Khetos txoj Kev Hloov Hlo

Txoj Kev Hloov Hlo, los ntawm Carl Heinrich Bloch

Plaub Hlis Ntuj 10–16

Mathais 15–17; Malakaus 7–9

“Koj Yog tus Khetos”

Kev nyeem vaj lug kub yuav caw tus Vaj Ntsuj Plig Dawb Huv los nrog koj koom ua ke hauv koj lub neej. Tus Vaj Ntsuj Plig Dawb Huv ib lub luag hauj lwm tseem ceeb yog kev ua tim khawv txog Yexus Khetos. Thaum koj nyeem cov vaj lug kub lub lim tiam no, cia li tsom ntsoov rau tej kev xav ntawm sab ntsuj plig uas ua rau koj zaj lus tim khawv txog tus Cawm Seej muaj zog ntxiv.

Sau Ntawv txog Koj tej Kev Tshoov Siab

Yeej yog ib qho txawv heev uas cov Falixais thiab cov Xadukais yuav xav hais kom Yexus ua “ib yam txuj ci tseem ceeb saum ntuj” rau lawv pom puas yog? Tej txuj ci tseem ceeb ntau uas Nws twb ua lawm tsis txaus los? Los sis Nws tej lus qhia uas muaj hwj huam heev los sis tej yam uas Nws ua kom muaj raws li cov yaj saub puag thaum ub tau hais lawm nev? Tej yam lawv xav tau tsis yog vim tsis tau muaj tej txuj ci tseem ceeb lawm tiam sis yog vim lawv tsis kam paub txog “tej txuj ci uas niaj hnub no muaj lawm” thiab lees tias tau muaj li ntawd. (Saib Mathais 16:1–4.)

Petus, ib yam li cov Falixais thiab cov Xadukais, tau pom tus Cawm Seej tej txuj ci tseem ceeb thiab mloog Nws tej lus qhia. Tiam sis Petus zaj lus tim khawv hais tias, “Koj yog tus [Khetos] uas yog Vajtswv tus uas muaj sia nyob tus Tub,” tsis tau los ntawm nws lub qhov muag thiab qhov ntsej los—“tsis yog neeg qhia rau [nws].” Nws “Txiv tus uas nyob saum ntuj ceeb tsheej qhia rau [nws]” kom nws muaj ib zaj lus tim khawv. Kev Tshwm Sim yog lub pob zeb uas tus Cawm Seej tau txhim tsa Nws lub Koom Txoos rau saud puag thaum ub thiab niaj hnub no—kev tshwm sim uas los saum ntuj los rau Nws cov tub qhe. Thiab nov yog lub pob zeb uas peb yuav nyob saud kom ua Yexus Khetos cov thwj tim—kev tshwm sim hais tias Yexus yog tus Khetos thiab Nws cov tub qhe tuav cov “yawm sij uas qhib ntuj ceeb tsheej rau [peb].” Thaum peb nyob ruaj khov saum lub hauv paus no, ntuj txiag teb tsaus lub hwj chim los “yuav kov tsis yeej [peb]” (Mathais 16:15–19).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 16:13–17

Ib zaj lus tim khawv txog Yexus Khetos yeej los ntawm kev tshwm sim.

Yog Yexus Khetos tau nug tib neeg niaj hnub no hais tias, “Sawv daws hais tias Neeg Leej Tub yog leej twg?” koj xav tias lawv yuav teb li cas? Koj yuav teb li cas yog Yexus tau nug koj tias, “Nej ho hais tias kuv yog leej twg?” (Saib Mathais 16:13–15.)

Cia li xav txog koj zaj lus tim khawv txog tus Cawm Seej thiab koj tau txais qhov no li cas. Koj kawm dab tsi los ntawm Mathais 16:15–17 uas yuav pab koj zaj lus tim khawv muaj zog? Yog koj xav kawm ntxiv txog ib zaj lus tim khawv thiab kev tshwm sim, cia li xav txog tej nqe vaj lug kub no: Yauhas 15:26; 2 Nifais 31:17–18; Amas 5:45–48; thiab Lus Qhuab Qhia thiab Kev Khi Lus 8:2–3.

