Tshisakidilu tshia A

Bua Baledi—Kulongolola Bana Beba bua Matuku a Moyo mu Njila wa Tshipungidi wa Nzambi

Bualu mukunanga, mukueyemena, ne mumanya buikadi bueba, Tatu wa mu Diûlu mukupesha tshipolu bua kuambuluisha bana beba bua babuela ne baya kumpala mu njila wenda wa bipungidi, njila wa moyo wa tshiendelela (tangila Dilongesha ne Bipungidi 68:25–28). Etshi tshidi tshiangata kubambuluisha bua kudilongolola bua kuenza ne kulama bipungidi bia tshijila, bumudi tshipungidi tshia ditambula ne bipungidi bienza mu ntempelo. Kupitshila ku bipungidi ebi, bana beba nebikala bakumbana bua kuikala balamata nkayabu ne disanka kudi Mupandishi, Yezu Kilisto.

Kudi njila ya bungi bua kulongolola bana beba bua kuikala kuabu mu njila wa tshipungidi, ne Tatu wa mu Diûlu neakuambuluisha bua kujingulula mushindu muakana wa kubambuluisha. Bu muwudi ukeba dipeta meji kudi Nzambi, lama mu meji ne dilonga dionsu kaditu anu difika mu dilongesha dilongolodibua nansha. Kadi, Tshitupa tshidi tshienza dilonga mu dîku ne makanda tshidi tshipolu thia kulongesha ku tshilejilu ne kupitshila ku malu makesa, bipolu bikesa bia kulongesha—bidi bifika mu mushindu mupepela mu matuku a nsombelu. Bumudi dilonda dia njila wa tshipungidi dikala kadiyi dishintuluka, dia matuku onsu a moyo, kadi didi kulonga pa njila wa tshipungidi. (Tangila “Home and Family,” Teaching in the Savior’s Way [2022], 30–31.)

Kuinshi kudi ngenyi idi mua kulombola ku dipetela meji kudi Nzambi. Udi mua kupeta ngenyi mikuabu bua kulongesha bana ba bidimu bia tshilongedi tshia mbedi mu “Tshisakidilu tshia B: Bua Tshilongelu tshia Mbedi—Kulongolola Bana Beba bua Matuku a Moyo mu Njila wa Tshipungidi ne Nzambi.”

Ditambula ne Dijadikibua

Nefi wakalongesha ne “tshibuelelu [tshitudi] mua kubuelela” mu njila wa tshipungidi “tshidi dikudimuna dia mutshima ne ditambula dia mu mâyi” (2 Nefi 31:17). Kudienzeja kueba bua kuambuluisha bana beba bua kudilongolola bua ditambula ne dijadikibua bidi mua kubambuluisha bua kubanga kuenza ne kulama tuipatshila tua mushinga ne meji. Kudienzeja kueba eku kudi kubanga ne kulongesha pa ditabuja mu Yezu Kilisto ne kukudimuna mutshima. Bidi kabidi biangata kulongesha pa mushindu utudi tuenzulula bipungidi bietu bia ditambula mu kuangata bia didia bia tshijila lumingu lonsu.

Nefi wakalongesha ne “tshibuelelu [tshitudi] mua kubuelela” mu njila wa tshipungidi “tshidi dikudimuna dia mutshima ne ditambula dia mu mâyi” (2 Nefi 31:17

Ebi bidi biambuluishi bidi mua kukuambuluisha: 2 Nefi 31; tshiena bualu tshia pabuatshi tshia makazina a Mulunda pa ditambula; Biena bualu ne Nkonku, “Ditambula,” Tshisangi tshia Mikanda ya Lumu Luimpa.

• Nansha wewa ne dimanya didi dikolesha ditabuja dieba mu Tatu wa mu Diûlu ne Yezu Kilisto, diabanyangana ne muaneba. Bambuluisha bua kumvua ne ditabuja didi tshintu tshidi mua kusasa ne kutungunuka kukola mu moyo. Bintu kayi bidi muaneba mua kuenza bua kutantshisha ditabuja dikola mu Yezu Kilisto kumpala kua bobu kutambushibua?

