Diya ku Nzubu, kudi Yongsung Kim

Ngondu wa Muanda Muteketa 14–20: Nendulombola mu Njila

Dilongesha ne Bipungidi 77–80

Bidimu bishadila ku bibidi panyima pa Ekelezia wa Yezu Kilisto mupingajibua, kukavu bidimba bisambuka pa 2.000 ne uvua utanta lukasa. Mu Ngondu Muisatu 1832, Joseph Smith wakasangila ne balombodi bakuabu ba Ekelezia “bua kuyukilangana pa malu a Ekelezia”: dijinga dia kupatula mabuluila, dia kusumba buloba bua kuikala kusangila, ne bua kukuba bapela (tangila Dilongesha ne Bipungidi 78, tshifulu tshia tshitupa). Bua kuandamuna ku majinga â, Mukalenga wakabikila nomba mukesa wa balombodi ba Ekelezia bua kuenza Tshiapu tshia Pamua, tshisumbu tshiasangisha madienzeji abu bua “kutantshisha bualu” bua Mukalenga (kanungu 4) mu tshitupa etshi. Kadi nansha mu bintu ebi bia dilombola, Mukalenga udi ushindamena pa malu a tshiendelela. Ku ndekelu, kipatshila ka tshiamua tshia dipatuila anyi nzubu wa tshilaminyi—bu bikuabu bidi bionsu bia bukalenga bua Nzambi—bidi bua dilongolola bana benda bua kupeta muaba mu bukalengabua bua selestiya ne mabanji a tshiendelela (kanungu 7, 18). Ne pikala mabenesha â makola bua kuwumvua mpindiewu, munkatshi mua ntatu ya ku dituku ne dituku, udi utujadikila bua tuikala basangala, bualu neatulombola mu njila (kanungu 18).

Ngenyi bua Kulonga mu Dîku ne mu Ekelezia

Dilongesha ne Bipungidi 77

Nzambi udi ufila dimanya kudi bantu badi badikeba.

Pavua Joseph Smith ne Sidney Rigdon benza mudimu ne disakibua dia dikudimuna Bibiliya, bavua badiela nkonku pa mukanda wa Buakabuluibua, bu muvua bantu bonsu. Ne bu muvua Joseph mumanya bimpa ne, pavuaye upanga meji, uvua mua kualomba kudi Nzambi. Ngenyi ivuaye mupeta idi mu Dilongesha ne Bipungidi 77. Pawudi ubala tshitupa etshi, ela meji bua kufunda ngenyi yeba ya mu shapita ya mushinga ya mu mukanda wa Buakabuluibua. Tshinyi tshiwudi muyila ku dilonga dieba pa dipeta dibuluila?

Dikudimuna dia Bibiliya, kudi Liz Lemon Swindle

Dilongesha ne Bipungidi 78

Tshiapu tshia Pamua tshivua ntshinyi?

Tshiapu tshia Pamua tshivua tshishikika bua kulombola kupatula mfundilu ya Ekelezia ne malu a bisalu mu Ohio ne mu Missouri. Tshivua tshienza kudi Joseph Smith, Newel K. Whitney, ne balombodi bakuabu ba Ekelezia bavua bateka biambuluishi bua kuandamuna ku majinga a mubidi a Ekelezia uvua mu ditanta dikola. Diakabi, Tshiapu tshia Pamua tshiakabuela dibanza ne tshiakashipibua mu 1834 pavua dibanza dipita bungi.

Tangila kabidi “Newel K. Whitney and the United Firm,” mu Revelations in Context, 142–47; Biena Bualu bia Muyuki wa Ekelezia, “United Firm (‘United Order’),” Tshisangi tshia Lumu Luimpa.

Dilongesha ne Bipungidi 78:1–7

Ndi mua kuambuluisha bua “kutantshisha bualu” bua Kilisto ne Ekelezia wenda.

Mukalenga wakambila Joseph Smith ne balombodi bakuabu ne dilombola nzubu wa tshilaminyi ne nzubu wa tshipatuidi bidi biambuluisha bua “kutantshisha bualu bunudi babuela” (Dilongesha ne Bipungidi 78:4). Tshinyi tshitudi mua kuamba ne tshidi “bualu” bua Ekelezia wa Mupandishi? Nana meji pa tshiotshi pawudi ubala Dilongesha ne Bipungidi 78:1–7. Mishindu kayi mikuabu mishilangana iwudi mua kuambuluisha bua kutantshisha bualu ebu—biangata ne mu dîku dieba?

