“19–25 Jun. Matiu 27; Mak 15; Luk 23; Jon 19: ‘Olgeta Samting I Finis Nao,’” Kam Folem Mi—Blong Wanwan Man, Woman mo Famli: Niu Testeman 2023 (2022)

“19–25 Jun. Matiu 23; Mak 15; Luk 20; Jon 19,” Kam Folem Mi—Blong Wanwan Man, Woman mo Famli: 2023

Pikja

Kraes long fored blong Paelat

Ecce Homo, i kam long Antonio Ciseri

19–25 Jun

Matiu 27; Mak 15; Luk 23; Jon 19

“Olgeta Samting I Finis Nao”

Matiu 27; Mak 15; Luk 23; mo Jon 19 oli tokbaot ol ditel blong ol las aoa blong laef blong Sevya long wol ia. Lukaot blong filim lav we Hem i gat long yu taem yu stap stadi abaot sakrifaes mo ded blong Hem.

Raetemdaon Ol Filing mo Tingting blong Yu

Tru long evri toktok mo aksen blong Hem, Jisas Kraes i bin stap olsem eksampol blong lav ia we i klin evriwan—wanem we Aposol Pol i singaotem, jareti (luk long 1 Korin 13). I no gat wan taem we i moa klia gud bitim ol las aoa blong laef blong Sevya long wol ia. Taem Hem i no mekem eni ting long fes blong ol giaman toktok agensem Hem, i soem se “i no save mekem tingting blong hem i go antap, mo i no save flas” (1 Korin 13:5). Hat blong Hem we i wantem fesem ol kil, ol tok jik, mo blong i hang long kros—mo i holemtaet paoa blong Hem mo putum en long ol bigfala trabol blong Hem—i soem se Hem i “tingting blong hem i longfala, mo hem i gat sore long man” (1 Korin 13:4, 7). Lav mo sore blong Hem long mama blong Hem, mo sore blong Hem long olgeta we oli hangem Hem long kros—iven taem Hem i bin stap safa we i no gat toktok blong tokbaot—i soemaot se Hem “i no save tingbaot hem nomo” (1 Korin 13:5). Long ol las aoa blong Hem long wol ia, Jisas i bin stap mekem wanem we Hem i bin stap mekem truaot long seves blong Hem long wol ia—i stap tijim yumi tru long fasin blong stap soem samting long yumi. I tru, jareti hem i “lav we i neva save sot” blong Kraes (Moronae 7:47).

Pikja

stadi blong yuwan pikja aekon

Sam Aedia blong Skripja Stadi blong Yuwan

Matiu 27; Mak 15; Luk 23; Jon 19

Hat blong Jisas Kraes blong wantem safa, i soem se Hem i lavem Papa, Hem i lavem yumi evriwan.

Nomata we Sevya i bin gat paoa blong singaotem “ol enjel, we oli moa long twelef kampani blong ol soldia” (Matiu 26:53), Hem nomo i jusum blong gotru long ol taem ia long kot we i no stret, fesem ol tok blong jik, mo bigfala sobodi. ?From wanem nao Hem i mekem hemia? Nifae i bin testifae se hem i, “from fasin blong hem blong stap kaen wetem lav, mo from fasin blong hem blong go tru long ol hadtaem wetem longfala tingting” (1 Nifae 19:9).

“Hem i karem kros blong hem, i go … long “Golgota” (Jon 19:17).

Maet blong statem stadi blong yu abaot ol las aoa blong Sevya, yu save ridim 1 Nifae 19:9. ?Long weaples nao, insaed long Matiu 27; Mak 15; Luk 23; mo Jon 19 yu yu faenem ol eksampol blong wanwan samting we Nifae i bin talem se bae Jisas i safa long hem?

“Oli jajem Hem se Hem i wan nogud samting.”
“Oli kilim Hem”
“Oli wipim Hem”
“Oli spet long Hem”

?Wijwan skripja nao i helpem yu blong filim fasin blong Sevya we i kaen wetem lav we Hem i gat long yu? ?Wanem nara tingting mo filing nao yu yu gat taem yu stap ridim ol stori ia? Tingting blong raetemdaon ol eksperiens ia, o blong serem olgeta wetem wan.

Luk tu long “Jesus Is Condemned before Pilate” mo “Jesus Is Scourged and Crucified” (vidio), ChurchofJesusChrist.org.

Matiu 27:27–49, 54; Mak 15:16–32; Luk 23:11, 35–39; Jon 19:1–5

Fasin blong jikim man i no save jenisim trutok.

Taem we Jisas i bin stap fesem ol jik truaot long seves blong Hem, ol fasin ia oli kam bigwan mo strong moa long taem we oli bin stap wipim mo hangem long Kros. Be fasin blong jik ia, i no save jenisim trutok ia: Jisas i Pikinini blong God. Taem yu stap ridim hamas nao oli bin daonem mo mekem Jisas i sem, tingting abaot wanem i kam agens, mo fasin blong jikim ol wok blong Hem tedei. ?Wanem niu tingting yumi kasem abaot fasin blong stap strong agensem wanem i kam agensem yumi? ?Wanem i tajem yu abaot ol toktok blong jif kapten long Matiu 27:54?

