“10–16 Julae. Ol Wok 6–9: ‘?Wanem Nao Yu Yu Wantem Mi blong Mekem?,’” Kam Folem Mi—Blong Wanwan Man, Woman mo Famli: Niu Testeman 2023 (2022)

“10–16 Julae. Ol Wok 6–9,” Kam Folem Mi—Blong Wanwan Man, Woman mo Famli: 2023

Pikja

Pol i foldaon long graon

Storian long Rod I Go long Damaskes, i kam long Michelangelo Merisi da Caravaggio

10–16 Julae

Ol Wok 6–9

?Wanem Nao Yu Yu Wantem Mi blong Mekem?

Blong stat, ridim Ol Wok 6–9. Ol aedia insaed long aotlaen ia i save helpem yu blong faenem sam long ol impoten prinsipol long ol japta ia, hemia nomata se bae yu save faenem sam narawan long stadi blong yuwan.

Raetemdaon Ol Filing mo Tingting blong Yu

Sapos i gat wan man we i luk se bae i no save jenisim laef blong hem, maet hem i Sol—wan Farisi we oli save gud hem se hem i stap givim hadtaem long ol Kristin man. Mekem se taem Lod i talem long wan disaepol, nem blong hem Ananaeas, blong go lukaotem Sol, mo givim wan blesing long hem, Ananaeas i tingting tu taem long hemia. Hem i talem: “Masta. Plante man oli stori long mi finis long man ya, mo oli talemaot ol rabis fasin we hem i stap mekem long ol man blong yu long Jerusalem” (Ol Wok 9:13). Be Lod i save hat blong Sol mo wanem hem i save mekem, mo Hem i gat wan misin finis i stap blong givim long Sol: “Yu go, from we mi mi jusumaot hem finis, blong hem i man blong wok blong mi. Hem bambae i talemaot nem blong mi long ol man we oli no laen blong Isrel, mo long ol king, mo long ol laen blong Isrel tu” (Ol Wok 9:15). Mekem se Ananaeas i bin obei, mo taem hem i faenem Sol, hem i singaotem hem “Brata Sol” (Ol Wok 9:17). Sapos Sol i bin save jenis fulwan mo Ananaeas i save welkamem hem olsem nomo, nao ?yu no ting se yumi mas tekem se eniwan i save jenisim laef—mo yumiwan tu?

Pikja

stadi blong yuwan pikja aekon

Sam Aedia blong Skripja Stadi blong Yuwan

Ol Wok 6–8

Hat blong mi i nid blong i stret long ae blong God.

Wan jos we i stap groap, i minim se i gat wan nid blong gat moa disaepol blong givim seves insaed long kingdom. Folem wanem i stap long Ol Wok 6:1–5, ?wanem kwaliti nao Olgeta Twelef oli stap lukaotem long olgeta we bae oli givim seves wetem olgeta? Taem yu stap ridim Ol Wok 6–8, luk olsem wanem ol kwaliti ia, mo ol narawan, oli bin kamaot long ol pipol olsem Steven mo Filip. ?Wanem nao Saemon i no gat, mo wanem nao yumi lanem aot long hem abaot fasin blong wantem jenisim laef?

?I gat eni samting we yu yu filim insperesen blong jenisim blong meksua se hat blong yu i “stret long fes blong God”? (Ol Wok 8:21–22). ?Olsem wanem nao, taem yu stap mekem jenis ia i save blesem yu taem yu stap wok blong God?

Ol Wok 6–7

Blong no stap letem Tabu Spirit insaed long yu, i save mekem se yu yu sakemaot Sevya mo ol wokman blong Hem.

Ol lida blong Ol Man Jiu oli bin responsibol blong stap mekem rere ol pipol blong taem ia we Mesaea i stap kam. Be yet, oli mestem mo no luksave Mesaea, nao oli sakemaot Hem. ?Olsem wanem samting ia i save hapen? Pat blong ansa ia, yu save faenem long ol toktok blong Steven: “Yufala i stap blokem Tabu Spirit oltaem” (Ol Wok 7:51). Long tingting blong yu, ?i minim wanem blong stap blokem Tabu Spirit? ?From wanem fasin blong stap blokem Tabu Spirit i lidim yumi blong sakemaot Sevya mo ol wokman blong Hem?

Taem yu stap ridim Ol Wok 6–7, lukaotem ol nara mesej we Steven i bin tijim Ol Jiu. ?Wanem fasin nao, hem i bin givim woning from? ?Yu yu luk sam semmak fasin long yuwan? ?Wanem nao ol toktok blong Steven oli stap tijim yu abaot risal blong stap blokem Tabu Spirit? ?Olsem wanem nao yu yu save lisingud moa, mo save folem moa ol kwaet toktok blong Tabu Spirit insaed long laef blong yu?

Luk tu long “The Martyrdom of Stephen” (video), ChurchofJesusChrist.org.

Ol Wok 8:26–39

Bae Tabu Spirit i helpem mi blong soem long olgeta ros ia we i go long Jisas Kraes.