Tangila kabidi Mukanda Munena wa Maludiki, 1.2.

Dilongesha ne Bipungidi 78:17–18

Mukalenga neandombola mu njila.

Buatshinyi udi wela meji ne Mukalenga udi ubikila misangu mikuabu bamulondi ne “bana bakesa”? (Dilongesha ne Bipungidi 78:17). Diba kayi diwukadi mudiumvua bu muana mukesa, pamuapa bualu bua tshintu kampanda “kuvua mutshiumvua to” anyi “kuvua mutshifila to”? (kanungu 17–18). Tshinyi tshiwudi upeta mu tunungu etu tshidi mua kukuambuluisha bua kuikala musangala (kanungu 18) mu meba a buina â? Ela meji bua kupeta tshimfuanyi tshieba tshia pauvua muana, ne nana meji mushindu uwuvua mukola mu nyuma tô ne katataka. Anyi ela meji pa tshintu kampanda tshivua tshikukolela pauvua nsonga kadi tshikadi tshikuteketela mpindiewu. Mu mushindu kayi udi Tatu wa mu Diûlu musua bua wikala bu muana? (tangila Mosiya 3:19). Mushindu kayi udiyi [utulombola] mu Njila?

Dilongesha ne Bipungidi 78:19

Ndi mua kupeta bintu bionsu ne kusakidila.

Bua kudilongolola bua kulonga Dilongesha ne Bipungidi 78:19, udi mua kuenza lista wa bintu bimpa bivua bikufikila lelu. Pashisha enza lista wa bintu bidi kabiyi bimueneka bu mabenesha kuwudi. Nana meji ku milongu eyi pawudi ubala Dilongesha ne Bipungidi 78:19. Dishilangana kayi didi dienza mu moyo weba pawudi upeta “bintu bionsu” ne kusakidila—nansha bintu bidi kabiyi bimueneka bu mabenesha?

Bua kulonga bia bungi pa mushindu udi kusakidila kudi Nzambi mua kukoka moyo weba, jandula mifundu eyi ne enza lista wa malelela awudi upeta mu: Misambu 107:8–9; Luka 17:11–19; Filipoyi 4:6–7; Mosiya 2:19–24; Alama 34:38; 37:37; Dilongesha ne Bipungidi 46:32; 59:7, 15–21.

Udi mua kukeba mu mukenji wa Mulombodi Mukulu Dieter F. Uchtdorf “Grateful in Any Circumstances” (Liahona, Ngondu Muitanu 2014, 70–77) bua mubelu pa mushindu wa kuikala basakididi. Udi mua kukeba mubelu wa momumua mu video “President Russell M. Nelson on the Healing Power of Gratitude” (Tshisangi tshia Lumu Luimpa). Mushindu kayi udi disakidila dilenga malanda eba ne Yezu Kilisto?

President Russell M. Nelson on the Healing Power of Gratitude

Keba ne abanya. Pawudi mupeshibua bujitu bua kulongesha, keba mushindu wa kuambuluisha bantu bua bakeba mifundu anyi miaku ya bambi—bobu nkayabu anyi mu bisumbu bikesa—ne babanyangana bidibu balonga. Tshilejilu, mu tshibilu etshi udi mua kupesha muntu yonsu anyi tshisumbu tshitupa tshia mukenji wa Mulombodi Mukulu Uchtdorf ne balomba bua babanyangana tshiambilu anyi mulongu wa tshidibu bumvua mu tshikosu tshia tshidiyi mulongesha.

Tangila kabidi “Count Your Blessings,” Hymns, no. 241; Biena Bualu ne Nkonku, “Gratitude,” Tshisangi tshia Lumu Luimpa.

Dilongesha ne Bipungidi 79–80

Dibikila bua kusadila Nzambi ndipita miaba yonsu indi nsadila.

Bilondeshila Dilongesha ne Bipungidi 80, Mukulu David A. Bednar wakalongesha ne, “Pamuapa dimua dia ku malongesha adi Mupandishi utulongesha mu dibuluila edi didi mua kutupesha mudimu mu muaba musunguluka udi munanga ne wa mushinga kadi tshikala tshipuekela ku dibikila ku mudimu” (“Called to the Work,” Liahona, Ngondu Muitanu 2017, 68). Mamanya kayi adi manuambuluisha bua kulonga ne miaku ya Mukulu Bednar idi milelela? Malongesha kayi a nsakidilu awudi upeta mu Dilongesha ne Bipungidi 79–80 adi mua kuambuluisha ewu udi mupeta dibikila?