Kuj saib “President Nelson: Hear Him—Personal Revelation” (video), ChurchofJesusChrist.org.

Mathais 16:13–19; 17:1–9; Malakaus 9:2–9

Cov “yawm sij uas qhib ntuj ceeb tsheej” los muaj nyob hauv lub ntiaj teb hnub no.

Cov “yawm sij uas qhib ntuj ceeb tsheej” uas tus Cawm Seej cog lus tias yuav muab rau Petus yog cov yawm sij pov thawj hwj (Mathais 16:19). Cov yawm sij pov thawj hwj yog dab tsi? Vim li cas peb yuav tsum muaj cov yawm sij no? Cia li xav txog tej lus nug no thaum koj nyeem txog tus Cawm Seej tej lus cog tseg nyob hauv Mathais 16:13–19 thiab thaum muaj raws li Nws tau cog lus nyob hauv Mathais 17:1–9; Malakaus 9:2–9 (kuj saib Joseph Smith Kev Txhais, Malakaus 9:3 [nyob hauv Malakaus 9:4, lub cim nram qab a]).

Lwm yam kev pab koj kawm txog cov yawm sij pov thawj hwj los muaj nyob hauv phau Lus Qhuab Qhia thiab Kev Khi Lus 65:2; 107:18–20; 110:11–16; 128:9–11; “Yawm Sij ntawm lub Pov Thawj Hwj” nyob hauv Phau Qhia txog Vaj Lug Kub (scriptures.ChurchofJesusChrist.org); thiab Txwj Laug Gary E. Stevenson zaj lus “Cov Yawm Sij thiab txoj Cai ntawm lub Pov Thawj Hwj Nyob Qhov Twg?,” (Liahona, Tsib Hlis Ntuj 2016, 29–32). Thaum koj kawm tej yam no, xav seb koj puas sau ntawv txog tej yam koj kawm txog cov yawm sij pov thawj hwj thiab cov koob hmoov uas los ntawm cov yawm sij no. Koj xav tias yog vim li cas ib tug yawm sij yog ib lub cim zoo kom piv rau txoj cai coj txoj hauj lwm pov thawj hwj no?

Kuj saib Dallin H. Oaks, “

tus mlom txog Petus uas tuav cov yawm sij

Cov yawm sij pov thawj hwj yog txoj cai kom coj kev siv lub pov thawj hwj.

Mathais 17:14–21; Malakaus 9:14–29

Thaum kuv xav ntseeg ntxiv, kuv yuav pib ntawm kev ntseeg uas kuv muaj lawm.

Yeej muaj tej yam uas kom leej txiv nyob hauv Mathais 17 thiab Malakaus 9 tsis paub tseeb Yexus yuav kho tau nws tus tub zoo. Nws tau thov Yexus cov thwj tim kho nws tus tub, thiab lawv kho tsis tau. Tiam sis thaum nws thov tus Cawm Seej ua ib qho txuj ci tseem ceeb, nws tau xaiv kom muaj kev ntseeg. Nws hais tias, “Tus Tswv, kuv ntseeg.” Ces, vim nws lees hais tias nws txoj kev ntseeg tsis txaus, nws hais tias, “Thov koj pab kom kuv muaj kev ntseeg ntxiv.”

Tus Ntsuj Plig qhia dab tsi rau koj thaum koj nyeem txog qhov txuj ci tseem ceeb no? Leej Txiv Saum Ntuj Ceeb Tsheej tau pab koj li cas kom muaj kev ntseeg ntxiv? Koj yuav ua li cas kom kev ntseeg koj muaj lawm loj tuaj? Tej zaum koj yuav xav sau ntawv txog tej nqe vaj lug kub, tej zaj lus hais hauv lub tuam rooj sab laj, los sis tej lub sij hawm hauv koj lub neej uas tau pab koj txoj kev ntseeg muaj zog ntxiv.

