“24–30 Julae. Ol Wok 16–21: ‘God I Singaot Mifala, blong Talemaot Gud Nius blong Jisas,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“24–30 Julae. Ol Wok 16–21,” Kam Folem Mi—Blong Wanwan Man, Woman mo Famli: 2023
24–30 Julae
Ol Wok 16–21
“God I Singaot Mifala, blong Talemaot Gud Nius blong Jisas”
Taem yu stap ridim abaot ol hadwok blong Pol blong prijim gospel, Spirit i save toktok long yu wetem ol tingting o ol filing. Raetem ol toktok ia, mo mekem ol plan blong tekem aksen folem olgeta.
Raetemdaon Ol Filing mo Tingting blong Yu
Long ol las toktok blong Lod i go long Ol Aposol blong Hem, i bin gat komanmen ia: “yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala (Matiu 28:19–20). Taem we Ol Aposol oli no bin go kasem evri nesen, Ol Wok 16–21 i soem se Pol mo ol fren blong hem we oli folem hem oli bin mekem plante gud wok blong stanemap Jos. Oli bin tijim, baptaesem, mo givim presen we i Tabu Spirit. Oli bin mekem ol merikel, iven blong mekem wan i girap long ded, mo oli bin talem finis se bae i gat Bigfala Apostasi (Ol Wok 20:7–12, 28–31). Mo wok we oli bin statem, i gohed wetem ol Aposol we oli stap laef tedei, wetem ol disaepol we oli givim strong tingting, olsem yu, we i stap help blong mekem wok we Sevya i bin givim, long sam wei we Pol i neva save ting long hem. Maet, yu yu save sam pipol we oli no save Papa long Heven o gospel blong Hem. Maet bae yu filim se spirit blong yu i stap tantanem yu blong yu mas serem wetem olgeta wanem we yu yu save abaot Hem (Ol Wok 17:16). Sapos yu folem eksampol blong Pol blong stap gat tingting i stap daon mo save tok stret blong serem gospel, maet bae yu faenem wan we Lod i openem hat blong hem (Ol Wok 16:14).
Sam Aedia blong Skripja Stadi blong Yuwan
Spirit bae i lidim mi long ol hadwok blong mi blong serem gospel
Profet Josef Smit i talemaot: “I no gat man i save prijim Gospel sapos i no gat Tabu Spirit” (Teachings of Presidents of the Church: Joseph Smith [2007], 332). Taem yu stap ridim Ol Wok 16–21, tingting long from wanem nao toktok blong Profet i tru. Teknot long sam taem we Spirit i bin helpem Pol mo olgeta we oli stap folem hem. ?Wanem blesing nao oli kam taem oli bin folem Spirit? ?Wetaem nao yu bin filim Spirit we i stap putum yu long ol hadwok blong yu blong serem gospel?
Mi save talemaot gospel long eni kaen situesen.
Blong oli sakem yu long kalabus from se yu stap prijim gospel, maet i olsem wan gudfala risen blong stop blong prij. Be long Pol mo long Saelas, hemia i kam olsem wan janis blong jenisim laef blong wan long kalabus (luk long Ol Wok 16:16–34). Truaot long Ol Wok 16–21, lukaotem ol nara eksampol we oli soem se Pol i wantem blong serem wanem hem i bin witnesem wetem evriwan. Long tingting blong yu, ?from wanem nao hem i stap tok stret mo klia, mo i no fraet? ?Wanem nao yu lanem aot long eksampol blong Pol?
I gat plante moa mesej abaot fasin blong serem gospel long Ol Wok 16–21. Taem yu stap stadi long ol japta, lukaotem sam we oli blong yu stret.
Luk long Dieter F. Uchtdorf, “Misinari Wok: Stap Serem Wanem I Stap long Hat blong Yu,” Liahona, Mei 2019, 15–18.
Wanwan long yumi i wan pikinini blong God.
“Yumi pikinini blong God.”
