“26 Jun–2 Julae. Matiu 28; Mak 16; Luk 24; Jon Jon 20–21: ‘Hem I Laef Bakegen Finis,’” Kam Folem Mi—Blong Wanwan Man, Woman mo Famli: Niu Testeman 2023 (2022)

“26 Jun–2 Julae. Matiu 24; Mak 16; Luk 20; Jon 20–21,” Kam Folem Mi—Blong Wanwan Man, Woman mo Famli: 2023

Pikja

Jisas i stap toktok long Pita long saed blong solwota

Fidim Sipsip blong Mi, i kam long Kamille Corry

26 Jun–2 Julae

Matiu 28; Mak 16; Luk 24; Jon 20–21

“Hem I Laef Bakegen Finis”

Wetem prea, ridim Matiu 28; Mak 16; Luk 24; mo Jon 20–21, mo luklukbak long glad we yu gat from Laef Bakegen long Ded blong Kraes. ?Huia i save kasem blesing sapos hem i harem testemoni blong yu abaot taem ia?

Raetemdaon Ol Filing mo Tingting blong Yu

Long plante, ded blong Jisas blong Nasaret bae i olsem wan en blong wan gudfala laef. ?I no man ia nao we i mekem Lasaros i girap long ded? ?I no Hem we i stanap agensem ol nogud tok blong Ol Farisi, plante taem? Hem i bin soem se Hem i gat paoa blong hilim olgeta we oli blaen, wetem leprosi o gat sik blong faol. Ol win mo ol solwota oli stap obei long Hem. Be yet, Hem hemia, i stap hang long kros, i stap talem se: “Olgeta samting i finis nao” (Jon 19:30). Maet i gat sam tru tingting long ol tok blong jik we i talem se: “Hem i sevem plante narafala man finis, be i no naf blong sevem hem” (Matiu 27:42). Be yumi save se ded blong Jisas i no en blong stori. Yumi save se kwaet taem ia, long tumb, i blong sot taem, mo we wok blong Kraes blong sevem ol man i jes stat ia nao. Oli no stap faenem Hem tedei “long ples blong ol dedman” long ples we ol man oli stap laef long hem (Luk 24:5). Ol tijing blong Hem, bae oli no go kwaet, from se ol disaepol blong Hem, we oli tru long Hem, bae oli prijim gospel long “evri nesen,” oli trastem promes ia blong Hem se bae Hem i stap “wetem [olgeta] oltaem, gogo wol ya i finis” (Matiu 28:19–20).

Pikja

stadi blong yuwan pikja aekon

Sam Aedia blong Skripja Stadi blong Yuwan

Matiu 28; Mak 16; Luk 24; Jon 20

Jisas i bin laef bakegen long ded.

Long ol skripja ia, bambae yu rid abaot wan long ol taem we i moa impoten long histri blong ol man: Laef Bakegen long Ded blong Jisas Kraes. Taem yu stap rid i go, putum yuwan long ples blong ol pipol we oli bin witnesem ol taem ia raon long taem blong Laef Bakegen long Ded. ?Wanem nao yu lanem aot long eksperiens blong olgeta?

?Yu, yu filim olsem wanem taem yu stap rid abaot Laef Bakegen long Ded blong Sevya? Tingting long wei we hemia i tajem yu—lukluk blong yu long laef, ol rilesensip blong yu, fet blong yu long Kraes, fet blong yu long ol nara trutok blong gospel.

Luk tu long Gaed long Ol Skripja, “Laef Bakegen long Ded”; Gospel Topics, “Resurrection,” topics.ChurchofJesusChrist.org.

Luk 24:13–35

Mi save invaetem Sevya blong stap wetem mi.

Taem yu stap ridim eksperiens blong tufala disaepol ia we tufala i stap travel blong go mit wetem Sevya we i laef bakegen long ded, lukaotem ol semmak samting long ol eksperiens blong yu olsem wan we i stap folem Kraes. ?Olsem wanem yu save wokbaot wetem Hem tedei, mo invaetem Hem blong stastap smol taem moa? (Luk 24:29). ?Olsem wanem yu luksave se Hem i stap wetem yu long laef blong yu? ?Long wanem wei nao Tabu Spirit i bin testifae long yu se Jisas Kraes i hae mo tabu?

Luk tu long “Abide with Me; ’Tis Eventide,” “Abide with Me!,” Hymns, ol namba 165–166.

Luk 24:36–43; Jon 20

Laef bakegen long Ded, hem i taem we bodi mo spirit, tufala i joen tugeta bakegen.

Ol stori blong Laef Bakegen long Ded blong Jisas Kraes oli save helpem yu blong andastanem se i minim wanem blong stap laef bakegen long ded. Eksampol: ?wanem trutok nao yu yu faenem long Luk 24:36–43 mo Jon 20 abaot ol bodi we oli laef bakegen long ded? Yu save luktru long ol nara skripja abaot laef bakegen long ded, olsem 1 Korin 15:35–44; Filipae 3:20–21; 3 Nifae 11:13–15; Doktrin mo Ol Kavenan 88:27–31; 110:2–3; 130:1, 22.

