“Abril 24–30. Juan 7–10: ‘Ako Mao ang Maayong Magbalantay sa mga Karnero’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Abril 24–30. Juan 7–10,” Dali, Sunod Kanako—Alang sa mga Indibidwal ug mga Pamilya: 2023
Neither Do I Condemn Thee [Ni Ako Manghimaraot Kanimo], ni Eva Koleva Timothy
Abril 24–30
Juan 7–10
“Ako ang Maayong Magbalantay sa mga Karnero”
Samtang magbasa ka sa Juan 7–10, mahimo kang makadawat og mga panghunahuna gikan sa Espiritu Santo mahitungod sa mga baroganan sa doktrina niini nga mga kapitulo. Ang pagrekord sa imong mga panghunahuna makatabang kanimo sa paghimo og plano sa pagbuhat niini.
I-rekord ang Imong mga Panghunahuna
Bisan og si Jesukristo mianhi aron sa pagdala og “kalinaw [ug] panagdait sa mga tawo” (Lucas 2:14), dihay “panagkasumpaki sa mga tawo tungod kaniya” (Juan 7:43). Ang mga tawo kinsa nakasaksi sa samang mga panghitabo nagkalahi ang mga konklusyon mahitungod kon kinsa si Jesus. Ang uban mihukom, “Siya maayong tawo,” samtang ang uban miingon, “Nagapasalaag Siya sa mga tawo” (Juan 7:12). Sa dihang Iyang giayo ang usa ka buta nga tawo sa Igpapahulay, ang uban namugos, “Kadtong tawhana dili gikan sa Dios, kay wala siya magbantay sa adlaw nga igpapahulay,” samtang ang uban nangutana, “Unsaon ba sa usa ka tawong makasasala ang pagkahimog mga milagro nga sama niini?” (Juan 9:16). Apan bisan pa sa tanang kalibog, kadtong nangita sa kamatuoran nakaila sa gahom sa Iyang mga pulong, kay “wala pa gay[o]y tawo nga nakasulti sama niining tawhana” (Juan 7:46). Sa dihang ang mga Judeo mihangyo ni Jesus “tug-ani kami sa lakt[o]d gay[o]d” kon siya ba si Kristo, Iyang gipadayag ang baroganan nga makatabang kanato sa pag-ila sa kamatuoran gikan sa sayop: “Ang Akong karnero nagapatalingh[o]g sa akong tingog,” miingon Siya, “ug Ako nakaila kanila, ug sila nagasunod kanako” (Juan 10:24, 27).
Mga Ideya alang sa Personal nga Pagtuon sa Kasulatan
Samtang nagsunod ako sa mga kamatuoran nga gitudlo ni Jesukristo, makahibalo ako nga kini tinuod.
Ang mga Judeo nahibulong nga nakahibalo og daghan si Jesus nga wala man unta Siya makaeskwela (tan-awa sa bersikulo 15)––sa labing minos, dili sa mga paagi nga nasinati nila. Sa tubag ni Jesus, gitudlo Niya ang laing paagi sa pagkahibalo sa kamatuoran nga magamit sa tanan, walay pagsapayan sa edukasyon o kaagi. Sumala sa Juan 7:14–17, unsaon nimo pagkahibalo nga ang doktrina nga gitudlo ni Jesus tinuod? Sa unsa nga paagi kini nga proseso nakatabang kanimo sa pagpalambo sa imong pagpamatuod sa ebanghelyo?
Ang kalooy sa Manluluwas alang sa tanan.
Kon hisgutanan ang bahin sa pakighinabi sa Manluluwas uban sa babaye nga nadakpan nga nanapaw, si Elder Dale G. Renlund miingon: “Sa pagkatinuod, ang Manluluwas wala mobaliwala sa pagpanapaw. Apan wala usab Niya gipanghimaraot ang babaye. Giawhag Niya ang babaye sa pag-usab sa iyang kinabuhi. Nadasig siya sa pag-usab tungod sa Iyang kapuangod ug kalooy. Gipamatud-an sa Hubad ni Joseph Smith sa Biblia ang miresulta nga pagkadisipulo niya: ‘Ug ang babaye mihimaya sa Dios sukad niana nga takna, ug mituo sa iyang ngalan’ [tan-awa sa Juan 8:11 ]” (Ang Atong Maayong Magbalantay,” Liahona, Mayo 2017, 30).
Kanus-a ka mibati sama sa babaye nga nakadawat og kalooy imbis panghimaraot gikan sa Manluluwas? Kanus-a ka nga sama sa mga escriba ug mga Pariseo, namasangil o naghukom sa uban bisan og ikaw makasasala? (tan-awa sa Juan 8:7). Unsa pa ang imong makat-onan gikan sa paagi sa pagtubag sa Manluluwas sa mga escriba ug mga Pariseo ug sa babaye nga nadakpan tungod sa pagpanapaw? Unsa ang imong makat-onan mahitungod sa pagpasaylo sa Manluluwas samtang nagbasa ka niini nga mga bersikulo?
Tan-awa usab “Go and Sin No More” (video), ChurchofJesusChrist.org.
Kon kita adunay hugot nga pagtuo, ang Dios mopaila sa Iyang Kaugalingon diha sa atong mga kasakit.
Unsa ang gitudlo sa Juan 9:1–3 kanimo mahitungod sa mga hagit ug mga kasakit sa kinabuhi? Samtang ikaw nagbasa sa Juan 9, pamalandonga kon giunsa sa “mga buhat sa Dios [ang] paghimo nga mopaila” diha sa kinabuhi sa lalaki nga natawo nga buta. Giunsa niini paghimo nga mopaila diha sa imong kinabuhi––lakip sa imong mga kasakit?