Long Aten, Pol i faenem ol pipol we oli gat ol defren tingting, mo defren lukluk long saed blong relijin. Oltaem nomo, oli stap lukaotem blong “harem wan niu samting,” mo wanem we Pol i stap givim, i no bin niu long olgeta (luk long Ol Wok 17:19–21). Oli bin wosip long plante god, wetem wan we oli singaotem “wan god we mifala i no save hem” (Ol Wok 17:23), be oli bin biliv se ol god oli ol paoa, o ol fos, we oli no laef, oli no ol man, mo i no Papa blong yumi. Tingting hevi long wanem we Pol i bin talem blong help blong kam blong save God. ?I minim wanem long yu blong yu yu wan “pikinini blong God”? (Ol Wok 17:29). Long tingting blong yu, ?olsem wanem nao, taem yu pikinini blong God, i defren long wei we yu yu jes wan kriesen blong Hem? ?Olsem wanem nao, taem yu andastanem trutok ia, bae i lidim wei we yu stap lukluk yuwan mo ol narawan?
Sapos yu bin stanap long saed blong Pol long tetaem ia, taem hem i bin stap testifae, ?wanem nao bae yu talem Ol Man Gris blong bifo abaot Papa blong yumi long Heven? ?Yu yu save wan we bae i helpem hem blong hem i harem testemoni blong yu?
Luk tu long Rom 8:16; 1 Jon 5:2; “We Are the Offspring of God” (video), ChurchofJesusChrist.org.
Ol Aedia blong Famli Skripja Stadi mo Haos Naet
-
Ol Wok 16–21.Blong mekem se famli blong yu i andastanem dip moa abaot Ol Wok 16–21, yufala i save stadi long map we i stap long en blong aotlaen ia, mo lukaotem ol siti we Pol i bin prijim gospel long ol japta ia. ?Wanem risos nao yumi gat tedei blong help tekem gospel i go long evri nesen?
Blong givim insperesen long famli blong yu blong serem gospel, yu save soem wan, o moa long wan vidio long seksen ia: “Stap Serem Gospel” we i stap long Gospel Laebri.
-
Ol Wok 17:10–12; 18:24–28.?Olsem wanem nao bae yumi save kam olsem Ol Sent long ol ves ia? ?I minim wanem blong “oli glad moa blong tingbaot ol tok blong tufala, … Oli wantem tumas blong harem tok blong tufala”? (Ol Wok 17:11). ?Wanem nao yumi mekem blong “savegud tu ol tok blong Baebol”? (Ol Wok 18:24).
-
Ol Wok 19:1–7.Ol ves ia oli save helpem famli blong yu blong toktok raon long hamas i impoten blong kasem baptaes mo konfemesen. Blong andastanem moa ol trutok we oli stap long Ol Wok 19:1–7, yufala i save toktok raon long sam samting we oli no gat yus sapos i no gat wan samting i stap, olsem wan mobaelfon we i no gat batri. O yu save serem tijing ia we i kam long Profet Josef Smit: “Baptaes andanit long wota, hem i wan haf baptaes, mo i no gat yus sapos i no gat nara haf blong hem—we i baptaes blong Tabu Spirit” (Teachings: Joseph Smith, 95). ?From wanem baptaes i no gat yus sapos wan i no kasem presen we i Tabu Spirit? (luk long 3 Nifae 27:19–20; Moses 6:59–61).
-
Ol Wok 19:18–20.Taem yu stap ridim Ol Wok 19:18–20, luk gud long wanem nao praes blong ol samting we ol pipol oli glad blong lego blong save akseptem gospel (luk long ves 19). ?I gat eni samting blong wol ia, o eni aktiviti we yumi nidim blong givap long ol blong kasem ol blesing blong heven?
-
Ol Wok 20:32–35.?Wetaem nao famli blong yu i gotru long tijing blong Kraes se “man we i stap givim presen i go, hem i save harem gud moa, i winim man we i stap kasem presen blong hem”? (Ol Wok 20:35). ?I gat eniwan we bae i harem gud sapos famli blong yu i save givim seves, givim taem, o sam presen i go long olgeta? Olsem wan famli, toktok raon long sam aedia mo mekem sam plan blong givim seves long wan. ?Yu harem olsem wanem taem yu givim seves long ol narawan? ?From wanem yu gat moa blesing taem yu givim bitim we taem yu kasem?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Mi Pikinini blong God,” STSP, pej 58.
Stap Kam Antap long Stadi blong Yuwan
Raetemdaon Ol Filing blong Yu. “Taem yu raetemdaon ol tingting mo filing we i kam long Spirit, yu stap soem long Lod se yu gat tingting long daereksen blong Hem, mo bambae Hem i blesem yu wetem moa revelesen we bae i kam oltaem.” (Teaching in the Savior’s Way, 12; mo tu, luk long pej 30).
Ol misinari wokbaot blong Aposol Pol.