“Plaub Hlis Ntuj 17–23. Mathais 18; Lukas 10: ‘Kuv Yuav Ua Li Cas Thiaj Tau Txoj Sia Ntev Mus Ib Txhis?,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Plaub Hlis Ntuj 17–23. Mathais 18; Lukas 10,” Los, Nrog Kuv Mus—Rau Ib Leeg thiab Tsev Neeg: 2023
Tus Neeg Xamalis Zoo, los ntawm Dan Burr
Plaub Hlis Ntuj 17–23
Mathais 18; Lukas 10
“Kuv Yuav Ua Li Cas Thiaj Tau Txoj Sia Ntev Mus Ib Txhis?”
Thaum koj thov Vajtswv pab koj nyeem thiab xav txog Mathais 18 thiab Lukas 10, tsom ntsoov rau tus Vaj Ntsuj Plig Dawb Huv tej kev tshoov siab. Nws yuav qhia koj tias koj yuav tsum kawm dab tsi los ntawm tej lus qhia thiab tej zaj no. Sau ntawv txog tej kev tshoov siab uas koj txais.
Sau Ntawv txog Koj tej Kev Tshoov Siab
Thaum koj nug tus Tswv ib lo lus, tej zaum koj yuav txais lus teb tsis raws li koj xav. Leej twg yog kuv tus neeg zej zog? Txhua tus uas xav tau koj txoj kev pab thiab txoj kev hlub. Leej twg yog tus loj dua ntais saum ntuj ceeb tsheej? Ib tug me nyuam yaus. Puas txaus yog yus zam tus uas ua txhaum xya zaus xwb? Tsis txaus, yuav tsum zam nws xya zaus xya caum. (Saib Lukas 10:29–37; Mathais 18:4, 21–22.) Thaum tus Tswv teb peb tsis raws li peb xav ces Nws caw peb hloov peb txoj kev xav hauv peb lub siab thiab tej yam peb ua. Yog koj xav paub tus Tswv lub siab nyiam vim koj xav kawm los ntawm Nws tiag tiag, tus Tswv yuav qhia koj ua neej kom muaj txoj sia nyob mus ib txhis nrog Nws.
Tej lub Tswv Yim Kawm Vaj Lug Kub ntawm Yus Ib Leeg
Kuv yuav tsum zam txim pub rau lwm tus yog kuv xav ko tus Tswv zam txim pub rau kuv.
Qhov uas Petus hais tias nws yuav zam txim rau ib tug xya zaus los tej zaum ua rau yus xav tias nws muaj siab dawb hais li ntawd, tiam sis Yexus tau qhia ib txoj kev cai siab dua. Nws teb hais tias, “Tsis yog xya zaus xwb, tiam sis yog xya zaus xya caum” (nqe 22), tiam sis Nws tsis qhia tias yuav tsum suav pes tsawg zaus, Nws qhia tias yuav tsum muaj ib tug cwj pwm li Yexus Khetos kom xav zam txim pub rau lwm tus. Thaum koj nyeem zaj lus piv txwv txog tus tub qhe uas tsis muaj siab hlub, cia li xav txog tej lub sij hawm thaum koj paub txog Vajtswv txoj kev hlub tshua thiab txoj kev khuv leej. Puas muaj leej twg uas xav tau koj txoj kev hlub tshua thiab txoj kev khuv leej?
Txwj Laug David E. Sorensen tau ceeb toom hais li no tias: “Txawm yog peb yuav tsum zam txim pub rau ib tug neeg zej zog uas ua phem rau peb, peb yuav tsum ua hauj lwm kom tsis txhob raug phem li ntawd ntxiv. … Kev zam txim tsis yog hais tias peb yuav tsum cia lwm tus ua phem rau peb. … Tiam sis thaum peb tawm tsam kev txhaum, peb yuav tsum tsis txhob cia kev chim siab los yog kev ntxub kav peb tej kev xav thiab tej yam peb ua” (“Forgiveness Will Change Bitterness to Love,” Liahona, Tsib Hlis Ntuj 2003, 12).