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga .

Ngenyi bua Kulongesha Bana

Dilongesha ne Bipungidi 77:2

Nzambi wakafuka tshifukibua tshionsu tshidi pa buloba.

• Pawudi wewa ne bana beba nubala Dilongesha ne Bipungidi 77:2 pamua, nudi mua kutangila bimfuanyi bia nyama, bia bîshi ne bia nyunyi. Bana beba badi mua kufunkuna bimfuanyi padibu babala miaku “Nyama,” “bintu bidi bidikoka,” ne “bidi bibuwuka mûlu.” Abanyanganayi mushindu kayi udi bifukibua bia Nzambi binuambuluisha bua kumvua dinanga dienda.

Nzambi wakafuka bifukibua bionsu bidi pa buloba.

Dilongesha ne Bipungidi 78:4

Ndi mua kuambuluisha “ditantshisha bualu” bua Yezu Kilisto.

• Bua kuambuluisha bana beba bua kuela meji pa mudimu wabu mu mudimu wa Mukalenga, bala nabu Dilongesha ne Bipungidi 78:4 bua kuleja “bualu” butudi “bananga” (bitaba anyi basungula bua kutua mpanda) patuvua batambuishibua. Bambuluisha bua batangila bitupa bia mifundu bu eyi bua mandamuna adi akengedibua: Mosiya 18:8–10; Dilongesha ne Bipungidi 20:37; Mose 1:39. Bana beba badi mua kusanka ne mudimu mu dinaya mushindu udibu mua kuambuluisha mu mudimu wa Mukalenga. Tshilejilu, ntshifuanangana ne tshinyi “bua kuambuilangana majitu enu” anyi “kuangata dîna dia Yezu Kilisto pa mutu penu”? Mushindu kayi udi etshi “tshitantshisha bualu” bua Kilisto?

Dilongesha ne Bipungidi 78:6

Ndi mua kuabanya tshindi natshi ne bakuabu.

• Bua kulongesha tshidi tshiumvuija “momumua mu malu a pa buloba” (kanungu 6), udi mua kupesha bana beba bimfuanyi bia bantu mu dijinga (nzala, batapika, anyi ne mashika) ne bintu bidi mua kubambuluisha (bu mudi biakudia, bisuiki, anyi bia kudibuikila). Pashisha bana beba badi mua kutuangaja bimfuanyi ne bintu. Tshinyi tshitudi mua kuabanyangana bua kuambuluisha bantu mu dijinga?

• Bua kupeta ngumvuilu mukuabu wa tshitupa 78, bala ne bana beba biambilu bidi muinshi mua bimfuanyi bibidi bia kumpala “Chapter 28: The Prophet Joseph Goes to Missouri Again” (mu Doctrine and Covenants Stories, 108, anyi video mukumbana mu Tshisangi tshia Lumu Luimpa ). Pashisha bana beba badi mua kudifuanyikija bu badi bambuluisha muntu kampanda bua kuibaka nzubu, kuabanya tshiakudia, anyi disadila mu mushindu mukuabu.

  Chapter 28: The Prophet Joseph Goes to Missouri Again: March–May 1832

Dilongesha ne Bipungidi 78:18

Yezu Kilisto neandombola mu njila.

• Bidi mua kuikala bia disanka bua bana beba kuakula pa tshidi tshiumvuija kuikala mulombodi ne pashisha kulombola tshibilu. Panyima pa dibala pamua Dilongesha ne Bipungidi 78:18, nudi mua kuyukilangana pa tshikondu tshituvua basua bua Yezu atulombola. Ela meji bua dimba musambu bu mudi “I Will Walk with Jesus” (Tshisangi tshia Lumu Luimpa).

Dilongesha ne Bipungidi 78:19

Ndi mua kupeta “bintu bionsu ne kusakidila.”

• Bala ne bana beba Dilongesha ne Bipungidi 78:19 bua kujandula tshidi Mukalenga mulaya bantu badi ne kusakidila. Ambuluisha bana beba bua bumvua tshidi tshiumvuija misangu lukama, pamuapa kudibaleja tshintu tshikesa tshimua ne pashisha bintu lukama bia momumua. Pamuapa badi mua kuzola bimfuanyi bia bintu bidibu bapeta kudi Mukalenga ne kusakidila.

Bua ngenyi ya bungi, tangila bualu bua ngondu ewu bua makazina a Mulunda .

Budimi bua Nzambi, kudi Sam Lawlor