Jon 20:24–29

“Olgeta we oli no luk mi, be oli bilif , long mi, bambae oli save harem gud.”

Sam pipol, oli olsem Tomas, we i talem se: “Sapos mi luk … bambae mi jes bilif long hem. !Be sapos no, bambae mi no save bilif.” (Jon 20:25). Long tingting blong yu, ?from wanem fasin blong biliv be yu no luk, i wan blesing? (luk long Jon 20:29). Tingting hevi long wei we yu bin gat ol blesing from se yu bin biliv long ol samting we yu no save luk. ?Olsem wanem nao yumi soem fet long Sevya ia taem we yumi no save luk Hem? ?Olsem wanem nao bae yu gohed blong mekem fet blong yu i kam strong moa long “? (luk long Alma 32:16–21; Ita 12:6). Tingting blong raetemdaon long wan jenol, ol eksperiens we oli bin helpem yu blong biliv long Jisas Kraes, o serem olgeta wetem wan we yu save.

Jon 21:1–17

Lod i stap invaetem mi blong fidim ol sipsip blong Hem.

Bae i intresting blong komperem wei we Sevya i stap mekem samting wetem ol Aposol blong Hem long Jon 21 long fas taem ia we Hem i givim oda long olgeta blong oli lego ol net blong pulum fis, olsem we oli raetem long Luk 5:1–11. ?Wanem ol nara semsemmak samting, mo ol samting we oli defren, we yu save faenem? ?Wanem sam niu samting abaot fasin blong stap olsem disaepol nao we yu faenem insaed long ol toktok blong Hem?

Tingting long wanem wei nao, ol toktok Sevya i talem long Pita long Jon 21:15–17 oli blong yu tu. ?I gat eni samting we i stap holembak yu long givhan wok blong yu long ol sipsip blong Lod? ?Wanem nao bae yu yu ansa sapos Lod i stap askem yu: ?“Yu yu lavem mi ?” Tingting hevi long hao yu yu save soem lav blong yu long Lod.

Luk tu long 1 Pita 5:2–4, 8; Jeffrey R. Holland, “The First Great Commandment,” Liahona, Nov. 2012, 83–85.

Pikja

famli stadi pikja aekon

Ol Aedia blong Famli Skripja Stadi mo Haos Naet

Luk 24:5–6.Presiden Thomas S. Monson i talem hemia abaot Luk 24:5–6: “I no gat eni toktok long fasin blong Ol Kristin man, we i gat moa mining long mi bitim olgeta toktok ia” (“He Is Risen!,” Liahona, May 2010, 89). ?Ol toktok ia oli minim wanem long yu mo long famli blong yu?

Matiu 28; Mak 16; Luk 24; Jon 20–21.Taem famli blong yu i stap ridim ol japta ia, luk ol pipol we oli toktok o mekem samting wetem Jisas, insaed long wanwan stori ia. Eksampol: ?Wanem i tajem yu abaot ol pipol ia we oli bin visitim tumb blong Sevya? ?Wanem nao yu yu lanem aot long ol toktok o ol aksen blong Ol Aposol, o aot long ol disaepol long rod we i go long Emeas?

Tingting blong, tugeta, yufala i singsing long “Did Jesus Really Live Again?” (Children’s Songbook, 64). Tokbaot wan we i ded, we famli blong yu i save gud hem, mo toktok raon long wei we ol trutok insaed long singsing ia oli tekem kamfot i kam long hat.

Rod i go long Emeas, i kam long Wendy Keller

Matiu 28:16–20; Mak 16:14–20; Luk 24:44–53.Long ol ves ia, ?wanem nao Jisas i stap askem ol Aposol blong Hem blong mekem? ?Long wanem wei nao yumi stap help blong mekem wok ia i kamtru? Ol memba blong famli oli save serem sam eksperiens blong sam taem we oli bin filim se Lod i “stap wok wetem olgeta” blong mekem ol stamba tingting blong Hem oli kamtru (Mak 16:20).

Jon 21:15–17.Tingting blong stap ridim ol ves ia, long semtaem we yufala i stap kakae tugeta. Hemia i save ademap sam mining long ol toktok ia blong Sevya blong “fidim ol sipsip blong mi.” Folem wanem we Jisas i bin tijim abaot sipsip long Niu Testeman, (eksampol, luk long Matiu 9:35–36; 10:5–6; 25:31–46; Luk 15:4–7; Jon 10:1–16), ?from wanem fasin blong fidim ol sipsip i wan gudfala wei blong tokbaot wok ia blong givim seves long ol pikinini blong God? ?Analoji ia i tijim wanem long yumi abaot wei we Papa long Heven mo Jisas oli filim abaot yumi?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Did Jesus Really Live Again?,” Children’s Songbook, 64.

Stap Kam Antap long Stadi blong Yuwan

Yusum miusik blong invaetem Spirit mo lanem doktrin. Sapos yu stap lisin o singsing long ol hym olsem “He Is Risen!” (Hymns, namba 199) i save invaetem Spirit mo i save helpem yu blong lan abaot Laef Bakegen long Ded blong Sevya.