“12–18 Jun. Luk 22; Jon 18: ‘I No Olsem Tingting blong Mi, Be Mekem Olsem Tingting blong Yu Nomo,’” Kam Folem Mi— Blong Wanwan Man, Woman mo Famli: Niu Testeman 2023 (2022)
“12–18 Jun. Luk 22: Jon 18,” Kam Folem Mi—Blong Wanwan Man, Woman mo Famli: 2023
Bus long Getsemane, i kam long Derek Hegsted
12–18 Jun
Luk 22; Jon 18
“I No Olsem Tingting blong Mi, Be Mekem Olsem Tingting blong Yu Nomo”
Tekem taem blong yu blong ridim Luk 22 mo Jon 18 long wik ia. Tingting hevi mo prea abaot wanem yu ridim. Taem yu mekem hemia, bae i givim janis long Spirit blong i testifae long hat blong yu we ol skripja oli tru.
Raetemdaon Ol Filing mo Tingting blong Yu
I bin gat trifala witnes nomo long wol ia blong witnesem safaring blong Jisas Kraes long Garen blong Getsemane—mo oli slip taem i bin stap hapen. Long garen ia, mo afta, antap long kros, Jisas i bin tekem long Hemwan ol sin, ol sobodi, mo ol safaring blong evriwan we oli kam long wol ia, nomata we kolosap i no gat wan we i bin laef long taem ia, i bin save wanem i bin stap hapen. Ol moa impoten wok blong taem we i no save finis, plante taem, taem oli stap tekem ples, wol i no luk. Be God Papa i bin save. Hem i bin harem strong prea blong fetful Pikinini blong Hem: “Papa, sapos i stret long tingting blong yu, plis yu tekemaot ol samting ya we i stap mekem mi mi harem nogud. Be yu no mekem olsem we mi mi wantem, yu mekem olsem we yu nomo yu wantem. “Nao wan enjel i aot long heven i kam, nao i kamtru long Jisas, i mekem hem i strong bakegen” (Luk 22:42–43). Yumi no bin stap long tetaem ia blong witnesem aksen ia we i soem se Hem i no selfis, mo i obei, yumi nao ol witnes blong Atonmen blong Jisas Kraes. Evri taem we yumi sakem sin mo kasem fogivnes from ol sin blong yumi, evri taem we yumi filim paoa blong Sevya we i mekem yumi kam strong moa, yumi save testifae abaot tru samting we i bin hapen long Garen blong Getsemane.
Sam Aedia blong Skripja Stadi blong Yuwan
Luk 22:31–34, 54–62; Jon 18:17–27
Fasin blong jenisim laef, i wan proses we i stap gogohed.
Tingting abaot ol eksperiens we Pita i bin gat wetem Sevya—ol merikel we hem i bin witnesem mo doktrin we hem i bin lanem. ?From wanem bae Sevya i talem long Pita: “Taem yu tanem tingting blong yu, yu kambak long mi bakegen, yu mas mekem tingting blong ol brata blong yu i strong”? (Luk 22:32; oli ademap italik). Taem yu stap tingting hevi long hemia, bae i save help blong tingting tu long wanem we Elda David A. Bednar i bin tijim abaot wanem i defren blong gat wan testemoni mo blong jenisim laef tru “Converted unto the Lord,” Liahona, Nov. 2012, 106–9).
Taem yu stap rid abaot eksperiens blong Pita we yu save faenem long Luk 22:31–34, 54–62 (luk tu long Jon 18:17–27), tingting long hao yuwan yu stap jenisim laef blong yu. ?Yu yu bin filim finis se yu yu komitim yu fulwan olsem, mekem se, olsem Pita, yu bin “rere blong go long kalabus wetem [Sevya], mo rere blong ded wetem [Sevya]”? (Luk 22:33). ?From wanem ol filing olsem, samtaem oli stap go lus? Evri dei, i gat janis blong tanem baksaed, o blong witnes abaot Sevya, wanem bae yu mekem blong yu evri dei witnes blong Hem? ?Wanem nara lesen yu yu lanem aot long eksperiens blong Pita?
Taem yu stap gohed blong stap ridim Niu Testeman, lukaotem ol pruf we i soem se Pita i stap gogohed blong jenisim laef blong hem. Mo tu, luk ol wei we hem i bin akseptem wok ia we i kam long Lod blong “mas mekem tingting blong ol brata blong [hem] i strong” (Luk 22:32; luk long Ol Wok 3–4).
Luk long Mak 14:27–31.
Sevya i bin safa from mi long Getsemane.
Presiden Russell M. Nelson i bin invaetem yumi blong “putum taem blong stap lanem abaot Sevya mo sakrifaes blong Hem we i pem praes from sin” (“Pulum Paoa blong Jisas Kraes Insaed long Laef blong Yumi,” Jeneral Konfrens, Epril 2017, ChurchofJesusChrist.org/general-conference/conferences?lang=bis).
Tingting se bae yu mekem wanem blong akseptem invitesen blong Presiden Nelson. Maet bae yu stat blong prea, mo tingting hevi long safaring blong Sevya long Getsemane, olsem we oli tokbaot long ol ves ia, mo raetem sam tingting mo filing, mo sam kwestin we oli kam long maen.
