he folofola ʻa e ʻOtuá (vakai, 1 Nīfai 15:23–24). ʻOange ki he fānaú ha meʻa ʻoku hangē ha vaʻa ukameá ke nau piki ki ai lolotonga hoʻo lau e veesi 24, hangē ko ha paipa pe vaʻakau. Te tau maʻu ʻi fē ʻa e folofola ʻa e ʻOtuá? Ko e hā te tau lava ʻo fai ke hoko ai ʻa e folofola ʻa e ʻOtuá ko ha konga ʻo ʻetau moʻuí ʻi he ʻaho kotoa?
-
Tokoniʻi e fānaú ke nau valivali mo fakakakato ʻa e peesi ʻekitivitī ki he uike ní. Te tau “piki maʻu” fēfē ki he folofola ʻa e ʻOtuá? (1 Nīfai 15:24).
Akoʻi e Tokāteliné: Fānau Lalahi Angé
Naʻe fekauʻi mai ʻe he Tamai Hēvaní ʻa Sīsū Kalaisi ki he māmaní, koeʻuhi ʻokú Ne ʻofa ʻiate au.
Naʻe mamata ʻa Nīfai ʻi ha mata meʻa-hā-mai ki he palani ʻa e Tamai Hēvaní maʻatautolú, pea ko Sīsū Kalaisí ko ha uho tefito ia ʻo e mata meʻa-hā-mai ko iá.
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau fakatauhoa e ngaahi veesi mei he 1 Nīfai 11:16–33 mo e ngaahi fakatātā ʻokú ne fakamatalaʻi e vēsí (hangē ko e 1 Nīfai 11:20, 24, 27, 29, 31, 33; vakai, Tohi Fakatātā ʻo e Ongoongoleleí, fika 30, 35, 38, 39, 42, 57). Ko e hā e meʻa ʻoku ako ʻe he fānaú kau kia Kalaisi mei he ngaahi vēsí mo e fakatātaá?
-
Fehuʻi ki he fānaú ko e hā e ʻuhinga ʻoku mahuʻinga ai ʻa Sīsū Kalaisi kiate kinautolú. Hivaʻi ha hiva kau ki he Fakamoʻuí, hangē ko e “Naʻá Ne Fekau Hono ʻAló” (Tohi Hiva ʻa e Fānaú, 20), pea fehuʻi ki he fānaú ko e hā e meʻa ʻoku akoʻi ange ʻe he hiva ko ʻení kau kia Sīsuú. Fakaafeʻi e fānaú ke tuku hanau taimi lolotonga ʻa e uiké ke fakakaukau ai kau kia Sīsū Kalaisi pea vahevahe ʻenau ngaahi aʻusiá ʻi he kalasi he uike kahaʻú.
ʻOku ʻi he Tohi ʻa Molomoná ʻa e ongoongolelei ʻo Sīsū Kalaisí.
ʻOku akoʻi ʻe he Tohi ʻa Molomoná ha ngaahi moʻoni pelepelengesi.
Ko e hā ʻoku ʻilo ʻe he fānaú kau ki he Hē mei he Moʻoní? Te ke tokoniʻi fēfē ke mahino kiate kinautolu e mahuʻinga ʻo e Tohi ʻa Molomoná ʻi hono fakafoki mai e ngaahi moʻoni ʻo e ongoongoleleí naʻe mole ʻi he lolotonga ʻo e Hē mei he Moʻoní?
Ngaahi ʻEkitivitī ʻe Ala Fakahokó
-
Lau fakataha e 1 Nīfai 13:26–29 pea fakaafeʻi e fānaú ke nau kumi ki he ngaahi meʻa ʻe hoko ʻi he taimi ʻoku ʻikai maʻu ai ʻe he kakaí ʻa e ngaahi moʻoni “mahinongofua mo mahuʻinga taha” ʻo e ongoongoleleí. Naʻe fakafoki fēfē ʻe he ʻEikí ʻa e ngaahi moʻoni kuo molé? (vakai, veesi 35–36, 40). Fakaafeʻi e fānaú ke vahevahe ʻenau fakamoʻoni ki he ngaahi moʻoni kuo nau ako mei he Tohi ʻa Molomoná pe ko hoʻo fakamoʻoni ʻaʻaú.
