Tshisokomenu, kudi Shaelynn Abel

Ngondu wa Muanda Muteketa 7–13: Difutu Diabu Nedikala Dinena ne Butumbi Buabu Nebuikala Tshiendelela

Dilongesha ne Bipungidi 76

Tshinyi tshiamfikila panyima pa lufu luanyi? Pabuipi ne muntu yonsu uvua udiebeja lukonku elu mu mushindu umua anyi mukuabu. Bua nkama ya bidimu, ngenzelu ya bungi ya buena Kilisto, ivua yeyemena pa malongesha a bibiliya, avua malongesha bua diûlu ne ngena, mpaladiso bua bakana ne dikenga bua bena bubi. Kadi dîku dijima didi mua kuikala bushuwa dipandika menemena anyi? Mu Ngondu Muibidi 1832, Joseph Smith ne Sidney Rigdon bavua badiebeja ne kuvua bia bungi bia kumanya pa tshiena bualu (tangila Dilongesha ne Bipungidi 76, tshifulu tshia tshitupa).

Bushuwa bivuaku. Pavua Joseph ne Sidney banana meji pa bintu ebi, Mukalenga wakalenga mesu a mitshima yabu ne akunzuluka (kanungu 19). Bakapeta dibuluila dia dikema, dialabala, dia butoka didi Bansantu babikila bipepela ne “Tshimônyi.” Tshiakakangula madidishi a diûlu ne tshiakapesha bana ba Nzambi tshingenyingenyi tshia muenenu wa tshiendelela. Tshimônyi tshiakabuluila ne diûlu didi dinena ne dialabala ne dikonga bionsu ne bidi bantu kabayi bafuanyikija. Nzambi udi muena lusa lua bungi ne mululama kupita mutudi mua kumumvua. Ne bana ba Nzambi badi ne muaba wa tshiendelela wa butumbi utudi katuyi mua kufuanyikija.

Tangila Saints, 1:147–50; “The Vision,” mu Revelations in Context, 148–54.

Ngenyi bua Kulonga mu Dîku ne mu Ekelezia

Dilongesha ne Bipungidi 76

Lupandu ludi lulua kupitshila kudi Yezu Kilisto, Muana wa Nzambi.

Tshitupa 76 tshidi tshibuluila malelela a mushinga pa muaba wetu wa tshiendelela, kadi kabiena bikumbana bua kuamba ne dibuluila edi didi pa makalenga asatu a butumbi anyi amu pa dilongolola dia lupandu. Nangananga, tshitupa 76 tshidi pa Yezu Kilisto, udi wenza dilongolola dia Nzambi bua lupandu luetu ne butumbi bua tshiendelela bikumbana. Pawudi ubala, udi mua kukeba miaku anyi biambilu bidi biumvuija malanda pankatshi pa Yezu Kilisto ne bantu badi bapiana makalenga mashilangana a butumbi. Pamuapa tabulo bu udi ulonda ewu udi mua kuambuluisha bua kufunda tshiwudi upeta.

Bukalenga bua butumbi	Malanda ne Yezu Kilisto	Mabenesha a tshiendelela
Bukalenga bua butumbi Selestiya (kanungu 50–70, 92–96)	Malanda ne Yezu Kilisto Bujadiki bupeta bua Yezu Kuenza ne kulama bipungidi Nenda	Mabenesha a tshiendelela Kukezukibua ku bubi Kutamba ku ditabuija
Bukalenga bua butumbi Terestiya (kanungu 71–79, 97)	Malanda ne Yezu Kilisto	Mabenesha a tshiendelela
Bukalenga bua butumbi Telestiya (kanungu 81–90, 98–106, 109–12)	Malanda ne Yezu Kilisto	Mabenesha a tshiendelela

Tshinyi tshiwudi umvua bua kuenza bua kukankamika malanda eba ne Mupandishi?

Padi Wilford Woodruff ubala tshimônyi etshi, wakamba ne, “Ngakumvua bua kunanga Mukalenga mu moyo wanyi kupita kumpala” (tangila “Mêyi a Dipinguluja: Majadiki a ‘Tshimônyi’”). Tshinyi tshiwudi ulonga pa Yezu Kilisto ku kanungu 1–5, 20–24, 39–43, 107–8 tshidi tshienza bua umunanga bikola?

