Apendiks B

Para iti Primary—Panangisagana kadagiti Ubbing para iti Tungpal Biag iti Dana ti Katulagan ti Dios

Kadagiti bulan nga addaan iti lima a Domingo, maallukoy a sukatan dagiti mannursuro iti Primary ti naiskediul nga Umaykayo, Sumurot Kaniak a balabala iti maikalima a Domingo iti maysa wenno ad-adu pay kadagitoy nga aktibidad iti panagsursuro.

Dagiti Pagbatayan ken Ordinansa ti Ebanghelio ni Jesucristo

Isuro ti doktrina ni Cristo kadatayo no kasano a makasublitayo iti Dios.

Idi nagpakita ni Jesucristo kadagiti tao iti America, insurona kadakuada ti doktrinana. Kinunana a mabalintayo a sumrek iti pagarian ti Dios no addaantayo iti pammati, agbabawi, agbuniag, umawat iti Espiritu Santo, ken agibtur agingga iti panungpalan (kitaen iti 3 Nephi 11:31–40; Doktrina ken Katulagan 20:29). Makatulong kenka a mangisuro kadagiti ubbing dagiti aktibidad iti baba ta dagitoy a pagbatayan ken ordinansa ti mangtulong kadatayo nga umasideg iti Mangisalakan iti unos ti panagbiagtayo.

Tapno masursuro ti ad-adu pay maipapan iti doktrina ni Cristo, kitaen iti 2 Nephi 31.

Dagiti Mabalin nga Aktibidad

• Ikkam dagiti ubbing kadagiti ladawan a mangipakita iti pammati ken ni Jesucristo, panagbabawi, panagbuniag ken kumpirmasion (kitaen iti Libro ti Arte ti Ebanghelio, dagiti num. 1, 111, 103, ken 105). Basaen wenno yulo a kadua dagiti ubbing ti maikapat a pagannurotan ti pammati, ket idawat kadakuada nga ingatoda dagiti ladawanda no madakamat dayta a pagbatayan wenno ordinansa. Tulongam dagiti ubbing a makaawat no kasano a matulongannatayo ti tunggal maysa kadagitoy a pagbatayan wenno ordinansa nga agbalin nga ad-adda pay a kas iti Nailangitan nga Ama ken ni Jesucristo.

• Kasano a matulongam dagiti ubbing a makaawat a ti pammati, panagbabawi, panagbuniag, ken kumpirmasion ket saan a maminsan laeng a pasamak no di ket makaimpluensia iti naespirituan a panagdur-astayo iti unos ti panagbiagtayo? Kas pagarigan, mabalinmo nga ipakita kadakuada ti ladawan ti maysa a bukel ken dakkel a kayo (wenno idrowing dagitoy a banag iti pisarra). Tulongam ida a mangpanunot kadagiti banag a makatulong a mangpatubo iti bukel tapno dumakkel daytoy iti maysa a dakkel a kayo, kas koma iti danum, daga, ken init. Tulongam ida a mangkita a dagitoy ket kapada dagiti banag nga aramidentayo tapno umas-asidegtayo iti Dios iti unos ti panagbiagtayo—panangpatibker iti pammatitayo ken ni Jesucristo, panagbabawi iti tunggal aldaw, panagtungpal kadagiti katulagan iti panagbuniagtayo, ken panangdengngeg iti Espiritu Santo.

• Ibinglay kadagiti ubbing ti estoria maipapan iti paputok [firecracker] manipud iti mensahe ni Elder Dale G. Renlund “How Can Repenting Help Me Feel Happy?” (Friend, Dis. 2017, 12–13, wenno Liahona, Dis. 2017, 70–71; kitaen met iti video a “Repentance: A Joyful Choice” [Gospel Library]).

  Iti nadumaduma a punto bayat ti estoria, awisem dagiti ubbing a mangpanunot maipapan iti mabalin a narikna koma ni Elder Renlund. Apay a maragsakantayo no agbabawitayo? Iburay kadagiti ubbing ti ragsak ken ayat a nariknam idi dinawatmo a pakawanennaka ti Nailangitan nga Ama.

Panagbuniag

Impakita ni Jesucristo ti pagwadan kaniak idi nabuniagan Isuna.

Nupay awan ti basol ni Jesus, nabuniagan Isuna tapno mangipakita iti naan-anay a pagwadan ti panagtungpal iti Nailangitan nga Ama (kitaen iti 2 Nephi 31:6–10).