Blong yu save stadi i go insaed moa abaot Sevya mo Atonmen blong Hem, traem luklukgud insaed long ol nara skripja blong faenem ol ansa long ol kwestin olsem olgeta ia:
-
?From wanem Atonmen blong Sevya i wan mas? (luk long 2 Nifae 2:5–10, 17–26; 9:5–26; Alma 34:8–16; 42:9–26.)
-
?Wanem nao Sevya i bin gotru long hem taem Hem i bin safa? (Luk long Aesea 53:3–5; Mosaea 3:7; Alma 7:11–13; Doktrin mo Ol Kavenan 19:16–19.)
-
?Olsem wanem nao, safaring ia blong Kraes, i tajem laef blong mi? (Luk long Jon 10:10–11; Hibrus 4:14–16; 1 Jon 1:7; Alma 34:31; Moronae 10:32–33; Dallin H. Oaks, “Kam Strong Moa Tru long Atonmen blong Jisas Kraes,” Jeneral Konfrens, Okt 2015, ChurchofJesusChrist.org/general-conference/conferences?lang=bis.)
-
Ol nara kwestin we mi gat:
Taem yu stap lan abaot wanem i bin hapen long Getsemane, bae i intresting blong save se Getsemane i bin wan garen blong ol olif tri, mo insaed i bin gat wan ples blong purumbut long ol oliv frut; oli stap smasem ol olif frut blong karemaot oel we oli bin yusum blong laet, mo kukum kaekae, mo tu blong hilim man wetem (luk long Luk 10:34). ?Olsem wanem, rod ia, o wok ia blong stap karemaot oel long oliv frut i wan simbol blong wanem Sevya i bin mekem blong yumi, long Getsemane? Blong gat sam aedia, luk long mesej blong Elda D. Todd Christofferson: “Sapos Yufala I Stap Obei long Ol Tok blong Mi Bambae Mi Lavem Yufala Olwe” (Jeneral Konfrens, Okt 2016, ChurchofJesusChrist.org/general-conference/conferences?lang=bis).
Luk tu long Matiu 26:36–46; Mak 14:32–42.
Sevya “i no king olsem ol king blong wol ia.”
Olsem wan politik lida, Pontias Paelat i bin save gud paoa mo ol kingdom blong wol ia. Be Jisas i bin tokbaot wan defren kaen kingdom. Tingting i gobak long wanem yu bin ridim abaot laef blong Sevya, wanem pruf yu yu luk we i soem se Hem i “no king blong wol ia”? (Jon 18:36). ?From wanem hem i impoten blong yu yu save hemia? ?Wanem moa i kamaot klia long yu abaot ol toktok blong Jisas i go long Paelat?
Ol Aedia blong Famli Skripja Stadi mo Haos Naet
-
Luk 22:31–32.?Olsem wanem nao Pita i maet filim taem hem i bin save se Jisas i bin prea from hem mo fet blong hem? ?Huia nao yumi save prea from blong “bilif blong [olgeta] bambae i no save foldaon”? (ves 32).
-
Luk 22:39–46.Blong stap lanem abaot safaring blong Sevya long Getsemane, i save kam wan tabu eksperiens long famli blong yu. Tingting long wanem nao yu save mekem blong gat wan spirit we i revren mo i stap wosip taem yu stap stadi long Luk 22:39–46. Maet yu save plei o singsing tugeta long sam fevret hym blong famli, o singsing blong ol pikinini abaot Sevya. Yufala i save wajem wan artwok we i go wetem hemia, o wajem wan vidio olsem: “The Savior Suffers in Gethsemane” (ChurchofJesusChrist.org). Taem yu stap ridim ol ves ia, ol memba blong famli oli save serem sam skripja we oli gat mining long olgeta—maet wan skripja i helpem olgeta blong filim lav ia blong Sevya Matiu 26:36–46; Mak 14:32–42). Maet yu save invaetem olgeta blong serem testemoni blong olgeta abaot Jisas Kraes mo Atonmen blong Hem.
-
Luk 22:42.Ol memba blong famli oli save serem ol eksperiens taem oli stap lan blong talem: “I no folem tingting blong mi, be i folem tingting blong yu.”
-
Luk 22:50–51; Jon 18:10–11.?Wanem nao yu lanem abaot Jisas aot long ol ves ia?
Yu Safa Olsem, i kam long Walter Rane
-
Jon 18:37–38.?Olsem wanem nao bae yumi ansarem kwestin blong Paelat? we i talem se: “?Wanem nao i trutok?” (ves 38). Blong gat sam aedia, luk long Jon 8:32; Doktrin mo Ol Kavenan 84:45; 93:23–28; mo “?Wanem Nao Trutok?,” STSP, pej 31.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Mi Sapraes Tumas we Jisas Hem I Lavem Mi,” STSP, pej 22.
Stap Kam Antap long Stadi blong Yuwan
Stadi long ol toktok blong ol lata-dei profet mo aposol. Ridim wanem ol lata-dei profet mo aposol oli bin tijim abaot ol trutok we yu faenem insaed long ol skripja. Eksampol, long las namba blong jeneral konfrens, long Liahona, yu save lukaotem topik indeks ia, “Atonmen” (luk long Teaching in the Savior’s Way, 21).
I No Olsem Tingting blong Mi, be Olsem Tingting blong Yu, i kam long Walter Rane