São Paulo Brazil Temple

Mayo 2–8

Exodo 35–40; Levitico 1; 16; 19

“Pagkabalaan ngadto sa Ginoo”

Samtang magtuon ka sa mga kasulatan, hatagi og pagtagad ang espirituhanong mga impresyon nga imong madawat mahitungod sa mga paagi nga mahimo ka nga mas sama sa Langitnong Amahan ug ni Jesukristo.

Irekord ang Imong mga Impresyon

Ang pagbiya sa Ehipto—bisan kon importante ug milagruso kadto—wala makatuman sa hingpit sa mga tuyo sa Dios alang sa mga anak sa Israel. Bisan ang umaabot nga kaabunda diha sa gisaad nga yuta dili mao ang katapusang tumong sa Dios alang kanila. Mga lakang lamang kini padulong sa unsay gusto gayud sa Dios alang sa Iyang katawhan: “Pagbalaan kamo kay ako, ang Ginoo nga inyong Dios, balaan man” (Levitico 19:2). Sa unsang paagi nagtinguha ang Dios sa paghimong balaan sa Iyang katawhan nga pagkabihag lamang ang ilang nahibaloan sulod sa daghang henerasyon? Mimando Siya kanila sa paghimo og usa ka dapit sa pagkabalaan ngadto sa Ginoo—usa ka tabernakulo sa kamingawan. Mihatag Siya kanila og mga pakigsaad ug mga balaod aron mogiya sa ilang mga lihok ug, sa katapusan, mousab sa ilang mga kasingkasing. Ug sa dihang napakyas sila sa ilang mga paningkamot sa pagsunod niadto nga mga balaod, misugo Siya kanila nga mohimo og mga pagsakripisyo og hayop aron mosimbolo sa pag-ula og dugo alang sa ilang mga sala. Kining tanan gituyo aron sa pagpunting sa ilang mga hunahuna, ilang mga kasingkasing, ug ilang mga kinabuhi ngadto sa Manluluwas ug sa katubsanan nga Iyang gitanyag. Siya ang tinuod nga dalan padulong sa pagkabalaan, alang sa mga Israelihanon ug alang kanato. Kitang tanan nakagahin og pipila ka panahon diha sa pagkabihag sa sala, ug kitang tanan gidapit sa paghinulsol—sa pagbiya sa sala ug pagsunod ni Jesukristo, kinsa misaad, “Ako adunay katakus sa paghimo kaninyo nga balaan” (Doktrina ug mga Pakigsaad 60:7).

Alang sa kinatibuk-ang pagpasabut sa basahon sa Levetico, tan-awa sa “Levitico” diha sa Giya ngadto sa mga Kasulatan.

Learn More image

icon sa personal nga pagtuon

Mga Ideya alang sa Personal nga Pagtuon sa Kasulatan

Exodo 35–40; Levitico 19

Gusto sa Ginoo nga mahimo akong balaan sama Kaniya.

Ang Exodo 25–31 nagrekord sa mga instruksyon sa Ginoo ngadto sa mga Israelihanon kon unsaon sa pagtukod og tabernakulo, diin ang sagradong mga ordinansa motabang kanila nga mahimong balaan nga katawhan. Ang Exodo 35–40 naghulagway sa mga paningkamot sa mga Israelihanon sa pagsunod niini nga mga instruksyon. Samtang magbasa ka sa mga kapitulo 35–40, pangitaa ang mga butang nga gihangyo sa Ginoo sa Iyang katawhan nga ibutang diha sa tabernakulo, ug pamalandongi kon unsa ang girepresentar niini nga mga butang ug unsa ang gisugyot niini kanimo mahitungod sa pag-uswag diha sa pagkabalaan. Labi nang ikonsiderar kon sa unsang paagi kini nga mga butang makapahunahuna kaninyo mahitungod sa Manluluwas. Ang talaan nga sama niini tingali makatabang kanimo:

Unsa nga butang ang imong nakit-an?	Unsa ang girepresentar niini?
Unsa nga butang ang imong nakit-an? Arka sa Pakigsaad (Exodo 37:1–9; 40:20–21)	Unsa ang girepresentar niini? Presensya sa Dios; Iyang mga pakigsaad ug mga sugo
Unsa nga butang ang imong nakit-an? Halaran sa insenso (Exodo 40:26–27; tan-awa usab sa Exodo 30:1, 6–8)	Unsa ang girepresentar niini? Mga pag-ampo nga misaka ngadto sa Ginoo
Unsa nga butang ang imong nakit-an? Tangkawan [Kandelaryo] (Exodo 37:17–24)
Unsa nga butang ang imong nakit-an? Halaran sa sakripisyo (Exodo 38:1–7; tan-awa usab sa Exodo 27:1; 29:10–14)
Unsa nga butang ang imong nakit-an? Hunawanan (palanggana) sa tubig (Exodo 30:17–21)

Kon nakaapil ka sa mga ordinansa sa templo, unsa ang imong nakat-onan mahitungod sa tabernakulo gikan sa Exodo 35–40 nga nagpahinumdom kanimo sa imong kasinatian didto? (tan-awa usab sa “Mga Hunahuna nga Hinumduman: Ang Tabernakulo ug Sakripisyo”). Pamalandongi kon sa unsang paagi ang mga pakigsaad sa templo makatabang kanimo nga mahimong mas balaan sama sa Langitnong Amahan ug ni Jesukristo.