Tapno masursuro ti ad-adu pay maipapan iti panagbuniag, kitaen iti Doktrina ken Katulagan 20:37; Gospel Topics, “Baptism” Gospel Library.

Dagiti Mabalin nga Aktibidad

• Ipakitam ti maysa a ladawan ti panagbuniag ti Mangisalakan ken ti panagbuniag ti sabali pay a tao (wenno kitaen iti Libro ti Arte ti Ebanghelio, num. 35 wenno num. 103 wenno num. 104). Kiddawem kadagiti ubbing a mangibinglay iti no ania ti pagdumaan ken no ania ti pagpadaan dagiti dua a ladawan. Aggigiddan a basaen ti Mateo 3:13–17 wenno “Kapitulo 10: Nabuniagan ni Jesus” iti Dagiti Estoria iti Baro a Tulag, 26–29, wenno buyaen ti katupagna a video iti Gospel Library.

  Awisem dagiti ubbing a mangitudo kadagiti banag iti ladawan a nadakamat iti panagbasa wenno iti video. Ibagam kadagiti ubbing maipapan iti panagayatmo iti Mangisalakan ken ti targigagaymo a mangsurot Kenkuana.

• Dumngeg wenno agkansion iti maysa a kanta maipapan iti panagbuniag, kas iti “When Jesus Christ Was Baptized” (Children’s Songbook, 102). Ania ti masursurotayo maipapan iti panagbuniag manipud iti daytoy a kanta? Basaen ti 2 Nephi 31:9–10, ket awisen dagiti ubbing a dumngeg no apay a nabuniagan ni Jesucristo. Awisem dagiti ubbing a mangidrowing iti ladawan ti bagbagida iti aldaw ti panagbuniagda.

Mapilik ti agaramid iti katulagan iti Dios ken mabuniagan.

Ti panagsagana iti panagbuniag ket napatpateg ngem iti panagsagana para iti maysa a pasken. Kayatna a sawen daytoy ti panagsagana nga agaramid iti katulagan ket kalpasanna panagtungpal iti dayta a katulagan iti tungpal biag. Utobem no kasano a matulongam dagiti ubbing a makaawat iti katulagan nga aramidendanto iti Nailangitan nga Ama no mabuniaganda, a mairaman dagiti kari nga aramidenna kadakuada ken dagiti kari nga aramidenda Kenkuana.

Dagiti Mabalin nga Aktibidad

• Ilawlawag a ti katulagan ket maysa a kari iti nagbaetan ti maysa a tao ken ti Nailangitan nga Ama. Bayat nga ikagkagumaantayo a tungpalen dagiti karitayo iti Dios, ikari ti Dios a bendisionannatayo. Isurat iti pisarra Dagiti Karik iti Dios ken Dagiti Kari ti Dios Kaniak. Aggigiddan a basaen ti Mosiah 18:10, 13 ken Doktrina ken Katulagan 20:37, ket tulongam dagiti ubbing a mangilista kadagiti karida iti babaen dagiti maitutop a paulo (kitaen met iti Dallin H. Oaks, “Your Baptism Covenant,” Friend, Peb. 2021, 2–3). Iburaymo no kasano a pinaraburannaka ti Nailangitan nga Ama bayat ti panagkagumaam nga agtungpal kadagiti katulagam iti panagbuniag.

• Ipakitam kadagiti ubbing dagiti ladawan ti bambanag nga inaramid ni Jesucristo idi adda ditoy daga (para iti sumagmamano a pagarigan, kitaen iti Libro ti Arte ti Ebanghelio, dagiti num. 33–49). Bay-am dagiti ubbing nga agasaritada no ania ti ar-aramiden ni Jesus iti tunggal ladawan. Basaen ti Mosiah 18:8–10, 13, ken awisem dagiti ubbing a dumngeg kadagiti banag nga inkarida nga aramiden no mabuniaganda (kitaen met iti “The Baptism Covenant,” Friend, Peb. 2019, 7; Liahona, Peb. 2019, F3). Kasano nga impluensiaanto dagitoy a kari dagiti tignaytayo iti inaldaw? Awisem dagiti ubbing a mangidrowing iti ladawan ti bagbagida a mangtultulong iti maysa a tao a kas iti wagas a panangtulong ni Jesus. Wenno mabalin a yaramidam dagiti ubbing iti simple a badge nga usarenda a naikabil ti nagan ti Mangisalakan iti daytoy.

  ubing a lalaki a mabumbuniagan

  Ilawlawag a no mabuniagantayo, agaramidtayo kadagiti kari iti Dios ken agaramid Isuna kadagiti karina kadatayo.