• Padi muaneba wenza disungula dibi, akula ne disanka pa dipa dia kukudimuna mutshima. Ne pawudi wenza disungula dibi, abanya disanka didi dilua pawudi ukudimuna mutshima dituku dionsu. Jadika ne bualu Yezu Kilisto wakakenga ne wakafua bua mibi yetu, tudi mua kukudimuna mutshima dituku dionsu, kuikala babuikidibua, ne kupeta bukola bua kukudimuka. Padi muaneba ukeba dibuikidibua, buikidila ne dilekelela ne disanka.

• Ambila muaneba pa ditambula dieba. Leja bimfuanyi ne tangalaja bintu bia kala. Akula mushindu kayi uwakumvua, mushindu udi kulama bipungidi bieba bia ditambula bikuambuluisha bua kufika ku dimanya Yezu Kilisto biakana, ne mushindu kayi udi bipungidi bieba bitungunuka kubenesha moyo weba. Kankamika muaneba bua kuela nkonku.

• Padiku ditambula mu dîku dieba anyi mu tshikongu, ndaku ne muaneba bua bamona. Akulayi pamua pa tshiwuvua wewa ne muaneba bamona ne bumvua. Biobi bikumbana, akulayi ne muntu udi muikala mutambuishibua ne ela nkonku bu mudi idi ilonda eyi: “Mushindu kayi uwudi muangata dipangadika edi? Mushindu kayi uwuvua mudilongolola?”

• Pawamona muaneba wenza tshintu tshivuabu balaya bua kuenza, muela kalumbadi ka moyo mujima. Leja ne kulama mapangadika kudi kutuambuluisha bua kudilongolola bua kulama bipungidi bitudi tuenza patudi tutambushibua. Tshinyi tshitudi tulaya Nzambi patudi tutambushibua? Tshinyi tshidiyi mutulaya? (Tangila Mosiya 18:8–10, 13.)

• Akula pa mushindu wa kuikala mujadikibua ne kulua tshidimba tshia Ekelezia wa Yezu Kilisto wa Bansantu ba Matuku a Ndekelu bikubensha. Bu tshilejilu, mushindu kayi uwuvua musemena pabuipi ne Tatu wa mu Diûlu ne Yezu Kilisto pawuvua musadila bakuabu ne muvua bakuabu bakusadila? Ambuluisha muaneba bua ela meji pa mishindu ya kusadila ne kukolesha bakuabu bu tshidimba tshia Ekelezia. Bambuluisha kabidi bua kupeta dimanya didi difumina ku disanka dia kusadila.

• Pawudi wewa ne muaneba bapeta dimanya dia tshijila pamua (bumudi ku ekelezia, panudi nubala mifundu, anyi pawudi usadila muntu) bambila pa ngumvuilu wa nyuma anyi muenenu uwudi mupeta. Bikila muaneba bua kuakula pa bidiye mumvua. Ikala mutuishibua pa mishindu mishilashilangana idi Nyuma wakula kudi bantu, biangata mishindu idiyi mukuakuila nkayeba. Ambuluisha muaneba bua kujingulula ne kuabanyangana neba bipolu pavuabu bapeta dimanya dia buenzeji bua Nyuma wa Tshijila.

• Tangilayi pamua bindidimbi bikesa bia videos mu nsangilu wa Tshisangi tshia Mikanda ya Lumu Luimpa udi ne tshiena bualu “Hear Him!” Akulayi pamua pa mishindu mishilangana idi basadidi ba Mukalenga bapeta miyuki kudi mupandishi ne bayumvua. Bikila muaneba bua kuzola tshimfuanyi anyi kuenza video pa mushindu udiyi mumvua dîyi dia Mupandishi.

• Enza bia didia bia tshijila tshikuma tshia tshijila ne disanka mu dîku dieba. Abanyangana ne muaneba mushindu uwudi muimanyina pa Yezu Kilisto pawudi wangana bia didia bia tshijila. Ambuluisha muaneba bua kuenza dilongolola bua kuleja ne bia didia bia tshijila bidi bia tshijila kudibu. Bu tshilejilu, kumvua miaku ya masambila dia bia didia bia tshijila kudi mua kutuvuluija pa bipungidi bietu bia ditambula.

• Biena bualu bia bungi bia makazina a Mulunda bidi ne tunungu, miyuki, ne bibilu bua kuambuluisha bana beba kudilongolola bua ditambula ne dijadikibua. Lekela bana beba basungula bimua bia kubala ne kutshionkomoka neba. (Tangila kabidi nsangilu wa “Preparing for Baptism” mu tshitupa tshia bana tshia tshisangi tshia Mikanda Lumu Luimpa.)

