“30 Tīsema–5 Sānuali. Ngaahi peesi Talateu ʻo e Tohi ʻa Molomoná: ‘Ko Ha Fakamoʻoni ʻe Taha ʻo Sīsū Kalaisi,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“30 Tīsema–5 Sānuali. Ngaahi peesi Talateu ʻo e Tohi ʻa Molomoná,” Haʻu, ʻo Muimui ʻIate Au—Maʻá e Palaimelí: 2020
30 Tīsema–5 Sānuali
Ngaahi peesi Talateu ʻo e Tohi ʻa Molomoná
“Ko ha Fakamoʻoni ʻe Taha ʻo Sīsū Kalaisi”
Kamata hoʻo teuteu ke akoʻí ʻaki hono lau e peesi talamuʻakí mo e talateu ʻo e Tohi ʻa Molomoná; ko e ngaahi fakamoʻoni ʻo e Kau Fakamoʻoni ʻe Toko Tolú, ko e Kau Fakamoʻoni ʻe Toko Valú, pea mo e Palōfita ko Siosefa Sāmitá; mo e “Ko ha Fakamatala Nounou ʻo Kau ki he Ko e Tohi ʻa Molomoná.” Fakalaulauloto ki he founga te ke lava ʻo ueʻi fakalaumālie ai ʻa e fānaú ke nau ako mei he Tohi ʻa Molomoná.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi e fānaú ke nau vahevahe ha ngaahi talanoa ʻoku nau ʻilo mei he Tohi ʻa Molomoná, ʻo ngāue ʻaki e ngaahi fakatātā 67–86 ʻi he Tohi Fakatātā ʻo e Ongoongoleleí pe ko ha ngaahi fakatātā kehe ʻokú ke maʻu.
Akoʻi e Tokāteliné: Fānau Iiki Angé
Peesi talamuʻaki ʻo e Tohi ʻa Molomoná
ʻE lava ke tokoniʻi au ʻe he Tohi ʻa Molomoná ke u maʻu e tui kia Sīsū Kalaisí.
Tokoniʻi e fānaú ke nau ʻiloʻi ko e taumuʻa ʻo e Tohi ʻa Molomoná ke fakamoʻoni ʻo kau kia Sīsū Kalaisi.
Ngaahi ʻEkitivitī ʻe Ala Fakahokó
-
Puke hake ha tatau ʻo e Tohi ʻa Molomoná, pea fakamahinoʻi ange ʻa e ʻuluʻi fakamatala, Ko ha Fakamoʻoni ʻe Taha ʻo Sīsū Kalaisi. Tuku ki he fānaú ke nau taufetongi ʻi hono lea ʻaki e, “Ko ha Fakamoʻoni ʻe Taha ʻo Sīsū Kalaisi.” Fakamatala fakaikiiki ange ki he fānaú ʻa e founga kuo fakamālohia ai ʻe he Tohi ʻa Molomoná ʻa hoʻo tui kia Sīsū Kalaisí.
-
Fai ha talanoa mei he Tohi ʻa Molomoná ʻokú ne akoʻi kau kia Sīsū Kalaisi, hangē ko e talanoa ʻo hono kikiteʻi ʻe he tangata Leimana ko Samuelá ʻo kau kia Kalaisí (vakai Hilamani 14–16), ko hono tāpuakiʻi ʻe he Fakamoʻuí ʻa e fānaú (vakai 3 Nīfai 17), pe ko e mamata e Tokoua ʻo Sēletí kia Sīsū Kalaisí (vakai ʻEta 2–3). ʻE ala tokoni e ngaahi vahe mei he Ngaahi Talanoa ʻo e Tohi ʻa Molomoná (mo e ʻū vitiō fakafekauʻakí ʻi he ChurchofJesusChrist.org). Fakamahinoʻi ki he fānaú ʻa e ngaahi meʻa ʻoku tau ako kau kia Sīsū mei he ngaahi talanoa ko ʻení. Talaange kiate kinautolu te nau ako ha ngaahi meʻa lahi he taʻú ni mei he Tohi ʻa Molomoná ʻo kau kia Sīsū Kalaisi.