Kumpirmasion

No makumpirmaanak, agbalinak a maysa a miembro ti Ti Simbaan ni Jesucristo dagiti Santo iti Ud-udina nga Aldaw.

Ti panagbalin a miembro ti Ti Simbaan ni Jesucristo dagiti Santo iti Ud-udina nga Aldaw ket mangyeg iti adu a bendision, karaman dagiti gundaway para kadagiti ubbing tapno agbalin nga aktibo a makiramraman iti aramid ti Dios.

Tapno masursuro ti ad-adu pay maipapan iti kumpirmasion ken ti sagut ti Espiritu Santo, kitaen iti Gary E. Stevenson, “How Does the Holy Ghost Help You?,” Liahona, Mayo 2017, 117–20; Gospel Topics, “Holy Ghost,” Gospel Library.

Dagiti Mabalin nga Aktibidad

• Awisem nga umay iti klase ti maysa a tao a nabiit pay a nabuniagan ken nakumpirmaan tapno mangiburay no ania ti rikna ti makumpirmaan. Ania ti kayatna a sawen iti daytoy a tao ti agbalin a maysa a miembro ti Ti Simbaan ni Jesucristo dagiti Santo iti Ud-udina nga Aldaw? Tulongam dagiti ubbing nga agpanunot kadagiti wagas a pakatungpalanda kadagiti katulaganda iti panagbuniag kas miembro ti Simbaan (kas iti panagserbi iti dadduma, panangawis iti dadduma nga agadal iti ad-adu pay maipapan ken ni Jesus, panagkararag kadagiti miting, ken dadduma pay). Iburaymo no kasano a nakatulong kenka ti panangaramidmo kadagitoy a banag a nakarikna iti rag-o ti panagbalin a maysa a miembro ti Simbaan ni Cristo.

• Ipakitam ti ladawan dagiti tao iti Dandanum ti Mormon (kitaen iti Libro ti Arte ti Ebanghelio, num. 76), ket awisem dagiti ubbing a mangiladawan no ania ti makitada iti ladawan. Isaritam ti estoria ni Alma ken dagiti taona a mabumbuniagan idiay Mosiah 18:1–17; “Kapitulo 15: Mangisuro ken Mamuniag ni Alma,” Dagiti Estoria iti Libro ni Mormon, 43–44, wenno ti katupagna a video iti Gospel Library).

  Irebyu ti Mosiah 18:8–9 ket kiddawem kadagiti ubbing nga agaramid kadagiti tignay a mangtulong kadakuada a manglagip kadagiti banag a sitatallugod nga aramiden dagiti tao kas miembro ti Simbaan ni Cristo. Mangiburayka iti maysa a padas idi nasaksiam dagiti miembro ti Simbaan nga agserserbi kadagitoy a wagas.

No makumpirmaanak, awatek ti sagut ti Espiritu Santo.

No mabuniagan ken makumpirmaantayo, ikari ti Nailangitan nga Ama a “kanayon nga agtaeng [kadatayo] ti Espirituna’ [Doktrina ken Katulagan 20:77). Maawagan daytoy a nakaskasdaaw a sagut ti Dios iti sagut ti Espiritu Santo.

Dagiti Mabalin nga Aktibidad

• Basaen ti Doktrina ken Katulagan 33:15, ket kiddawem kadagiti ubbing a dumngeg iti naisangsangayan a sagut nga ited ti Nailangitan nga Ama kadatayo no mabuniagan ken makumpirmaantayo. Tapno matulongam ida a makasursuro iti ad-adu pay maipapan iti no kasano a makatulongto kadakuada ti sagut ti Espiritu Santo, aggigiddan a mangrebyu iti Juan 14:26; Taga Galacia 5:22–23; 2 Nephi 32:5; 3 Nephi 27:20. Mabalinmo pay nga irebyu ti artikulo a “The Holy Ghost Is …” (Friend, Hunio 2019, 24–25; Liahona, Hunio 2019, F12–F13).