Siyempre, ang pagkaanaa lang sa balaang mga dapit dili maghimo kanato nga balaan. Ang Levitico 19 naghulagway og mga balaod ug mga sugo nga gihatag sa Ginoo sa pagtabang sa mga Israelihanon nga mouswag diha sa pagkabalaan. Unsa ang imong nakita niini nga mga sugo nga makatabang kanimo nga mahimong mas balaan? Unsa ang imong gibati nga angay nga buhaton aron mas hingpit nga makasunod niini nga mga baruganan?

Tan-awa usab sa Carol F. McConkie, “Ang Katahum sa Pagkabalaan,” Liahona, Mayo 2017, 9–12; Giya ngadto sa mga Kasulatan, “Pagkabalaan”.

Exodo 35:4–36:7

Ang Ginoo misugo kanako sa paghimo sa akong mga halad uban sa matinguhaon nga kasingkasing.

Sa tuig human mibiya sa Ehipto, ang relasyon sa mga anak sa Israel ngadto ni Jehova mahulagway nga dili makanunayon. Bisan pa, samtang magbasa ka sa Exodo 35:4–36:7, timan-i kon sa unsang paagi ang mga Israelihanon misanong sa sugo sa paghimo og tabernakulo. Unsa ang imong nakat-unan sa mga Israelihanon nga makatabang kanimo nga mas maayong moserbisyo sa Ginoo?

Si Presidente Bonnie L. Oscarson mitudlo: “Ang matag miyembro kinahanglan nga masayud kon unsa sila ka kinahanglanon. Ang matag tawo adunay importanting butang nga ikatampo ug adunay talagsaong mga talento ug mga abilidad nga makatabang sa pagpadayon niining importante nga buhat” (“Young Women nga anaa sa Buhat,” Liahona, Mayo 2018, 37). Samtang magbasa ka sa Exodo 36:1–4, pamalandongi kon unsa ang gihatag sa Ginoo kanimo. Ikonsiderar ang pagpangutana sa Langitnong Amahan kon unsa ang Iyang gihatag kanimo aron makaapil ka sa Iyang buhat.

karaang mga tawo nga nagdala og mga halad aron sa pagtukod sa tabernakulo

Ang mga anak sa Israel mihatag og mga halad alang sa tabernakulo uban ang “masinugtanon [nga] kasingkasing” (Exodo 35:5). Paghulagway pinaagi ni Corbert Gauthier, © Lifeway Collection/gilisensyahan gikan sa goodsalt.com

Levitico 1:1–9; 16

Pinaagi sa Pag-ula ni Jesukristo, mahimo akong mapasaylo.

Ang kadaghanan sa basahon sa Levitico tingali kahibulongan kanato—mga pagsakripisyo og hayop, mga ritwal nga naglakip og dugo ug tubig, ug mga balaod nga nagdumala sa gagmay kaayong mga detalye sa kinabuhi. Apan kini nga mga ritwal ug mga balaod gituyo aron sa pagtudlo og mga baruganan nga pamilyar—paghinulsol, pagkabalaan, ug ang Pag-ula sa Manluluwas. Aron makit-an kini nga mga baruganan samtang magbasa ka sa Levitico 1:1–9; 16, ikonsiderar ang mga pangutana nga sama niini: Unsa ang akong makat-onan gikan niini nga mga sakripisyo mahitungod ni Jesukristo ug sa Iyang maulaong sakripisyo? Sa unsang paagi ako sama niadtong naghimo niini nga mga sakripisyo? Mahimo nimong ikonsiderar ang pagribyu sa “Mga Hunahuna nga Angayng Timan-an: Ang Tabernakulo ug Sakripisyo” dinhi niini nga kapanguhaan ug “Sakripisyo” sa Giya ngadto sa mga Kasulatan (scriptures.ChurchofJesusChrist.org).

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Exodo 36:1–7.Sa Exodo 36:1–7, unsa ang atong makat-onan sa paagi nga ang mga Israelihanon misanong sa sugo sa paghimo og tabernakulo? Isip pamilya, mahimo kamong maghunahuna og mga paagi nga ang Ginoo midapit kanato sa pag-apil sa Iyang buhat. Unsaon nato pagsunod ang ehemplo sa mga Israelihanon?

Exodo 40.Samtang magbasa kamo og dungan sa Exodo 40, mahimo nimong dapiton ang mga sakop sa pamilya sa pag-isa sa ilang mga kamot sa matag higayon nga makadungog sila og hugpong sa mga pulong sama sa “ingon sa gisugo sa Ginoo.” Unsa ang atong makat-unan gikan niini nga kapitulo mahitungod sa pagkamasulundon ngadto sa Ginoo?

Exodo 40:1–34.Samtang magbasa kamo mahitungod sa pagtukod sa tabernakulo diha sa Exodo 40, mahimo kamong magtinabangay sa pag-ila sa lain-laing bahin sa tabernakulo, gamit ang hulagway nga nag-uban niini nga latid.

Levitico 19.Ang tagsa-tagsa ka sakop sa pamilya mahimong mangita og bersikulo niini nga kapitulo nga ilang gibati nga makatabang kanila nga “[mahimong] balaan” (Levitico 19:2) ug mopaambit niini sa pamilya.

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Dugang Kabalaan Hatagi Ako,” Mga Himno, nu. 77.

Pagpalambo sa Personal nga Pagtuon

Pangitaa si Jesukristo. Ang tanang kasulatan, bisan ang Daang Tugon, nagpamatuod mahitungod ni Jesukristo. Samtang magbasa ka sa Daang Tugon, ikonsiderar kon unsa ang gitudlo kanimo sa mga simbolo, mga tawo, ug mga panghitabo mahitungod sa Manluluwas.

tabernakulo

The Ancient Tabernacle [Ang Karaang Tabernakulo], ni Bradley Clark