Tangila kabidi 1 Petelo 3:18–19; 4:6; Dallin H. Oaks, “What Has Our Savior Done for Us?,” Liahona, Ngondu Muitanu 2021, 75–77; “I Stand All Amazed,” Hymns, no. 193.

Shindamena pa Tatu wa mu Diûlu, pa Yezu Kilisto, ne pa Dilongesha diabu. Ku bionsu bitudi mua kulonga mu mifundu, malelela a mushinga wa bungi adi atuambuluisha bua kuibaka ditabuija mu Tatu wa mu Diûlu ne Yezu Kilisto, dikudimuna mutshima, kuenza ne kulama bipungidi Nabu, ne kupeta Nyuma wa Tshijila. Nansha biobi bisankisha bua kufuanyikija anyi kusulakaja ngikadilu anyi bibidilu bia bantu bikala mua kupeta makalenga a butumbi mashilangana, bidi bia mushinga bua kushindamena pa Tatu wa mu Diûlu ne pa Mupandishi. Bionsu bidibu benza bua kutulongolola ku butumbi ebu nebitutangija Kudibu.

Mu tshibambalu etshi, Joseph Smith wakamona tshimônyi tshidi tshifunda mu Dilongesha ne Bipungidi 76.

Dilongesha ne Bipungidi 76:5–10, 114–18

Ndi mua kumvua disua dia Nzambi ku bukola bua Nyuma wa Tshijila.

Bidimba bionsu bia Ekelezia biakitaba ne lutatu dibuluila didi mu tshitupa 76, bualu divua dilongesha ne pabuipi ne bantu bonsu nebapandishibua ne nebapeta mulongu kampanda wa butumbi. Tshilejilu, Brigham Young wakamba ne: “Bilela bianyi bivua ne, padi tshimônyi tshinduilua bua musangu wa kumpala, tshivua buludi tshibengangana ne tshipangakana ne ndongelu wanyi wa kala. Ngakamba ne, Ngindila ndambu. Ntshivua mubenga to, kadi tshivua mua kutshiumvua to.” Wakumvuija ne uvua ne bua “kuela meji ne kusambila, kubala ne kuela meji, tô ne panguvua ntshimanya ne ntshiumvua tshionsu nkayanyi” (mu “The Vision,” mu Revelations in Context, 150). Tshinyi tshiwudi mulonga ku mamanya edi tshidi mua kukuambuluisha pikala Nzambi mukubuluila bintu bidi bishilangana ne ngumvuilu weba wa mpindiewu? Tshinyi tshiwudi ulonga pa Nzambi mu Dilongesha ne Bipungidi 76:5–10, 114–18? Tshinyi tshidi tunungu etu tulongesha pa mushindu uwudi mua kumvua disanka dimpa dia disua dia Nzambi? (kanungu 7).

Dilongesha ne Bipungidi 76:39–44, 50–70

Dizanjikibua didi tshipidi tshia kulu tshia lupandu.

Dilongesha ne Bipungidi 76:39–44 tudi tumvuija lupandu mu kabujima. Tunungu 50–70 tudi tumvuija dizanjikibua, mushindu musunguluka wa lupandu. Mushindu kayi uwudi mua kumvuija dishilangana didi pankatshi pa lupandu ne dizanjikibua? Mudimu kayi wa Mupandishi mu yoyi yonsu ibidi? Tshinyi tshiwudi upeta mu tunungu etu tshidi tshikusaka bua kukeba dizanjikibua?

Tangila kabidi Yone 3:16–17; Dilongesha ne Bipungidi 132:20–25.

Dilongesha ne Bipungidi 76:50–70, 92–95

Tatu wanyi wa mu Diûlu mmusua bua mpeta moyo wa tshiendelela mu bukalenga bua Selestiya.

Ukatu mudikonka—anyi mudiebeja—pawudi mua kulua bu muntu wapeta butumbi bua selestiya, bu mudibu bumvuija mu Dilongesha ne Bipungidi 76:50–70, 92–95? Nansha mudibi ne mushinga bua kumanya tshidi Nzambi muindila kutudi, ela meji kabidi bua kutangila mu tunungu etu bua bidiye mutuenzela—ne bidiye mu dienza—bua kutuambuluisha bua kulua bu Yeya. Buatshinyi udi umvua ne didienzeja dieba didi dibadibua kudiyi?