• Sakbay ti klase, awisem dagiti nagannak ti maysa wenno ad-adu pay kadagiti ubbing tapno mangiburay no kasano a nabendisionanda gapu ta adda kadakuada ti sagut ti Espiritu Santo. Kasano a tulonganna ida? Kasano a mangngeganda ti timekna?

• Aggigiddan nga agkansion iti maysa a kanta maipapan iti Espiritu Santo, kas iti “The Holy Ghost” (Children’s Songbook, 105). Tulongam dagiti ubbing a makaawat no ania ti isuro ti kanta maipapan no kasano a matulongannatayo ti Espiritu Santo.

Makasaritanak ti Espiritu Santo iti adu a wagas.

Maisagananto dagiti ubbing a makailasin iti timek ti Espiritu tapno umawat iti bukod a paltiing a mangtarabay kadakuada iti unos ti panagbiagda. Isurom kadakuada nga adu dagiti wagas a mabalin a makisarita ti Espiritu Santo kadatayo.

Dagiti Mabalin nga Aktibidad

• Tulongam dagiti ubbing nga agpanunot kadagiti nadumaduma a wagas a mabalin a makasaritatayo ti maysa a gayyem nga agnanaed iti adayo a lugar, kas iti panangsurat, panangipatulod iti email, wenno pannakisarita iti telepono. Isurom kadakuada a mabalin a makisao kadatayo ti Nailangitan nga Ama babaen ti Espiritu Santo. Usarem ti mensahe ni Presidente Dallin H. Oaks “How Does Heavenly Father Speak to Us?” tapno matulongam dagiti ubbing a makaawat iti nadumaduma a wagas a makasaritanatayo ti Espiritu Santo kadagiti panunot ken pusotayo (Friend, Mar. 2020, 2–3; Liahona, Mar. 2020, F2–F3).

• Mangiburay iti maysa a padas no kaano a nakikomunikar kenka ti Espiritu Santo, mabalin a babaen kadagiti ideya a simmangbay iti panunotmo wenno babaen iti maysa a nariknam iti pusom (kitaen iti Doktrina ken Katulagan 6:22–23; 8:2–3; kitaen met iti Henry B. Eyring, “Open Your Heart to the Holy Ghost,” Friend, Ago. 2019, 2–3; Liahona, Ago. 2019, F2–F3). Paneknekam kadagiti ubbing a matulongan ti Espiritu Santo ida iti kasta met la a wagwagas.

• Tulongam dagiti ubbing nga agpanunot kadagiti panawen a mabalin a nariknada ti Espiritu—kas pagarigan, no agkankansion iti kanta maipapan iti Mangisalakan wenno no agar-aramid iti maysa a nasayaat a banag para iti dadduma. Tulongam ida a mangilasin kadagiti naespirituan a rikna nga isangbay ti Espiritu Santo. Apay iti panagkunam nga ited ti Espiritu Santo kadatayo dagita a rikna? Tulongam dagiti ubbing nga agpanunot kadagiti banag a masapul nga aramidentayo tapno mangngegantayo ti Espiritu Santo a makisarita kadatayo. Isaritam no ania ti ar-aramidem tapno mangngegmo a nalawlawag ti Espiritu.

Ti Sakramento

No makiranudak iti sakramento, malagipko ti sakripisio ti Mangisalakan ken mapabaro dagiti katulagak.

Inted ti Mangisalakan ti sakramento kadatayo a mangtulong kadatayo a manglagip iti panagsakripisiona para kadatayo ken mangpabaro kadagiti katulagantayo. Gapu iti daytoy linawas nga ordinansa, maitultuloytayo a masagrap dagiti bendision ti panagbuniagtayo iti unos ti panagbiagtayo.

Tapno masursuro ti ad-adu pay, kitaen iti Mateo 26:26–30; 3 Nephi 18:1–12; Doktrina ken Katulagan 20:77, 79.

Dagiti Mabalin nga Aktibidad

• Awisem dagiti ubbing a mangkolor iti “Jesus Introduced the Sacrament to the Nephites” iti Scripture Stories Coloring Book: Book of Mormon (2019), 26. Awisem ida a mangitudo no ania iti pampanunoten dagiti tao iti ladawan. Ibasam kadagiti ubbing dagiti paset iti 3 Nephi 18:1–12 wenno “Kapitulo 45: Isuro ni Jesucristo maipapan iti Sakramento ken Kararag,” Dagiti Estoria iti Libro ni Mormon, 126–27, wenno buyaen ti katupagna a video iti ChurchofJesusChrist.org. Ania ti maaramidtayo a panglaglagip ken ni Jesucristo kabayatan ti sakramento?