-
Hivaʻi ha foʻi hiva kau ki he Tohi ʻa Molomoná, hangē ko e “Ngaahi Talanoa ʻo e Tohi ʻa Molomoná” (Tohi Hiva ʻa e Fānaú, 62). Hivaʻi tuʻo lahi fakataha ʻa e foʻi hivá, pea tuku ke taufetongi e fānaú hono puke hake ha fakatātā ʻo e Fakamoʻuí, lolotonga hoʻomou hivá.
Talateu ki he Tohi ʻa Molomoná
Ko e Tohi ʻa Molomoná ko e maka-tuʻu-loto ia ʻo ʻetau tui fakalotú.
Naʻe fakamatalaʻi ʻe Palesiteni Tōmasi S. Monisoni ʻo pehē: “Kapau ʻoku moʻoni [ʻa e Tohi ʻa Molomoná—pea ʻoku ou fakamoʻoni atu ʻi he loto malūʻia ʻoku moʻoni ia—ta ko Siosefa Sāmitá ko ha palōfita … , Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e Siasi ʻo e ʻEikí ʻi he māmaní, pea kuo toe fakafoki mai e lakanga fakataulaʻeiki māʻoniʻoni ʻo e ʻOtuá” (“Ko e Mālohi ʻo e Tohi ʻa Molomoná,” Ensign pe Liahona, Mē 2017, 86–87).
Ngaahi ʻEkitivitī ʻe Ala Fakahokó
-
Lau ki he fānaú ʻa e konga lea ko ʻeni ne fai ʻe Siosefa Sāmita ʻi he talateu ki he Tohi ʻa Molomoná: “Ko e Tohi ʻa Molomoná ko e maka-tuʻu-loto ia ʻo ʻetau tui fakalotú.” Fakamatalaʻi ange ʻoku tatau pē hono puke fakatahatahaʻi ʻe he maka-tuʻu-lotó ha ʻālesó, pea mo hono pukepuke mo fakamālohia ʻe he Tohi ʻa Molomoná ʻa ʻetau fakamoʻoni ki he ngaahi meʻa kehé, hangē ko Siosefa Sāmita pea mo e ongoongoleleí.
-
Fakaafeʻi ha mātuʻa ʻa ha taha ʻo e fānaú ke ne vahevahe e founga naʻá ne maʻu ai ha fakamoʻoni ki he Tohi ʻa Molomoná. Lau mo e fānaú ʻa e fakaafe ʻi he konga fakaʻosi ʻo e talateu ki he Tohi ʻa Molomoná, pea tokoniʻi kinautolu ke nau fakatātaaʻi e ngaahi meʻa te nau lava ʻo fai ke nau maʻu ai ʻenau ngaahi fakamoʻoní.
“Ko e Fakamoʻoni ʻa e Palōfita ko Siosefa Sāmitá”
Naʻe foaki kiate kitautolu ʻa e Tohi ʻa Molomoná ʻi he mālohi ʻo e ʻOtuá.
ʻE lava ke tokoniʻi ʻe he fakamoʻoni ʻa Siosefa Sāmitá ke mahino ki he fānaú ʻa e taumuʻa fakalangi ʻo e Tohi ʻa Molomoná.
Ngaahi ʻEkitivitī ʻe Ala Fakahokó
-
Fakamatala fakaikiiki ki he fānaú ʻa e talanoa ʻo hono ʻomi ʻo e Tohi ʻa Molomoná, ʻo hangē ko hono fakamatalaʻi ʻi he “Ko e Fakamoʻoni ʻa e Palōfita ko Siosefa Sāmitá.” Te ke lava foki ʻo fakaʻaongaʻi mo e “Vahe 1 : Naʻe Anga Fēfē ʻEtau Maʻu ʻa e Tohi ʻa Molomoná” (Ngaahi Talanoa ʻo e Tohi ʻa Molomoná, 2–4, pe vitiō fakafekauʻakí ʻi he ChurchofJesusChrist.org). Tokoniʻi e fānaú ke nau fakatātaaʻi tuʻo ua pe lahi ange lolotonga hoʻo fai e talanoá.