Leej twg yog cov Xya Caum?
Raws li tus txheej txheem uas ua hauv Phau Qub (saib Khiav Dim 24:1; Teev Npe 11:16), Yexus Khetos tau “xaiv dua xya caum ob leeg,” ntxiv rau Nws Kaum Ob tug Thwj Tim, kom ua tim khawv txog Nws, qhia Nws txoj moo zoo, thiab pab Nws ua Nws txoj hauj lwm. Lub Koom Txoos uas tau muab txum tim rov qab los tseem ua raws li tus txheej txheem no. Tus Tswv hu cov Xya Caum kom pab Kaum Ob tug Thwj Tim ua lawv ntiag tug hauj lwm ua cov tim khawv tshwj xeeb txog Yexus Khetos rau neeg nyob thoob plaws lub ntiaj teb.
Kuj saib Lus Qhuab Qhia thiab Kev Khi Lus 107:25–26, 33–34, 97.
Xwv kom txais tau txoj sia nyob mus ib txhis, kuv yuav tsum hlub Vajtswv thiab hlub kuv tus kwv tij zej zog zoo li kuv hlub kuv tus kheej.
Ib txoj kev zoo kom pab peb nco txog zaj lus piv txwv txog tus neeg Xamalis zoo yog Yexus tej lus teb ob lo lus nug hais tias: “Kuv yuav ua li cas kuv thiaj tau txoj sia ntev dhawv mus ib txhis?” thiab “Tus twg thiaj yog kuv tej kwv tij zej zog?” (Lukas 10:25, 29). Thaum koj nyeem zaj lus piv txwv no, cia li xav txog ob lo lus nug no. Koj nrhiav tau tej lus teb twg?
Nyob hauv Yexus lub caij nyoog, kev sib ntxub ntawm cov neeg Yudais thiab cov neeg Xamalis twb kav ntev ntau txhiab xyoo. Cov neeg Xamalis yog cov neeg Yudais cov xeeb ntxwv uas nyob hauv Xamalis thiab tau sib yuav nrog Lwm Haiv Neeg. Cov neeg Yudais xav tias cov neeg Xamalis phem heev vim lawv tau koom nrog Lwm Haiv Neeg thiab tau tso qhov tseeb tseg. Cov neeg Yudais tau ncig mus deb heev kom thiaj li tsis hla teb chaws Xamalis. (Kuj saib Lukas 9:52–54; 17:11–18; Yauhas 4:9; 8:48.)
Koj xav tias yog vim li cas tus Cawm Seej tau xaiv ib tug neeg Xamalis, ib tug uas cov neeg Yudais ntxub, kom coj yam ntxwv txog kev khuv leej thiab kev hlub tus kwv tij zej zog? Zaj lus piv txwv no tshoov koj lub siab ua dab tsi?
Kuj saib Mauxiyas 2:17; “Parable of the Good Samaritan” thiab “A Good Samaritan” (ob daim video), ChurchofJesusChrist.org.
Peb xaiv “yam zoo ntawd” thaum peb xaiv ua tej yam txhua hnub kom txais tau txoj sia nyob mus ib txhis.