Bukola bua Buakuidi, Bukokeshi, ne Nsapi

Buakuidi budi bukola ne bukokeshi bua Nzambi budiyi ubeneshila bana benda. Buakuidi bua Nzambi budi pa buloba lelu mu Elekezia wa Yezu Kilisto wa Bansantu ba Matuku a Ndekelu. Bidimba bionsu bia Ekelezia bidi bilama bipungidi biabu—bakaji, baluma, ne bana—badi babeneshibua ne bukola bua buakuidi bua Nzambi mu nzubu yabu bua kubakankamika ne mêku abu (Mukanda Munena wa Maludiki: Disadila mu Ekelezia wa Yezu Kilisto wa Bansantu ba Matuku a Ndekelu, 3.6, Tshisangi tshia Mikanda Lumu Luimpa). Bukola ebu budi bukuatshisha bidimba mu dienza mudimu wa lupandu ne dizanjikibua bia Nzambi mu nsombelu wa nkaya ne wa mêku (tangila Mukanda Munena wa Maludiki, 2.2).

Padi baluma ne bakaji basadila mu mabikila mu Ekelezia, badi babienza ne Bukokeshi bua buakuidi, mu buludiki bua aba badi ne nsapi ya buakuidi. Bana bonsu ba Tatu wa mu Diûlu—Bana benda baluma ne bakaji—nebikala babeneshibua padibu bafika ku diumvua biakana buakuidi buenda.

Tudi tupeta milulu ku bukokeshi bua buakuidi. Bidimba bikumbana biluma bidi bipeta bukokeshi bua buakuidi kupitshila ku diambika ne dijidila mu milongu ya buakuidi (Mukanda Munena wa Maludiki, 3.4). Aba badi mu milongu ya buakuidi badi mua kuikala banyishibua kudi muntu udi ne nsapi ya buakuidi bua kukumbaja milulu ya buakuidi.

Bua kulonga bia bungi pa buakuidi, tangila Russell M. Nelson, “Spiritual Treasures,” Liahona, Ngondu wa Dikumi ne Umua 2019, 76–79; Russell M. Nelson, “The Price of Priesthood Power,” Liahona, Ngondu Muitanu 2016, 66–69; “Priesthood Principles,” shapita 3 mu Mukanda Munena wa Maludiki.

• Enza milulu ya buakuidi tshitupa tshia mushinga mu moyo wa dîku dieba. Bu tshilejilu, ambuluisha muaneba bua kudilongolola mu nyuma bua bia didia bia tshijila lumingu lonsu. Kankamika muaneba bua kukeba mabenesha a buakuidi padiyi usama anyi ujinga busambi anyi buludiki. Tshienza tshibidilu bua kuleja mishindu idi Mukalenga ubenesha dîku dieba kupitshila ku bukola bua buakuidi.

• Muwudi ubala mifundu pamua, keba bipolu bua kuyukilangana pa mushindu udi Nzambi ubenesha bantu kupitshila ku bukola buenda. Tangalaja mamanya eba nkayeba pavua Nzambi mukubenesha kupitshila ku buakuidi. Bilejilu bia mabenesha atudi tupeta kudi Nzambi kupitshila ku buakuidi, tangila Mukanda Munena wa Maludiki, 3.2, 3.5.

• Longesha muaneba ne panyima pa ditambula, badi mua kupeta bukola bua buakuidi mu kulama bipungidi bia ditambula. Monununayi pamua mukenji wa Mulombodi Mukulu Russell M. Nelson “Spiritual Treasures” (Liahona, Ngondu wa Dikumi ne Umua 2019, 76–79). Ambila muaneba mushindu udi milulu ya buakudi mituala bukola bua Nzambi mu moyo weba. Bua lista wa imua mishindu itudi babeneshibua kudi bukola bua buakuidi, tangila Mukanda Munena wa Maludiki, 3.5.

• Yukilayi pa lukonku “Musadidi wa Mukalenga mufuanangana ne nganyi?” Balayi pamua Dilongesha ne Bipungidi 121:36–42, ne keba mandamuna. Nansha bionsu biwudi mujingulula muaneba (anyi muntu mukuabu) wenzela umua wa ku nshindamenu eyi anyi ngikadilu mu tunungu etu, tuleja.

