Yexus taug kev mus nrog cov thwj tim uas nqa tawb ncuav

Peb Hlis Ntuj 27–Plaub Hlis Ntuj 2

Mathais 14; Malakaus 6; Yauhas 5–6

“Tsis Txhob Ntshai”

Thaum koj nyeem Mathais 14; Malakaus 6; thiab Yauhas 5–6, nrhiav tej yam tseeb uas muaj nqis rau koj. Tej zaum koj yuav xav nug koj tus kheej tej yam xws li “Tej zaj lus nyob hauv tej tshooj no muaj nqis dab tsi rau kuv?” “Muaj tej lus qhia twg rau kuv lub neej?” los sis “Kuv xav qhia tej yam twg rau kuv tsev neeg los sis rau lwm tus?”

Sau Ntawv txog Koj tej Kev Tshoov Siab

Vim li cas Petus tau tawm hauv lub nkoj mus nyob hauv Dej Hiav Txwv Kalilais thaum cua ntsawj hlob heev? Ua li cas nws ho ntseeg tias yog Yexus txawj mus ko taw saum nplaim dej, nws yuav txawj thiab? Peb tsis paub tseeb, tiam sis tej zaum Petus to taub tias Vajtswv Leej Tub tsis tau los ua tej txuj ci zoo kawg nkaus rau tib neeg xwb tiam sis Nws tau los kom muab hwj chim rau tib neeg zoo li Petus ua tej yam zoo kawg nkaus thiab. Yexus twb caw kom tib neeg “Los, nrog kuv mus” (Lukas 18:22). Petus twb tau mloog Yexus cov lus no ib zaug lawm, thiab nws txaus siab mloog ib zaug ntxiv, tsis hais nws yuav tsum kov yeej nws txoj kev ntshai thiab ua ib yam uas ntshe neeg ua tsis taus. Nyaj tus Tswv yuav tsis hais kom peb tawm hauv ib lub nkoj los thaum muaj cua daj cua dub los sis muab peb cov ncuav tsawg xwb thaum muaj txhiab txhiab tus neeg uas xav noj, tiam sis tej lub sij hawm Nws yuav hais kom peb ua raws li Nws qhia thaum peb tsis tshua to taub tag nrho. Txawm yog Nws caw peb ua dab tsi los, tej zaum yuav ua rau peb xav tsis thoob los sis ntshai heev. Tiam sis yuav muaj tej txuj ci tseem ceeb yog peb yuav ua zoo li Petus thiab tsis txhob ntshai, tsis txhob ua xyem xyav, thiab tsis txhawj txog qhov uas peb tsis tshua to taub thiab cia li muaj kev ntseeg coj raws li Nws.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Yauhas 5:16–47

Yexus Khetos hwm Nws Txiv.

Kev txheeb ze ntawm Leej Txiv Saum Ntuj Ceeb Tsheej thiab Nws txhua tus me nyuam yeej yog ib yam dawb ceev. Nyob hauv tej nqe no, Yexus Khetos tau coj yam ntxwv rau peb xyaum kom peb sib raug zoo nrog Leej Txiv Saum Ntuj Ceeb Tsheej. Cia li nyeem Yauhas 5:16–47, thiab sau lub cim rau txhua zaus koj pom lo lus Txiv. Leej Tub ua li cas kom hwm Leej Txiv, thiab koj yuav ua li cas kom coj raws li Nws tus yam ntxwv? Koj kawm dab tsi txog qhov uas Leej Txiv xav li cas txog Nws Leej Tub? Koj txais kev tshoov siab ua dab tsi kom sib raug zoo ntxiv nrog koj Leej Txiv Saum Ntuj Ceeb Tsheej?

Kuj saib Yauhas 17; Jeffrey R. Holland, “The Grandeur of God,” Liahona, Kaum Ib Hlis Ntuj 2003, 70–73.

cov ncuav thiab cov ntses

Yexus ua ib qho txuj ci tseem ceeb kom pub rau tsib txhiab tus neeg noj thaum tsuas muaj tsib lub ncuav thiab ob tug ntses xwb.

Mathais 14:15–21; Malakaus 6:33–44; Yauhas 6:5–14

Tus Cawm Seej muaj peev xwm siv tej yam uas kuv txo hwj chim muab kom ua raws li Nws tej hom phiaj.

Koj puas tau xav tias koj tsis txaus kom kho txhua yam uas koj pom ib puag ncig koj—nyob hauv tsev, nrog cov phooj ywg thiab tsev neeg, los sis hauv cov pej xeem? Ntshe Yexus cov thwj tim yeej xav tias lawv tsis txaus thaum Nws hais kom lawv pub rau tsib txhiab tus neeg noj thaum tsuas muaj tsib lub ncuav thiab ob tug ntses xwb. Thaum koj nyeem txog qhov txuj ci tseem ceeb uas muaj tom qab ntawd, cia li xav txog qhov uas Vajtswv yuav siv tej yam uas koj txo hwj chim pub rau lwm tus kom foom koob hmoov rau lawv. Nws tau ua li cas kom ua rau koj tes hauj lwm loj zog thaum koj tau ua hauj lwm rau Nws? Cia li xav txog cov lus no los ntawm Muam Michelle D. Craig: “Yog peb pub tej yam uas peb muaj rau Khetos, ces Nws yuav ua kom tej yam peb ua ntawd loj zog. Tej yam uas nej muaj yeej txaus—txawm yog nej yog ib tug neeg uas qaug zog los yog—yog hais tias nej tso siab rau Vajtswv txoj kev tshav ntuj” (“Kev Txhawj Xeeb uas Zoo,” Liahona, Kaum Ib Hlis Ntuj 2018, 54).