• Kiddawem dagiti ubbing a mangibaga kenka iti sumagmamano a banag a nasken a laglagipenda nga aramiden, kas iti panangikurdon ti sapatosda wenno panangbuggo kadagiti imada sakbay a manganda. Apay a napateg a laglagipentayo dagitoy a banag? Ibasam ti Moroni 4:3 kadagiti ubbing, ken kiddawem kadakuada a dumngeg iti no ania ti ikaritayo a kanayon a laglagipen no umawattayo iti sakramento. Apay a napateg a laglagipentayo ni Jesucristo? Tulongam dagiti ubbing a makaawat no kasano a matulongannatayo ti tinapay ken danum ti sakramento a manglaglagip no ania ti inaramid ni Jesus para kadatayo (kitaen iti Moroni 4:3; 5:2).

• Isurat iti pisarra ti “Ikarik a …” Ibasam kadagiti ubbing dagiti kararag iti sakramento (kitaen iti Doktrina ken Katulagan 20:77, 79). No mangngeganda ti maysa a kari nga aramidentayo iti Dios, agsardengka ket tulongam ida a mangileppas ti binatog iti pisarra iti kari a nangngeganda. Tulongam ida a makaawat a no umawattayo iti sakramento, ar-aramidentayo dagiti isu met la a kari nga inaramidtayo iti panagbuniag.

• Ania ti kayatna a sawen ti panangawat iti bagitayo ti nagan ni Jesucristo? Tapno matulongam a sungbatan dagiti ubbing daytoy a saludsod, mangiburay iti pagarigan ti maysa a banag a pangikabilantayo kadagiti nagantayo. Apay nga ikabiltayo dagiti nagantayo kadagitoy a banag? Apay a kayat ni Jesucristo nga ikabilna ti naganna kadatayo? Ibilang ti panangibinglay iti daytoy a palawag manipud ken ni Presidente Russell M. Nelson: “Ti panangawattayo iti nagan ti Mangisalakan ket iramanna ti panangipakdaar ken panangipaneknek iti dadduma—babaen kadagiti aramid ken balikastayo—a ni Jesus ti Cristo” (“The Correct Name of the Church,” Liahona, Nob. 2018, 88).

Ti Bileg, Turay, ken dagiti Tulbek ti Priesthood

Bendisionan ti Dios dagiti annakna babaen iti bileg ti priesthood.

Amin nga annak ti Dios—babai ken lalaki, ubing ken nataengan—umawat iti bileg ti Dios bayat ti panagtungpalda kadagiti katulagan nga inaramidda Kenkuana. Aramidentayo dagitoy a katulagan no umawattayo kadagiti ordinansa ti priesthood kas iti panagbuniag (kitaen iti General Handbook: Serving in The Church of Jesus Christ of Latter-day Saints, 3.5, Gospel Library). Tapno masursuro ti ad-adu pay, kitaen iti Russell M. Nelson, “Spiritual Treasures,” Liahona, Nob. 2019, 76–79; “Priesthood Principles,” kapitulo 3 iti General Handbook.

Dagiti Mabalin nga Aktibidad

• Tulongam dagiti ubbing a mangilasin kadagiti bendision a maawatda gapu iti priesthood. Tapno maikkan ida iti sumagmamano a kapanunotan, mabalinmo nga ipabuya ti video a “Blessings of the Priesthood” (Gospel Library).

• Ibilangmo ti panangisurat kadagitoy a bendision iti pisarra. Apay a napateg kadatayo dagitoy a bendision? Paneknekam a sumangbay dagitoy a bendision kadatayo gapu ken ni Jesucristo ken ti bileg ti priesthoodna.