• Pawudi wewa ne muaneba nuenzela nsapi bua kukanga tshibi anyi kutemesha mashinyi, angata tusunsa bua kufuanyikija nsapi eyi kudi nsapi idi balombodi ba buakuidi nayi. (Bua ngumvuilu wa nsapi ya buakuidi, tangila Mukanda Munena wa Maludiki, 3.4.1). Tshinyi tshidi nsapi ya buakuidi “ikangula” anyi “itemesha” buetu? Tangila kabidi Gary E. Stevenson, “Where Are the Keys and Authority of the Priesthood?,” Liahona, Ngondu Muitanu 2016, 29–32; “Where Are the Keys?” (video), Tshisangi tshia Mikanda Lumu Luimpa.

  Where Are the Keys?

Kuikala Mutambuishibua ne Mujadikibua bua Bankambua

Ntempelo idi tshitupa tshia dilongolola dia Tatu wa mu Diûlu bua bana benda. Mu nzubu wa Mukalenga, tudi tuenza bipungidi bia tshijila ne Tatu wa mu Diûlu patudi tuenza milulu ya tshijila, yonsu idi ifunkuna kudi Yezu Kilisto. Tatu wa mu Diûlu wakafila mushindu bua bana benda bonsu kuenza bipungidi ne kuikala mu milulu, biangata ne bantu badi kabayi bayipeta mu moyo ewu. Ku ntuandijilu wa tshidimu tshidi muaneba ukumbaja bidimu 12 bakadi bakola kakesa bua kuikala batambushibua ne bajadikibua mu ntempelo bua bankambua bafua (tangila kabidi 1 Kolinto 15:29).

• Yaku misangu yonsu ku nzubu wa Mukalenga padi mishindu yeba ikuanyishila. Akula kudi muaneba pa buatshinyi udi uya ne mushindu kayi udi ntempelo ukuambuluisha bua udiumvua pabuipi ne Tatu wa mu Diûlu ne Yezu Kilisto.

• Monununayi ne yukilayi pamua pa nkoku ya dianyisha dia kubuela mu ntempelo. Udi mua kuyipeta mu mabeji 36–37 a Bua Dikankamika dia Bansonga: Buludiki bua Kuenza Masungula. Akula ne muaneba pa tshinyi tshidi tshifika mu muyuki wa dianyisha dia kubuela mu ntempelo. Umvuija buatshinyi kuikala ne dianyisha dia kubuela mu ntempelo kudi ne mushinga bueba.

• Balayi pamua Malaki 4:6. Akula pa mushindu udi mitshima yenu mua kuikala mikudimuka kudi bankambua benu. Longa bia bungi pa bankambua benu mu dijandula dia malu a kala a dîku dieba pamua mu FamilySearch.org. Keba bankambua badi dijinga ne kuikala batambuishibua ne bajadikibua. Mutangidi wa tshikongu wa ntempelo ne malu a kala a dîku udi mua kukuambuluisha.

• Monununayi pamua bimua bia ku biambuluishi mu nsangilu udi ne tshiena bualu tshia “Temple” mu tshitupa tshia bana mu Tshisangi tshia Mikanda ya Lumu Luimpa. (Tangila kabidi “Preparing Your Child for Temple Baptisms and Confirmations” mu ChurchofJesusChrist.org.)

Kupeta Dibenesha dia Nkambua Mukulu

Dibenesha dia Nkambua Mukulu didi mua kuikala mushimi wa buludiki, busambi, ne dipeta meji kudi Nzambi. Didi ne mibelu ya nkaya buetu ifumina kudi Tatu wa mu Diûlu ne ituambuluisha bua kumvua bumuntu buetu bua tshiendelela ne kipatshila. Ambuluisha muaneba bua kudilongolola bua kupeta dibenesha dia nkambua mukulu mu dibalongesha mushinga ne buikadi bua tshijila bua mabenesha a nkambua mukulu.

Bua kulonga bia bungi pa ntambu, tangila Biena bualu ne Nkonku, “Patriarchal Blessings,” Tshisangi tshia Mikanda Lumu Luimpa.

• Abanyangana ne muaneba dimanya dieba dia kupeta dibenesha dia nkambua mukulu. Udi mua kutangalaja bintu bumudi mushindu uwudi mudilongolola bua kudipeta, mushindu udidi dikuambuluisha bua kusemena pabuipi ne Nzambi, ne mushindu udiyi mutungunuka ne kukuludika kupitshila ku dibenesha edi. Udi kabidi mua kubikila muaneba bua kuakula kudi bidimba bikuabu bia dîku bikadi bipeta mabenesha abu a nkambua mukulu.