Matiu 27:46; Mak 15:34

Jisas Kraes i bin safa hemwan blong mekem se mi mi no save safa.

Long taem blong wan long ol moa strong taem antap long kros, Jisas, we oltaem i bin dipen long Papa blong Hem long Heven, nao i harem se Papa blong Hem i lego Hem. Taem yu stap rid abaot hemia, bae i save lidim yu blong tingting abaot sam taem we yu bin filim se yu longwe long God. Maet yu save tingting hevi long, hao nao, sakrifaes blong Sevya antap long kros, i mekem se i posibol blong yu yu kam kolosap bakegen long Hem. Olsem we Elda Jeffrey R. Holland i bin testifae: “From se Jisas i bin wokbaot long wan longfala rod olsem hemwan nomo, yumi, yumi no nid blong wokbaot yumiwan. … Trutok i kamaot klia antap long hil blong Kalvari se bambae yumi neva stap yumiwan, o se bae yumi no kasem help, iven sapos samtaem, yumi filim se yumi stap yumiwan o yumi no gat help. (“None Were with Him,” Liahona, May 2009, 88). Tingting long hao nao Sevya i save helpem yu blong winim fasin blong stap yuwan taem yu stap ridim ful mesej blong Elda Holland.

Luk 23:34

Sevya i eksampol blong fogivnes.

Yu yu filim olsem wanem taem yu stap ridim ol toktok blong Sevya long Luk 23:34? (Luk niu tingting we i kam tru long Josef Smit Translesen long futnot c). Taem hem i tokbaot ol toktok blong Sevya, Presiden Henry B. Eyring i bin tijim: “Yumi mas fogiv mo no holem rabis tingting long olgeta we oli bin mekem nogud long yumi. Sevya i bin soem eksampol ia antap long kros. Yumi no save hat blong olgeta we oli mekem nogud long yumi” (“That We May Be One,” Ensign, May 1998, 68). ?Olsem wanem ves ia i helpem yu sapos yu gat trabol blong stap fogivim wan?

Pikja

famli stadi pikja aekon

Ol Aedia blong Famli Skripja Stadi mo Haos Naet

Matiu 27; Mak 15; Luk 23; Jon 19.Blong helpem famli blong yu abaot ol samting we oli bin hapen long ol japta ia, yu save serem wetem olgeta: “Japta 52: Ol Tes blong Jisas” mo “Japta 53: Jisas I Bin Krusifae” (insaed long Ol Niu Testeman Stori, 133–38, o vidio we i semmak long ChurchofJesusChrist.org). O yufala i save wajem tugeta, ol vidio we oli soemaot ol taem ia: “Jesus Is Condemned before Pilate” mo “Jesus Is Scourged and Crucified” (ChurchofJesusChrist.org). Yu save invaetem ol pikinini blong talem bakegen ol stori ia wetem toktok blong olgeta nomo. Ol memba blong famli oli save serem olsem wanem oli filim abaot Sevya from ol samting we Hem i bin safa from.

Matiu 27:11–26; Mak 15:1–15; Luk 23:12–25; Jon 19:1–16.?From wanem Paelat i givim Jisas blong oli hangem Hem long kros, iven we hem i bin save se Jisas i no gat rong? ?Wanem lesen nao yumi lanem aot long eksperiens blong Paelat abaot fasin blong stanap from samting we yumi save se i raet? Maet bae i helpem famli blong yu blong rolplei long ol defren taem ia, blong mekem se oli save praktis blong save stanap from samting we i raet.

Matiu 27:46; Luk 23:34, 43, 46; Jon 19:26–28, 30.Maet yu save givim wok long wanwan memba blong famli blong ridim wan, o moa long wan toktok we Sevya i bin talem antap long kros, we yu save faenem insaed long ol ves ia. Askem olgeta blong serem wanem we oli lanem aot long ol toktok ia, abaot Sevya mo misin blong Hem.

Mak 15:39.?Olsem wanem nao, taem yu stap rid abaot taem oli hangem Jisas long kros, i mekem testemoni blong yu i kam strong moa se Jisas i Pikinini blong God?

Jon 19:25–27.?Wanem nao yumi lanem aot long ol ves ia abaot wei we yumi save lavem mo sapotem ol memba blong famli?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Upon the Cross of Calvary,” Hymns, namba 184.

Stap Kam Antap long Fasin blong Yumi blong Stap Tij

Gat wan laef we i semmak long laef blong Sevya. “Bae hem i help blong stadi long hao nao Sevya i bin stap tij—ol fasin we Hem i bin yusum mo olgeta samting we Hem i bin talem. Be paoa blong Jisas blong tij mo leftemap ol narawan, i kam long wei we Hem i bin stap laef mo i kam long huia Hem. Moa yu wok strong wetem strong tingting blong traehad blong laef olsem Jisas Kraes, moa bae yu kam blong save tij long wei we Hem i bin tij” (Teaching in the Savior’s Way, 13).