• Isurat dagiti sumaganad a paulo iti pisarra: bileg ti Dios ken bileg ken turay ti Dios a naited kadagiti lallaki iti daga. Kiddawem kadagiti ubbing a mangikabil kadagiti ladawan iti babaen ti umuna a paulo a tumulong kadatayo a makaawat no kasano nga inusar ti Dios ti bilegna a mangbendision kadatayo, kas iti panangparsuana ti lubong, panangtarabay ken panangiturongna kadatayo, mangipakpakita nga ay-ayaten ken am-ammonatayo, ken dumdumngeg ken mangsungsungbat kadagiti kararagtayo (kitaen iti Libro ti Arte ti Ebanghelio, dagiti num. 3, 68, 90, 111). Kiddawem kadakuada a mangikabil kadagiti ladawan iti babaen ti maikadua a paulo a mangtulong kadatayo a makaawat no kasano nga usaren dagiti nalinteg a lallaki iti daga ti bileg ken turay ti Dios a mangbendision kadatayo, kas iti panangbendision iti masakit, panagbuniag, panagkumpisar, panangannong iti sakramento, ken panangilantip kadagiti pamilia (kitaen iti Libro ti Arte ti Ebanghelio, dagiti num. 46, 104, 105, 107, 120). Ibinglay no apay nga agyamyamanka iti priesthood ken dagiti bendision nga isangbayna.

• Maysa kadagiti kangrunaan a wagas a pangawatantayo kadagiti bendision ti bileg ti Dios iti panagbiagtayo ket babaen kadagiti ordinansa ti priesthood (kitaen iti Doktrina ken Katulagan 84:20). Tapno matulongam dagiti ubbing a mangsursuro iti daytoy a kinapudno, mabalinmo nga ilista dagiti sumaganad a nasantuan a kasuratan iti pisarra: 3 Nephi 11:21–26, 33 (panagbuniag); Moroni 2 (kumpirmasion); Moroni 4–5 (sakramento). Mabalin dagiti ubbing a saggaysa a pumili iti maysa kadagitoy a binatog ket mangilasin iti ordinansa nga iladawan daytoy. Awisem dagiti ubbing a mangibinglay no kasano a nabendisionanda mismo babaen iti panangawatda kadagiti ordinansa ti priesthood.

• Tulongam dagiti ubbing a makaawat nga awatendanto ti bileg manipud iti Dios bayat iti panagbuniag ken panagtungpalda iti katulagan iti panagbuniag. Saludsodem kadagiti ubbing no kasano a makatulong daytoy a bileg kadakuada.

Maiturong ti aramid ti Dios babaen kadagiti tulbek ti priesthood ken maipatungpal babaen iti turay ti priesthood.

Maordenan dagiti maikari a lallaki ti Simbaan iti maysa a saad [office] iti priesthood. Mainayon pay, no mai-set apart para iti maysa a takem [calling] wenno matudingan a tumulong iti aramid ti Dios, maaramatna ti naitalek a turay ti priesthood kenkuana. Ti pannakausar ti amin a turay ti priesthood iti Simbaan ket iturong dagiti indibidual nga agiggem kadagiti tulbek ti priesthood, kas iti stake president, ti bishop, ken dagiti presidente dagiti korum. Dagiti tulbek ti priesthood ti turay a mangiturong iti pannakausar ti priesthood iti panangaramid iti trabaho ti Apo.

Dagiti Mabalin nga Aktibidad

• Kaduam dagiti ubbing a mangbasa iti Marcos 3:14–15, ket ipakitam kadakuada ti ladawan ti maysa a pasamak a nailadawan idiay (kas iti Libro ti Arte ti Ebanghelio, num. 38). Saludsodem kadagiti ubbing no adda nakitadan a maysa a tao a maordenan iti maysa a saad [office] ti priesthood wenno mai-set apart iti maysa a takem [calling] (wenno isaritam kadakuada ti maipapan kadagiti padas a napasaramon). Kasano a mayarig dayta iti no ania ti inaramid ti Mangisalakan kadagiti Apostolna? Tulongam dagiti ubbing a mangilista iti pisarra dagiti saad [office] ti priesthood wenno takem [calling] a maited kadagiti miembro iti Simbaan, kas iti mannursuro wenno lider iti maysa nga organisasion. Iti abay ti tunggal saad wenno takem, mabalinmo nga isurat no ania ti aramiden ti maysa a tao iti dayta a saad wenno takem. Isaritam kadagiti ubbing no kasano a nakatulong kenka iti panagserbim ti pannaka-set apart ti maysa a tao babaen ti panangiturong dagiti tulbek ti priesthood.