-
Fakaʻaliʻali ki he fānaú ha fakatātā ʻo e ngaahi mataʻitohi mei he ʻū lauʻi peleti koulá. Fakamatalaʻi ange naʻe tokoniʻi ʻe he ʻOtuá ʻa Siosefa, ke ne liliu ʻa e ngaahi mataʻitohi ko ʻení ki ha ngaahi lea ʻe lava ke tau lau mo mahino kiate kitautolu.
ʻĪmisiongo lauʻi peleti koula ʻe ua ʻoku hā ai e ngaahi mataʻitohi kuo tohíNaʻe liliu ʻe Siosefa Sāmita e ngaahi mataʻitohi kuo tohi ʻi he ʻū lauʻi peleti koulá.
Akoʻi e Tokāteliné: Fānau Lalahi Angé
Peesi talamuʻaki ʻo e Tohi ʻa Molomoná
ʻOku tokoniʻi au ʻe he Tohi ʻa Molomoná ke u maʻu e tui kia Sīsū Kalaisí.
Manatuʻi ko hoʻo taumuʻa ʻi hono akoʻi e fānaú kau ki he Tohi ʻa Molomoná, ke fakamālohia ʻenau tui ki he Fakamoʻuí.
Ngaahi ʻEkitivitī ʻe Ala Fakahokó
-
Vahevahe e kalasí ke nau tauhoa. Fakaafeʻi e ngaahi hoa takitaha ke nau lau e palakalafi hono ua ʻo e peesi talamuʻaki ʻo e Tohi ʻa Molomoná, ʻo kumi ha meʻa ʻoku talamai ai kiate kinautolu e meʻa ʻoku fakataumuʻa ke fai ʻe he Tohi ʻa Molomoná. Fakaafeʻi leva e hoa takitaha ke vahevahe ki he kalasí.
-
Tokoniʻi e fānaú ke nau fekumi ʻi he talamuʻakí ki he konga lea “ki hono fakalotoʻi ʻo e Siú mo e Senitailé ko Sīsū ko e Kalaisí.” ʻE fakalotoʻi fēfē nai kitautolu ʻe he Tohi ʻa Molomoná ko Sīsū ʻa e Kalaisí? Fakaafeʻi kinautolu ke nau vahevahe ha talanoa mei he Tohi ʻa Molomoná ʻa ia kuó ne fakamālohia ʻenau tui kia Kalaisí, peá ke vahevahe foki mo haʻo talanoa.
Talateu ki he Tohi ʻa Molomoná
Ko e Tohi ʻa Molomoná ko e maka-tuʻu-loto ia ʻo ʻetau tui fakalotú.
ʻE tokoni ʻa hono maʻu ha fakamoʻoni ʻo e Tohi ʻa Molomoná ke ʻilo ʻe he fānaú, ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e Siasi moʻoni ia ʻo e ʻOtuá.
Ngaahi ʻEkitivitī ʻe Ala Fakahokó
-
Kole ki he fānaú ke nau pehē pē kuo teʻeki ke ke fanongo ʻi he Tohi ʻa Molomoná kimuʻa. Fakaafeʻi kinautolu ke nau tauhoa ʻo fakakaukauʻi ha ngaahi founga ʻe lava ke nau fakamatalaʻi atu pe ko e hā ia pea ko e ʻomi mei fē, ʻo fakaʻaongaʻi e ngaahi fakaikiiki mei he talateú. Tuku leva ki he ngaahi hoa takitaha ke nau taufetongi ʻi hono akoʻi koé. ʻE lava foki ke tokoni atu ʻa e fakatātā The Bible and the Book of Mormon Testify of Christ (ChurchofJesusChrist.org).