• Monununa pamua mukenji wa Randall K. Bennett’s “Your Patriarchal Blessing—Inspired Direction from Heavenly Father” ne mukenji wa Mukulu Kazuhiko Yamashita “When to Receive Your Patriarchal Blessing” (Liahona, Ngondu Muitanu 2023, 42–43, 88–90). Tangalaja ne umua ne mukuabu binudi balonga ku mikenji eyi pa buatshinyi Tatu wa mu Diûlu mmujinga bua tupeta dibenesha dia nkambua mukulu. Bua kulonga pa mushindu wa kupeta dibenesha dia nkambua mukulu, tangila Mukanda Munena wa Maludiki, 18.17.

• Pawikala ne nkambua yeba ivua mipeta mabenesha a nkambua mukulu, bidi mua kuikala bifila meji a nyuma bua kubala amua a ku owu ne muaneba. Bua kukeba mabenesha a nkambua ikadi mifua, buela mu ChurchofJesusChrist.org, tuta pa biamua ku ditumba dia kulu dia dia baluma, ne sungula Patriarchal Blessing.

• Panyima pa muaneba mupeta dibenesha dia nkambua mukulu, bikila bidimba bia dîku bieba bivua koku bua kuamba ngumvuilu yabu ne kuabanyangana ne muaneba.

Kupeta kua Diambika

Mukalenga mujinga kuambika, anyi kubenesha, bana benda bonsu ne bukola bua ku diûlu (Dilongesha ne Bipungidi 95:8). Tudi tuya ku ntempelo bua kupeta diambika dietu nkayetu musangu amu umua, kadi bipungidi bitudi tuenza ne Nzambi ne bukola bua nyuma budiyi utupesha bu tshitupa tshia diambika bidi mua kutubenesha dituku dionsu mu nsombelu wetu.

• Leja foto wa ntempelo mu nzubu mueba. Ambila muaneba pa ngumvuilu uvua mujingulula mu nzubu wa Mukalenga. Akula misangu ya bungi pa dinanga dieba bua Mukalenga ne nzubu wenda ne bipungidi biwudi muenza nenda momu. Keba bipolu bua kuya ku ntempelo ne muaneba bua kukumbaja matambula ne majadiki a bankambua babu.

• Enzelayi pamua temples.ChurchofJesusChrist.org . Balayi pamua kanungu bu “About the Temple Endowment” ne “Prepare for the House of the Lord.” Lekela muaneba ela nkoku idiyi nayi pa ntempelo. Bua buludiki pa tshiwudi mua kuakula pambelu pa ntempelo, tangila mukenji wa Mukulu David A. Bednar “Prepared to Obtain Every Needful Thing” (Liahona, Ngondu Muitanu 2019, 101–4; tangila nanga-nanga tshitupa tshidi ne tshiena bualu “Home-Centered and Church-Supported Learning and Temple Preparation”).

• Muwudi wewa ne muaneba nubuela anyi nujadika milulu mikuabu (bu mudi bia didia bia tshijila anyi dibenesha dia diondopa), angata tshipolu bua kuyukila pa bimanyinu bidi mu mululu. Tshinyi tshidi bimanyinu ebi bileja? Mushindu kayi udibi bijadika bua Yezu Kilisto? Etshi tshidi mua kuambuluisha muaneba bua kudilongolola bua kunana meji pa ngumvuilu wa bifuanyikijilu bia milulu ya ntempelo, bidi bijadika kabidi bua Yezu Kilisto.

• Ambuluisha muaneba bua kumona mushindu udiyi ulama tshipungidi tshia ditambula tshiumvuija mu Mosiya 18:8–10, 13 (tangila kabidi tunungu 8–9, tumvuija mamuma a tshipungidi atshi). Ambuluisha kabidi muaneba bua kumona mushindu udi Mukalenga ubabenesha. Ibaka dieyemena dia muaneba mu bukola buabu bua kulama bipungidi.