-
Fakaʻaliʻali ʻa e vitiō, “The Book of Mormon—a Book from God” (ChurchofJesusChrist.org) ke fakatātaaʻi e ngāue fakataha ʻa e Tohi Tapú mo e Tohi ʻa Molomoná ke akoʻi e moʻoní. Ko e hā e ʻuhinga ʻoku ʻaonga ai ke maʻu ha kau fakamoʻoni ʻo tokolahi ange he toko tahá? Tā ha foʻi toti ʻi he palakipoé pea fakahingoa ko e Tohi Tapu, pea fakaafeʻi e fānau takitaha ke nau tā ha laine hangatonu kehe ʻo fou atu ʻi he foʻi totí ke fakahaaʻi ʻe lava pē ke fakaʻuhingaʻi ʻa e ngaahi akonaki ʻi he Tohi Tapú ʻi ha ngaahi founga kehekehe ʻi he taimi ʻoku tuʻu tokotaha pē ai e Tohi Tapú. Tāmateʻi e ngaahi lainé pea tā ha foʻi toti fika ua ʻo fakahingoa ko e Tohi ʻa Molomoná. Fakaafeʻi ha tokotaha ke ne tā ha laine hangatonu ʻo fou atu ʻi he ongo foʻi totí ke fakahaaʻi ʻoku taha pē ʻa e founga ke fakaʻuhingaʻi ai ʻa e ongoongoleleí ʻi he taimi ʻoku fakaʻaongaʻi fakataha ai ʻa e Tohi Tapú mo e Tohi ʻa Molomoná.
-
Tokoniʻi e fānaú ke nau ako maʻuloto ʻa e tefito ʻo e tui fika valú.
ʻOku ʻomi ʻe he folofola ʻa e ʻOtuá ʻa e mālohi kiate au ke u matuʻuaki ʻa e ʻahiʻahí.
Te ke tokoniʻi fēfē ʻa e fānau ʻokú ke akoʻí ke fakamālohia ʻenau ngaahi fakamoʻoni ki he folofolá? Fakalaulauloto ki he fehuʻi ko ʻení lolotonga hono lau e 1 Nīfai 15:23–25, pea fakaʻaongaʻi e ngaahi ʻekitivitī ʻi laló ke poupouʻi hoʻo fakakaukaú.
Ngaahi ʻEkitivitī ʻe Ala Fakahokó
-
Kole ki he fānaú ke nau fakamatala fakaikiiki ʻa e mata-meʻa-hā-mai ʻo e ʻakau ʻo e moʻuí (vakai, 1 Nīfai 8; 11). Ko e hā e meʻa naʻá ne fakafeʻātungiaʻi e aʻu ʻa e kakaí ki he ʻakaú? Ko e hā e meʻa naʻá ne tokoniʻi kinautolu ke nau aʻu ki aí? Fakaafeʻi ʻa e fānaú ke nau lau e 1 Nīfai 15:23–25. Naʻe tokoni fēfē ʻa e vaʻa ukameá ki he kakaí ke nau mavahe atu mei he ʻao fakapoʻulí? ʻE tokoni fēfē ʻa hono lau ʻo e folofola ʻa e ʻOtuá, ke tau matuʻuaki e ʻahiʻahí mo e fakapoʻulí ʻi he ngaahi ʻahó ni?
-
Fakakakato mo e fānaú ʻa e peesi ʻekitivitií. Lolotonga ʻenau fai iá, kole ange ke nau talanoa kau ki ha ngaahi ʻahiʻahi ʻoku feʻao mo e fānaú. Te nau lava fēfē ʻo manatuʻi ke piki maʻu ki he vaʻa ukameá he ʻaho kotoa? Hivaʻi e “Ko e Vaʻa Ukameá” (Ngaahi Himí, fika 172) ko ha konga ʻo e ʻekitivitī ko ʻení.
Poupouʻi e Akó ʻi ʻApi
Poupouʻi e fānaú ke nau fakaʻaliʻali ki honau ngaahi fāmilí ʻa e “vaʻa ukamea” naʻa nau faʻu mei he peesi ʻekitivitií pea vahevahe e founga te nau lava ai ʻo piki ki he vaʻa ukameá ʻaki hono lau e folofolá.
Fakatupulaki ʻo ʻEtau Founga Akoʻí
Fakaʻaongaʻi e ʻātí ke fakakau mai ki ai ʻa e kau akó. ʻI hoʻo akoʻi ki he fānaú ha talanoa ʻi he folofolá, fekumi ki ha ngaahi founga ke tokoni ai ke nau fakakaukauloto ki ai. Te ke lava ʻo fakaʻaongaʻi ha ngaahi fakatātā, vitiō, tamapua, teunga mo e alā meʻa pehē.