Nyob hauv Lukas 10:38–42, Yexus tau caw Mathas xav txawv txog qhov uas nws siv sij hawm li cas. Tom qab nws hais txog tej nqe no, Muam Carol F. McConkie qhia tias: “Yog peb yuav ua neeg dawb huv, peb yuav tsum kawm kom zaum ntawm Ixayees tus Dawb Huv ko taw thiab siv sij hawm ua dawb huv. Peb puas muab tus xov tooj, txhua yam peb yuav tsum ua, thiab tej yam ntawm lub ntiaj teb no tso tseg me ntsis? Kev thov Vajtswv, kev kawm ntawv, thiab kev mloog Vajtswv txoj lus yeej caw Nws txoj kev hlub nkag rau hauv peb lub siab kom ntxuav peb huv. Cia peb siv sij hawm ua neeg dawb huv, kom peb yuav muaj Nws tus Ntsuj Plig dawb ceev puv npo” (“Kev Ua Dawb Huv uas Zoo Nkauj Kawg,” Liahona, Tsib Hlis Ntuj 2017, 11). Tej zaum koj yuav xav tshuaj seb koj siv sij hawm li cas—tsis hais thaum siv sij hawm ua tej yam zoo los yog. Puas muaj ib yam zoo dua (nqe 42) uas tsim nyog koj siv sij hawm ua ntxiv?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Mathais 18:1–11.Vim li cas Yexus xav kom peb ua zoo li ib tug me nyuam yaus? Cov me nyuam yaus zoo li cas uas yuav pab peb hloov los ua neeg zoo li Yexus Khetos? (saib Mauxiyas 3:19).
Yexus xav kom Nws cov thwj tim hloov lawv lub siab kom zoo li cov me nyuam yaus lub siab.
-
Mathais 18:15.Peb yuav ua li cas kom ua raws li tej lus qhia nyob hauv Mathais 18:15 nyob hauv peb tsev neeg? Qhov uas peb ua li no yuav pab peb tsev neeg li cas?
-
Mathais 18:21–35.Zaj lus piv txwv no qhia dab tsi rau peb txog Yexus Khetos? Zaj lus no qhia dab tsi rau peb txog kev hlub lwm tus?
-
Lukas 10:25–37.Tej zaum nej tsev neeg yuav nyiam hnav ris tsho zoo li cov neeg nyob hauv zaj lus piv txwv. Vim li cas tej lub sij hawm peb zoo li cov neeg nyob hauv zaj lus piv txwv no? Tus Cawm Seej zoo li tus neeg Xamalis zoo no li cas? Peb yuav tsum ua li cas kom zoo li tus neeg Xamalis zoo?
Tej zaum nej yuav xav hu nkauj ua ke hu ib zaj nkauj qhuas Vajtswv uas txhawb nqa tej lus tseeb nyob hauv zaj lus piv txwv no. Ib zaj nkauj zoo hu yog “Tus Tswv, Kuv Yuav Nrog Koj Mus” (Cov Nkauj Qhuas Vajtswv, zaj 98), tiam sis muaj lwm zaj thiab. Tej zaum nej tsev neeg yuav nyiam nrhiav ib zaj nkauj thiab piav vim li cas zaj ntawd muaj lub ntsiab zoo li zaj lus piv txwv ntawd.
-
Lukas 10:38–42.Puas nyuaj rau nej teem sij hawm ua tej yam kom txhawb nqa nej sab ntsuj plig nyob hauv nej tsev neeg? Tej zaum zaj dab neeg txog Maivliag thiab Mathas yuav pab nej xav ua tsev neeg kev sab laj los sis tsev neeg hmo ua ke kom paub ua li no zoo dua. Nrog nej tsev neeg, tej zaum nej yuav xav sau ntawv txog tej yam uas nej xaiv tau kom “xaiv yam zoo ntawd” (Lukas 10:42).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Jesus Said Love Everyone,” Children’s Songbook, 61.
Kev Qhia Zoo Dua Ntxiv
Saib xyuas kom muaj kev hlub. Qhov uas nej tsev neeg ib leeg xav li cas thiab ua zoo li cas rau ib leeg yeej hloov tau qhov uas neeg xav li cas hauv nej tsev. Cia li pab txhua tus hauv nej tsev neeg kom ua lawv lub luag hauj lwm kom muaj ib lub tsev uas txhua tus txaus siab qhia txog tej xwm txheej, nug tej yam, thiab hais lus tim khawv. (Saib Teaching in the Savior’s Way, 15.)
Yexus Khetos Nyob hauv Maivliag thiab Mathas lub Tsev, los ntawm Walter Rane