• Awisem dagiti ubbing a mangpanunot iti maysa a banag a kasapulanyo ti tulbek iti daytoy, kas iti maysa a kotse wenno maysa a ridaw. Ania ti mapasamak no awan kenka ti tulbek? Aggigidddan a basaenyo ti Doktrina ken Katulagan 65:2, ken ibinglaymo ti pammaneknekmo maipapan iti kinapateg ti kaadda dagiti tulbek ti priesthood iti daga. Mabalinyo pay a buyaen ti video a “Where Are the Keys?” (Gospel Library) ket kitaen no ania ti isuro ni Elder Stevenson maipanggep kadagiti tulbek ti priesthood.

• Kiddawem iti maysa a tao iti ward nga agiggem kadagiti tulbek tapno umay iti klase ket ibinglayna kadagiti ubbing no ania ti kaipapanan ti agiggem kadagiti tulbek ti priesthood. Pailadawanmo kenkuana dagiti responsibilidad wenno pagrebbenganna. Ania dagiti paset ti aramid ti Apo nga idauluanna? Kasano a tulongan ti Mangisalakan isuna?

Ti Templo ken ti Plano ti Kinaragsak

Ti templo ket ti balay ti Apo.

Dagiti templo ket paset ti plano ti Nailangitan nga Ama para kadagiti annakna. Kadagiti templo, agaramidtayo kadagiti sagrado a katulagan Kenkuana, maisagutan iti bileg ti priesthood, umawat iti paltiing, mangannong kadagiti ordinansa para kadagiti pimmusayen a kapuonantayo, ken mailantip a sangkamaysa iti pamiliatayo para iti kinaagnanayon. Maaramid amin daytoy gapu ken ni Jesucristo ken ti pangsubbot a sakripisiona.

Kasano a matulongam dagiti ubbing a sursuruam a mangbigbig iti kinasagrado ti balay ti Apo ken maisagana dagiti bagbagida nga agbalin a maikari a makiraman kadagiti ordinansa iti templo? Ibilang ti panangrebyu kadagitoy a resources: Doktrina ken Katulagan 97:15–17; Russell M. Nelson, “Closing Remarks,” Liahona, Nob. 2019, 120–22; “Why Latter-day Saints Build Temples,” temples.ChurchofJesusChrist.org.

agtutubo iti ruar ti templo

Dagiti templo ket paset ti plano ti Nailangitan nga Ama para kadagiti annakna.

Dagiti Mabalin nga Aktibidad

• Ipakita ti maysa wenno ad-adu pay a ladawan dagiti templo. Saludsodem kadagiti ubbing no ania ti mamagbalin iti templo a maysa a naisangsangayan a lugar. Ilawlawag nga iti tunggal templo naisurat ti: “Kinasantuan iti Apo: Ti Balay ti Apo.” Damagem kadagiti ubbing no ania ti mabalin a kaipapanan ti “Kinasantuan iti Apo”. Apay a maawagan ti templo a balay ti Apo? Ania ti isuro daytoy kadatayo maipapan iti templo? No adda nakapanen iti templo kadagiti ubbing, mabalinda met nga iburay no ania ti nariknada idi addada idiay. No nakapankan iti templo, iburaymo no kasano ti nariknam iti kaadda ti Apo idiay, ken isaritam no apay a sagrado a lugar ti templo kenka.

• Aggigiddan a basaen ti Doktrina ken Katulagan 97:15–17. Idawatmo kadagiti ubbing a mangsapul no ania ti namnamaen ti Apo kadagiti sumrek iti nasantuan a balayna. Apay a kasapulan a maikaritayo a sumrek iti balayna? Kas paset daytoy a panagsasarita, ibagam kadagiti ubbing maipapan iti rekomenda iti templo, agraman no kasano a magun-od daytoy. Mabalinmo nga awisen ti maysa a miembro iti bishopric a mangibinglay kadakuada no ania ti interbyu para iti rekomenda iti templo ken dagiti saludsod a madamag iti maysa a tao.

Iti templo, agaramidtayo kadagiti katulagan iti Dios.

Insuro ni Presidente Russell M. Nelson, “Awisennatayo ni Jesucristo a magna iti dana ti katulagan nga agsubli iti pagtaengan kadagiti Nailangitan a Nagannaktayo ken makadenna dagiti ay-ayatentayo” (“Come, Follow Me,” Liahona, Mayo 2019, 91). Tulongam dagiti ubbing a makaawat a ti dana ti katulagan iramanna ti panagbuniag, kumpirmasion, ken ti endowment ken pannakailantip iti templo.