• Akula mu dibatokeshela ne misangu ya bungi pa mushindu udi bipungidi bieba bia mu ntempelo biludika masungula eba ne bikuambuluisha bua kusemena babuipi ne Yezu Kilisto. Udi mua kuenzela Mukanda Munena wa Maludiki, 27.2, bua kumonununa bipungidi bitudi benza mu ntempelo. Wewa mupeta diambika, ambila bana beba pa mushindu udi bilulu bia ntempelo bikuambuluisha bua kuvuluka bipungidi ne Yezu Kilisto (tangila “Sacred Temple Clothing” [video], Tshisangi tshia Mikanda ya Lumu Luimpa); Anette J. Dennis, “Put Ye On the Lord Jesus Christ,” Liahona, May 2024, 10–13).

  Sacred Temple Clothing

Kusadila Bukenji

Mukulu David A. Bednar wakalongesha: “Tshintu tshidi tshitamba kuikala ne mushinga tshiwudi mua kuenza bua kudilongolola bua dibikila dia kusadila tshidi kulua muena bukenji kala kumpala kua wewa kuya mu bukenji. … Kipatshila kakena ka kuya mu bukenji; kadi, ka kulua muena bukenji ne kusadila mu nsommbelu wetu mujima ne mutshima onsu, bukola, meji, ne makanda. … Udi udilongolola bua matuku a moyo bua mudimu wa bena bukenji (“Becoming a Missionary,” Liahona, Ngondu wa Dikumi ne Umua 2005, 45–46). Mamanya a muaneba a kulua muena bukenji neababenesha tshiendelela, kabiyi anu bua tshikondu tshidiyi mua kusadila bu muena bukenji.

Bua kulonga bia bungi, tangila Russell M. Nelson, “Preaching the Gospel of Peace,” Liahona, Ngondu Muitanu 2022, 6–7; Gary E. Stevenson, “Love, Share, Invite,” Liahona, Ngondu Muitanu 2022, 84–87; “Adjusting to Missionary Life,” Tshisangi tshia Mikanda ya Lumu Luimpa.

• Mushindu wa kutangalaja lumu luimpa mu mishindu mipepela. Misangu yonsu ikala mumanyishibua bua bipolu bia kutangalaja ne bakuabu ngumvuilu yeba pa Tatu wa mu Diûlu ne Mupandishi ne mabenesha awudi mupeta kupitshila ku lumu luimpa lupiguluja lua Mupandishi ne bu tshidimba tshia Ekelezia wenda. Bikila bakuabu bua kuikala ne dîku dieba mu Ekelezia- ne bibilu- bikuabu bia dîku.

• Keba bipolu bua dîku dieba kuyukila ne bena bukenji. Babikila bua kulongesha balunda beba, anyi kubapesha bua bobu kulongesha bantu mu nzubu weba. Konka bena bukenji pa mamanya adibu bapeta ne mushindu kayi udi disadila mu bukenji dinuambuluisha bua kusema pabuipi ne Yezu Kilisto. Konka kabidi bidibu benza (anyi bajinga kuenza) bua kudilongolola bua kuikala bena bukenji.

• Wewa musadila mu bukenji, akula bitoka ne misangu ya bungi pa mamanya eba. Anyi bikila mulunda anyi bidimba bia dîku bivua bisadila mu bukenji bua kuakula pa abu. Udi kabidi mua kuakula pa mishindu iwuvua mutangalaja lumu luimpa ne bakuabu mu nsombelu weba. Ambuluisha muaneba bua kuela meji pa mishindu ya kutangalaja lumu luimpa.

• Pesha muaneba tshipolu bua kulongesha dîku dieba nshindamenu ya lumu luimpa. Muaneba udi kabidi mua kutangalaja mitaba enda ne bakuabu. Tshilejilu, nudi kabidi mua kuyukila pa lukonku bu “mushindu kayi utudi bua kuleja Mukanda wa Molomo kudi muntu utukayi muanji kumumvua?” anyi “mushindu kayi utudi mua kumvuija dijinga dia Mupandishi kudi muntu udi kayi Muena Kilisto?” Tangila kabidi Ahmad S. Corbitt, “Do You Know Why I as a Christian Believe in Jesus Christ?,” Liahona, Ngondu Muitanu 2023, 119–21.)

• Ambuluisha bana beba bua kulua bakana mu kuakula ne bantu. Mishindu kayi mimpa ya kubanga diyukilangana? Kankamika muaneba bua kulonga mushindu wa kumvua bidi bakuabu bamba, kumvua tshidi mu mitshima yabu, ne kutangalaja malelela a lumu luimpa adi mua kubenesha nsombelu yabu.