Mathais 14:22–33; Malakaus 6:45–52; Yauhas 6:15–21

Yexus Khetos caw kuv tso kuv txoj kev ntshai thiab kev ua xyem xyav tseg thiab muab siab rau ntseeg Nws.

Cia li xav txog tej xwm txheej uas muaj nyob hauv Mathais 14:22–33; Malakaus 6:45–52; thiab Yauhas 6:15–21. Xav txog qhov uas Petus thiab lwm tus thwj tim yuav xav li cas. Koj kawm dab tsi txog kev ua thwj tim los ntawm tus Cawm Seej tej lus thiab tej yam Nws tau ua hauv tej nqe no? Koj kawm dab tsi los ntawm Petus tej lus thiab tej yam nws tau ua? (Kuj saib 1 Nifais 3:7.) Tus Tswv caw koj ua dab tsi uas muaj ntsis zoo li koj tawm hauv lub nkoj los? Koj kawm dab tsi hauv tej nqe no uas pab koj ua siab loj muab siab ntseeg Yexus Khetos?

Yauhas 6:22–71

Vim kuv yog Yexus Khetos ib tug thwj tim, kuv yuav tsum txaus siab ntseeg thiab lees txais qhov tseeb, tsis hais thaum twg nyuaj ua li ntawd los yog.

Thaum Yexus hais tias Nws yog “cov mov uas cawm neeg txoj sia” (Yauhas 6:48), neeg coob xav tias “cov lus no nyuaj kawg li” (Yauhas 6:60). Petus tej lus nyob hauv Yauhas 6:68–69 yuav pab koj li cas thaum lub sij hawm uas nyuaj rau koj ua raws li tus Cawm Seej tej lus qhuab qhia? Muaj dab tsi hauv Petus zaj lus tim khawv uas tshoov koj lub siab? Puas muaj “tej lus [uas] pub tau txoj sia ib txhis rau neeg” (Yauhas 6:68) uas pab tau koj ua raws nraim li tus Cawm Seej hais?

Kuj saib M. Russell Ballard, “Peb Yuav Mus Cuag Leej Twg?,” Liahona, Kaum Ib Hlis Ntuj 2016, 90–92.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 14:15–21.Xav seb nej yuav ua li cas kom pab nej tsev neeg xav txog qhov uas yuav tsum muaj cov ncuav thiab cov ntses npaum li cas kom pub mov rau tsib txhiab neeg noj. Qhov txuj ci tseem ceeb nyob hauv Mathais 14:15–21 qhia dab tsi rau peb txog tus Cawm Seej? Xav seb nej puas yuav qhia txog ib lub sij hawm thaum nej tsis tau muaj txaus es tus Cawm Seej tau pab kom nej muaj txaus lawm.

Mathais 14:22–33.Tej zaum nej tsev neeg yuav nyiam ua yeeb yam txog zaj dab neeg hauv tej nqe no. Vim li cas cov thwj tim ntshai heev? Vim li cas Petus txawj kov yeej nws txoj kev ntshai thiab tawm lub nkoj mus? Nws tau ua li cas kom qhia tias nws muaj kev ntseeg thaum nws tab tom tog zog rau hauv dej? Ua li cas peb zoo li Petus?

Yauhas 5:1–16.Hais kom nej tsev neeg sau lub cim thaum Yexus kho neeg mob zoo hlo lawm nyob hauv tej nqe no. Yexus Khetos ua li cas kom kho tau peb zoo hlo? Thaum twg thiab ua li cas Nws tau kho peb zoo hlo lawm?

Yauhas 6:28–58.Muab txhua tus hauv nej tsev neeg ib lub ncuav, thiab sib tham txog tej txiaj ntsim uas peb txais tau los ntawm cov mov thiab lwm yam zaub mov zoo. Ces nrhiav hauv tej nqe no ua ke, nrhiav seb vim li cas Yexus Khetos hu Nws tus kheej tias Nws yog “cov mov uas cawm neeg txoj sia” (Yauhas 6:35). Qhov uas peb “noj” cov mov uas cawm neeg txoj sia txhais li cas? (saib D. Todd Christofferson, “Cov Mov uas Los Saum Ntuj Los Cawm Neeg txoj Sia,” Liahona, Kaum Ib Hlis Ntuj 2017, 36–39).

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Vajtswv Muaj Tswv Yim thiab Hlub Peb,” Cov Nkauj Qhuas Vajtswv, zaj 84.

Kev Kawm Zoo Dua Ntxiv ntawm Yus Ib Leeg

Nrhiav koj tej lub tswv yim ntawm sab ntsuj plig. Thaum koj kawm koj tus kheej thiab nrog koj tsev neeg, tsis txhob xav tias yuav tsum nyeem tej nqe vaj lug kub no xwb. Tus Tswv yeej muaj lwm yam Nws xav kom koj kawm hauv tej tshooj no uas tsis tau sau ntawv txog ntawm no. Thov Vajtswv seb tej ntawd yog dab tsi.

Yexus rub Petus tawm hauv dej los

Tiv Cua Hlob, los ntawm Liz Lemon Swindle