Kuj saib Jeffrey R. Holland, “Lord, I Believe,” Liahona, Tsib Hlis Ntuj 2013, 93–95.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 15:7–9; Malakaus 7:6–7.Ob qho no txawv li cas hais tias peb lub qhov ncauj hwm Vajtswv xwb thiab peb lub siab npuab Nws?

Mathais 15:17–20; Malakaus 7:18–23.Vim li cas peb ceev faj txog tej yam uas peb muab rau hauv peb lub qhov ncauj? Raws li Yexus qhia hauv tej nqe no, vim li cas peb yuav tsum ceev faj txog tej yam uas peb lub qhov ncauj hais—thiab tej uas peb xav hauv peb nruab siab? Peb yuav ua li cas kom peb lub siab huv?

Mathais 16:15–17.Vajtswv ua dab tsi kom qhia peb tias Yexus yog tus Khetos, “uas yog Vajtswv tus uas muaj sia nyob tus Tub”? (nqe 16). Peb yuav ua li cas kom npaj peb tus kheej txais kev tshwm sim no los ntawm Nws?

Mathais 16:13–19; 17:1–9.Yog xav pab qhia cov me nyuam txog cov yawm sij pov thawj hwj, tej zaum nej yuav xav hais Txwj Laug Gary E. Stevenson zaj dab neeg thaum nws xauv nws lub tsheb es cov yawm sij nyob haud (saib daim video “Cov Yawm Sij Dua Twg Lawm?” nyob ntawm ChurchofJesusChrist.org). Tej zaum nej yuav xav cia cov me nyuam siv cov yawm sij qhib nej lub tsev, lub tsheb, los sis lwm lub ntsuas phoo. Xav seb nej puas muab ib daim duab txog tus Thawj Tswj Hwm ntawm lub Koom Txoos rau lawv saib thiab ua tim khawv tias nws tuav tag nrho cov yawm sij, ib yam li Petus tuav.

Mathais 17:20.Cov yaj saub uas ntseeg Yexus Khetos twb tau muab cov roob txav mus (saib Yakhauj 4:6; Mauxes 7:13). Tiam sis feem ntau, peb tsis tas muaj ib qho txuj ci tseem ceeb loj npaum li ntawd. Thawj Tswj Hwm M. Russell Ballard tau qhia tias: “Yog tias peb muaj kev ntseeg me me npaum li ib lub noob mustard, tus Tswv yuav pab tau peb tshem tej roob ntawm kev poob siab thiab kev tsis ntseeg ntawm tej hauj lwm uas peb muaj thaum peb ua hauj lwm pab Vajtswv cov me nyuam, suav cov neeg txheeb ze, cov mej zeej ntawm lub Koom Txoos, thiab lawv cov uas tseem tsis tau los koom lub Koom Txoos” (“Txiaj Ntsim Muaj Nuj Nqis Heev Los ntawm Vajtswv Los,” Liahona, Tsib Hlis Ntuj 2018, 10). Muaj tej lub roob twg hauv peb lub neej uas peb xav muab txav mus? Peb yuav ua li cas kom ntseeg Vajtswv lub hwj chim pab peb tshem tej roob no?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Kuv Ntseeg Tswv Yexus,” Cov Nkauj Qhuas Vajtswv, zaj 51.

Kev Qhia Zoo Dua Ntxiv

Koom ua ke ntau zaus. Thawj Tswj Hwm Henry B. Eyring qhia hais tias: “Siv txhua lub cib fim muab cov me nyuam sau ua ke kom kawm txog Yexus Khetos cov lus qhuab qhia. Piv rau tus yeeb ncuab tej kev siv zog los ntshe tsis muaj cib fim ntau.” (“The Power of Teaching Doctrine,” Ensign, Tsib Hlis Ntuj 1999, 74).

txiv neej nrog nws tus tub mob los cuag Yexus

Xib Hwb, Kuv Coj Kuv tus Me Tub, los ntawm Walter Rane