Mushindu kayi udi tshimônyi tshia butumbi bua selestiya tshilenga mushindu uwudi musua kusomba mu matuku eba a moyo?

Tangila kabidi Mose 1:39; J. Devn Cornish, “Am I Good Enough? Will I Make It?,” Liahona, Ngondu wa Dikumi ne Umua 2016, 32–34.

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga .

Ngenyi bua Kulongesha Bana

Dilongesha ne Bipungidi 76:24

Tudi bonsu bana ba Nzambi.

• Bua kuambuluisha bana beba bua bumvua bukola buabu bua bunzambi, udi mua kubaleja bimfuanyi bia bana ne bia baledi babu. Nudi mua kubala Dilongesha ne Bipungidi 76:24 ne kuyukilangana buatshinyi nudi ne disanka bua kumanya ne tudi bonsu bana ba baluma ne ba bakaji ba Nzambi.

• Nudi mua kuimba kabidi pamua “I Am a Child of God” (Mukanda wa Misambu ya Bana, 2–3) ne bikila bana beba bua badifunkuna padibu bimba “Ndi.” Nanku imbayi musambu kabidi, mudialuja “Ndi muikala” ne “udi muikala” mudifunkuna dia mukuabu muntu.

Dilongesha ne Bipungidi 76:5, 41–42, 69

Yezu Kilisto udi Mupandishi wanyi.

• Enza dinaya ne bana beba mu dinaya edi mudi mukuabu ukonka ne “Tshinyi tshidi Yezu Kilisto mukuenzela?” Wewa ne bana beba nudi mua kukeba mandamuna adi akumbana mu kanungu 5, 41–42, anyi 69 mu tshitupa 76. Nudi mua kuimba kabidi “He Sent His Son,” Mukanda wa Misambu ya Bana, 34–35. Mushindu kayi utudi mua kuleja disakidila dietu bua tshidi Mukalenga mutuenzela?

Diumvuija ku Suffer the Children [Kukengesha Bana], kudi J. Kirk Richards

Dilongesha ne Bipungidi 76:62

Tatu wa mu Diûlu mmusua bua mpingana bua kusomba nenda kashidi.

• Wewa ne bana beba nudi mua kubala anyi kutangila tshitupa anyi mujima wa “Chapter 26: The Three Kingdoms of Heaven” (in Doctrine and Covenants Stories, 97–103, anyi video udi mukumbanangana mu Tshisangi tshia Lumu Luimpa) ne abanyanganayi tshinudi bananga pa tshimônyi tshivua Joseph Smith mupeta. Lekela bana beba babanya ngenyi ne ngumvuilu biabu pa tshidi mua kuikala nsombelu ne Tatu wa mu Diûlu mu bukalenga bua selestiya.

  Chapter 26: The Three Kingdoms of Heaven: 16•February 1832

• Udi mua kubala kabidi Dilongesha ne Bipungidi 76:62 ne kubikila bana beba bua kuzola bimfuanyi biabu bobu ne Tatu wa mu Diûlu ne Yezu Kilisto mu bukalenga bua selestiya (tangila dibeji dia tshibilu tshia lumingu elu).

Dilongesha ne Bipungidi 76:12, 15–19, 114–16

Dilonga dia mifundu didi mua kungambuluisha bua “kumvua malu a Nzambi.”

• Udi mua kubikila bana beba bua kubala kanungu 15–19 kupatula tshivua Joseph Smith ne Sidney Rigdon benza pavuabu bamona tshimônyi mu Dilongesha ne Bipungidi 76. Londela bana beba pa diba diûvua mupeta disakibua pawuvua ubala mifundu, ne konka bana beba ne badi mua kuikala ne dimanya dia momumua.

Bua ngenyi ya bungi, tangila bualu bua ngondu ewu bua makazina a Mulunda .

Glory in Degrees [Milongu ya Butumbi], kudi Annie Henrie Nader