Dagiti Mabalin nga Aktibidad

• Kiddawem kadagiti ubbing a tulongandaka a mangrebyu ti katulagan nga aramidentayo iti Dios no mabuniagantayo ken pabaruentayo no makiranudtayo iti sakramento (kitaen iti Mosiah 18:10; Doktrina ken Katulagan 20:77, 79). Ipakita ti maysa a ladawan ti templo ket ilawlawag nga ad-adu pay ti bendision a kayat nga ited ti Nailangitan nga Ama kadatayo iti templo.

• Mangidrowing iti maysa a ruangan nga agturong iti maysa a dana. Saludsodem kadagiti ubbing no apay iti panagkunada a makatulong nga adda maysa a dana a pagnaan. Aggigiddan a basaen ti 2 Nephi 31:17–20, a nangidasigan ni Nephi ti katulagan ti panagbuniag iti maysa a ruangan ket awisennatayo nga agtultuloy iti dana kalpasan ti panagbuniag. Ad-adu pay dagiti katulagan nga aramiden kalpasan ti panagbuniag, agraman dagiti katulagan a maaramid iti templo. Ilawlawag nga inawagan ni Presidente Nelson daytoy a dana iti “dana ti katulagan.”

Iti templo, mabalintayo ti mabuniagan ken makumpirmaan para kadagiti kapuonan a pimmusayen.

Inaramid ti ebanghelio ni Jesucristo a makapagsubli ti amin a makipagnaed Kenkuana, uray no pumusayda nga awan ti pannakaammoda iti ebanghelio. Iti templo, mabalintayo a mabuniagan ken makumpirmaan kas miembro ti Simbaan ni Jesucristo nga agpaay kadakuada.

Dagiti Mabalin nga Aktibidad

• Isaritam maipapan iti maysa a panawen nga adda inaramid ti maysa a tao para kenka a dimo naaramid para iti bagim. Awisem dagiti ubbing a mangibinglay kadagiti kasta met laeng a padas. Ilawlawagmo a no mapantayo iti templo, maawattayo dagiti sagrado nga ordinansa kas iti panagbuniag para iti dadduma a pimmusayen. Kasano nga agbalintayo a kas ken ni Jesus no ar-aramidentayo dagiti trabaho para kadagiti pimmusayen? Ania ti inaramidna para kadatayo a ditayo maaramid para iti bagbagitayo?

• Awisem ti maysa wenno ad-adu pay nga agtutubo a nabuniaganen para kadagiti kapuonanda tapno mangibinglay iti padasda. Saludsodem kadakuada no ania ti rikna ti adda iti templo. Allukoyem ida a mangibinglay no ania ti nariknada bayat ti panangaramidda iti daytoy a trabaho para kadagiti kapuonanda.

• Mangidrowing iti maysa a kayo iti pisarra, nga adda dagiti ramut ken sangana. Awisem dagiti ubbing a mangpanunot no kasano a mayarig ti maysa a pamilia iti maysa a kayo. Imarkam dagiti ramut a Kapuonan, imarkam dagiti sanga nga An-annabo, ken imarkam ti puon ti kayo a Sika. Aggigiddan a basaen daytoy a binatog manipud iti Doktrina ken Katulagan 128:18: “Ta datayo no awanda [dagiti kapuonantayo] saantayo nga agbalin a naan-anay; wenno isuda no awantayo saanda nga agbalin a naan-anay.” Agsaludsod kas iti sumaganad: “Apay a kasapulantayo dagiti kapuonantayo? Apay a kasapulandatayo dagiti an-anabotayo? Kasano a natulongandatayo dagiti nagannak, dagiti lelong ken lelang, ken dadduma pay a kapuonantayo?” Awisem dagiti ubbing a mangsukisok iti nabati pay a paset ti Doktrina ken Katulagan 128:18 para iti ragup ti balikas a mangiladawan no kasano a matulongantayo dagiti kapuonantayo.

• Ibilang ti pannakitinnulong kadagiti nagannak ti tunggal ubing a mangsapul iti nagan ti maysa a kapuonanda nga itugot ti ubing iti templo (kitaen iti FamilySearch.org).