Si Jesukristo mao ang Maayong Magbalantay sa Karnero.
Bisan og ikaw dili sinati sa mga karnero ug sa pagbantay sa karnero, ang pagbasa sa Juan 10, diin ang Manluluwas nag-ingon, “Ako ang maayong magbalantay sa karnero,”makatudlo kanimo og importanting mga kamatuoran mahitungod Kaniya. Sa pagpangita niini nga mga kamatuoran, pangita og mga hugpong sa mga pulong nga naghulagway kon sama sa unsa ang maayong magbalantay sa karnero ug dayon hunahunaa kon giunsa niining mga hugpong sa mga pulong paggamit ngadto sa Manluluwas. Sa ubos mao ang pipila ka mga ehemplo:
-
Bersikulo 3: “Ang Iyang kaugalingong mga karnero pagatawgon niya sa ngalan, ug pagamandoan niya sila paingon sa gawas.”
-
Bersikulo 11: Siya “magahalad sa iyang kinabuhi alang sa mga karnero.”
-
Bersikulo 16: “Usa ra unya ang panon, ug usa ang magbalantay.”
Aniay pipila nga dugang pangutana sa pagtabang kanimo sa pagpamalandong niini nga kapitulo: Sa unsa nga paagi si Jesus sama sa usa ka pultahan? (tan-awa sa mga bersikulo 7–9). Giunsa Niya paghatag kanimo og “kinabuhi … nga madagayaon gay[o]d”? (bersikulo 10). Kanus-a nimo gibati nga Siya sa personal nakaila kanimo? (tan-awa sa bersikulo 14). Unsaon nimo pag-ila sa tingog sa Maayong Magbalantay sa karnero? (tan-awa sa bersikulo 27).
Tan-awa usab sa Salmo 23; Ezequiel 34; Alma 5:37–39; 3 Nephi 15:21–16:5; Gerrit W. Gong, “Maayong Magbalantay, Kordero sa Dios,” Liahona, Mayo 2019, 97–101.
Mga Ideya alang sa Pamilya nga Pagtuon sa Kasulatan ug Home Evening
-
Juan 7:24.Sa pagtabang sa imong pamilya sa pagsabot sa pagtulon-an ni Jesus sa Juan 7:24, mahimo nimong ipakita kanila ang usa ka butang nga ang hitsura sa gawas lahi sa sulod. O ang mga sakop sa pamilya mahimo nga makigbahin og mga kasinatian nga mitudlo kanila sa dili paghukom pinaagi sa gawas nga mga hitsura. Makalista ka usab og mga kalidad sa matag sakop sa pamilya nga dili makita sa mata (tan-awa usab sa 1 Samuel 16:7; Thomas S. Monson, “Tan-awa ang Uban kon Unsa Sila sa Umaab[o]t,” Liahona, Nob. 2012, 68–71).
-
Juan 8:31–36.Unsa ang gipasabot sa pagkahimong “alagad sa sala”? (tan-awa usab sa Moroni 7:11). Unsa nga mga kamatuoran ang gitudlo ni Jesus ang makahimo kanato nga gawasnon?
Jesus Healing the Blind [Jesus Nag-ayo sa Buta], ni Carl Heinrich Bloch
-
Juan 9.Unsaon nimo pagtabang sa imong pamilya sa paghanduraw sa asoy ni Jesus nga nag-ayo sa buta nga lalaki sa Juan 9? Mahimo nimong i-aksyon ang istorya og dungan o ipakita ang video “Jesus Heals a Man Born Blind” (ChurchofJesusChrist.org). Hunonga og kadiyot ang istorya aron ang mga sakop sa pamilya makabasa sa tukma nga mga bersikulo gikan sa Juan 9. Dapita sila sa pagtimaan sa bisan unsa nga mga leksiyon nga ilang makat-onan gikan sa istorya, sama sa unsay gipasabot nga mahimong kinabig ngadto sa ebanghelyo ni Jesukristo.
-
Juan 10:1–18, 27–29.Aron maapil ang mga sakop sa pamilya sa pagkat-on gikan sa sambingay sa maayong magbalantay, hangyoa ang matag usa kanila sa pagdrowing og litrato sa usa sa mosunod: usa ka kawatan, usa ka pultahan, usa ka magbalantay, usa ka sinuholan (binayran nga trabahante), usa ka lobo, ug usa ka karnero. Dapita sila sa pagbasa sa Juan 10:1–18, 27–29, ug dayon paghisgot isip usa ka pamilya unsa ang gitudlo sa Manluluwas bahin sa mga butang nga ilang gidrowing.
Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.
Gisugyot nga awit: “Ang Dios ang Akong Magbalantay,” Mga Himno,, nu. 61.
Pagpalambo sa Personal nga Pagtuon
Pangita sa dinasig nga mga pulong ug mga hugpong sa mga pulong. Samtang ikaw magbasa, ang Espiritu mahimong modala og piho nga mga pulong o hugpong sa mga pulong sa imong atensyon nga magdasig ug mag-awhag kanimo ingon og gisulat alang lamang kanimo. Hunahunaa ang pagtimaan sa bisan unsa nga mga pulong o hugpong sa mga pulong nga nagdasig kanimo sa Juan 7–10.
Lost No More [Wala na Mawala], ni Greg K. Olsen