• Keba bipolu bua muaneba kulonga pa ngikadilu ne mitabuja makuabu. Bambuluisha bua kujingulula ne kunemeka nshindamenu mimpa ne milelela mu mitaba a bakuabu.

Kupeta Mululu wa Disuikibua

Mu ntempelo, muluma ne mukaji badi mua kuikala basedibua bua tshiendelela. Etshi tshidi tshifika mu mululu mubikidibua ne “disuika dia mu ntempelo.” Nansha mululu ewu ne mua kuikala bidimu bipita bungi bua muaneba mukaji anyi muluma, bintu bikesa, bipepela, bia mushinga binudi nuenza pamua mu bidimu ebi bidi mua kubambuluisha bua kudilongolola bua dibenesha edi dinena.

• Balayi pamua “Dîku: Dimanyisha kudi ba pa Buloba” (Tshisangi tshia Mikanda ya Lumu Luimpa). Tshinyi tshidi dimanyisha edi dikulongesha pa disanka mu dîku ne pa mabaka adi maya kumpala? Ne muaneba, sungula umua wa ku nshindamenu mifundibua mu dimanyisha bua kulonga. Udi mua kukeba mifundu idi ipetangana ne nshindamenu mu Guide to the Scriptures. Udi kabidi mua kupangadika bua kutamba kuenzela nshindamenu ewu mu dîku dieba. Muwudi wenzela tuipatshila tueba, yukilayi pamua pa bipeta bia kuteka mu tshienzedi nshindamenu eyi mu moyo wa dîku.

• Ne bana beba, balayi mukenji wa Mulombodi Mukulu Dieter F. Uchtdorf “In Praise of Those Who Save” (Liahona, Ngondu Muitanu 2016, 77–80). Pawudi upeta tshitupa tshifunda “Tshiapu tshia bintu bia Kuimansha,” udi mua kukeba bintu mu nzubu weba bia kuimansha ne bintu bikuabu bidi kabiyi bia kuimansha. Akula pa muwudi wenzela bintu ebi mu mishindu mishilangana pawudi ujinga bua bishala bua ntanta mula. Tshinyi tshidi etshi tshileja pa mushindu utudi mua kuenzela malanda a dibaka ne dîku? Tshinyi tshikuabu tshitudi balonga mu muyuki wa Mulombodi Mukulu Uchtdorf pa mushindu udi Mupandishi mua kutuambuluisha bua kuibaka dibaka ne dîku bikola?

• Akula mu bulelela ne muaneba pa bintu biwudi wewa ne mukajeba nulonga pa kuikala ne Kilisto pankatshi pa dibaka dia tshiendelela ne mishindu inudi nuteta bua kudishidimuja. Pawikala wewa ne mukajeba nukadi basuikibua mu ntempelo, leja muaneba mu tshilejilu mushindu uwudi udienzeja bua kulama bipungidi bieba ne Mukalenga. Ambila muaneba mushindu uwudi udienzeja bua kuteka Tatu wa mu Diûlu ne Mupandishi pankatshi pa malanda eba ne mushindu kayi udibu bakuambuluisha (tangila kabidi Ulisses Soares, “In Partnership with the Lord,” Liahona, Ngondu wa Dikumi ne Umua 2022, 42–45).

• Padi mapangadika a dîku ajinga kuenjibua, enza bipangu bia dîku ne mayukilanganyi. Tuishibua ne muenenu ya bidimba bionsu bia dîku idi miumvukibua ne miangatshibua ne mushinga. Enzela mayukilanganyi bu tshipolu tshia kuenza diyukila dimpa ne dia disanka mu malanda a dîku, nansha bantu bonsu kabayi ne muenenu umua. (Tangila M. Russell Ballard, “Family Councils,” Liahona, Ngondu Muitanu 2016, 63–65.)

• Koku kufika dibenga kumvuangana anyi bilumbu mu dîku, leja ditukija ne lusa. Ambuluisha muaneba bua kumona mushindu kayi uwudi utuala bilumbu mu mishindu ya Kilisto idi mua kubambuluisha bua kudilongolola bua dibaka dimpa. Balayi pamua Dilongesha ne Bipungidi 121:41–42, ne akula pa mushindu udi nshindamenu mu tunungu etu mua kuikala yenzeka mu dibaka.