-
Fakaafeʻi ha kiʻi tamasiʻi ke ne lau e fakamatala ʻa Siosefa Sāmita ʻi he palakalafi ono ʻo e talateú. Fakaʻaongaʻi e peesi ʻekitivitī ki he uike ní ke fakamatalaʻi e founga ʻoku pukepuke ai ʻe he maka-tuʻu-lotó ha ʻāleso. Fakatatau ki he palakalafi fakaʻosi ʻo e talateú, ko e hā ha ngaahi toe meʻa kehe ʻoku tau ʻiloʻi ʻi he taimi ʻoku tau maʻu ai ha fakamoʻoni ʻoku moʻoni ʻa e Tohi ʻa Molomoná?
“Ko e Fakamoʻoni ʻa e Kau Fakamoʻoni ʻe Toko Tolú”; “Ko e Fakamoʻoni ʻa e Kau Fakamoʻoni ʻe Toko Valú”
Te u lava ʻo hoko ko ha fakamoʻoni ʻo e Tohi ʻa Molomoná.
Te ke tokoniʻi fēfē ʻa e fānaú ke nau maʻu mo vahevahe ʻenau ngaahi fakamoʻoni ki he Tohi ʻa Molomoná?
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau fakamatalaʻi ha meʻa kuo nau mātā ʻa ia kuo teʻeki mamata ai ha taha ʻi he kalasí. Fakamatalaʻi ange, ʻoku ʻi he Tohi ʻa Molomoná ʻa e ngaahi fakamoʻoni ʻo e toko 11 ne nau mamata ki he ʻū lauʻi peleti koula ko ia ne liliu mei ai e Tohi ʻa Molomoná, ʻo makehe meia Siosefa Sāmita. Lau fakataha ʻa e ngaahi fakamoʻoní. Ko e hā e ʻuhinga ne fie maʻu ai ʻe he kau fakamoʻoni ko ʻení ke ʻiloʻi ʻe he niʻihi kehé ʻa ʻenau ngaahi fakamoʻoní?
-
Fehuʻi ange pe ʻoku ʻi ai ha taha ʻi he fānaú te ne fie vahevahe ʻa e founga naʻá nau ʻiloʻi ai ʻoku moʻoni ʻa e Tohi ʻa Molomoná. Lau fakataha ʻa e Molonai 10:3–5, pea fakaafeʻi e fānaú takitaha ke nau lau e Tohi ʻa Molomoná he taʻú ni, pea maʻu pe fakamālohia ʻenau fakamoʻoni ki hono moʻoní. Talaange ki he fānaú ʻa e founga naʻá ke maʻu ai hoʻo fakamoʻoni ki he Tohi ʻa Molomoná.
Poupouʻi e Akó ʻi ʻApi
Kapau ʻe lava, fakapapauʻi ʻoku maʻu ʻe he fānau takitaha ha tatau ʻo e Tohi ʻa Molomoná, pea fakaafeʻi kinautolu ke nau kamata lau ia ʻiate kinautolu pē pea mo honau ngaahi fāmilí.
Fakatupulaki ʻEtau Akoʻí
Fekumi ki ha ueʻi fakalaumālie ʻaʻau pē. Fakaʻaongaʻi e ngaahi fokotuʻutuʻu ko ʻení ko ha maʻuʻanga fakakaukau ke ne ʻomi kiate koe ha ueʻi fakalaumālie lolotonga hoʻo fakalaulauloto ki he ngaahi fie maʻu ʻa e fānau ʻokú ke akoʻí, kae ʻikai hoko pē ko ha ngaahi fakahinohino kuo pau ke ke muimui ki ai lolotonga hoʻo akoʻí.