?Wanem nao yu yu lanem abaot fasin blong serem gospel aot long stori long Ol Wok 8:26–39? ?Olsem wanem Tabu Spirit i helpem Filip? ?Olsem wanem nao fasin blong serem gospel wetem ol narawan i olsem blong stap olsem wan gaed (luk long Ol Wok 8:31).

Elda Ulisses Soares i bin talem se stori ia “i rimaenem yumi long tabu wok blong yumi evriwan, blong lukaot blong lanem mo tijim wanwan long yumi long gospel blong Jisas Kraes. … Samtaem yumi olsem Man Itiopia ia—yumi nidim help blong wan tija we i fetful mo i gat insperesen; mo samtaem, yumi olsem Filip—yumi nid blong tijim mo mekem ol narawan oli kam strong moa long rod blong olgeta blong jenisim laef” (“?Olsem Wanem Nao Mi Save Andastanem?,” Liahona, Mei 2019, 6). Tingting blong ridim nara haf blong mesej blong Elda Soares, mo tingting hevi long wei we Tabu Spirit i save helpem yu blong yu kam wan we i lanem samting long wan moa gud wei, mo hao yu save kam wan tija blong gospel.

Ol Wok 9

Taem mi mi stap mekem tingting blong Lod, mi save kam wan tul long han blong Hem.

Taem we Sol i jenisim laef blong hem, i hapen kwiktaem; kwik nomo i aot long fasin blong sarem Ol Kristin Man long kalabus mo i go prij abaot Kraes long ol haos blong prea. Taem yu stap ridim stori ia, tingting hevi long from wanem nao hem i bin glad blong jenisim laef blong hem. (Blong ridim ful storian blong Sol abaot taem we hem i bin jenisim laef blong hem, luk long Ol Wok 22:1–16 mo 26:9–18. Tek not se long ol stori ia, Sol, nem blong hem i Pol [luk long Ol Wok 13:9].)

I nomata se i tru se eksperiens blong Pol i no semmak olsem ol narawan—long plante long ol pipol, fasin blong jenisim laef i wan rod we i longwan moa—?i gat eni samting we yu save lanem aot long Sol taem hem i jenisim laef blong hem? ?Wanem nao yu lanem aot long wei we Ananaeas mo ol nara disaepol oli mekem samting taem Sol i jenisim laef blong hem? ?Wanem nao bae yu mekem blong yusum ol lesen ia insaed long laef blong yu? Maet yu stat wetem wan prea, olsem we Sol i bin mekem, “?Wanem nao yu yu wantem mi blong mekem?”

Taem yu stap ridim Ol Wok 9:36–42, tingting long wanem wei nao, Tabita, i bin stap olsem wan tul long han blong God. ?Wanem samting abaot Tabita i givim insperesen long yu?

Luk tu long Dieter F. Uchtdorf, “Waiting on the Road to Damascus,” Liahona, May 2011, 70–77; “The Road to Damascus” (vidio), ChurchofJesusChrist.org.

Pikja

famli stadi pikja aekon

Ol Aedia blong Famli Skripja Stadi mo Haos Naet

Ol Wok 6:8; 7:51–60.Komperem ol stori blong Steven long Ol Wok 6:8 mo Ol Wok 7:51–60 wetem ol stori blong Sevya long Luke 23:1–46. ?Olsem wanem nao Steven i folem eksampol blong Sevya?

Ol Wok 7:51–60.?Olsem wanem nao Tabu Spirit i bin blesem Steven taem we oli bin stap mekem nogud hem? ?Wetaem nao yumi bin kasem paoa we i kam long Tabu Spirit long ol taem we i had?

Ol Wok 9:5.Wan stik i wan sap spia we oli yusum blong ronem ol animol. Plante taem, ol animol bae oli kikbak taem oli stikim olgeta, we bae i mekem se stik ia i draon long mit blong animol. ?Olsem wanem analoji ia, samtaem i blong yumi tu? ?Wanem nao yumi save mekem blong akseptem gud moa taem Lod i wantem stretem yumi?

Tabita I Girap, i kam long Sandy Freckleton Gagon

Ol Wok 9:32–43.Tingting blong invaetem ol memba blong famli blong yu blong droem ol pikja blong ol stori long Ol Wok 9:32–43. ?Wanem nao yu lanem abaot tru fasin blong stap wan disaepol aot long ol stori ia? ?Olsem wanem wan we i stap mekem fulap gud wok, olsem Tabita, i save helpem ol narawan blong biliv long Lod? (luk long Ol Wok 9:36; “Japta 60: Pita I Givimbak Laef long Tabita” (long Ol Niu Testeman Stori, 156–57, o vidio we i go wetem ChurchofJesusChrist.org).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Talem Se Mi Redi blong Go, Masta,” STSP, pej 46.

Stap Kam Antap long Stadi blong Yuwan

Yusum Ol Skripja Ia long Laef blong Yu Taem yus stap rid, tingting long wei we ol stori mo ol tijing insaed long ol skripja we oli save aplae long laef blong yu. Eksampol: ?Wanem janis nao yu yu gat blong givim seves long ol narawan, olsem we Tabita i bin mekem long Ol Wok 9:36–39?